မွၵ်ႇလူင်ႇလဵဝ်/တွၼ်ႈသၢမ်သိပ်းသွင်
ထိုင်မႃးထႅင်ႈဝၼ်းၼိုင်ႈ ၼၢင်းမူဝ်ၶၢဝ် ဢၢင်ႈၵႂႃႇၸၢႆႇၵၢတ်ႇ လႄႈ မၼ်းမႃးထူၵ်းငိုၼ်း ၼႂ်းထူင်မၼ်းသေ ဢၢၼ်ႇတူၺ်းယူႇ၊ ၽွင်းမိူဝ်ႈမၼ်းမႃး လိတ်ႈတူၺ်းၸေႈႁႃႈပျႃးမႂ်ႇ ဢၼ်တူပ်ႉဝႆႉၼၼ်ႉ ၼႆ လႆႈႁၼ်တႅမ်ႈဝႆႉ ၼင်ႇၼႆယဝ်ႉ-
လႆႈမႃးႁၼ်ၵၼ် - ၸုဝ်ႈဢၼ်ၼိုင်ႈၵႅပ်ႉ
ၸူဝ်ႈၽႅပ်ႉတႃၵေႃႈ - ႁဝ်းတေႃႈဢမ်ႇလိုမ်း
တွင်းၵိုမ်းၼႂ်းၸႂ် - မိူဝ်ႈလႂ်ႁဝ်းႁႃး
တေၶိုၼ်းၺႃးၵၼ်ထႅင်ႈ။ ။
ၼၢင်းမူဝ်ၶၢဝ် လႆႈႁၼ်ၸေႈႁႃႈပျႃးၼၼ်ႉလႄႈ မၼ်းၶုၵ်းၸႂ်လႆႈ ပဵၼ်ငိုၼ်းဢၼ်မၼ်းလႅၵ်ႈပၼ် ၸၢႆးမွၼ်းၶိူဝ်းၼၼ်ႉၵမ်းလဵဝ်ယဝ်ႉ၊ လွင်ႈဢၼ်ငိုၼ်းမၢင်ႁႃႈပျႃးၼႆႉ ၶိုၼ်းၽႅဝ်မႃးတီႈမၼ်းၼႆၵေႃႈ မၼ်းၼၢင်းဝူၼ်ႉတူၺ်းၼႆ မၼ်းၼၢင်းတွင်းလီလီယူႇ ပဵၼ်ၸဝ်ႈၵႃး တႅၵ်ႉၸီႇမိူဝ်ႈဝႃးၼၼ်ႉ တုမ်ႉပၼ်မၼ်းယဝ်ႉ မၼ်းၼၢင်းဝူၼ်ႉၵႂႃႇဝူၼ်ႉၶိုၼ်းသေ ၵမ်းလိုၼ်းပွင်ႇၸႂ်ဝႃႈ ၸဝ်ႈၵႃးမိူဝ်ႈဝႃးၼၼ်ႉ ႁဵတ်းႁိုဝ်ၵေႃႈ ပဵၼ်ၸၢႆးမွၼ်းၶိူဝ်းယဝ်ႉၼႆယူႇ။
ၵွပ်ႈၼႆ မၼ်းၼၢင်းၸင်ႇႁေႃႈၵႃးသေ ၵႂႃႇၸူးတီႈႁိူၼ်း ၸၢမ်သႅင်းၶဝ်ယဝ်ႉ၊ ၸၢႆးၶမ်းလႄႈ ၸၢမ်သႅင်းၵေႃႈ တေႇၼႃႈႁိူၼ်း ႁူမ်ႈၵၼ် ၸၢႆးၶမ်းမႃးႁဵတ်းလုၵ်ႈၶူၺ် တီႈႁိူၼ်းၸၢမ်သႅင်းၶဝ်သေ ႁဵတ်းၵၢၼ်လုမ်း တီႈတူၼ်ႈတီးၼႆယဝ်ႉ၊ ၼၢင်းမူဝ်ၶၢဝ်ၵေႃႈ ႁေႃႈၵႃး ၶဝ်ႈမႃး ၼႂ်းဝၢင်းႁိူၼ်း ၸၢမ်သႅင်းၶဝ်သေ ၼႅတ်ႈၶဝ်ႈမိူဝ်းၸူး ၸၢႆးၶမ်းလႄႈၸၢမ်သႅင်း ၼႂ်းႁိူၼ်းၶဝ်ယဝ်ႉ၊ မၼ်းမိူဝ်းၺႃး မိူဝ်ႈၶဝ်တိုၵ်ႉၵိၼ်ၼမ်ႉၼဵင်ႈဝၢၼ်လႄႈ ၶႃသွင်ၵေႃႉၸင်ႇဝႃႈ
“ဢေႃႈ ... မူဝ် မႃးလႄႈ မႃးလႄႈ မႃးၵိၼ်ၼမ်ႉၼဵင်ႈဝၢၼ် လႄႈ ၶဝ်ႈမုၼ်းၸွမ်းႁဝ်းလႄႈ သၢင်ႇထုၵ်ႇယဝ်ႉ”
ၼၢင်းမူဝ်ၶၢဝ်ၵေႃႈ ၶဝ်ႈၼင်ႈၵိၼ် ၼမ်ႉၼဵင်ႈဝၢၼ်ၸွမ်းၶဝ်ယူႇ ၸၢမ်သႅင်းၸင်ႇဝႃႈ
“မူဝ် ... ၵွပ်ႈသင် လၢၵ်ႇလၢၵ်ႇလၢႆးလၢႆးသေ ၽႅဝ်မႃးႁိူၼ်းၸၢမ်သႅင်းၶဝ် ၸဵမ်ၸဝ်ႉလႃႇ မိူဝ်ႈၼႆႉ”
“မူဝ်ၶႂ်ႈမႃးထၢမ်ၶၢဝ်ႇငၢဝ်း ပီႈၸၢႆးၶိူဝ်းဢိူဝ်ႈ ၸၢမ်သႅင်း”
ၸၢႆးၶမ်းၵေႃႈ ၸင်ႇဝႃႈ
“ဢေႃႈ ... ဝႃႈၼၼ်ႁႃႉ ... ပီႈၸၢႆးၶမ်းၶဝ်ၵေႃႈ ဢၢင်ႈၵႂႃႇ လၢတ်ႈမူဝ်ၶၢဝ်ၼင်ႇၵဝ်ႇဢိူဝ်ႈၼႆႉ”
“ပီႈၸၢႆးၶမ်း ၶဝ်လႆႈၶၢဝ်ႇမၼ်းတီႈလႂ်လႃႇ”
“ပီႈၸၢႆးၶမ်းလႆႈငိၼ်းၶၢဝ်ႇမိူဝ်ႈဝႃးဢိူဝ်ႈ ၵူၼ်းႁဵတ်းၵၢၼ် တီႈလုမ်းႁဝ်းၵေႃႉၼိုင်ႈ မၼ်းလုၵ်ႉပၢင်လွင်းၶၢႆႉမႃးသေ လႆႈငိၼ်းၶၢဝ်ႇဝႃႈ ၸၢႆးၶိူဝ်းၵႂႃႇႁဵတ်းမေႃသွၼ် တီႈဝၢၼ်ႈလွႆပျႃးၼႆယဝ်ႉ”
“မိူဝ်ႈဝႃးတႄႉ ပီႈၸၢႆးၶိူဝ်း တိုၵ်ႉမႃးမီးတီႈတူၼ်ႈတီးၼႆႉယူႇ ဢိူဝ်ႈ”
“တႄႉႁႃႉ ... မူဝ်ႁၼ်မၼ်းတီႈလႂ်”
“မူဝ်ႁၼ်မၼ်း တီႈၵၢတ်ႇၸဝ်ႈၸၢမ်ႇထုၼ်းဢိူဝ်ႈ မိူဝ်ႈၸဝ်ႉၼၼ်ႉတႄႉ မူဝ်ဢမ်ႇထၢင်ႇ မၼ်းပဵၼ်ပီႈၸၢႆးၶိူဝ်းသေဢိတ်း မၼ်းတေယိမ်ၵႃးတႅၵ်ႉၸီႇတႆးၵေႃႉမၼ်းသေ မႃးႁႃသိုဝ်ႉၶူဝ်းၼင်ႇၵဝ်ႇယူဝ်ႉ မူဝ်လႄႈ ၸၢႆးၸၢႆး ဢွၵ်ႇၵၢတ်ႇမႃးၼႆ ဢမ်ႇႁူႉလႄႈ ယင်းမႃးၶၢတ်ႈၵႃးမၼ်းသေ ႁႂ်ႈမႃးသူင်ႇၽႅဝ် တီႈႁိူၼ်းၵွၼ်ႇယဝ်ႉ”
“မူဝ်ဢမ်ႇတွင်း မၼ်းႁႃႉမူဝ်”
“ဢမ်ႇတွင်းၼႃး မၼ်းလႅၵ်ႈလၢႆႈႁၢင်ႈဝႆႉလႄႇဢိူဝ်ႈ”
“မူဝ်သမ်ႉႁဵတ်းႁိုဝ်ႁူႉလႃႇ လွင်ႈဝႃႈ မၼ်းပဵၼ်ၸၢႆးၶိူဝ်းၼၼ်ႉ”
“မူဝ်မႃးႁူႉၸၵ်း တီႈမၢင်ႁႃႈပျႃးၼႆႉဢိူဝ်ႈ ၸၢမ်သႅင်းမိူဝ်ႈမၼ်းတုမ်ႉ ၵႃႈၵႃးၼၼ်ႉ မူဝ်ၵေႃႈ ဢမ်ႇၶုၵ်းၸႂ်လႆႈတူၺ်း ထိုင်မႃးၼႂ်ၼႆႉ ၸင်ႇၶိုၼ်းႁၼ်ၺႃးသေ ႁူႉဝႃႈမၼ်းပဵၼ် ပီႈၸၢႆးၶိူဝ်းၼႆယဝ်ႉ”
ၸၢႆးၶမ်း ၸင်ႇဝႃႈ
“ပေႃးၼႆ မိူဝ်ႈၼႆႉၵေႃႈ မၼ်းယင်းတိုၵ်ႉမီးယူႇ တီႈတူၼ်ႈတီးၼႆႉယူဝ်ႉၼေႃ”
“ဢမ်ႇႁူႉယဝ်ႉ ၵႃးဢၼ်မၼ်းႁေႃႈၼၼ်ႉတႄႉ ပဵၼ်ၵႃး တႆးၵေႃႉမၼ်း ဢၼ်ယူႇတီႈပွၵ်ႉပႃႇမႆႉၼၼ်ႉဢိူဝ်ႈ”
“ဢေႃႈ ... ႁူႉယဝ်ႉ ႁူႉယဝ်ႉ ႁဵတ်းႁိုဝ်ၵေႃႈ တေပဵၼ်ၵႃး ၸၢႆးသၢမ်တိပ်ႉဢိူဝ်ႈၼၼ်ႉ ၵမ်ႉႁဝ်းၸင်ႇၵႂႃႇထၢမ်တူၺ်း ၵိၼ်လႄႈ ၼမ်ႉၼဵင်ႈတေၵတ်းမူတ်းယဝ်ႉ”
ၶဝ်ၵေႃႈ ဢွၼ်ၵၼ်ၵိၼ်ႁႂ်ႈၸဵဝ်းယဝ်ႉသေ ၶီႇၵႃးၼၢင်းမူဝ်ၶၢဝ်ၵႂႃႇတီႈႁိူၼ်း ၸၢႆးသၢမ်တိပ်ႉၶဝ်ယဝ်ႉ၊ ၸၢႆးသၢမ်တိပ်ႉလႆႈငိၼ်း သဵင်ၵႃးလႄႈ မၼ်းၸင်ႇဢွၵ်ႇမႃးသေ
“ဢေႃႈ ... ၸၢႆးၶမ်းၶဝ်ႁႃႉ မႃးလႄႈ မႃးၼင်ႈၼႂ်းႁိူၼ်း လႄႈ”
ၶဝ်ၵေႃႈ ဢွၼ်ၵၼ်မႃးၼင်ႈသေ ၸၢႆးၶမ်းၸင်ႇဝႃႈ
“ၶႅၵ်ႇပီႈၸၢႆးသၢမ်တိပ်ႉ မိူဝ်းၵႂႃႇယဝ်ႉႁႃႉ”
“ဢေႃႈ ... ဝႃႈတီႈၸၢႆးၶိူဝ်းႁႃႉ”
“ၸႂ်ႈဢိူဝ်ႈ”
“မိူဝ်းၵႂႃႇမိူဝ်ႈဝႃးယဝ်ႉ”
“မိူဝ်းၵႂႃႇတီႈလႂ်ဝႃႈ”
“မၼ်းဝႃႈတႄႉ မိူဝ်းၵႂႃႇပၢင်လွင်းၼႆဢိူဝ်ႈ မၼ်းၵႂႃႇႁဵတ်း မေႃသွၼ်တီႈၼၼ်ႈ လႆႈသၢမ်ပီယဝ်ႉၼႆ ဢမ်ႇၸႂ်ႈႁႃႉ မၼ်းမႃး လၢတ်ႈၼႄလႄႈ ႁဝ်းၵေႃႈၸင်ႇႁႃႁူႉၵူၺ်းဢိူဝ်ႈ”
“မၼ်းမႃးတူၼ်ႈတီးၼႆႉ မၼ်းမႃးႁဵတ်းသင်ၼႆ ၸၢႆးသၢမ်တိပ်ႉဢမ်ႇႁူႉႁႃႉ”
“မၼ်းဝႃႈတႄႉ မႃးႁႃသိုဝ်ႉၶူဝ်းတႃႇယိပ်းတိုဝ်းၵမ်ႈၽွင်ႈ ၼႆယဝ်ႉ”
“မၼ်းမႃးႁႃသိုဝ်ႉၵႂႃႇတႄႉ ပဵၼ်ၶိူင်ႈယိပ်း ၵႅမ်ႇမရႃႇဢိူဝ်ႈ သမ်ႉလႆႈႁၼ်မၼ်းသိုဝ်ႉတၢင်းလဵၼ်ႈလုၵ်ႈဢွၼ်ႇၵႂႃႇ ၵမ်ႈၽွင်ႈဢိူဝ်ႈ တႃႇလုၵ်ႈဢွၼ်ႇမၼ်းယူဝ်ႉထၢင်ႇတႄႉ”
လႆႈငိၼ်းၼင်ႇၼၼ် ၶဝ်သၢမ်ၵေႃႉ ပဵၼ်ၸႂ်ႁူဝ်ႇလူဝ်ႇႁၢင်းလၢင်းၵႂႃႇယဝ်ႉ ၼၢင်းမူဝ်ၶၢဝ်တႄႉ ၼမ်ႉတႃမၼ်းၼၢင်း လွမ်ဢိူမ်ႈႁူၺ်ႇမႃးၵမ်းလဵဝ်ယဝ်ႉ
ၸၢႆးၶမ်း ၸင်ႇထၢမ်ဝႃႈ
“မၼ်းတႄႇၼႃႈႁိူၼ်းယဝ်ႉႁႃႉ ... ၸၢႆးသၢမ်တိပ်ႉ”
“လွင်ႈၼႆႉ ၵဝ်ၵေႃႈလိုမ်းထၢမ်တူၺ်းမၼ်းဢိူဝ်ႈ၊ ပေႃး တူၺ်းႁၼ် ဢၼ်မၼ်းသိုဝ်ႉတၢင်းလဵၼ်ႈလုၵ်ႈဢွၼ်ႇ ၵွင်ႈဢွၼ်ႇၵႃးဢွၼ်ႇၸိူင်ႉၼႆၵႂႃႇတႄႉ ပဵၼ်မၼ်းသိုဝ်ႉပၼ် လုၵ်ႈဢွၼ်ႇမၼ်း လဵၼ်ႈယူဝ်ႉ”
ၶဝ်သၢမ်သီႇၵေႃႉ သိုပ်ႇဢုပ်ႇၵၼ်ထႅင်ႈတၢၼ်ႇတၢၼ်ႇသေ ၶိုၼ်းပွၵ်ႈမႃးမိူဝ်း တီႈႁိူၼ်းၸၢမ်သႅင်းယဝ်ႉ၊ ပေႃးဝႃႈ ႁွတ်ႈၽႅဝ်တီႈႁိူၼ်း ၸၢမ်သႅင်းၶဝ် ၼၢင်းမူဝ်ၶၢဝ်မႃးႁႆႈယူႇယဝ်ႉ၊ ၼၢင်းၸၢမ်သႅင်းၸင်ႇ ထၢမ်ဝႃႈ
“မူဝ် ... မူဝ် ႁႆႈႁဵတ်းသင်”
“မူဝ် ... ၶေႃးၶူမ်ၸႂ်လဵၵ်ႉဢိူဝ်ႈ ... ၸၢမ်သႅင်း သိုတ်ႉသိုတ်ႉ”
“မူဝ် ... ၶေႃးၶူမ်ၸိူင်ႉႁိုဝ်မူဝ် ... လၢတ်ႈလူး”
“မူဝ် ... ဢမ်ႇၸၢင်ႈၶိုၼ်းထူပ်း ပီႈၸၢႆးၶိူဝ်းယဝ်ႉယူဝ်ႉ ၸၢမ်သႅင်း”
“ၵွပ်ႈသင်လႃႇ မူဝ်”
“မၼ်းပေႃးတႄႇၼႃႈႁိူၼ်းသေ မီးလုၵ်ႈယဝ်ႉ ဢမ်ႇၸႂ်ႈ ႁႃႉ”
“ဢူဝ် မူဝ်ၵေႃႈ ... ယင်းပႆႇလႆႈႁူႉၶၢဝ်ႇငၢဝ်းမၼ်းလီလီသေလႄႈ ”
ၸၢႆးၶမ်းၵေႃႈ ၸင်ႇဝႃႈ
“မူဝ်ၶၢဝ် ... မိူဝ်ႈၼႆႉ ပဵၼ်ဝၼ်းပိၵ်ႉလုမ်းယူႇဢမ်ႇၸႂ်ႈႁႃႉ ၵွပ်ႈၼႆ ပီႈၸၢႆးၶမ်းတေၵႂႃႇႁႃမၼ်းသေ ၵႂႃႇဢဝ်ၶၢဝ်ႇမၼ်း တီႈပၢင်လွင်းဢိူဝ်ႈ ပေႃးသၢင်ႇထုၵ်ႇၼႆ တေႁွင်ႉပႃး တူဝ်မၼ်းမႃးၸွမ်းၵမ်းလဵဝ်လႆ ... မူဝ်ၶၢဝ်ၵေႃႈတေၵႂႃႇၸွမ်းယူႇႁႃႉ”
ၼၢင်းမူဝ်ၶၢဝ် ဝႆႁူဝ်ၼႄသေ
“မူဝ်ဢမ်ႇၸွမ်းယဝ်ႉ ပီႈၸၢႆးၶမ်း ... မူဝ်တေယူႇတီႈ တူၼ်ႈတီးသေ ပႂ်ႉထွမ်ႇၶၢဝ်ႇမၼ်းဢဝ်ၵူၺ်းယဝ်ႉ ပေႃးဝႃႈ မၼ်းဢမ်ႇပႆႇပိတ်းမွၵ်ႇတၢင်ႇလူင်ၼႆတႄႉ မူဝ်တေပႂ်ႉမၼ်းဝႆႉယူႇ”
“လီယဝ်ႉ ... ပေႃးၼႆၵေႃႈ ပႂ်ႉဝႆႉလႄႈ”
ၸၢႆးၶမ်းၵေႃႈ ၼႅတ်ႈႁႅၼ်းၶူဝ်းလဵင်းမၼ်းသေ ဢဝ်ၵႃး ၼၢင်းမူဝ်ၶၢဝ်ၶဝ် ႁေႃႈၵႂႃႇတီႈပၢင်လွင်းယဝ်ႉ။