မွၵ်ႇလူင်ႇလဵဝ်/တွၼ်ႈသၢမ်သိပ်းႁႃႈ
ၸၢႆးၶမ်း ၼၢင်းၸၢမ်သႅင်း ဢိၵ်ႇလူၺ်ႈၸၢႆးၸၢႆးလွမ်လွမ်ၶဝ်ႈ မိူဝ်းၼႂ်းႁိူၼ်းသေ ၸၢႆးၶမ်း ၸင်ႇၸႂ်ႉႁႂ်ႈ ၸၢႆးၸၢႆးလွမ်လွမ် ၵႂႃႇႁိမ်းပူႇၶဝ် လႄႈ ၼၢႆးၶဝ်ဢၼ်တိုၵ်ႉၼင်ႈတင်ႇသေ တူၺ်းလိၵ်ႈၶၢဝ်ႇယူႇ ၼၼ်ႉယဝ်ႉ။ ၸၢႆးၶမ်းသင်ႇလၢတ်ႈဝႃႈ
“ၸၢႆးၸၢႆး ... ၵႂႃႇၽၢႆႇလင်ပူႇၼၢႆးသူႁေ ၵႂႃႇႁွင်ႉဝႃႈပူႇပူႇ ၼၢႆးၼၢႆးၼႆ ႁႅင်းႁႅင်းၼႃႈ”
ၸၢႆးၸၢႆးၵေႃႈ လွမ်လွမ်ၵႂႃႇၽၢႆႇလင်ပူႇၼၢႆးၶဝ်ၼၼ်ႉယူႇ တင်းႁၢင်ႈၵူၼ်းထဝ်ႈဢွၼ်ႇမၼ်းၼၼ်ႉၼႆ ပဵၼ်ဢၼ်လီၶႂ်ႈၶူဝ်တႄႉတႄႉလႄႈ ၸၢႆးၸၢႆးၽႅ ဝ်ၵႂႃႇၽၢႆႇလင်ပူႇၼၢႆးၶဝ်သေ မၼ်းၸင်ႇႁွင်ႉ သႅၼ်ႇဝႃႈ“ပူႇပူႇ ၼၢႆးၼၢႆး”ၼႆႁႅင်းႁႅင်းယဝ်ႉ၊ ပူႇၼၢႆးၶဝ် တူၵ်းၸႂ်ၵႂႃႇ လူင်လူင်လၢင်လၢင်သေ
“ဢလူဝ်ႉ ၽြႃးလူင်ပဵၼ်ၸဝ်ႈ ပႃၼဝ်ႈလူင်ပဵၼ်တူဝ်”
“ဢလူဝ်ႉ မႄႈဢိူၺ်ႉ”
ပူႇၼၢႆးၶဝ် ဝၢႆႇတူၺ်းလႆႈႁၼ် ႁၢင်ႈပူႇထဝ်ႈဢွၼ်ႇၸၢႆးၸၢႆး လႄႈ ၶႃၶိုၼ်းတူၵ်းၸႂ်ၵႂႃႇထႅင်ႈယဝ်ႉ
“ဢလူဝ်ႉ ... ဢီႈသင်ၼႆႉ”
“ဢႃး ... ႁဵတ်းသင်ၼႆႉ”
ၸၢႆးၶမ်းလႄႈ ၼၢင်းၸၢမ်သႅင်း တဵၵ်းတွင်ႉတဵၵ်းသႆႈသေ ၶူဝ်ယူႇတႄႉတႄႉဝႃႈဝႃႈယဝ်ႉ ၸၢႆးၸၢႆးၸင်ႇဝႃႈ
“ပူႇပူႇ ၼၢႆးၼၢႆး ၸၢႆးၸၢႆးၸွင်ႇႁၢင်ႈလီ”
ပူႇၶဝ်တႄႉၸူမ်းၶူဝ်ယူႇႁႃးႁႃးယဝ်ႉ ၼၢႆးၶဝ်ၸင်ႇဝႃႈ
“ဢလူဝ်ႉ ... လၢၼ်ၸၢႆးၼၢႆးၼႆႉ ႁၢင်ႈလီဝႃႈႁၢင်ႈလီပေႃး တၢၼ်ႇၽီတမ်ႇမွႆး ၽၼ်ၼၢႆးပေႃးၶႂ်ႈပၢႆႈယဝ်ႉ ၽႂ်ႁဵတ်းပၼ်ၸၢႆးမႃး ၼႆႉ”
“လုင်းလုင်း ႁဵတ်းပၼ်ဢိူဝ်ႈ”
“လုင်းလုင်းၵေႃႉလႂ်”
“လုင်းလုင်းၵေႃႉဢၼ် ပၼ်ၵွင်ႈၸၢႆးၸၢႆးၼၼ်ႉဢိူဝ်ႈ လုင်းလုင်းလႄႈမႄႈမႄႈ မီးဝႆႉၼႂ်းသူၼ်ဢိူဝ်ႈ”
ဢူႈၼၢင်းမူဝ်ၶၢဝ် ၶဝ်ၸင်ႇထၢမ်ဝႃႈ
“ဢေႃႈ ... ၸၢႆးၶမ်း ... ၸၢႆးၶိူဝ်းၽႅဝ်မႃးယဝ်ႉႁႃႉ”
“ဢေႃႈ ၶႃႈငိၼ်းၶၢဝ်ႇဝႃႈ မၼ်းမီးတီႈပၢင်လွင်းၼႆသေ ၸင်ႇၵႂႃႇႁွင်ႉမၼ်းမႃးဢေႃႈ”
“ၶႃသွင်ၵေႃႉ ၼၢင်းမူဝ် တိုၵ်ႉမီးဝႆႉၼႂ်းသူၼ်ႁႃႉမိူဝ်ႈလဵဝ်”
“ၸႂ်ႈဢေႃႈ”
ၽွင်းၼၼ် ၸၢႆးၸၢႆးၸင်ႇၸၼ်ပူတ်းၼူတ်ႇပူတ်းမွႆၵၢင်း ပူတ်းမၢၼ်ႇတႃ မၢၵ်ႇႁူဝ်မၼ်းပႅတ်ႈယဝ်ႉ၊ လုင်းၸိုၼ်ႈၵေႃႈ ၶႂ်ႈႁၼ် ၸၢႆးၶိူဝ်းၼႃႇလႄႈ မၼ်းၸင်ႇဝႃႈ
“ၸၢႆးၶမ်းၵႂႃႇႁွင်ႉၶႃမႃးၸူး လုင်းလႄႈ”
ၸၢႆးၸၢႆးၸင်ႇဝႃႈ
“ၸၢႆးၸၢႆးတေၵႂႃႇႁွင်ႉမႃးၼႃႈ ပူႇပူႇ”
ၸၢႆးၸၢႆး ဢဝ်ၼူတ်ႇမွႆၵၢင်း မၢၼ်တႃမၢၵ်ႇႁူဝ်ၸိူဝ်းၼၼ်ႉ သႂ်ႇပၼ်ၼႂ်းမိုဝ်းပူႇၶဝ်သေ ဢၢင်ႈဢႅၼ်ႇၵႂႃႇႁွင်ႉ ၸၢႆးၶိူဝ်းၶႃၼႆယဝ်ႉ၊ မၼ်းၸၢႆးၸင်ႇၶုၵ်းၸႂ်လႆႈမဵဝ်းၼိုင်ႈလႄႈ မၼ်းၶိုၼ်းလွမ်တူၺ်း ၼႃႈပူႇၶဝ်ယူႇ၊ ပူႇၶဝ်ၸင်ႇဝႃႈ
“ၸၢႆးၸၢႆးတူၺ်းသင် ၵႂႃႇႁွင်ႉမႄႈသူမႃးလႄႈ”
“ၵမ်ႉလႄႈ ပူႇပူႇ”
မၼ်းၸၢႆး ၶိုၼ်းမႃးယိပ်းဢဝ်မွႆၼူတ်ႇမွႆၵၢင်းၸိူဝ်းၼၼ်ႉယဝ်ႉ ၶဝ်ၵေႃႈဢွၼ်ၵၼ်တူၺ်းမၼ်းယူႇ ... ပူႇၶဝ်ၸင်ႇဝႃႈ
“ဢေႃႈ ... ၸၢႆးၸၢႆးတေသႂ်ႇၼူတ်ႇၸိူဝ်းၼႆႉသေ ၵႂႃႇႁွင်ႉႁႃႉ”
“ၸၢႆးၸၢႆးဢမ်ႇသႂ်ႇ ၸၢႆးၸၢႆးတေသႂ်ႇပၼ်ပူႇပူႇဢိူဝ်ႈ”
ၸၢႆးၶမ်းလႄႈ ၼၢင်းၸၢမ်သႅင်း ၶႂ်ႈၶူဝ်ၼႃႈလႄႈ ၶႃၵၼ်ႈ ၶူဝ်ယူႇယဝ်ႉ ပူႇၶဝ်ၶိုၼ်းဝႃႈ
“ပူႇဢမ်ႇၶႂ်ႈသႂ်ႇ ၸၢႆးၸၢႆး”
ၸၢႆးၸၢႆးႁဵတ်းၸႃႉတေႃႇပူႇၶဝ်သေ
“ဢိုဝ်း ... ဢိုဝ်း ... ပူႇပူႇသႂ်ႇလႄႈ ၸၢႆးၸၢႆးတေသႂ်ႇပၼ် ဢိူဝ်ႈ”
ၼၢႆးၶဝ်ၵေႃႈၸင်ႇဝႃႈ
“ၸၢႆးၸၢႆးပိူၼ်ႈဢမ်ႇလီႁဵတ်းၸိူင်ႉၼၼ်”
“ဢိုဝ်း ... ဢိုဝ်း ... လီဢိူဝ်ႈ ... လုင်းလုင်းယင်းႁဵတ်းယူႇ”
“ဢိူဝ်ႈ ၵႂႃႇႁဵတ်းပၼ်လုင်းသူလႄႈ”
“ဢိုဝ်း ... ဢမ်ႇႁဵတ်း ဢမ်ႇႁဵတ်း ၸၢႆးၸၢႆးတေႁဵတ်းပၼ် ပူႇပူႇဢိူဝ်ႈ”
“ယွၼ်ႉပိူဝ်ႈ ၸၢႆးၸၢႆးႁဵတ်းၸႃႉတေႃႇပူႇၶဝ်ၼၢႆးၶဝ်လႄႈ ၶႃသွင်ၵေႃႉၵေႃႈ သမ်ႉႁၵ်ႉလၢၼ်ၸၢႆးၶႃလႄႈ လၢၼ်ၸၢႆးၶႃ ၶႂ်ႈႁဵတ်းသင်ၼႆၵေႃႈ ၶႃလႆႈၸွမ်းၸႂ်ပၼ်သေႇသေႇယဝ်ႉ၊ ပူႇၶဝ်ၵူဝ်လၢၼ်ၸၢႆး မၼ်းႁႆႈလႄႈ မၼ်းၸင်ႇဝႃႈ
“မႃးလႄႈ မႃးသႂ်ႇပၼ်ပူႇပူႇလႄႈ”
ၶဝ်ဢွၼ်ၵၼ်ၶူဝ်သေ တူၺ်းၸၢႆးၸၢႆးသႂ်ႇမွႆၵၢင်း ပၼ်ပူႇၶဝ်ၼၼ်ႉယူႇ ဝၢႆးသေ သႂ်ႇမွႆၵၢင်းယဝ်ႉ မၼ်းၸၢႆး ဢဝ်မၢၼ်ႇတႃလမ် သုပ်းပၼ်ပူႇၶဝ်ယဝ်ႉ၊ ဝၢႆးသေၼၼ်ႉ မၼ်းဢၢင်ႈသႂ်ႇၼူတ်ႇ ပၼ်ပူႇၶဝ်ၼႆယဝ်ႉ မၼ်းလႆႈႁၼ်ပူႇၶဝ်မီးဝႆႉၼူတ်ႇယဝ်ႉလႄႈ မၼ်းၸင်ႇဝႃႈ
“ပူႇပူႇ ၼူတ်ႇပူႇပူႇၼႆႉ ဢမ်ႇႁၢင်ႈလီ”
ၼႆသေ မၼ်းၸၢႆးထၢင်ႇဝႃႈ တေမိူၼ်ၸိူင်ႉၼင်ႇ မၼ်းတိုတ်ႉၸၼ်ၼူတ်ႇၸၢႆးၶိူဝ်းၼၼ်ႉလႆႈငၢႆႈငၢႆႈယူႇၼႆလႄႈ မၼ်းၸၢႆး ၸင်ႇၸၼ်တိုတ်ႉၼူတ်ႇပူႇၶဝ်ၼၼ်ႉယဝ်ႉ၊ ပူၶဝ်ၸဵပ်းၼႃႇသေ ႁွင်ႉဝႃႈ
“ဢႂ်ႉ ... ဢႂ်ႉ ဢႃး ယႃႇပေၸၼ် ၸၢႆးၸၢႆးၸဵပ်းဢိူဝ်ႈ မၼ်းဢမ်ႇၸၼ်လႆႈမဵဝ်းၼႆႉ”
“ႁိုဝ်း ... ၸၢႆးၸၢႆးၸၼ်တီႈလုင်းလုင်း ယင်းလႆႈယူႇ”
“လုင်းလုင်းသူ မၼ်းဢမ်ႇမီးၼူတ်ႇၸိူင်ႉပူႇပူႇလႄႈ ပူႇတႄႉမီးယဝ်ႉလူး ပူႇဢမ်ႇသႂ်ႇယဝ်ႉၼႃႈ ၵႂႃႇလႄႈ ၵႂႃႇႁွင်ႉမႄႈမႄႈသူ မႃးၽႂ်းၽႂ်းလႄႈ”
ၸၢႆးၸၢႆး ၶိုၼ်းလွမ်တူၺ်းၼႃႈၼၢႆးၶဝ် ပႆႇမီးၼူတ်ႇလႄႈ မၼ်းၸင်ႇဢဝ်ၼူတ်ႇၼၼ်ႉ သႂ်ႇပၼ်ၼၢႆးၶဝ်ယဝ်ႉ
“ဢူဝ် ... ၼၢႆးၼၢႆးဢမ်ႇသႂ်ႇ ယႃႇပေႁဵတ်းၼၼ် ၸၢႆးၸၢႆး”
“ဢိုဝ်း ... ဢိုဝ်း ပူႇပူႇယင်းသႂ်ႇယူႇ ပေႃးၼၢႆးၼၢႆးဢမ်ႇ သႂ်ႇဢမ်ႇလႆႈၵူၺ်း သႂ်ႇလႄႈ”
ၼၢႆးၶဝ်ၵေႃႈ ဢမ်ႇၸၢင်ႈထဵင်သင် ၸၢႆးၸၢႆးဢဝ်ၼူတ်ႇၼၼ်ႉ သႂ်ႇပၼ်ၼၢႆးၶဝ် ဢဝ်မၢၵ်ႇႁူဝ်တိုဝ်းပၼ်ၼၢႆးၶဝ်ယဝ်ႉ၊ ၸၢႆးၶမ်းလႄႈ ၸၢမ်သႅင်းတဵၵ်းတွင်ႉၶႃသေ ၶူဝ်ယူႇၶိုၵ်းၶိုၵ်းယဝ်ႉ ၸၢႆးၸၢႆး ၸင်ႇဝႃႈ
“ပူႇပူႇလႄႈ ၼၢႆးၼၢႆး ယႃႇပေယႃႉ ယႃႇပေၸၼ်ပႅတ်ႈၼႃႈ ပေႃးၸၼ်ပႅတ်ႈၼႆတႄႉ ဢမ်ႇလႆႈၵူၺ်း ၸၢႆးၸၢႆးတေႁႆႈဢိူဝ်ႈ၊ ယႃႇပေၸၼ်ပႅတ်ႈၼႃႈ ၸၢႆးၸၢႆးတေၵႂႃႇႁွင်ႉ မႄႈမႄႈလႄႈ လုင်းလုင်း မႃးတူၺ်းဢိူဝ်ႈ”
ၽွင်းမိူဝ်ႈၸၢႆးၸၢႆး ဢၢင်ႈဢွၵ်ႇႁိူၼ်းၵႂႃႇၼၼ်ႉ ၸၢႆးၶမ်း ၸင်ႇဝႃႈ
“ၸၢႆးၸၢႆးမႃးၼႆႈၵမ်ႉၼိုင်ႈလူး ပေႃးၸၢႆးၸၢႆးၵႂႃႇႁွင်ႉလုင်း လုင်းလႄႈ မႄႈမႄႈၼႆ ယႃႇပေဝႃႈလုင်းလုင်းၼႆၼႃႈ”
“ဝႃႈႁိုဝ်လႃႇ”
“ဝႃႈဢူႈဢူႈၼႆၼႃႈ”
“ဢိုဝ်း ... ဢမ်ႇဝႃႈ ... ဝႃႈလုင်းလုင်းၼႆဢိူဝ်ႈ”
“ဢမ်ႇၸႂ်ႈၸၢႆႈၸၢႆး ပေႃးသႂ်ႇမွႆၵၢင်းသႂ်ႇၼူတ်ႇ တိုဝ်းမၢၼ်ႇ တႃၸိူဝ်းၼႆႉၵူၺ်းဢိူဝ်ႈ ပိူၼ်ႈဝႃႈလုင်း၊ ပေႃးဢမ်ႇသႂ်ႇၼႆ ပိူၼ်ႈဝႃႈ ဢူႈဢူႈၼႆဢိူဝ်ႈၼႃႈ ၵႂႃႇႁွင်ႉဝႃႈ ဢူႈဢူႈမႄႈမႄႈၼႆၼႃႈ”
ၸၢႆးၸၢႆးၵေႃႈငွၵ်းႁူဝ်ၼႄသေ ဢႅၼ်ႇဢွၵ်ႇႁိူၼ်းၵႂႃႇယဝ်ႉ လႆႈႁၼ်ၸၢႆးၶမ်း သွၼ်ပၼ်ၸၢႆးၸၢႆးၼင်ႇၼၼ် ပူႇၼၢႆးၶဝ် လွမ်ယုမ်ႉႁၢၼ်ႉၸႂ်ဝႆႉယူႇ၊ ၽွင်းၼၼ်ႉ ၸၢႆးၶိူဝ်းလႄႈ ၼၢင်းမူဝ်ၶၢဝ်ၵေႃႈ ၸူဝ်းၵၼ်သေ ဢၢင်ႈမႃးတီႈၼႂ်းႁိူၼ်းၼင်ႇၵဝ်ႇယဝ်ႉ၊ ၸၢႆးၸၢႆး ဢႅၼ်ႇမႃးၸူး ၶႃသွင်ၵေႃႉသေ မႃးႁွင်ႉဝႃႈ “လုင်းလုင်း မႄႈမႄႈ”
ၼၢင်းမူဝ်ၶၢဝ် ၸင်ႇထၢမ်
“ႁဵတ်းသင် လုၵ်ႈၸၢႆး”
ၸၢႆးၸၢႆးၶိုၼ်းၶုၵ်းၸႂ်လႆႈ ဢၼ်ၸၢႆးၶမ်းသွၼ်ပၼ်မႃးၼၼ်ႉလႄႈ မၼ်းၸင်ႇၶိုၼ်းမႄႈႁွင်ႉဝႃႈ “ဢေႃႈ ... ဢမ်ႇၸႂ်ႈလုင်းလုင်းယဝ်ႉဝႃႈ ဢူႈဢူႈမႄႈမႄႈ ပူႇပူႇဝႃႈ ႁႂ်ႈမႃးႁွင်ႉဢူႈဢူႈမႄႈမႄႈ ၵႂႃႇၼႂ်းႁိူၼ်းဝႃႇ”
လႆႈငိၼ်းၸၢႆးၸၢႆး ႁွင်ႉၸၢႆးၶိူဝ်း “ဢူႈဢူႈ”ၼႆလႄႈ ၼၢင်း မူဝ်ၶၢဝ်လႄႈ ၸၢႆးၶိူဝ်းယုမ်ႉတူၺ်းၼႃႈၵၼ်သေ ၶႃသွင်ၵေႃႉငွမ်ၼင်ႈၸုပ်ႇၼူမ်ၵႅမ်ႈ ၸၢႆးၸၢႆးၵေႃႉၽၢႆႇၽၢႆႇယဝ်ႉ၊ ၸၢႆးၸၢႆးၵေႃႈၸၼ် မိုဝ်းၸၢႆးၶိူဝ်းၽၢႆႇၼိုင်ႈ ၸၼ်မိုဝ်းၼၢင်းမူဝ်ၶၢဝ်ၽၢႆႇၼိုင်ႈသေ
“ဢူႈဢူႈမႄႈမႄႈ မႃးလႄႈ ၵႂႃႇၸူးပူႇပူႇၼၢႆးၼၢႆးဝႃႇ”
ၶဝ်သၢမ်ၵေႃႉၵေႃႈ ၸုင်မိုဝ်းၵၼ်သေ ၶဝ်ႈမႃးၼႂ်းႁိူၼ်းယဝ်ႉ ၽွင်းမိူဝ်ႈထိုင်မႃးၼႂ်းႁိူၼ်းၼၼ်ႉ ၸၢႆးၸၢႆးၸင်ႇဝႃႈ
“ဢူႈဢူႈ မႄႈမႄႈ တူၺ်းပူႇပူႇၼၢႆးၼၢႆးလူး ၸၢႆးၸၢႆးႁဵတ်း ပၼ်ဢိူဝ်ႈ”
ၸၢႆးမွၼ်းၶိူဝ်းလႄႈ ၼၢင်းမူဝ်ၶၢဝ်ၵေႃႈ လွမ်တူၺ်းၵႂႃႇ လႆႈႁၼ်ဢူႈၶဝ် မီးမွႆၵၢင်းတိုဝ်းမၢၼ်ႇတႃလမ်သေ ယုမ်ႉၸုတ်းၵုတ်း။ လႆႈႁၼ်မႄႈၶဝ် တိုဝ်းမၢၵ်ႇႁူဝ် မီးၼူတ်ႇလမ်ၽိုတ်းၽိုၼ်းသေယုမ်ႉၵိုတ်း ယုမ်ႉၵိုတ်းယူႇလႄႈ ၶႃသွင်ၵေႃႉပဵၼ်ဢၼ်ၸူမ်းၶူဝ်ၵႂႃႇတႄႉတႄႉ၊ ၸၢႆးၸၢႆးၵေႃႈ လႆႈႁၼ်ဢူႈဢူႈမႄႈမႄႈ ပူႇပူႇၼၢႆးၼၢႆး လုင်းလုင်းပႃႈပႃႈ မၼ်းၶူဝ်ယူႇလႄႈ မၼ်းၵေႃႈပဵၼ်ဢၼ်ၶႂ်ႈၶူဝ်သေ ႁုၼ်ႉၶူဝ်ၸွမ်းၶဝ်ယဝ်ႉ မၼ်းၸၢႆး ၸင်ႇၶူဝ်သေလၢတ်ႈဝႃႈ
“ႁႃး ႁႃး ႁႃး ၶိၵ်း ၶိၵ်း ... ပူႇပူႇၼၢႆးၼၢႆးႁၢင်ႈလီၵျႃႉ”