မွၵ်ႇလူင်ႇလဵဝ်/တွၼ်ႈသၢမ်သိပ်းသီႇ
ထႅင်ႈဝၼ်းၼိုင်ႈၵၢင်ၼႂ် လုၵ်ႈႁဵၼ်းမၼ်း ဢိၵ်ႇလူၺ်ႈ ၵူၼ်းဝၢၼ်ႈၶဝ် ဢွၼ်ၵၼ် မႃးသူင်ႇၶႃသွင်ၵေႃႉ ထိုင်ပွတ်းတၢင်းယူႇ၊ ယွၼ်ႉပိူဝ်ႈတေလႆႈၽၢတ်ႇမေႃသွၼ်ၶဝ်လႄႈ လုၵ်ႈႁဵၼ်းၶဝ်မၢင်ၸိူဝ်း ဢွၼ်ၵၼ်ပဵၼ်တၢင်းသေးလၢႆသေ ႁႆႈတေႃႇမေႃသွၼ်ၶဝ်ယူႇ၊ ၸၢႆးမွၼ်းၶိူဝ်းၵေႃႈ လႆႈႁၼ်ၼင်ႇၼၼ် မၼ်းၸၢႆးၸႂ်ဢမ်ႇသိူဝ်းလႆႈ ၼင်ႇၵဝ်ႇ။
ဝၼ်းၼၼ်ႉ ၶႃသွင်ၵေႃႉၶီႇၵႃးသေ ပွၵ်ႈမႃးမိူဝ်းယဝ်ႉ၊ ပေႃးဝႃႈ ႁွတ်ႈၽႅဝ်တူၼ်ႈတီးၼႆ ၸၢႆးၶမ်းထၢင်ဝႃႈ မူဝ်ၶၢဝ်မီးဝႆႉတီႈႁိူၼ်း ၸၢမ်သႅင်ႈၶဝ်ၼႆလႄႈ မၼ်းၸႂ်ႉ ၸၢႆးၶိူဝ်း ႁေႃႈၵႃးမိူဝ်း တီႈႁိူၼ်းၸၢမ်သႅင်းၶဝ်ယဝ်ႉ၊ လႆႈငိၼ်းသဵင်ၵႃး ၶဝ်ႈမႃးၼႂ်းႁိူၼ်းလႄႈ ၸၢမ်သႅင်းၼႅတ်ႈ ဢွၵ်ႇမႃးတူၺ်းယူႇ။
မၼ်းလႆႈႁၼ် ၵေႃႉဢၼ်မႃးၸွမ်းၸၢႆးၶမ်းၼၼ်ႉ ပဵၼ် ၸၢႆးၶိူဝ်းၼႆ မၼ်းဢမ်ႇထၢင်ႇသေဢိတ်း ယွၼ်ႉပိူဝ်ႈ ၸၢႆးၶိူဝ်းလႅၵ်ႈလၢႆႈႁၢင်ႈ သႂ်ႇမွႆၵၢင်း သႂ်ႇၼူတ်ႇတို ဝ်းမၢၼ်ႇတႃလမ် တိုဝ်ႈမၢၵ်ႇႁူဝ်ဝႆႉလႄႈ မၼ်းထၢင်ႇပဵၼ် ၶႅၵ်ႇတၢင်ႇတီႈၼႆယဝ်ႉ မၼ်းၼၢင်းၸင်ႇထၢမ်ဝႃႈ
“ဢေႃႈ ... ၶဝ်ႈမႃးၼင်ႈၶႃႈလႄႈ”
ၶႃသွင်ၵေႃႉလွမ်လွမ်ယုမ်ႉယူႇ ၼၢင်းၸၢမ်သႅင်းၸင်ႇထၢမ်
“ပီႈၸၢႆးၶမ်း ပီႈၸၢႆးၶိူဝ်းလူး မႃးၽႅဝ်တီႈႁိူၼ်းမူဝ်ၶဝ်ယဝ်ႉႁႃႉ”
“ပႆႇၽႅဝ်”
“ပေႃးၼႆ ပီႈၸၢႆးၶိူဝ်းဢမ်ႇၸွမ်းမႃးႁႃႉ”
“ၸွမ်းမႃးဢိူဝ်ႈ”
“မႃးမီးတီႈလႂ်လႃႇ မိူဝ်ႈလဵဝ်”
ၸၢႆးၶမ်းၸင်ႇယုမ်ႉသေ ၸီႉၼႄၸၢႆးၶိူဝ်းယဝ်ႉ
“ႁႃး ႁႃး ႁႃး ၼႆႉၼႃႇ ၸၢႆးၶိူဝ်းဢိူဝ်ႈ ၸၢမ်သႅင်းတူၺ်းလီလီလေႃႇ”
ၼၢင်းၸၢမ်သႅင်းၵေႃႈ ဢၢမ်းၵႂႃႇသေ
“ဢလူဝ်ႉ ... ပီႈၸၢႆးၶိူဝ်း ... ၸၢမ်သႅင်းယူဝ်ဝႃႈ ပဵၼ်ၵူၼ်းၵႃႉၼႂ်းလပ်းသိင်ႇၵေႃႉၼိုင်ႉၼႆၼႃး ... တူၺ်းလူး ၸၢမ်သႅင်းပေႃးဢမ်ႇတွင်းသေဢိတ်းလူင် မိူဝ်ႈသိုၼ်းၼၼ်ႉၵေႃႈ ပီၸၢႆးၶိူဝ်းႁဵတ်း ၼႆသေ မႃးတူၼ်ႈတီးႁႃႉ”
“ၸႂ်ႈဢိူဝ်ႈ ... ၸၢမ်သႅင်း”
“ဢေႃႈ ... ၵွပ်ႈၼႆဢိူဝ်ႈ မူဝ်ႁၼ်ယူႇၵေႃႈ မူဝ်တေႁဵတ်း ႁိုဝ်တွင်းပီႈၸၢႆးၶိူဝ်းလႃႇ မူဝ်ၵေႃႈ ၸင်ႇႁႃလၢမ်းလႆႈ တီႈၸေႈႁႃႈပျႃးၼၼ်ႉ ၼႂ်ဝႃးသေမႃးလၢတ်ႈၸၢမ်သႅင်းၶဝ်ယဝ်ႉ ပေႃးၼႆၵႂႃႇႁဝ်းၵႂႃႇ တီႈမူဝ် ပီႈၸၢႆးၶိူဝ်း”
“ၵႂႃႇလႄႈ ပေႃးၼႆၵေႃႈ”
“ပီႈၸၢႆးၶိူဝ်း တေႁဵတ်းႁၢင်ႈၵူၼ်းၵႃႉၼႂ်းလပ်းသိင်ႇၼႆႉ သေၵႂႃႇႁႃႉ”
“ၸႂ်ႈဢိူဝ်ႈ ... ႁေးႁေး”
ၸၢႆးၶိူဝ်းႁေႃႈၵႃးသေ ၶဝ်ဢွၼ်ၵၼ်မိူဝ်းတီႈႁိူၼ်း ၼၢင်းမူဝ်ၶၢဝ်ၶဝ်ယဝ်ႉ ၼၢင်းမူဝ်ၶၢဝ်လႄႈ ၸၢႆးၸၢႆးတိုၵ်ႉလဵၼ်ႈၵေႃႉၵၼ် ၼႂ်းသူၼ်သေ ၸၢႆးၸၢႆးတိုၵ်ႉဢဝ်ၵွင်ႈ ဢၼ်ၸၢႆးမွၼ်းၶိူဝ်းပၼ်မၼ်းၼၼ်ႉ ယိုဝ်းမႄႈၶဝ်ယူႇ၊ လႆႈငိၼ်းသဵင်ၵႃးမႃးလႄႈ ၶႃသွင်ၵေႃႉ လႆႈႁၼ်ပဵၼ်ၸၢႆးၶိူဝ်းၶဝ်ၼႆ ၼၢင်းမူဝ်ၶၢဝ် ပဵၼ်ဢၼ်ၸူမ်းၵႂႃႇ တႄႉတႄႉမၼ်းၼၢင်းၸင်ႇယိပ်းႁွပ်ႇဢဝ် ၸၢႆးၸၢႆးသေ မႃးၸူးၶဝ်ယဝ်ႉ လႆႈႁၼ်ၸၢႆးၶိူဝ်း လႅၵ်ႈလၢႆႈႁၢင်ႈမႃးၼင်ႇၼၼ် ၼၢင်းမူဝ်ၶၢဝ်ယုမ်ႉဝႆႉယူႇ မၼ်းၼၢင်း ၸင်ႇႁွပ်ႇၸၢႆးၸၢႆးသေလၢတ်ႈဝႃႈ
“ၸၢႆးၸၢႆးၼႆႉပဵၼ်ၽႂ်ၼႆႉ ၸၢႆးၸၢႆးၸွင်ႇတွင်းႁိုဝ်”
“တွင်းဢိူဝ်ႈ ... ပဵၼ်လုင်းလုင်း ဢၼ်ပၼ်ၵွင်ႈၸၢႆးၸၢႆး ၼၼ်ႉယဝ်ႉ”
ၸၢႆးၶိူဝ်းၸင်ႇဝႃႈ
“ၸၢႆးၸၢႆး မႃးၸူးလုင်းလုင်းလႄႈ”
ၸၢႆးၶိူဝ်းၵေႃႈႁွပ်ႇဢဝ် ၸၢႆးၸၢႆးၼႂ်းမိုဝ်းၼၢင်းမူဝ်ၶၢဝ်ယဝ်ႉ ၸၢႆးၶမ်းၸင်ႇဝႃႈ
“ၸၢႆးၸၢႆး ... ၸၢႆးဢမ်ႇၵူဝ်လုင်းလုင်းၼႆႉႁႃႉ မၼ်းမေႃ ၺွပ်းလုၵ်ႈဢွၼ်ႇဢိူဝ်ႈ”
“ဢမ်ႇၵူဝ် ... လုင်းလုင်းၼႆႉ ႁၵ်ႉၸၢႆးၸၢႆးဢိူဝ်ႈ ... မၼ်း ပၼ်ၸၢႆးၸၢႆးၵွင်ႈၼႆႉၼႃႉ”
ၸၢႆးၶမ်းၸင်ႇၶိုၼ်းဝႃႈ
“ၸၢႆးၸၢႆး ၸၼ်တူၺ်းမွႆၵၢင်း လုင်းလုင်းသူၼၼ်ႉလူး ၸွင်ႇႁတ်း”
“ႁတ်းဢိူဝ်ႈ”
“ၸၼ်လႄႈ ၸၢႆးၸၢႆး”
ၸၢႆးၸၢႆးၵေႃႈ တိုတ်ႉၸၼ်မွႆၵၢင်းၸၢႆးၶိူဝ်းသေ ယွၼ်ႉပိူဝ်ႈ ပဵၼ်ဢၼ်သႂ်ႇဢဝ်ၵူၺ်းလႄႈ မွႆၵၢင်းၼၼ်ႉ ပႃးမႃးၼႂ်းမိုဝ်း ၸၢႆးၸၢႆး သဵင်ႈသဵင်ႈသေ ၶဝ်ဢွၼ်ၵၼ်ၸူမ်းၶူဝ်ယူႇ ၸၢႆးၸၢႆးၵေႃႈ ယိပ်းတူၺ်ႈမွႆ ၵၢင်းၼၼ်ႉသေ ၶူဝ်ယူႇ ... ၸၢႆးၶမ်းၸင်ႇဝႃႈ
“ၸၢႆးၸၢႆး ၸၼ်ပႅတ်ႈ ၼူတ်ႇလုင်းလုင်းသူၼၼ်ႉထႅင်ႈ လႄႈ”
ၸၢႆးၸၢႆးၵေႃႈ သိုပ်ႇၸၼ်ၼူတ်ႇၸၢႆးၶိူဝ်းပႅတ်ႈထႅင်ႈယဝ်ႉ
“ၸၢႆးၸၢႆးပူတ်းမၢၼ်ႇတႃ ပူတ်းမၢၵ်ႇႁူဝ်လုင်းလုင်းသူထႅင်ႈ လႄႈ”
ၸၢႆးၸၢႆးၵေႃႈ သိုပ်ႇပူတ်းမၢၼ်ႇတႃ ပူတ်းမၢၵ်ႇႁူဝ် ၸၢႆးၶိူဝ်းယဝ်ႉသေ ယုမ်ႉႁႅၼ်တူၺ်းၼႃႈ ၸၢႆးၶိူဝ်းယူႇ ၸၢႆးၶိူဝ်းၸင်ႇဝႃႈ
“ၸၢႆးၸၢႆးၸွင်ႇၶႂ်ႈႁဵတ်းၸိူင်ႉ လုင်းလုင်းၼႆႉႁိုဝ်”
ၸၢႆးၸၢႆးငွၵ်းႁူဝ်ၼႄသေ
“ဢိူဝ်ႈ လုင်းလုင်းတေႁဵတ်းပၼ်ၼႃႈ”
ၸၢႆးၶိူဝ်းၵေႃႈ ဢဝ်ၸၢႆးၸၢႆးလုၵ်ႉၸုၵ်းတီႈလိၼ်သေ သႂ်ႇၼူတ်ႉသႂ်ႇမွႆၵၢင်း ဢဝ်မၢၼ်ႇတႃလမ်သႂ်ႇပၼ် ဢဝ်မၢၵ်ႇႁူဝ်သုပ်း ပၼ်ၸၢႆးၸၢႆးလႄႈ ၶဝ်ဢွၼ်ၵၼ်ၸူမ်းၶူဝ်ၸၢႆးၸၢႆးယူႇ။
ၸၢႆးၶိူဝ်းၸင်ႇဝႃႈ
“ႁႄး ႁႄး ၵမ်းၼႆႉ ၸၢႆးၸၢႆးပဵၼ်ပူႇထဝ်ႈဢွၼ်ႇယဝ်ႉ ႁၢင်ႈလီၵျႃႉ ၵႂႃႇတူၺ်းမၢၼ်ႇတီႈၵႃးၼၼ်ႉလူး”
ၸၢႆးၶမ်း ၸင်ႇၵႂႃႇႁွပ်ႇဢဝ်မၼ်း မႃးတူၺ်းႁၢင်ႈတီႈမၢၼ်ႇ ၵႃးၼၼ်ႉသေ ၶဝ်ဢွၼ်ၵၼ်ၸူမ်းၶူဝ်မၼ်းယူႇ ၸၢႆးၶမ်းၶႂ်ႈႁႂ်ႈ ၸၢႆးၶိူဝ်းလႄႈ ၼၢင်းမူဝ်ၶၢဝ် ထူပ်းၵၼ်လီလီလႄႈ မၼ်းၸင်ႇဝႃႈ
“ၸၢႆးၸၢႆးၵႂႃႇႁဝ်းၵႂႃႇ ၼႄပူႇပူႇ ၼၢႆးၼၢႆးတီႈႁိူၼ်းၼၼ်ႉၼေႃႈ ၸၢမ်သႅင်းၵေႃႈ မႃးလႄႈ ႁႃးဢွၼ်ၸၢႆးၸၢႆးၵႂႃႇၼႄပူႇၼႄၼၢႆးၶဝ်”
ၶဝ်သၢမ်ၵေႃႉ ပူၼ်ႉၶဝ်ႈမိူဝ်းၼႂ်းႁိူၼ်းသေ မိူဝ်းမေႃးပၼ်း ယူႇၼႂ်းႁိူၼ်းယဝ်ႉ၊ တီႈၼႂ်းသူၼ်ၼႆႉတႄႉ ၵိုတ်းဝႆႉၸၢႆးမွၼ်းၶိူဝ်း လႄႈ မူဝ်ၶၢဝ်ၵူၺ်း ... ၶႃသွင်ၵေႃႉ ၶိုၼ်းမႃးႁၼ်ၵၼ်လႄႈ ၶႃသွင်ၵေႃႉၸူမ်းသိူဝ်းၵေႃႈၸူမ်းသိူဝ်း ၶေႃးၶူမ်ၵေႃႈၶေႃးၶူမ်သေ မႃးၵွတ်ႇၵၼ်ဝႆႉႁႅင်းႁႅင်းယဝ်ႉ။
“မူဝ်”
“ပီႈၸၢႆးၶိူဝ်း”
“မူဝ် ... တိုၵ်ႉႁၵ်ႉပီႈၸၢႆးၶိူဝ်းယူႇၼေႃ”
“ပီႈၸၢႆးၶိူဝ်း ... မွၵ်ႇတၢင်းႁၵ်ႉ ၼႂ်းၸႂ်မူဝ်ၼႆႉ ပဵၼ်မွၵ်ႇ လူင်လဵဝ် ပုၼ်ႈတႃႇပီႈၸၢႆးၶိူဝ်းၵေႃႉလဵဝ်သေႇသေႇယဝ်ႉ ပီႈၸၢႆးၶိူဝ်း။ ပီႈၸၢႆးၶိူဝ်းလူး ၵႂႃႇပိတ်းမွၵ်ႇတၢင်ႇလူင်ယဝ်ႉ ဢမ်ႇၸႂ်ႈႁႃႉ”
“ဢမ်ႇပိတ်းလူင်မူဝ် ... တႃႇဝႃႈတေပိတ်းၼၼ်ႉဝႆႉၵႆၵႆလႃႈ ယိပ်းၵေႃႈ ယင်းဢမ်ႇႁတ်းယိပ်းတူၺ်းသေဢိတ်းၵွၼ်ႇယဝ်ႉမူဝ်”
“မူဝ်ယူဝ်ဝႃႈ ပီႈၸၢႆးၶိူဝ်းၵႂႃႇပိတ်းမွၵ်ႇႁၢင်ႈလီ တၢင်းပၢင်လွင်းၼၼ်ႉၼႆ ဢမ်ႇၸႂ်ႈႁႃႉ”
“ဢမ်ႇၸႂ်ႈၵူၺ်းမူဝ် ... ပီႈၸၢႆးၶိူဝ်းၵႂႃႇႁႃယူႇတီႈၸႂ်မႆႈ တေႁၢႆၼၼ်ႉဢိူဝ်ႈ”
“ႁၢႆယဝ်ႉႁႃႉ ... ပီႈၸၢႆးၶိူဝ်း”
“ပေႃးမူဝ်ယႃပၼ်တႄႉ တေႁၢႆၵႂႃႇငၢႆႈငၢႆႈယူႇယဝ်ႉမူဝ်”
“မူဝ်တေလႆႈႁဵတ်းႁိုဝ်ယႃပၼ်လႃႇ ပီႈၸၢႆးၶိူဝ်း”
“ဢဝ်မွၵ်ႇလူင်ႇလဵဝ်ၼၼ်ႉ ယႃပၼ်ဢိူဝ်ႈမူဝ်”
ၼၢင်းမူဝ်ၶၢဝ် ၸုပ်ႇၼူမ်ပၼ် ၵႅမ်ႈၸၢႆးၶိူဝ်းၼုင်ႈၽၢႆႇၼိုင်ႈၵမ်းသေ
“မူဝ်ယႃပၼ်ယူႇယဝ်ႉ ပီႈၸၢႆးၶိူဝ်း ... ၶႅၼ်းယဝ်ႉႁႃႉ”
“ၶႅၼ်းယဝ်ႉမူဝ်”
မွၵ်ႇတၢင်းႁၵ်ႉဢွၼ်ၶႃသွင်ၵေႃႉ ၶိုၼ်းပိုတ်ႇၵီႈႁၢင်ႈလီ တေႃႇၵၼ်မႂ်ႇမႂ်ႇသႂ်သႂ်ယူႇ ၼၢင်းမူဝ်ၶၢဝ် ၸင်ႇဝႃႈ
“ပီႈၸၢႆးၶိူဝ်း ... ယႃႇပေပၢႆႈပႅတ်ႈမူဝ်ထႅင်ႈၼႃႈ”
“ဢမ်ႇပၢႆႈယဝ်ႉ မူဝ် ... ပိၵ်ႉသမ်ႉလိုပ်ႈပၢႆႈၼႆၵေႃႈ တေဢမ်ႇၶၢႆႉတီႈၵူၺ်း ယုမ်ႇလႃႈမူဝ် ... ပီႈၸၢႆးၶိူဝ်း ၶႂ်ႈယူႇလူၺ်ႈမူဝ်ၽႂ်းၽႂ်းယဝ်ႉ”
“မူဝ်တေထၢမ်တူၺ်းမဵဝ်းၼိုင်ႈၵွၼ်ႇ ပေႃးပီႈၸၢႆးၶိူဝ်း ၽွမ်ႉၼႆၵေႃႈ ဢဝ်ပီႈၸၢႆးၶိူဝ်းဝႃႈယဝ်ႉ၊ ပေႃးပီႈၸၢႆးၶိူဝ်းဢမ်ႇၽွမ်ႉ ၼႆတႄႉ မူဝ်လူဝ်ႇလႆႈဝူၼ်ႉတူၺ်းၵွၼ်ႇယဝ်ႉ ပီႈၸၢႆးၶိူဝ်း”
“ၽွမ်ႉၸိူင်ႉႁိုဝ် ... မူဝ်”
“ဢေႃႈ ... ပေႃးပီႈၸၢႆးၶိူဝ်းႁၵ်ႉမူဝ်ၼႆၵေႃႈ လူဝ်ႇလႆႈႁၵ်ႉပႃးလုၵ်ႈၸၢႆးမူဝ်ၸၢႆးၸၢႆးၼၼ်ႉယဝ်ႉ၊ ၸွင်ႇပီႈၸၢႆးၶိူဝ်း တေႁၵ်ႉၸၢႆးၸၢႆးလႆႈယူႇႁိုဝ်”
“မူဝ် ... ၸဵမ်မိူဝ်ႈတေႁၼ်ၸၢႆးၸၢႆးၼၼ်ႉ ပီႈၸၢႆးၶိူဝ်း ဢွၵ်ႇၸႂ်ႁၵ်ႉမၼ်းမိူၼ်လုၵ်ႈၸၢႆးၵမ်းလဵဝ်ယဝ်ႉ၊ ၸၢႆးၸၢႆးၵေႃႈပဵၼ် လုၵ်ႈဢွၼ်ႇဢၼ်လီႁၵ်ႉၵေႃႉၼိုင်ႈ ၼင်ႇၵဝ်ႇလႄႈ ၸၢႆးၸၢႆးၵေႃႈ ပီႈၸၢႆးၶိူဝ်းႁၵ်ႉ မူဝ်ၵေႃႈပီႈၸၢႆးၶိူဝ်းၶႅၼ်းႁၵ်ႉယဝ်ႉ ဢၼ်ပိူၼ်ႈဝႃႈ ဢဝ်လုၵ်ႈဢဝ်မႄးၼႆၼၼ်ႉ ပဵၼ်ပီႈၸၢႆးၶိူဝ်းၼႆယဝ်ႉ”
လႆႈငိၼ်းၼင်ႇၼၼ် ၼၢင်းမူဝ်ၶၢဝ်ၸူမ်းသိူဝ်း ပေႃးဢမ်ႇ မီးတီႈတႅၵ်ႈလႄႈ မၼ်းၼၢင်းႁႅင်ႉၸူမ်းသိူဝ်းၼႃႇသေ ၼမ်ႉတႃသႂ်ဢွၼ်ႇမၼ်းၼၢင်း ယွႆႉလူင်းၸွမ်းၵႅမ်ႈၶွင်ႇ ၸွမ်းၵႅမ်ႈပွင်ႇဢွၼ်ႇ မၼ်းၼၢင်းယူႇယဝ်ႉ၊ ၸၢႆးၶိူဝ်းလႆႈႁၼ်ၼင်ႇၼၼ် မၼ်းၸင်ႇဝႃႈ
“မူဝ် ယွၼ်ႉပိူဝ်ႈသင် မူဝ်သမ်ႉတူၵ်းၼမ်ႉတႃယူႇလႃႇ”
“မူဝ် ... မူဝ် ... မူဝ် ၸူမ်းသိူဝ်းဢိူဝ်ႈ ပီႈၸၢႆးၶိူဝ်း”
ၼၢင်းမူဝ်ၶၢဝ်လၢတ်ႈၼင်ႇၼႆသေ ၶိုၼ်းၵွတ်ႇၸၢႆးၶိူဝ်းဝႆႉ ႁႅင်းႁႅင်းယူႇယဝ်ႉ လွင်ႈတၢင်းႁၵ်ႉတၢင်းပႅင်း ၶႃသွင်ၵေႃႉၼၼ်ႉ ဢမ်ႇသုတ်းဢမ်ႇသဵင်ႈဢမ်ႇမူတ်းဢမ်ႇၵဵင်ႈလႆႈယဝ်ႉ။