မွၵ်ႇလူင်ႇလဵဝ်/တွၼ်ႈသၢဝ်း

ဝၢႆးသေ ဢိုၼ်းႁူင်းႁဵၼ်းယဝ်ႉ ၶဝ်ၽၢတ်ႇယၢၼ်ၵၼ်သေ ၸၢႆးမွၼ်းၶိူဝ်းၵေႃႈ ပွၵ်ႈမိူဝ်းလွႆလႅမ် ၸၢႆးၶမ်းၵေႃႈ ပွၵ်ႈမိူဝ်းၵုုၼ်ႁဵင်းယဝ်ႉ၊ ၸၢႆးမွၼ်းၶိူဝ်းၽႅဝ်မႃးလွႆလႅမ်သေတႃႉ မၼ်းပဵၼ်ဢၼ်ၶုၵ်းၸႂ်လႆႈ ၶႆႈၸႂ်ထိုင်ၼၢင်းမူဝ်ၶၢဝ် ၵူႈၶမ်ႈဝၼ်းၼႂ်ယဝ်ႉ၊ ၵွပ်ႈၼႆမၼ်း ၸင်ႇတႅမ်ႈလိၵ်ႈသေ သႂ်ႇမႃးၸူး တီႈၼၢင်းမူဝ်ၶၢဝ်ယဝ်ႉ။

လိၵ်ႈဢၼ်မၼ်းပၼ်မႃးၼၼ်ႉ ၼၢင်းမူဝ်ၶၢဝ်ႁပ်ႉလႆႈသေ မၼ်းၼၢင်း မႃးၽုၺ်ႇတူၺ်း ၼႂ်းသူၼ်မွၵ်ႇၶဝ်ၼၼ်ႉယူႇ ယွၼ်ႉပိူဝ်ႈ လႆႈႁူႉဝႃႈ ပဵၼ်လိၵ်ႈၸၢႆးမွၼ်းၶိူဝ်းလႄႈ ၼၢင်းမူဝ်ၶၢဝ် ပဵၼ်ဢၼ်ၸူမ်းသိူဝ်းတႄႉတႄႉသေ ၼႃႈတၢင်းယုမ်ႉဢွၼ်ႇမၼ်းၼၢင်းၵေႃႈ ၵီႈႁၢင်ႈလီ မိူၼ်မွၵ်ႇၼႂ်းသူၼ်ၶဝ် ဢၼ်ၵီႈဝႆႉၼၼ်ႉယူႇ။ မၼ်းၼၢင်း မႃးဢိင်ၼိူဝ်တင်ႇ ၼႂ်းသူၼ်ၶဝ် တီႈၼိုင်ႈသေ ၽုၺ်ႇလူတူၺ်း လိၵ်ႈၸၢႆးၶိူဝ်းၼၼ်ႉယဝ်ႉ၊ လႆႈႁၼ်တူဝ်လိၵ်ႈႁၢင်ႈလီ ၸၢႆးၶိူဝ်းသေ ၼႂ်းလိၵ်ႈၼၼ်ႉ မၼ်းၸၢႆး ဢဝ်ၵိင်ႇမွၵ်ႇၵွၼ်ႁႅင်ႈၵိင်ႇဢွၼ်ႇၼိုင်ႈ သႂ်ႇမႃးၸွမ်းယဝ်ႉ။

ၼၢင်းမူဝ်ၶၢဝ် မႄးယိပ်းဢဝ်ၵိင်ႇမွၵ်ႇၵွၼ်သေ ၼူမ်သုတ်ႇ ဢၼ်ၸၢႆးမွၼ်းၶိူဝ်း တႅမ်ႈမႃးၼၼ်ႉယဝ်ႉ၊ ၽွင်းမၼ်းၼၢင်း တိုၵ်ႉတႄႇလူလိၵ်ႈၼၼ်ႉ ၼၢင်းၸၢမ်သႅင်း မႃးဢႅဝ်ႇမၼ်းၼၢင်းသေ မႃးလၵ်ႉလွမ်တူၺ်း လိၵ်ႈႁူမ်ႈမၼ်း မီးယူႇဝႆႉၽၢႆႇလင်မၼ်းၼၢင်းၼႆ မၼ်းၼၢင်းဢမ်ႇႁူႉထိုင် မၼ်းသိုပ်ႇလူတူၺ်း လိၵ်ႈဢၼ်ၸၢႆးမွၼ်းၶိူဝ်းၼၼ်ႉယူႇ။

ယိုၼ်ႈႁွတ်ႈပၼ်ထိုင်

ပွင်ၶိုင်တႅမ်ႈပၼ်

ၵေႃႉဢၼ်ၸိုဝ်ႈဝႃႈ “မူဝ်”

ၽွင်းမိူဝ်းပႆႇလူလိၵ်ႈၼႆႉ မူဝ်တေၺႃးႁၼ် မွၵ်ႇၵွၼ်ႁႅင်ႈဢွၼ်ႇ ၵိင်ႇၼိုင်ႈဢွၼ်တၢင်းယဝ်ႉ၊ မွၵ်ႇဢၼ်ၼႆႉတႄႉ ဢဝ်သၽေႃးဢၼ်ၸိုဝ်ႈဝႃႈ‘မွၵ်ႇ’ၼႆၼၼ်ႉသေ မႃးမွၵ်ႇပၼ်မူဝ်ယူႇ။

ဢွၼ်တၢင်းၼႆႉ ယၢမ်းႁွင်ႉဝႃႈ“မူဝ်ၶၢဝ်”ၼႆသေတႃႉ ယၢမ်းလဵဝ်ၼႆႉ ႁႂ်ႈလႆႈႁွင်ႉဝႃႈ“မူဝ်”ၼႆသေၵမ်း။ ဝၢႆးသေၽၢတ်ႇယၢၼ်ၵၼ် ၵေႃႉတီႈတီႈၼႆ ၼႂ်းၸႂ်ပီႈၸၢႆးၶိူဝ်း ပဵၼ်ဢၼ်ၶုၵ်းၸႂ်လႆႈမူဝ်လႄႈ ၸၢမ်သႅင်းတႄႉတႄႉ၊ ဢၼ်ၶုၵ်းၸႂ်လႆႈၶႆႈၸႂ်ထိုင် မူဝ်ၼၼ်ႉ ပဵၼ်ဢၼ်ယႂ်ႇတွၼ်းလိူဝ်သေပိူၼ်ႈယဝ်ႉ မူဝ် ... ယုမ်ႇလႄႈ။

လွင်ႈဢၼ်တေႇႁၼ်ၵၼ် တီႈသႅင်ႇၶဝ်ႈသွႆး လွင်ႈဢၼ် ၶိုၼ်းၵႂႃႇထူပ်းၵၼ်သေ ၵႂႃႇဢႅဝ်ၼႂ်းၼွင် လွင်ႈဢၼ်လႆႈၶိုၼ်ႈႁဵၼ်း ၸွမ်းၵၼ်မႃးၸိူဝ်းၼၼ်ႉ ပီႈၸၢႆးၶိူဝ်း ၶိုၼ်းၶုၵ်းၸႂ်လႆႈ ၶႆႈၸႂ်ထိုင် ယူႇတႃႇသေႇဢိူဝ်ႈ မူဝ်တႄႉ ယူဝ်ၶႄးလိုမ်းယဝ်ႉယူဝ်ႉၼေႃ။ ပီႈၸၢႆးၶိူဝ်းတႄႉဢမ်ႇလိုမ်း တေတွင်းၵိုမ်းဝႆႉ တေႃႇၸူဝ်ႈယူႇၼႆယုမ်ႇလႃႈ။

ဢေႃႈ ... မူဝ် ... ၽွင်းမိူဝ်ႈ ႁဝ်းလႆႈၶိုၼ်ႈႁဵၼ်းၸွမ်းၵၼ်ယူႇၼၼ်ႉ ၶေႃႈၵႂၢမ်းဢွၼ်ႇ ဢၼ်မီးဝႆႉၼႂ်းၸႂ် ပီႈၸၢႆးၶိူဝ်းၼၼ်ႉ ပီႈၸၢႆးၶိူဝ်းၶႂ်ႈလၢတ်ႈထိုင် ႁႂ်ႈမူဝ်ႁူႉငိၼ်းၼႆသေတႃႉ ပီႈၸၢႆးၶိူဝ်း ဢမ်ႇပဵၼ်လၢတ်ႈ ဢမ်ႇႁတ်းလၢတ်ႈ ဢမ်ႇလႆႈလၢတ်ႈမႃး ၵွပ်ႈၼႆ ယၢမ်းလဵဝ် ပီႈၸၢႆးၶိူဝ်း ၸင်ႇၸႂ်ႉႁႂ်ႈမွၵ်ႇဢွၼ်ႇ ဢၼ်သႂ်ႇမႃးၼႂ်းၼႆႉ တၢင်တူဝ်ပီႈၸၢႆးၶိူဝ်းသေ မွၵ်ႇလၢတ်ႈထိုင်မူဝ် လွင်ႈဢၼ်ပီႈၸၢႆးၶိူဝ်း ႁၵ်ႉမူဝ်ၼၼ်ႉယဝ်ႉ ၵွပ်ႈၼႆ ပီႈၸၢႆးၶိူဝ်း ၸင်ႇတႅမ်ႈဝွၵ်းဢွၼ်ႇ ပုၵ်ႈၼိုင်ႈ မီးၼင်ႇၼႆယဝ်ႉ။

✽ မွၵ်ႇဢွၼ်ႇတၢင်တူဝ် ၊ လၢတ်ႈပၼ်မူဝ်လႄႈ

ၵႄႈၵၢင်ၸႂ်ၼႆႉ ၊ ႁၵ်ႉပႅင်းဝႆႉယဝ်ႉ

ၵူႈၸဝ်ႉဝၼ်းၶိုၼ်း ၊ မၼ်းတိုၼ်းသိုပ်ႇႁၵ်ႉ

ၶွတ်ႇတၵ်ႉမၼ်ႈၵိုမ်း ၊ ဢမ်ႇဢၢၼ်းလိုမ်းသေပွၵ်ႈ။

ၵၢင်ၸႂ်ပီႈၸၢႆးၶိူဝ်းတႄႉ ႁၵ်ႉမူဝ်ဝႆႉ ၸဵမ်မိူဝ်ႈထူပ်းႁၼ်ၵၼ် တီႈသႅင်ႇၶဝ်ႈသွႆးသေ ဢၼ်လႆႈလႅၵ်ႈငိုၼ်းၵၼ်ၼၼ်ႉၵေႃႈ ယွၼ်ႉပိူဝ်ႈ လႆႈလႅၵ်ႈဢဝ် ၼႂ်းမိုဝ်းမူဝ်လႄႈ ၸေႈႁႃႈပျႃး ဢၼ်မူဝ်လႅၵ်ႈပၼ်ၼၼ်ႉ ပီႈၸၢႆးၶိူဝ်း သိမ်းဝႆႉတေႃႇထိုင်ဝၼ်းမိူဝ်ႈၼႆႉယဝ်ႉ၊ ဝၢႆးသေ ၶိုၼ်းထူပ်းႁၼ်ၵၼ် ၽွင်းမိူဝ်ႈၵႂႃႇၼႂ်းၼွင် ၽွင်းမိူဝ်ႈၶိုၼ်ႈ ၸၼ်ႉၸွမ်ၼႆ လွင်ႈဢၼ်ပီႈၸၢႆးၶိူဝ်း လွမ်ႁၵ်ႉမူဝ်ၼႆ ပဵၼ်ဢၼ် ႁႅင်းယႂ်ႇမႃးယူႇသေတႃႉ ယွၼ်ႉပိူဝ်ႈၵူဝ်မူဝ် ဢမ်ႇၶိုၼ်းႁၵ်ႉပီႈၸၢႆးၶိူဝ်း ၵူဝ်မူဝ်ၸင်းပီႈၸၢႆးၶိူဝ်းသေ ၵူဝ်လွင်ႈတၢင်းမိုတ်ႈၵိုဝ်းႁဝ်း လူႉလႅဝ်လႄႈ ၸင်ႇဢမ်ႇႁတ်းပိုတ်ႇၽုၺ်ႇလၢတ်ႈဢွၵ်ႇယဝ်ႉ၊ ယၢမ်းလဵဝ် ယူဝ်ဢၼ်ပီႈၸၢႆးၶိူဝ်း တူၵ်းလိုၼ်းယဝ်ႉႁိုဝ်ၼေႃး ၵွပ်ႈၼႆ ၵပ်းၵၢႆႇ လူၺ်ႇလွင်ႈတၢင်းမႆႈၸႂ်ၼႆႉသေ ပီႈၸၢႆးၶိူဝ်းတႅမ်ႈဝႆႉ ၼင်ႇၼႆထႅင်ႈယဝ်ႉ။

✽ တူၼ်ႈမႆႉယႂ်ႇမီးၽီ ၊ ၵူၼ်းႁၢင်ႈလီမီးၸူႉ

ထုင်းၵႂၢမ်းႁူႉၼင်ႇၼႆ ၊ ၼွင်ႉမိူင်းၵႆယၢၼ်ႁဝ်း

ယူဝ်သဝ်းမီးၸူႉဝႆႉ ၊ ယူဝ်ၸၢႆးၼႆႉတူၵ်းလိုၼ်း

ဝၼ်းသိုၼ်းမိူဝ်ႈပၢၼ်ၵွၼ်ႇ ၊ ယူဝ်ဢမ်ႇႁွၼ်ႇယွၼ်းသူး

တမ်ႈတီႈၵွင်းမူးၽြႃး ၊ ႁူမ်ႈၵၼ်မႃးႁိုဝ်ၼေႃး သင်ၸိူဝ်ႉဝႃႈ မူဝ်မီးဝႆႉယဝ်ၼႆတႄႉ ၶႅၼ်းတေႃႈဝၢင်းၶႂၢင်းပၼ် ပီႈၸၢႆးၶိူဝ်းသေၵမ်း၊ ပီႈၸၢႆးၶိူဝ်းတႄႉ တေပဵၼ်ၵေႃႉဢၼ်မုင်ႈမွင်းတၢင်းႁၵ်ႉမူဝ်ယူႇတႃႇသေႇယဝ်ႉမူဝ် ... ၶႅၼ်းတေႃႈ ပၼ်တၢင်းမုင်ႈမွင်းသေၵမ်း။

တေပႂ်ႉမုင်ႈမွင်း ၽွင်းမိူဝ်ႈႁၵ်ႉမူဝ် ယုမ်ႉၶူဝ်လၢတ်ႈဢွၵ်ႇ မွၵ်ႇၼႄလွင်ႈ ၶိုၼ်းႁၵ်ႉၸႆးယူႇ။ ။

ပီႈၸၢႆးၶိူဝ်း ... လွႆလႅမ်

ၼၢင်းမူဝ်ၶၢဝ် ႁူဝ်ၸႂ်တွတ်ႇသေ သိုပ်ႇလူလိၵ်ႈ တေႃႇပေႃးသုတ်းယဝ်ႉ၊ ၵၢင်ၸႂ်မၼ်းၼၢင်းၵေႃႈ တိုၼ်းလွမ်လွမ် ႁၵ်ႉၸၢႆးၶိူဝ်းဝႆႉယဝ်ႉလႄႈ မၼ်းၼၢင်းဢဝ်လိၵ်ႈၼၼ်ႉ တၢင်ႇတႃႈ ၼႃႈဢူၵ်းမၼ်းၼၢင်းသေ လွမ်လွမ်လၢတ်ႈဝႃႈ

“ဢေႃႈ ... ပီႈၸၢႆးၶိူဝ်း လွင်ႈၼႆႉမူဝ်ၵေႃႈ လွမ်ႁူႉဝႆႉ ၼႂ်းၸႂ်မူဝ်ယူႇ ... မူဝ်တေလႆႈႁဵတ်းႁိုဝ် ၶိုၼ်းမွၵ်ႇလၢတ်ႈပၼ် ပီႈၸၢႆးၶိူဝ်းလႃႇ”

မၼ်းၼၢင်းထူၺ်ႈၸႂ်လူင် ၵမ်းၼိုင်ႈသေ

ဢေႃႈ ... ပီႈၸၢႆးၶိူဝ်း မူဝ်ၵေႃႈလွမ်လွမ်ႁၵ်ႉ ပီႈၸၢႆးၶိူဝ်းဝႆႉယဝ်ႉ”

မၼ်းၼၢင်း ၼူမ်မွၵ်ႇၵွၼ်ဢွၼ်ႇ ၵမ်းၼိုင်ႈ ၶိုၼ်းဢဝ်လိၵ်ႈဢဝ်မွၵ်ႇၼၼ်ႉ သႂ်ႇၼႂ်းထူင်လိၵ်ႈၼၼ်ႉယဝ်ႉ ဢဝ်တႃႈဝႆႉ ၼိူဝ်ဢူၵ်းမၼ်းၼၢင်းယဝ်ႉ မၼ်းၼၢင်း ပဵၼ်ဢၼ်ႁူဝ်ၸႂ်တွတ်ႇ ၸူမ်းသိူဝ်းဝႆႉယူႇတႄႉတႄႉ၊ မၼ်းၼၢင်း တိုၵ်ႉၶိုၼ်းမေး လွမ်တူၺ်း ထူင်လိၵ်ႈၼၼ်ႉယူႇ ၽွင်းမိူဝ်ႈၼၼ်ႉ ၼၢင်းၸၢမ်သႅင်း ႁိမ်ဢဝ် ထူင်လိၵ်ႈ ၼႂ်းမိုဝ်းၼၢင်းမူဝ်ၶၢဝ်ၽႂ်းၽႂ်းယဝ်ႉ။

ၼၢင်းမူဝ်ၶၢဝ်တူၵ်းၸႂ်ၵႂႃႇသေ ၼႅတ်ႈလုၵ်ႉဝၢႆႇတူၺ်းၽၢႆႇ လင်ၽႂ်းၽႂ်းယဝ်ႉ

“ဢူဝ် ... ၸၢမ်သႅင်း ယႃႇပေႁဵတ်းၼၼ် ဢဝ်မႃးလႄႈ”

“ၶိၵ်း ... ၶိၵ်း ... ဢမ်ႇပၼ် ပဵၼ်လိၵ်ႈၽႂ်ဝႃႈ”

“ဢမ်ႇၸႂ်ႈလိၵ်ႈသင် ဢဝ်မႃးလႄႈ ၸၢမ်သႅင်း”

ၶႃသွင်ၵေႃႉ လမ်းၵၼ်သေ ပၼ်ႇလဵပ်ႈတင်ႇၼၼ်ႉယူႇ

“ၸၢမ်သႅင်း ... ဢဝ်မႃးလႄႈ လိၵ်ႈၼၼ်ႉ”

“ပဵၼ်လိၵ်ႈသင် လၢတ်ႈသိုဝ်ႈသိုဝ်ႈလႄႈ”

“လိၵ်ႈတႆးၵေႃႉမူဝ်ဢိူဝ်ႈ ဢဝ်မႃးလႄႈၸၢမ်သႅင်း”

“ပေႃးပဵၼ်လိၵ်ႈတႆးၵေႃႉမူဝ်ၼႆ ၸၢမ်သႅင်း ယွၼ်းၽုၺ်ႇ တူၺ်းၽွင်ႈၼႃႈ”

“ယႃႇပေတူၺ်း ... ၸၢမ်သႅင်း ... ဢဝ်မႃးလႄႈ ဢီႉ”

“ပႆႇပၼ်လႆႈၵွၼ်ႇ”

ၼၢင်မူဝ်ၶၢဝ် ၸင်ႇႁွမ်းမိုဝ်းသေ

“ဢလူဝ်ႉ ... ၸၢမ်သႅင်း ႁႂ်ႈမူဝ်ၶူပ်ႉဝႆႈပၢၵ်ႇၵမ်းၼႆၵေႃႈ မူဝ်တေဝႆႈလႆ ဢဝ်မႃးလႄႈ”

“ၶိၵ်း ... ၶိၵ်း ... ပဵၼ်လိၵ်ႈပီႈၸၢႆးၶိူဝ်းပၼ်မႃး ဢမ်ႇၸႂ်ႈႁႃႉမူဝ်”

“ၸႂ်ႈဢိူဝ်ႈ ... ဢဝ်မႃးလႄႈ”

ၼၢင်းၸၢမ်သႅင်း မႃးၼင်ႈၼိူဝ်တင်ႇသေ

“ယေႃႈမူဝ် ... မူဝ်ဢမ်ႇၶႂ်ႈပၼ်တူၺ်းၵေႃႈ ၸၢမ်သႅင်း ပေႃးႁၼ်မူတ်းယဝ်ႉ ၶိၵ်း ... ၶိၵ်း မူဝ်လူဝ်ႇလႆႈလဵင်ႉ ၸၢမ်သႅင်း ၶဝ်ႈသွႆးဢိူဝ်ႈၼႃ”

ၼၢင်းမူဝ်ၶၢဝ် ပဵၼ်ဢၼ်လီဢၢႆၼႃႈမႆႈၵႂႃႇသေ ၼႅတ်ႈၶိုၼ်းဢဝ်လိၵ်ႈ ၼႂ်းမိုဝ်းၸၢမ်သႅင်းၽႂ်း ၽႂ်းယဝ်ႉ။

“ၸၢမ်သႅင်း ၽႅဝ်မႃးႁိုင်ယဝ်ႉႁႃႉ”

“ၽႅဝ်မႃး မိူဝ်ႈမူဝ်တိုၵ်သိၵ်ႇတူၺ်းလိၵ်ႈသေ ၼူမ်မွၵ်ႇၼၼ်ႉဢိူဝ်ႈ”

“တႄႉႁႃႉ ... ၸၢမ်သႅင်း”

“တႄႉဢိူဝ််ႈ ... ၼႂ်းလိၵ်ႈၼၼ်ႉ တႅမ်ႈဝႆႉသင်ၼႆၵေႃႈ ၸၢမ်သႅင်း သမ်ႉပေႃးလူတူၺ်းမူတ်းယဝ်ႉ ၶိၵ်း ... ၶိၵ်း မူဝ်လီဢၢႆၵႂႃႇယဝ်ႉႁႃႉ ... ဝၢႆးသေ မူဝ်လူလိၵ်ႈၼႆႉ မူဝ်လၢတ်ႈသင်ၼႆၵေႃႈ ၸၢမ်သႅင်း ငိၼ်းယူႇၵူၺ်း မူဝ်ဝႃႈႁိုဝ်ၵေႃ ... ဢေႃႈ ... ပီႈၸၢႆးၶိူဝ်း မူဝ်ၵေႃႈ ႁၵ်ႉပီႈၸၢႆးၶိူဝ်းဝႆႉယဝ်ႉ ၼႆဢမ်ႇၸႂ်ႈႁႃႉ”

ၼၢင်းမူဝ်ၶၢဝ် လီဢၢႆၵႂႃႇသေ ဢဝ်တႃမိုဝ်းမၼ်းထုပ်ႉ ၸၢမ်သႅင်းယဝ်ႉ

“ဢူဝ် ... ဢမ်ႇၸႂ်ႈသင်”

“ၶိၵ်း ... ၶိၵ်း ... ယႃႇပေလႅၼ် ၸၢမ်သႅင်းငိၼ်းယူႇ မႃးၼင်ႈၵွၼ်ႇလူး”

ၼၢင်းမူဝ်ၶၢဝ်ၵေႃႈ မႃးၼင်ႈႁိမ်းၸၢမ်သႅင်းယဝ်ႉ ၸၢမ်သႅင်းၸင်ႇယိပ်းမိုဝ်း ၼၢင်းမူဝ်ၶၢဝ်သေ

“မူဝ် ... တိုၵ်ႉလီဢၢႆယူႇႁႃႉ ... ယႃႇပေဢၢႆလေႃႇ ၸွင်ႇၸၢမ်သႅင်း ပဵၼ်ပိူၼ်ႈပဵၼ်ၽႂ်ၵေႃႈဢမ်ႇၸႂ်ႈ ပဵၼ်ႁဝ်းၼင်ႇၵၼ်ၵူၺ်း ဢမ်ႇၸႂ်ႈႁႃႉ”

“မူဝ်တေလႆႈႁဵတ်းႁိုဝ်လႃႇ ၸၢမ်သႅင်း”

“မူဝ်ၵေႃႈ ႁၵ်ႉပီႈၸၢႆးၶိူဝ်း ဝႆႉယူႇဢမ်ႇၸႂ်ႈႁႃႉ”

ၼၢင်းမူဝ်ၶၢဝ် လီဢၢႆဝႆႉလႄႈ မၼ်းၼၢင်းၵူမ်ႈႁူဝ်ဝႆႉယူႇ မၼ်းၼၢင်း ဢမ်ႇပဵၼ်လၢတ်ႈသင် ၼၢင်းၸၢမ်သႅင်းၸင်ႇၶိုၼ်းထၢမ်ဝႃႈ

“မူဝ် ... မူဝ် ... ၵေႃႈႁၵ်ႉပီႈၸၢႆးၶိူဝ်းယူႇ ဢမ်ႇၸႂ်ႈႁႃႉ လၢတ်ႈလႄႈ”

ၼၢင်းမူဝ်ၶၢဝ် လွမ်တူၺ်းၼႃႈၸၢမ်သႅင်းၵမ်းၼိုင်ႈသေ မၼ်းၼၢင်းငွၵ်းႁူဝ်ၼႄ ၵမ်းၼိုင်ႈယဝ်ႉ ၼၢင်းၸၢမ်သႅင်း ၸင်ႇၶိုၼ်းဝႃႈ

“ပေႃးၼႆ မူဝ်တေၶိုၼ်းတွပ်ႇပၼ် ပီႈၸၢႆးၶိူဝ်းၵမ်းလဵဝ်ႁႃႉ”

“ပေႃးၵိုင်ႉၵၢင်ႉတွပ်ႇၵမ်းလဵဝ်ၼႆတႄႉ တေပႆႇတူၵ်းထုၵ်ႇယူဝ်ႉၸၢမ်သႅင်း”

“မူဝ်တေႁဵတ်းႁိုဝ်လႃႇ”

“မူဝ်တေပႂ်ႉတူၺ်း ၶၢဝ်းယၢမ်းမၼ်းထႅင်ႈၵွၼ်ႇဢိူဝ်ႈ ၸၢမ်သႅင်း ဢမ်ႇၸႂ်ႈႁႃႉ”

“လီယူႇၼႃႇ ဢဝ်မူဝ်ဝႃႈဢိူဝ်ႈ”

ဝၼ်းၼၼ်ႉ ၶႃသွင်ၵေႃႉသိုပ်ႇဢုပ်ႇၵၼ်လွင်ႈၶိူဝ်း ၸၢႆးမွၼ်းၶိူဝ်း ၵူႈပိူင်ပိူင်ယူႇ။