မွၵ်ႇလူင်ႇလဵဝ်/တွၼ်ႈသၢမ်သိပ်းဢဵတ်း
ၶၢဝ်းမႆႈၶၢဝ်းၵတ်းပူၼ်ႉၵႂႃႇ ၶၢဝ်းၼိုင်ႈယဝ်ႉ ၶၢဝ်းၼိုင်ႈသေ မွၵ်ႇၵွၼ်ၵေႃႈ ပေႃးတၼ်းၵီႈၵႂႃႇ သီႇသုပ်ႈယဝ်ႉ။
ၼၢင်းမူဝ်ၶၢဝ် ယူႇတီႈႁိူၼ်းၶဝ်သေ ထွမ်ႇၵႂၢမ်းပုၵ်ႈၼိုင်ႈယူႇ ၵႂၢမ်းဢၼ်မၼ်းၼၢင်းထွမ်ႇၼႆႉတႄႉ ပဵၼ်ၵႂၢမ်းဢၼ်ၸိုဝ်ႈဝႃႈ “ပႂ်ႉမွင်းၶိုၼ်းထူပ်းႁၼ်ၵၼ်”ၼႆၼၼ်ႉယဝ်ႉ မၼ်းၼၢင်းၽုၺ်ႇ ၸၢၵ်ႈၵႂၢမ်းသေ လွမ်လွမ်ဝတ်ႉၵႂၢမ်းၸွမ်းယူႇ-
✽ လူမ်းထွင်းပဝ်ႇ ဢဝ်ၽိူဝ်မႆႉပိဝ််ႁူင်ႈတူၵ်း တွင်ႉလေႃးဢွၼ်ႇ ႁွင်ႉမေႃးၶေႃးၶူမ်ၸႂ် ၶိင်ႇႁႅင်ႈၶၢဝ်းမႆႈ ၶုၵ်းၸႂ်လႆႈ သူပီႈၸၢႆးၵူႈၶိုၼ်းဝၼ်းငၢႆးယူႇဢိူဝ်ႈ။
✽ မွၵ်ႇၵုမ်ႈသုမ်ႇ သဵင်ၾႃႉလင်လႄႈ ၽူၼ်ႁူဝ်ႈတူၵ်း သဵင်ၶဵတ်ႇဢွၼ်ႇ မေႃးပၼ်ပေႃးၸွတ်ႇယဝ်ႉ ၶိင်ႇၾူၼ်ၶၢဝ်းႁိုဝ်ႉ ၶုၵ်းၸႂ်လႆႈ သူပီႈၸၢႆး ၵူႈၶိုၼ်းဝၼ်းငၢႆးယူႇဢိူဝ်ႈ။
✽ မူၺ်ၼၢႆးဢွၼ်ႇ တူၵ်းၸွတ်ႇၵႂႃႇ ၵူႈတီႈၵူႈတၢင်း မႆႉမွၵ်ႇၵွၼ် မိူင်းႁဝ်းၵီႈၶွင်ႇယဝ်ႉ ၶိင်ႇၵတ်းၶၢဝ်းမူၺ် ၶုၵ်းၸႂ်လႆႈသူပီႈၸၢႆး ၵူႈၶိုၼ်းဝၼ်း ငၢႆႈယူႇဢိူဝ်ႈ၊
မိူဝ်ႈႁဝ်ႈလႆႈသဝ်းႁိမ်းၽင်ႇၼမ်ႉဢုပ်ႇၵၼ် ပၼ်ၵႂၢမ်းမၼ်ႈၵႅၼ်ႇ ႁၵ်ႉၼႅၼ်ႇဢိူဝ်ႈတင်းသွင် ယၢမ်ႈၼႆ ယၢၼ်ၵႆၵၼ်သေ မီးယူႇၵေႃႉတၢင်း မၢဝ်ႇပီႈၸၢႆးဢိူၺ်း ပႂ်ႉမွင်းမိူဝ်ႈၽွင်းၶိုၼ်းထူပ်းႁၼ် ၵၼ် ✽ ✽ ✽
မၼ်းၼၢင်းဝတ်ႉၵႂၢမ်းပုၵ်ႉၼႆႉသေ ၶုၵ်းၸႂ်လႆႈၸၢႆးၶိူဝ်း လႄႈ ၼမ်ႉတႃဢွၼ်ႇမၼ်းၼၢင်း ယွႆႉတူၵ်းလူင်းမႃးယဝ်ႉ၊ ယၢမ်းလဵဝ်ဢမ်ႇလႆႈႁၼ် ဢမ်ႇလႆႈငိၼ်းၶၢဝ်ႇ ၸၢႆးၶိူဝ်းပေႃးတေမီးသီႇပီယဝ်ႉ။
ၵွပ်ႈၼႆ မၼ်းၼၢင်းၸင်ႇပိၵ်ႉၸၢၵ်ႈၵႂၢမ်းသေ ႁႆႈယူႇၵေႃႉ လဵဝ်သိုတ်ႉသိုတ်ႉယဝ်ႉ။
ၽွင်းၼၼ် ၵူၼ်းၸၢႆးဢွၼ်ႇၵေႃႉၼိုင်ႈ တေမီးမွၵ်ႈသၢမ်ၶူပ်ႇ ၽွင်းတိုၵ်ႉလီႁၵ်ႉၼၼ်ႉ ၽႅဝ်မႃးၽၢႆႇလင်မၼ်းသေ မႃးလွမ်တူၺ်းမၼ်းၼၢင်း ဢၼ်တိုၵ်ႉႁႆႈၼၼ်ႉယူႇ လုၵ်ႈဢွၼ်ႇၵေႃႉၼၼ်ႉ ၸင်ႇမႃးႁွင်ႉဝႃႈ
“မႄႈ ... မႄႈ ... မႄႈမႄႈႁႆႈႁဵတ်းသင်”
လႆႈငိၼ်းသဵင် လုၵ်ႈၸၢႆးမၼ်း ႁွင်ႉမၼ်းလႄႈ မၼ်းၼႅတ်ႈတူၺ်း လုၵ်ႈၸၢႆးမၼ်းသေ ႁွပ်ႇဢဝ်လုၵ်ႈၸၢႆးမၼ်းၼၢင်းယဝ်ႉ လုၵ်ႈၸၢႆးဢွၼ်ႇမၼ်း ၸၢႆးၸၢႆးဢဝ်မိုဝ်းမၼ်း ၸဵတ်ႉပၼ်ၼမ်ႉတႃ မႄႈမၼ်းသေ ထၢမ်ဝႃႈ
“မႄႈမႄႈ ႁႆႈႁဵတ်းသင်” “မႄႈမႄႈဢမ်ႇႁႆႈလူင် လုၵ်ႈၸၢႆး မႄႈမႄႈလႃႈလီႁဵတ်းဢဵၼ်ႈဢိူဝ်ႈ လုၵ်ႈၸၢႆးၵိၼ်ၶဝ်ႈၼႂ်ယဝ်ႉႁႃႉ”
“ၸၢႆးၸၢႆး ဢမ်ႇၶႂ်ႈၵိၼ်မႄႈမႄႈ”
“ၵိၼ်ဢိတ်းၼိုင်ႈလႄႈ မႄႈမႄႈတေသွမ်ပၼ် လုၵ်ႈၸၢႆး ဝႃႈငၢႆႈယူႇလူင်”
“ဢိုဝ်း ... ႁိုဝ်း ... ၸၢႆးဢမ်ႇၶႂ်ႈၵိၼ်”
“ၵိၼ်လႄႈ ပေႃးၵိၼ်ယဝ်ႉ မႄႈမႄႈတေဢွၼ်ၵႂႃႇသိုဝ်ႉ ၵႃးဢွၼ်ႇႁိူဝ်းမိၼ်ဢွၼ်ႇဢိူဝ်ႈၼႃႈ”
ၼၢင်းမူဝ်ၶၢဝ် ႁွပ်ႇဢဝ်လုၵ်ႈၸၢႆးဢွၼ်ႇ မၼ်းမႃးသွမ်ၶဝ်ႈ လုၵ်ႈၸၢႆးမၼ်းယူႇ၊ ဝၢႆးသေၼၼ်ႉ မၼ်းၼၢင်း ဢွၼ်လုၵ်ႈၸၢႆးမၼ်းသေ မႃးႁႃသိုဝ်ႉတၢင်းလဵၼ်ႈ တီႈၼႂ်းၵၢတ်ႇ ၸဝ်ႈၸၢမ်ထုၼ်းယဝ်ႉ၊ ဝၢႆးသေသိုဝ်ႉယဝ်ႉ ၶႃသွင်ၵေႃႉမႄႈလုၵ်ႈ ဢွၵ်ႇၵၢတ်ႇမႃးသေ လႆႈႁၼ်တႅၵ်ႉၸီႇလမ်းၼိုင်ႈလႄႈ ၼၢင်းမူဝ်ၶၢဝ် ၸင်ႇဝႃႈ
“ၸဝ်ႈၵႃး ... ၵႂႃႇသူင်ႇပၼ် တီႈ ပွၵ်ႉဢူးၵျီးၶမ်းလူး”
ၼၢင်းမူဝ်ၶၢဝ်ၵေႃႈ ၸၼ်ဢဝ်မိုဝ်းလုၵ်ႈၸၢႆးမၼ်းသေ ၶိုၼ်ႈၶီႇ တီႈႁူဝ်ၵႃး ႁိမ်းၸဝ်ႈၵႃးၼၼ်ႉယဝ်ႉ၊ ၸဝ်ႈၵႃးၵေႃႈ ႁေႃႈၵႃး ဢွၵ်ႇမႃးသေ ၽွင်းမိူဝ်ႈထိုင်မႃး ႁိမ်းတၢင်းလူင်ၼၼ်ႉ ၼၢင်းမူဝ်ၶၢဝ် ၸင်ႇၶုၵ်းၸႂ်လႆႈမဵဝ်းၼိုင်ႈသေ မၼ်းၼၢင်းၸင်ႇၶိုၼ်းဝႃႈ
“ဢေႃႈ ... ၸဝ်ႈၵႃး ႁဵတ်းၵျေးၸူးသေ ၵႂႃႇသူင်ႇပၼ်တီႈ ႁူင်းယႃၸဝ်ႈၸၢမ်ထုၼ်းဢွၼ်တၢင်းၼႃႈ ... ႁဝ်းလူဝ်ႇၵႂႃႇတူၺ်း တႆးၵေႃႉႁဝ်း ၵႅပ်ႉၼိုင်ႈဢိူဝ်ႈ”
“လႆႈယူႇ”
ၸဝ်ႈၵႃးၵေႃႈ ႁေႃႈၵႃးမၼ်း ၵႂႃႇသူင်ႇပၼ် တီႈႁူင်းယႃၸဝ်ႈၸၢမ်ႇထုၼ်းယဝ်ႉ ပေႃးႁွတ်ႈထိုင်ၼႆ ၼၢင်းမူဝ်ၶၢဝ်ၶႃမႄႈလုၵ်ႈ ၸင်ႇလူင်းၵႃးသေ ၼၢင်းမူဝ်ၶၢဝ်ၸင်ႇသင်ႇလၢတ်ႈဝႃႈ
“ဢေႃႈ ... ၸဝ်ႈၵႃး ... ၶႅၼ်းတေႃႈပႂ်ႉဝႆႉၵမ်ႉဢွၼ်ႇဢိတ်းၼိုင်ႈၼႃႈ ႁဝ်ႈတေၸဵဝ်းမႃးၽႂ်းၽႂ်းယူႇ”
ၼၢင်းမူဝၢ်ၶဝ်ၶႃမႄႈလုၵ်ႈၵေႃႈ ၵႂႃတူၺ်းၼႂ်းႁူင်းယႃၼၼ်ႉ ၵႅပ်ႉၼိုင်ႈသေၶိုၼ်း ၼႅတ်ႈဢွၵ်ႇမႃး ၶီႇၵႃးယဝ်ႉ လုၵ်ႈၸၢႆးမၼ်းၸၢႆးၸၢႆး ၸင်ႇထၢမ်
“မႄႈမႄႈ ... ၸၢႆးၶဝ်တေမိူဝ်းႁိူဝ်းယဝ်ႉႁႃႉ”
“မိူဝ်ႈဢိူဝ်း လုၵ်ႈၸၢႆး မႄႈမႄႈ ပေႃးသိုဝ်ႉပၼ်လုၵ်ႈၸၢႆး ၵႃးဢွၼ်ႇႁိူဝ်းမိၼ်ဢွၼ်ႇယဝ်ႉၼႃႇ ... ပေႃးၽႅဝ်တီႈႁိူၼ်း ၸင်ႇလဵၼ်ႈၼႃႈ”
လႆႈငိၼ်း ၶႃသွင်ၵေႃႉလၢတ်ႈတေႃႇၵၼ်ၼင်ႇၼၼ် ၸဝ်ႈၵႃးၼၼ် ႁူႉပွင်ႇဝႃႈ ပဵၼ်ၶႃသွင်ၵေႃႉမႄႈလုၵ်ႈၵၼ်ယူႇ၊ ၵေႃႉဢၼ် ႁေႃႈၵႃးတႅၵ်ႉၸီႇၼႆႉတႄႉ ပဵၼ်ၸၢႆးမွၼ်းၶိူဝ်းယဝ်ႉ၊ ၶၢဝ်းယၢမ်း ဢၼ်မၼ်းႁၢႆလၢႆၵႂႃႇသၢမ်ပီပၢႆပၢႆ သီႇပီၸမ်ၸမ်ၼၼ်ႉ မၼ်းပၢႆႈၵႂႃႇယူႇ တီႈဝၢၼ်ႈလွႆပျႃး ဢၼ်မီး ၽၢႆႇႁွင်ႇဝဵင်းပၢင်လွင်း ဢၼ်ၵႆယၢၼ်သၢမ်လၵ်းသေ ၵႂႃႇႁဵတ်းမေႃသွၼ်ၵေႃႉၼိုင်ႈယဝ်ႉ။
လွင်ႈဢၼ်မၼ်းၶိုၼ်းမႃးၽႅဝ် တူၼ်ႈတီးၼႆႉတႄႉ မၼ်း လူဝ်ႇသိုဝ်ႉၶိူင်ႈယိပ်းတၢင်းတိုဝ်း မၼ်းလႄႈ မၼ်းၸၢႆးၸင်ႇလႅၵ်ႈလၢႆႈ ၽၢင်မၼ်းသေ ၶဝ်ႈမႃးၼႂ်းဝဵင်းတူၼ်ႈတီးယဝ်ႉ၊ ယွၼ်ႉပိူဝ်ႈ မၼ်းသႂ်ႇ ၼူတ်ႇ သႂ်ႇမွႆၵၢင်းတိုဝ်းမၢၼ်ႇတႃလမ် တိုဝ်းမၢၵ်ႇႁူဝ်ဝႆႉလႄႈ ၼၢင်းမူဝ်ၶၢဝ် ဢမ်ႇတွင်းမၼ်း လွင်ႈဢၼ်မၼ်းမႃးႁေႃႈၵႃးတႅၵ်ႉၸီႇၼႆႈတႄႉ မၼ်းယိမ်ၵႃးတႆးၵေႃႉမၼ်းသေ ႁေႃႈမႃးတီႈၵၢတ်ႇလႄႈ ၸင်ႇမႃးၺႃးၼၢင်းမူဝ်ၶၢဝ်ယဝ်ႉ၊ မၼ်းမႃးလႆႈႁၼ် ၼၢင်းမူဝ်ၶၢဝ် ၼင်ႇၼႆ ၼႂ်းၸႂ်မၼ်းၸၢႆး ပဵၼ်ဝႆႉမဵဝ်းၼိုင်ႈ လွမ်လွမ်ၸႂ်လဵၵ်ႉၶေႃးၶူမ်ယူႇ မၼ်းလွမ်ဝူၼ်ႉပွင်ႇ ၼႂ်းၸႂ်မၼ်းၼင်ႇၼႆယဝ်ႉ။
“ဢေႃႈ ... မူဝ် ... မူဝ်ပေႃးတေႇၼႃႈႁိူၼ်းသေ သမ်ႉပေႃး မီးလုၵ်ႈၸၢႆးဢွၼ်ႇၵေႃႉၼိုင်ႈယဝ်ႉၼေႃ ... လုၵ်ႈၸၢႆးဢွၼ်ႇမူဝ်ၼႆႉ ႁၢင်ႈလီလႆႈမႄႈမၼ်းယဝ်ႉ”
မၼ်းၸၢႆးႁေႃႈၵႃး ဝူၼ်ႉမႃးၼင်ႇၼႆယူႇ လွင်ႈဝႃႈ မၼ်းပဵၼ် ၸၢႆးမွၼ်းၶိူဝ်းၼႆ မၼ်းဢမ်ႇလၢတ်ႈ ၽွင်းၼၼ် လုၵ်ႈၸၢႆးဢွၼ်ႇ ၼၢင်းမူဝ်ၶၢဝ်လႆႈႁၼ် ၵွင်ႈဢွၼ်ႇဢၼ်ၸၢႆးၶိူဝ်း ဢၢင်ႈသိုဝ်ႉမိူဝ်းပၢင် လွင်းၼၼ်ႉလႄႈ ၸၢႆးၸၢႆးၸင်ႇဝႃႈ
“မႄႈမႄႈ ... ၸၢႆးၶႂ်ႈလႆႈၵွင်ႈမဵဝ်းၼႆႉဢိူဝ်ႈ”
“ဢူဝ် ... လုၵ်ႈၸၢႆးၼႆႉ ၶႂ်ႈလႆႈမဵဝ်းၼိုင်ႈယဝ်ႉ ၶႂ်ႈလႆႈမဵဝ်း ၼိုင်ႈတိၵ်းတိၵ်းဝႃႈ တီႈႁိူၼ်းၵေႃႈ မီးဝႆႉယူႇ ဢၼ်ၼိုင်ႈၼႃႇ”
လုၵ်ႈၸၢႆးဢွၼ်ႇမၼ်း ႁဵတ်းၸႃႉသေ
“ဢိုဝ်း ... ႁိုဝ်း ... ၸၢႆးၶႂ်ႈလႆႈမဵဝ်းၼႆႉဢိူဝ်ႈ ဢၼ်တီႈႁိူၼ်းၼၼ်ႉ ဢမ်ႇလီ ယၢဝ်းယၢဝ်းသေ၊ ၸၢႆႈၶႂ်ႈလႆႈၵွင်ႈပွတ်းမဵဝ်းၼႆႉ”
“ၵမ်ႉ ... မႄႈမႄႈတေႁႅမ်ၸၢႆးယူႇၼႃႈ”
ၸၢႆးၸၢႆးႁႆႈသေ တုၵ်းယွၼ်းမႄႈၶဝ်ယူႇ
“ႁိုဝ်ႉႁိုဝ်ႉ ... ဢိုဝ်း ... ၸၢႆးၶႂ်ႈလႆႈၵွင်ႈပွတ်းၸိူင်ႉၼႆဢိူဝ်ႈ”
ၸဝ်ႈၵႃးၼၼ်ႉၵေႃႈ ၸင်ႇဝႃႈ
“ၸၢႆးၶႂ်ႈလႆႈမဵဝ်းၼႆႉႁႃႉ ... ဢဝ်လႄႈ ဢဝ်လႄႈ ႁိူဝ်ႈလုင်းလုင်းပၼ်ၸၢႆးဢိူဝ်ႈၼႃႈ”
ၼၢင်းမူဝ်ၶၢဝ်ၵေႃႈ ၵဵင်ၸႂ်ၵႂႃႇတႄႉတႄႉသေ
“ဢူဝ် ... ယႃႇပေပၼ်မၼ်းၶႃႈ တီႈႁိူၼ်းၵေႃႈ မီးဝႆႉယူႇ”
ယွၼ်ႉပိူဝ်ႈ ၸၢႆးမွၼ်ႈၶိူဝ်းဢူမ်ပူႉဝႆႉသေ လၢတ်ႈၵႂၢမ်းလႄႈ ၼၢင်းမူဝ်ၶၢဝ် ဢမ်ႇတွင်းသဵင်မၼ်း ၸၢႆးမွၼ်းၶိူဝ်းၸင်ႇဝႃႈ
“ၵေႃႈယဝ်ႉလႄႈ လုၵ်ႈဢွၼ်ႇၼႆၼႃႇ ထုင်းၸၢမ်ႇၶဝ်ၼႆႉတႄႉ ႁၼ်သင်ၵေႃႈၶႂ်ႈလႆႈယဝ်ႉ ပေႃးဢမ်ႇလႆႈ သမ်ႉႁႆႈယဝ်ႉ၊ ပေႃးလႆႈၼႆသမ်ႉ ၸူမ်းသေလဵၼ်ႈလဵၼ်ႈယႃႉယႃႉယဝ်ႉ ... တိူင်းမၼ်းလႄႈ”
ၸၢႆးၸၢႆးလႆႈၵွင်ႈၼၼ်ႉလႄႈ မၼ်းပဵၼ်ဢၼ်ၸူမ်းတႄႉတႄႉသေ မၼ်းၸင်ႇယိပ်းတူၺ်းသေ ထၢမ်ဝႃႈ
“လုင်ႈလုင်း ပိူၼ်ႈႁဵတ်းႁိုဝ်ယိုဝ်းၼႆႉ”
ၸၢႆးၶိူဝ်းၵေႃႈ ငၢဝ်ႉၼဵၼ်မၼ်းၼႄ ၸၢႆးၸၢႆးယဝ်ႉ
“ၼႄႈ ပိူၼ်ႈႁဵတ်းၼႆယိုဝ်းဢိူဝ်ႈ”
တူၵ်ႉ တူၵ်ႉ တူၵ်ႉ တူၵ်ႉ တိဝ်ႉ တိဝ်ႉ ဝီး ဝီး
ၸၢႆးၸၢႆးၵေႃႈ ငၢဝ်ႉၼဵၼ်မၼ်းသေ ယိုဝ်းတူၺ်းယူႇ
တူၵ်ႉတူၵ်ႉ
“ငၢဝ်ႉႁႅင်းႁႅင်းလေႃႇၸၢႆးၸၢႆး”
တူၵ်ႉတူၵ်ႉတူၵ်ႉတူၵ်ႉ တိဝ်ႉတိဝ်ႉ ဝီးဝီး
“ဢိူဝ်ႈၸႂ်ႈယဝ်ႉ ပေႃးငၢဝ်ႉႁႅင်းႁႅင်းၼႆ မၼ်းမေႃးၼမ်ၼမ်ယဝ်ႉ”
လုင်းလုင်း ... ၵွင်ႈမဵဝ်းၼႆႉ ပေႃးယိုဝ်းပိူၼ်ႈ ၸွင်ႇတၢႆႁိုဝ်”
ၸၢႆးမွၼ်းၶိူဝ်းလႄႈ ၼၢင်းမူဝ်ၶၢဝ် ၸူမ်းၶူဝ်ၵႂႃႇတႄႉတႄႉ
“ၵွင်ႈမဵဝ်းၼႆႉတႄႉ ဢမ်ႇတၢႆ ၸၢႆးၸၢႆး ဢၼ်လုၵ်ႈသိုၵ်း ၶဝ်ယိပ်းၼၼ်ႉၵူၺ်းဢိူဝ်ႈ ၸၢင်ႈတၢႆဢိူဝ်ႈမဵဝ်းၼၼ်ႉ”
“ၸၢႆးၸၢႆးလႆႈႁၼ်ၼႂ်း တီႇဝီႇတီႈႁိူၼ်းႁဝ်း ပိူၼ်ႈဢဝ်ၵွင်ႈသေ ယိုဝ်းၵၼ်တၢႆဢိူဝ်ႈ”
ၸၢႆးမွၼ်းၶိူဝ်း ပဵၼ်ဢၼ်လႆႈၸႂ်သေ မၼ်းၸင်ႇထၢမ်ဝႃႈ “ၶဝ်ႁဵတ်းႁိုဝ်ယိုဝ်းၵၼ်လႃႇ တီႈၼႂ်းထီႇဝီႇၼၼ်ႉ” ၸၢႆးၸၢႆးၵေႃႈ ႁဵတ်းယိူင်ႈၼႄ ၸိူင်ႉၼင်ႇ ပိူၼ်ႈယိုဝ်းၵၼ် ပႅင်ႈၼင်ႇ ဢၼ်မၼ်းလႆႈႁၼ်ၼၼ်ႉယဝ်ႉ
“ၶဝ်ႁဵတ်းၼႆယိုဝ်းၵၼ် “တူင်ႉတူင်ႉ”ၼႆသေ ၵေႃႉၼိုင်ႈ သမ်ႉဝႃႈ“ဢႃႉ”ၼႆသေ လူမ်ႉတၢႆပႅတ်ႈယဝ်ႉ”
ၶႃသွင်ၵေႃႉ လွမ်တူၺ်းၸၢႆးၸၢႆးသေယုမ်ႉယူႇ ၸၢႆးမွၼ်းၶိူဝ်းၸင်ႇဝႃႈ
“လုၵ်ႈဢွၼ်ႇၵေႃႉၼႆႉတႄႉ ပေႃးယႂ်ႇမႃးတေလႅတ်းတႄႉတႄႉ ဢိူဝ်ႈၼႆႉ” ၼၢင်းမူဝ်ၶၢဝ်ၵေႃႈ ၸင်ႇဝႃႈ
“ၸႂ်ႈဢေႃႈ ... တေလႅတ်းယူႇယူဝ်ႉ၊ ၵႂႃႇတီႈလႂ်ၵေႃႈ ဢမ်ႇလႃႈလီၵူဝ်ပိူၼ်ႈၶႃႈလူင်”
“လီဢိူဝ်ႈၼၼ်ႉ လုၵ်ႈဢွၼ်ႇၼႆႉ မၼ်းလူဝ်ႇလႆႈႁတ်းႁၢၼ်ၸဵမ်လဵၵ်ႉ ၸင်ႇတေလီယဝ်ႉ၊ ပေႃးၶဝ်ႁတ်းဝႆႉ ၸဵမ်လဵၵ်ႉၼႆ ယႂ်ႇမႃးၵေႃႈၶဝ်ႁတ်းယဝ်ႉ ပေႃးၶဝ်ၵူဝ်ဝႆႉၸဵမ်မိူဝ်ႈလဵၵ်ႉၼႆ ယႂ်ႇမႃးၵေႃႈ ၶဝ်ဢမ်ႇပေႃးႁတ်းၵူၺ်း”
“ၸႂ်ႈဢေႃႈ”
ၸၢႆးမွၼ်းၶိူဝ်းၵေႃႈ ႁေႃႈၵႃးသေ မႃးသူင်ႇၽႅဝ်တီႈႁိူၼ်း ၼၢင်းမူဝ်ၶၢဝ်ၶဝ်ယဝ်ႉ ၼၢင်းမူဝ်ၶၢဝ် လူင်းၵႃးမႃးသေထၢမ်ဝႃႈ
“တေလႆႈပၼ်ၵႃႈႁိုဝ်ၶႃႈ”
“ႁဵင်ႁႃႈပၢၵ်ႇပႅၵ်ႉဢိူဝ်ႈ”
“ၵႃႈႁိုဝ်ၶႃႈၵေႃ”
“သိပ်းႁႃႈ”
ၼၢင်းမူဝ်ၶၢဝ်ၵေႃႈ ၽုၺ်ႇထူင်ငိုၼ်းမၼ်း ၸၢႆႇၼမ်ယဝ်ႉလႄႈ ထူင်ငိုၼ်းမၼ်း ဢမ်ႇပေႃးၵိုတ်းငိုၼ်းၼမ်သင်ယဝ်ႉ၊ ၵွပ်ႈၼႆသွၵ်ႈ ၵႂႃႇသွၵ်ႈၶိုၼ်း မၼ်းၼၢင်းၵေႃႈၸင်ႇလႆႈဢဝ် မၢင်ၶၼ်သွင်မၢင်ပၼ် ၵႂႃႇယဝ်ႉ၊ ၸၢႆးမွၼ်းၶိူဝ်းၵေႃႈ သမ်ႉဢမ်ႇမီးၸေႈတႃႇတေတုမ်ႉလႄႈ မၼ်းၸင်ႇဝႃႈ
“မၢင်ႁႃႈပျႃးဢမ်ႇမီးၶႃႈႁႃႉ”
ၼၢင်းမူဝ်ၶၢဝ် ႁႃတူၺ်းၼႂ်းထူင်ငိုၼ်းမၼ်းၵေႃႈ ဢမ်ႇမီးလႄႈ မၼ်းၼၢင်းၸင်ႇဝႃႈ
“ဢမ်ႇမီးယဝ်ႉ ... ဢမ်ႇတုမ်ႉၵေႃႈလႆႈယဝ်ႉ”
“ဢူဝ် ... ဢမ်ႇၸႂ်ႈသႄႈ ... ၵမ်ႉလႄႈ တေႁႃတူၺ်းၵွၼ်ႇ ၶႄးတေမီးယူႇယူဝ်ႉ”
ၸၢႆးမွၼ်းၶိူဝ်း ထူၵ်းငိုၼ်းမၼ်းဢွၵ်ႇသေ မႃးႁႃတူၺ်းၵေႃႈ ဢမ်ႇႁၼ် ၸင်ႇႁၼ်မၢင်ႁႃႈပျႃး ဢၼ်မီးဝႆႉၼႂ်းထွင်းမၼ်းၼၼ်ႉ မၢင်ၼိုင်ႈလႄႈ မၼ်းဢဝ်တုမ်ႉပၼ်ၵႂႃႇယဝ်ႉ”
“ၶွပ်ႈၸႂ်ယဝ်ႉ တေၵႂႃႇၵွၼ်ႇၼႃႈ ႁႄႉၸၢႆးၸၢႆး လုင်းလုင်း ၵႂႃႇၵွၼ်ႇၼႃႈ တႃးတႃ ပႆးပႆ မွၼ်းမွၼ်း”
ၸၢႆးၸၢႆးၵေႃႈ ၶိုၼ်းယုၵ်ႉမိုဝ်းၼႄ ၸၢႆးၶိူဝ်းသေ
“လုင်းလုင်း တႃးတႃ မွၼ်းမွၼ်း”
“လုၵ်ႈၸၢႆး ၸူမ်းယဝ်ႉၶႃႈ မိူဝ်းလွႆးလွႆးၼႆလႄႈ”
“လုင်းလုင်း ၸူမ်းယဝ်ႉၶႃႈ မိူဝ်းလွႆးလွႆး”
ၸၢႆးၸၢႆးဝၢႆႇ တူၺ်ႈမႄႈၶဝ် မၼ်းဢမ်ႇႁၼ်မႄႈၶဝ်ႁဵတ်း မွၼ်းမွၼ်းလႄႈ မၼ်းၸၢႆး ၸင်ႇၸႂ်ႉႁႂ်ႈမႄႈၶဝ်ႁဵတ်းမွၼ်းမွၼ်းယဝ်ႉ
“မႄႈမႄႈ ၵေႃႈႁဵတ်းတႃးတႃ မွၼ်းမွၼ်းပၼ် လုင်းလုင်း လႄႈ ႁဵတ်းလႄႈ မႄႈမႄႈ”
ၼၢင်းမူဝ်ၶၢဝ်ၵေႃႈ ၵၵ်းၵႆဝႆမိုဝ်းၼႄ ၸဝ်ႈၵႃးယဝ်ႉ
“မႄႈမႄႈဝႃႈ မိူဝ်းလွႆးလွႆး ၼႆလႄႈ”
“မိူဝ်းလွႆးလွႆး”
ၸၢႆးမွၼ်းၶိူဝ်းၵေႃႈ ၵၵ်းၵႆဝႆမိုဝ်းတေႃႇ ၶႃသွင်ၵေႃႉသေ ႁေႃႈၵႃးမိူဝ်းယဝ်ႉ၊ ဢွၼ်တၢင်းၼႆႉ မၼ်းၸၢႆး ဢမ်ႇတွၼ်ႉၶိုၼ်ႈမႃး တူၼ်ႈတီးသေပွၵ်ႈ၊ ပွၵ်ႈၼႆႉ မၼ်းလႅၵ်ႈလၢႆႈႁၢင်ႈသေမႃးၼႆ သမ်ႉလိူၵ်ႈလိူၵ်ႈ မႃးၺႃးၼၢင်းမူဝ်ၶၢဝ်လႄႈ မၼ်းၸၢႆးသိူဝ်းၸႂ်ၵေႃႈပႃး ဢမ်ႇသိူဝ်းၸႂ် ၵေႃႈပႃး ၼင်ႇၵၼ်ယဝ်ႉ၊ ငိုၼ်းဢၼ်ၼၢင်းမူဝ်ၶၢဝ် ပၼ်မၼ်းမႃး မၢင်ၶၼ်သွင်မၢင်ၼၼ်ႉ ၽိူဝ်ႇမၼ်းမႃးလိတ်ႈတူၺ်းၼႆ လႆႈႁၼ်တႅမ်ႈ လိၵ်ႈဝႆႉၼင်ႇၼႆ
✽ ဢမ်ႇထၢင်ႇတေမႃး - ထူပ်းၺႃးႁၼ်ၵၼ်
မၢင်ၶၼ်ႁႃႈပျႃး - လႆႈမႃးလႅၵ်ႈၵၼ်
ပဵၼ်ဢၼ်ၸႂ်တိတ်း - ဝူၼ်ႉၶိတ်းၶိုၼ်းယူႇၵူႈဝၼ်းၼႂ်
ထႅင်ႈမၢင်ၼိုင်ႈတႄႉ
ထူပ်းၺႃးၵၼ်ၵေႃႈ - တေႃႈပႆႇႁူႉၸိုဝ်ႈ
ၵေႃႉမႃးလိုဝ်ႈသဝ်း - ၵေႃႉၶိုၼ်းၽၢတ်ႇႁဝ်းၵႂႃႇယဝ်ႉ။
မၼ်းၸၢႆးတူၺ်းမၢင်ၶၼ်သွင်မၢင်ၼၼ်ႉသေ ထူၺ်ႈၸႂ် ယႂ်ႇၸႂ်လူင်ယူႇယဝ်ႉ။