မွၵ်ႇလူင်ႇလဵဝ်/တွၼ်ႈသၢမ်သိပ်းသၢမ်
ဝၼ်းမိူဝ်ႈၼႆႉ ၽွင်းမိူဝ်ႈၵၢင်ၼႂ်ၼၼ်ႉ လုၵ်ႈႁဵၼ်းၶဝ် ဢွၼ်ၵၼ်မႃးၵၼ်ႇတေႃးမေႃသွၼ်ၶဝ် ၸၢႆးမွၼ်းၶိူဝ်း ဢၼ်တေ ၶိုၼ်းပွၵ်ႈမိူဝ်းၼၼ်ႉယဝ်ႉ၊ တီႈဝၢၼ်ႈလွႆပျႃး ဢၼ်မၼ်းမႃးႁဵတ်း မေႃသွၼ်ၼႆႉ ဢွၼ်တၢင်း ၶဝ်လူဝ်ႇမေႃသွၼ်ထႅင်ႈၵေႃႉၼိုင်ႈၼႆလႄႈ ၸၢႆးမွၼ်းၶိူဝ်းၵေႃႈ ၸင်ႇတၢင်တူဝ် တီႈဢၼ်လူဝ်ႇဝႆႉၼၼ်ႉသေ ႁဵတ်းမေႃသွၼ်ၶဝ်မႃးယဝ်ႉ။
ယၢမ်းလဵဝ် မေႃသွၼ်မႂ်ႇထႅင်ႈၵေႃႉၼိုင်ႈ ၽႅဝ်မႃးယဝ်ႉလႄႈ မၼ်းၸၢႆးၵေႃႈ လႆႈဝႄႈဢွၵ်ႇပၼ်ယဝ်ႉ၊ ယွၼ်ႉပိူဝ်ႈ ၼမ်ႉၸႂ်ၸေႇတၼႃႇမၼ်း လီလႄႈ ၶဝ်ဢွၼ်ၵၼ်သေးလၢႆမၼ်းသေ သိုပ်ႇၸႂ်ႉ ႁႂ်ႈမၼ်းယူႇတီႈဝၢၼ်ႈၶဝ်ၼၼ်ႉယူႇ ၵူၺ်းၵႃး မၼ်းၽၢတ်ႇပီႈဢၢႆး ပီႈၼၢင်းမၼ်းမႃး ႁိုင်ယဝ်ႉၵေႃႈပိူင်ၼိုင်ႈ မိူဝ်ႈဝႃးမၼ်းလႆႈၵႂႃႇထူပ်း ႁၼ်ၼၢင်းမူဝ်ၶၢဝ်မႃးယဝ်ႉၵေႃႈပိူင်ၼိုင်ႈလႄႈ မၼ်းပွၵ်ႈမႃးသေ မႃးလၢတ်ႈၼႄၵူၼ်းလူင်ၶဝ် လွင်ႈဢၼ်မၼ်းတေၶိုၼ်းမိူဝ်းၼၼ်ႉ ၼႆယဝ်ႉ။
ၵွပ်ႈၼႆ မိူဝ်ႈၼႆႉမိူဝ်ႈၸဝ်ႉၼၼ်ႉ လုၵ်ႈႁဵၼ်းမၼ်း ၸင်ႇဢွၼ်ၵၼ်မႃးၵၼ်ႇတေႃးမၼ်း ၼႅတ်ႈႁဵတ်းပွႆးသူင်ႇသင်ႇမေႃသွၼ်ၶဝ် လဵင်ႉၶဝ်ႈသေ ႁဵတ်းလွင်ႈတူင်ႉတၵ်ႉၸၢႆးမွၼ်းၶိူဝ်းယူႇ၊ ဝၢႆးသေ တၢင်းၶပ်ႉၶိုင်ၶဝ်ၸိူဝ်းၼၼ်ႉ ယဝ်ႉၵႂႃႇသဵင်ႈ ၸၢႆးမွၼ်းၶိူဝ်းၵေႃႉလဵဝ် ၶိုၼ်ႈမႃးတီႈၼိူဝ်လွႆၵွင်းမူး လွႆပျႃးသေ မႃးၶုပ်ႉဝႆႈၽြႃးယူႇ ယွၼ်ႉပိူဝ်ႈ တေလႆႈၽၢတ်ႇယၢၼ်လုၵ်ႈႁဵၼ်းမၼ်း တေလႆႈၽၢတ်ႇယၢၼ် တီႈဢၼ်မႃးယႃၸႂ်မႆႈမၼ်းၼၼ်ႉလႄႈ ၼႂ်းၸႂ်မၼ်းၸၢႆး ပဵၼ်ဢၼ် ၶေႃးၶူမ်မႃးတဵမ်ဢူၵ်းတဵမ်ၸႂ်သေ ၼမ်ႉတႃမၼ်းၸၢႆး လႆယွႆႉတူၵ်းယူႇ။
မၼ်းယူႇၼိူဝ်လွႆၵွင်းမူးၼၼ်ႉသေ မုင်ႈလွမ်တူၺ်းဝၢၼ်ႈ ဢွၼ်ႇဢၼ်မၼ်းမႃးယူႇသဝ်း သၢမ်ပီပၢႆၼၼ်ႉယူႇ၊ ၵွပ်ႈသင် တေလႆႈၽၢတ်ႇယၢၼ် ဝၢၼ်ႈဢွၼ်ႇၼႆသေ မၼ်းၸၢႆးသမ်ႉၶႂ်ႈႁႆႈၼႆ မၼ်းၸၢႆးဝူၼ်ႉဢမ်ႇလႆႈ၊ တၢမ်းၶမ်ႈ ၽွင်းမိူဝ်ႈမၼ်းၶိုၼ်ႈမႃးမီး ၼိူဝ်လွႆၵွင်းမူးၼၼ်ႉ ၸၢႆးၶမ်းၵေႃႈ ႁေႃႈၵႃးၽႅဝ်မႃး တီႈဝၢၼ်ႈလွႆပျႃး မႃးထၢမ်ၶၢဝ်ႇၸၢႆးၶိူဝ်းသေ ၸွမ်းၶိုၼ်ႈမႃး တီႈလွႆၵွင်းမူးဢွၼ်ႇၼၼ်ႉ ယဝ်ႉ မၼ်းၸင်ႇထၢမ်ဝႃႈ
“မေႃသွၼ်သူ မီးၼိူဝ်လွႆၼႆႉႁႃႉ”
“မီးဢိူဝ်ႈ ... မေႃသွၼ်ဝႃႈ ႁႂ်ႈႁဝ်းပႂ်ႉဝႆႉတီႈၼႆႈသေ လၢတ်ႈ ယႃႇပေပၼ်ၽႂ်ၶိုၼ်ႈမိူဝ်းၵွၼ်ႇၼႆယဝ်ႉ”
လုၵ်ႈဢွၼ်ႇၸိူဝ်းၼႆႉၵေႃႈ ပိၵ်ႉတၢင်းမၼ်းဝႆႉလႄႈ ၸၢႆးၶမ်းၸင်ႇဝႃႈ
“ၵဝ်ပဵၼ်တႆးၵေႃႉမေႃသွၼ်သူဢိူဝ်ႈ ၵဝ်မႃးႁႃမၼ်းဢိူဝ်ႈၼႆႉ ပၢႆႈလႄႈ ၵဝ်တေၵႂႃႇၸူးမၼ်းဢိူဝ်ႈ”
လုၵ်ႈဢွၼ်ႇၸိူဝ်းၼၼ်ႉ ပၢႆႈပၼ်တၢင်းၸၢႆးၶမ်းယဝ်ႉ ၸၢႆးၶမ်းၵေႃႈ ၸင်ႇဢႅၼ်ႇၶိုၼ်ႈလွႆသေ ၵႂႃႇႁၼ်ၸၢႆးၶိူဝ်း ဢၼ်တိုၵ်ႉငဝ်တူၺ်းၵႆၵႆၼၼ်ႉယဝ်ႉ မၼ်းၸင်ႇႁွင်ႉဝႃႈ
“ၸၢႆးၶိူဝ်း”
ၸၢႆးၶိူဝ်းၵေႃႈ ၸဵမ်မိူဝ်ႈမၼ်းမႃးယူႇတီႈဝၢၼ်ႈၼႆႉ ၽႂ်ၵေႃႈ ဢမ်ႇတွၼ်ႉႁွင်ႉမၼ်း“ၸၢႆးၶိူဝ်း”ၼႆသေပွၵ်ႈ၊ ၵွပ်ႈၼႆ မၼ်းၸင်ႇ ၼႅတ်ႈဝၢႆႇတူၺ်းၽႂ်းၽႂ်းယဝ်ႉ လႆႈႁၼ်ၸၢႆးၶမ်းလႄႈ ယွၼ်ႉပိူဝ်ႈၶဝ် ၽၢတ်ႇယၢၼ်ၵၼ်ႁိုင်သေ ၶိုၼ်းမႃးၺႃးၵၼ်လႄႈ ၶႃပဵၼ်ဢၼ်ၸူမ်းသိူဝ်းၼင်ႇၵၼ်သေ ဢႅၼ်ႇမႃးၵွတ်ႇၵၼ်ဝႆႉယူႇယဝ်ႉ။
“ၸၢႆးၶမ်း မႂ်းလုၵ်ႉတီႈလႂ်မႃး”
“ၵဝ်လုၵ်ႉတီႈတူၼ်ႈတီးသေ တင်ႈၸႂ်မႃးႁႃမႂ်းဢိူဝ်ႈ ၸၢႆးၶိူဝ်း မိူဝ်ႈဝႃးမႂ်းလုၵ်ႉတူၼ်ႈတီးမႃး ဢမ်ႇၸႂ်ႈႁႃႉ”
“ၸႂ်ႈဢိူဝ်ႈ ... မႂ်းႁဵတ်းႁိုဝ်ႁူႉ ၸၢႆးၶမ်း”
“ၼႂ်ၼႆႉ မူဝ်ၶၢဝ်လႆႈႁၼ် ဢၼ်မႂ်းဢဝ်မၢင်ႁႃႈပျႃး တုမ်ႉပၼ်မၼ်းၼၼ်ႉသေ မႃးၸူးႁႃးၸၢမ်သႅင်းလႄႈ ႁဝ်းယင်းၵႂႃႇႁႃမႂ်း တီႈႁိူၼ်းၸၢႆးသၢမ်တိပ်ႉၶဝ်ၵွၼ်ႇဢိူဝ်ႈ၊ လႆႈႁူႉဝႃႈ မႂ်းမႃးတီႈၼႆႈလႄႈ ၵဝ်ၸင်ႇၸွမ်းမႃးႁႃမႂ်းဢိူဝ်ႈ”
ၸဵမ်မိူဝ်ႈ ၸၢႆးၶိူဝ်းပၢႆႈဢွၵ်ႇႁိူၼ်းမႃးၼၼ်ႉ မၼ်းၸၢႆးတိုၼ်း ဢမ်ႇထၢမ်ၶၢဝ်ႇငၢဝ်း ဢမ်ႇၸွပ်ႇၶၢဝ်ႇငၢဝ်းၽႂ်လႄႈ လွင်ႈဝႃႈၸၢႆးၶမ်း ၶႃၼၢင်းၸၢမ်သႅင်း ဢဝ်ၵၼ်ၼၼ်ႉၵေႃႈ မၼ်းပႆႇႁူႉထိုင်ၵွပ်ႈၼႆ မၼ်းၸင်ႇထၢမ်ဝႃႈ
“ၸၢႆးၶိူဝ်း ၶိူဝ်သွင်ၵေႃႉ ၸၢမ်သႅင်း ဢဝ်ၵၼ်ယဝ်ႉႁႃႉ”
“ဢဝ်ၵၼ်ပီၵၢႆဢိူဝ်ႈ ၵဝ်မႃးယူႇတီႈႁိူၼ်းၶဝ်သေ ႁဵတ်ႊၵၢၼ်လုမ်း တီႈတူၼ်ႈတီးဢိူဝ်ႈ၊ ဢၼ်ၵဝ်မႃးႁႃမႂ်းၼႆႉၵေႃႈ မူဝ်လႄႈ ၸၢမ်သႅင်းၸႂ်ႉမႃးႁႃဢိူဝ်ႈ”
“မူဝ်ၸႂ်ႉမႃးႁႃၼႆႁႃႉ ... ၸၢႆးၶမ်း”
“ၸႂ်ႈဢိူဝ်ႈ”
“မၼ်းပေႃးတေႇၼႃႈႁိူၼ်းၸွမ်း ၸၢႆးသႅင်မိူင်းသေ ပေႃးမီး လုၵ်ႈဢွၼ်ႇၵေႃႉၼိုင်ႈဝႆႉယဝ်ႉ ဢမ်ႇၸႂ်ႈႁႃႉ ၸၢႆးၶမ်း”
“ၸၢႆးၶိူဝ်း လွင်ႈၸၢႆးသႅင်မိူင်းၼၼ်ႉ မႂ်းဢမ်ႇငိၼ်းၶၢဝ်ႇမၼ်းသင်ႁႃႉ”
“ၸဵမ်မိူဝ်ႈ ၵဝ်ဢွၵ်ႇႁိူၼ်းမႃးၼၼ်ႉ ၵဝ်ဢမ်ႇထၢမ်ၶၢဝ်ငၢဝ်းၽႂ်သေၵေႃႉလႄႈ ၵဝ်ဢမ်ႇလႆႈႁူႉသင် ၸၢႆးၶမ်း”
“ၸၢႆးသႅင်မိူင်းတၢႆယဝ်ႉလူး”
“ယွၼ်ႉပိူဝ်ႈသင်လႄႈ မၼ်းတၢႆလႃႇ”
“မၼ်းသူႇယႃႈၽိၼ်ႇၽိူၵ်ႇဢိူဝ်ႈ သမ်းၵေႃႈသမ်းယဝ်ႉ ၵွပ်ႈၼႆ မၼ်းသမ်းယႃႈၽိၼ်ႇၽိူၵ်ႇၽိတ်းသေ တၢႆၵႂႃႇယဝ်ႉယဝ်ႈ”
“ဢေႃႈ ... ၸၢႆးသႅင်မိူင်းတၢႆယဝ်ႉၼႆႁႃႉ ... ပေႃးၼႆၶႃသွင် ၵေႃႉမူဝ် လႆႈဝႆႉ လုၵ်ႈၸၢႆးဢွၼ်ႇၵေႃႉၼိုင်ႈဢိူဝ်ႈၼေႃႈ”
ၸၢႆးၶမ်း ၸင်ႇၶူဝ်ဢွၵ်ႇသဵင်ႁႅင်းႁႅင်းသေ
“ႁႃး ... ႁႃး ... ႁႃး ... ဢမ်ႇၸႂ်ႈၵူၺ်း ၸၢႆးၶိူဝ်း”
“ပေႃးၼႆ ၸၢႆးၸၢႆးၼၼ်ႉ ပဵၼ်လုၵ်ႈၽႂ်လႃႇ”
“ပဵၼ်ပီႈဢၢႆႈလူင် ၼၢင်းမူဝ်ၶၢဝ်ၶဝ် ၵဵပ်းလဵင်ႉဝႆႉဢိူဝ်ႈ၊ ၶႃသွင်ၵေႃႉၽူဝ်မႄးသမ်ႉ ၵုမ်ႇလႆႈၵႂႃႇႁဵတ်းၵၢၼ် တီႈႁူင်းယႃယူႇတႃႇသေႇလႄႈ လုၵ်ႈဢွၼ်ႇၵေႃႉၼၼ်ႉ ယႂ်ႇမႃးၼႂ်းမိုဝ်းမူဝ်ၶၢဝ်သေ မူဝ်ၶၢဝ်ၵေႃႈ သမ်ႉမီးသမ်ႇယေႃးၸိၼ်ႇၼိူဝ်ၸၢႆးၸၢႆးလႄႈ မၼ်းၼၢင်းၶိုၼ်းယွၼ်းဢဝ် တီႈပီႈဢၢႆႈၶဝ်ယဝ်ႉ၊ ၵွပ်ႈၼႆၸၢႆးၸၢႆးၼၼ်ႉ ပဵၼ်လုၵ်ႈၵဵပ်းၼၢင်းမူဝ်ၶၢဝ်ဢိူဝ်ႈ ၸၢႆးၶိူဝ်း”
“မူဝ်လႄႈ ၸၢႆးသႅင်မိူင်းတၼ်းတႄႇၼႃႈႁိူၼ်းလူၺ်ႈၵၼ် ယူႇႁႃႉ ၸၢႆးၶမ်း”
“ဢမ်ႇတၼ်းလႆႈတႄႇ ၸၢႆးသႅင်မိူင်း သမ်းယႃႈၽိူၵ်ႇသေ တၢႆၵႂႃႇပေႃးလႆႈသၢမ်ပီယဝ်ႉ၊ ဢေႃႈ ... ၸၢႆးၶိူဝ်း ... မႂ်းလူးတႄႇၼႃႈႁိူၼ်းယဝ်ႉယဝ်ႈႁႃႉ ၸၢႆသၢမ်တိပ်ႉလၢတ်ႈဝႃႈ မၼ်းႁၼ်မႂ်းသိုဝ်ႉ တၢင်းလုၵ်ႈဢွၼ်ႇမိူဝ်းၼႆယဝ်ႉ ပဵၼ်တႃႇလုၵ်ႈဢွၼ်ႇမႂ်းႁႃႉၸၢႆးၶိူဝ်း”
“ၸႂ်ႈဢိူဝ်ႈ ၸၢႆးၶမ်း”
ၸၢႆးၶမ်းၸႂ်လူႉၵႂႃႇသေ ၶိုၼ်းထၢမ်ဝႃႈ
“မႂ်းဢဝ်ၽႂ်ၸၢႆးၶိူဝ်း ... လုၵ်ႈမႂ်းမီးလၢႆၵေႃႉယဝ်ႉ”
“မီးႁူၵ်းသိပ်းပၢႆသၢမ်ၵေႃႉဢိူဝ်ႈ ... ၸၢႆးၶမ်း”
ၸၢႆးၶမ်း ဢၢမ်းၵႂႃႇသေ
“ဢလူဝ်ႉ ... ဢမ်ႇၸႂ်ႈယူဝ်ႉ ၸၢႆးၶိူဝ်း”
“ၸႂ်ႈဢိူဝ်ႈ မိူဝ်ႈမႂ်းၶိုၼ်ႈလွႆမႃးၼၼ်ႉ မႂ်းဢမ်ႇႁၼ်ႁႃႉ ၶဝ်ပႂ်ႉဝႆႉယူႇတီႈတိၼ်လွႆၼၼ်ႉ ၵမ်ႈၽွင်ႈဢိူဝ်ႈ”
ၸၢႆးၶမ်းၵေႃႈ ၶိုၼ်းပွင်ႇၸႂ်ဝႃႈ ပဵၼ်လုၵ်ႈႁဵၼ်းဢၼ်ၸၢႆးမွၼ်းၶိူဝ်း မႃးသွၼ်လိၵ်ႈပၼ်ၶဝ်ၼၼ်ႉၼႆလႄႈ မၼ်းၸင်ႇဝႃႈ
“ဢေႃႈ ... ပဵၼ်လုၵ်ႈႁဵၼ်းမႂ်းႁႃႉ ၵဝ်ယူဝ်ဝႃႈပဵၼ် လုၵ်ႈၸၢႆးမႂ်းၼႆၼႃး မိူဝ်ႈၸဝ်ႉၼၼ်ႉ ၵဝ်ပေႃးၸႂ်ဢမ်ႇလီၵႂႃႇယဝ်ႉၼႆႉ”
“ၵွပ်ႈသင်ၸႂ်ဢမ်ႇလီလႃႇ ၸၢႆးၶမ်း”
“ၵဝ်ၵူဝ်မႂ်းႁၵ်ႉၵေႃႉမႂ်ႇသေ ၵူဝ်ၶိူဝ်မူဝ်ၶၢဝ် ဢမ်ႇၺႃးၵၼ် ၼၼ်ႉဢိူဝ်ႈ ယွၼ်ႉပိူဝ်ႈ လိၵ်ႈၸၢမ်သႅင်းလႄႈ မႂ်းၸင်ႇပၢႆႈဢွၵ်ႇႁိူၼ်း ဢမ်ႇၸႂ်ႁႃႉ ၵွပ်ႈၼႆ တႃဢၼ်ၶိူဝ်သွင်ၵေႃႉ မူဝ်ၶၢဝ် တေၶိုၼ်းထူပ်းၵၼ်ၼၼ်ႉ ပုၼ်ႈၽွၼ်းလူင်မၼ်း မီးတီႈ ႁႃးသွင်ၵေႃႉၸၢမ်သႅင်း သဵင်ႈသဵင်ႈယဝ်ႉ၊ ႁႃးသွင်ၵေႃႉ ၸၢမ်သႅင်းၵေႃႈ ထၢမ်ႁႃၶၢဝ်ႇမႂ်းၵူႈတီႈတီႈယဝ်ႉၼႆႉ ... ႁူး ... ဢလူဝ်ႉ ... မိူဝ်ႈၼႆႉတႄႉ လႆႈဝႃႈပုၼ်ႈၽွၼ်း ႁႃးၸၢမ်သႅင်း မဝ်ၵႂႃႇတႄႉတႄႉယဝ်ႉ ၵွပ်ႈၼႆ ၸၢႆးၶိူဝ်းမိူဝ်းၸွမ်းၵဝ်လႄႈ မူဝ်ၵေႃႈ တေၸူမ်းသိူဝ်းပႂ်ႉမႂ်းဝႆႉယူႇဢိူဝ်ႈ”
“ၸၢႆးၶမ်း ယူဝ်ဢူႈမႄႈ မူဝ်ၶဝ်ဢမ်ႇၽွမ်ႉၵဝ်ယူဝ်ႉ”
“ၽွမ်ႉၼႅၼ်ႇယဝ်ႉ မူဝ်ၶၢဝ်ၵေႃႈ လၢတ်ႈၼႄဢူႈမႄႈၶဝ် သဵင်ႈသဵင်ႈယဝ်ႉ လွင်ႈမႂ်းၼႆႉ၊ ဢူႈၶဝ်တႄႉ ၽွမ်ႉမႂ်းသုတ်းယဝ်ႉ၊ မၼ်းဝႃႈမၼ်းလႆႈၸႂ်မႂ်းၸဵမ်မိူဝ်ႈ သူၵႂႃႇဝႆႈၽြႃးၼႂ်းၼွင်ၼၼ်ႉၵွၼ်ႇၼႆယဝ်ႉ ပီႈဢၢႆႈၶဝ်ၸိူဝ်းၼၼ်ႉၵေႃႈ ၽွမ်ႉသဵင်ႈသဵင်ႈယဝ်ႉ”
“မႄႈၶဝ်ၼၼ်ႉလူႈ ... ၸၢႆးၶမ်း”
“တီႈလဵဝ်မႄႈၶဝ် ဢမ်ႇႁတ်းမေႃးၸွမ်းသင်ယဝ်ႉ ယွၼ်ႉပိူဝ်ႈမႄႈၶဝ် တူၺ်းႁၼ်ၼႃႈငိုၼ်းၶမ်းသေ ဢဝ်မူဝ်ၽွမ်ႉၵၼ်ၸၢႆးသႅင်မိူင်း ဢၢႆႈၶီႈယႃႈၼၼ်ႉလႄႈ ဝၢႆးသေၶဝ်ႁူႉၸၢႆးသႅင်မိူင်း ပဵၼ်ၶီႈယႃႈၼႆ ၶဝ်ဢွၼ်ၵၼ်ထႃႉမႄႈၶဝ် ယႃႉလႅဝ်လွင်ႈထၢမ်ၵၼ်ၼၼ်ႉ ပႅတ်ႈၵွၼ်ႇယဝ်ႉ”
“ဢေႃႈ ... ၸိူင်ႉၼၼ်ႁႃႉ”
“ၸႂ်ႈဝႃႈၸႂ်ႈ ... ပေႃးဢမ်ႇၽိတ်းသေဢိတ်းယဝ်ႉ”
ၶႃသွင်ၵေႃႉၵေႃႈ လူင်းလွႆမႃးသေ မႃးၼွၼ်းၼႂ်းဝၢၼ်ႈ ၶိုၼ်းၼိုင်ႈယဝ်ႉ။