မွၵ်ႇလူင်ႇလဵဝ်/တွၼ်ႈသၢမ်သိပ်း
ဝၼ်းဢၼ်ၸၢႆးၶိူဝ်း တေဢွၵ်ႇႁိူၼ်းၵႂႃႇၼၼ်ႉ မၼ်းၵႂႃႇ သႂ်ႇလိၵ်ႈ တီႈၸၢမ်သႅင်းၽိုၼ်ၼိုင်ႈယဝ်ႉ။ လိၵ်ႈဢၼ်ၸၢႆးၶိူဝ်းသႂ်ႇမႃးၼၼ်ႉၵေႃႈ ၽႅဝ်မႃးတီႈၸၢမ်သႅင်းသေ မၼ်းၼၢင်း မႃးလူတူၺ်းၼႂ်းသူၼ်ၶဝ်ယူႇ
ၶွပ်ၸႂ်ပၼ်ထိုင်
ၸၢမ်သႅင်း
လိၵ်ႈဢၼ်ပီႈၸၢႆးၶိူဝ်း တႅမ်ႈမႃးတီႈၸၢမ်သႅင်းၼႆႉတႄႉ ဢဝ်မၢၵ်ႇႁူဝ်ၸႂ် ဢၼ်လူႉလႅဝ်ႁဵတ်းပဵၼ်ၸေႈတႅမ်ႈ ဢဝ်ၼမ်ႉတႃ ႁဵတ်းပဵၼ်ၼမ်ႉမိုၵ်ႉသေ တႅမ်ႈမႃးယဝ်ႉ ၸၢမ်သႅင်း။
လွင်ႈဢၼ်လႆႈပဵၼ်ပူၼ်ႉလူၼ်ႉလိူဝ်ၵႂႃႇ ၸိူဝ်းၼႆႉတႄႉ ပီႈၸၢႆးၶိူဝ်း ဢမ်ႇႁတ်းတၢင်ႇတၢင်းၽိတ်း တီႈၼိူဝ်ၽႂ်သေၵေႃႉ၊ တေလႆႈဝႃႈ ပဵၼ်ၵၢမ်ႇပီႈၸၢႆးၶိူဝ်းသဵင်ႈသဵင်ႈၼႆယဝ်ႉ ၸၢမ်သႅင်း၊ ဝၼ်းဢၼ်ႁပ်ႉ ႁၼ်လိၵ်ႈၸၢမ်သႅင်းပၼ်မႃးၼၼ်ႉၼႆ ပီႈၸၢႆးၶိူဝ်းလႆႈမႆႈၸႂ်ၼႃႇသေ ၾႆးမႆႈပႃႇပႅၵ်ႇယဝ်ႉ။ ၵွပ်ႈသင်လႄႈ သမ်ႉပေႃးလႆႈမႆႈတၢၼ်ႇၼၼ်ႉၼႆႉ ၼႆၸိုင် ဝၼ်းဢၼ်ပီႈၸၢႆးၶိူဝ်းၽႅဝ်ထိုင် လွႆလႅမ်ၼၼ်ႉၵေႃႈ မႄႈပီႈၸၢႆးၶိူဝ်းၶဝ် သဵင်ႈၸူဝ်ႈသုတ်းပၢၼ်ၵူၼ်းပႅတ်ႈ ပီႈၸၢႆးၶိူဝ်းသေ ပီႈၸၢႆးၶိူဝ်းယင်းဢမ်ႇတၼ်းၶိုတ်း မိူဝ်ႈမႄႈပီႈၸၢႆးၶိူဝ်းၶဝ်သဵင်ႈ တေႃႉတႄႉ လုတ်ႈၵၼ်ၵႂႃႇၸူဝ်ႈၶၢဝ်းယၢမ်းဢိတ်းၼိုင်ႈၵူၺ်း။
လႆႈမႆႈၸႂ်လူၺ်ႈ ၵေႃႉပဵၼ်မႄႈတၢႆၵႂႃႇသေ ပႆႇတၼ်းယဵၼ်ၸႂ် ထႅင်ႈပိူင်ၼိုင်ႈ သမ်ႉလႆႈမႆႈၸႂ်လူၺ်ႈ ၵေႃႉႁၵ်ႉလႄႈ ၵႄႈၵၢင်ၸႂ် ပီႈၸၢႆးၶိူဝ်း မႆႈလိူတ်ႇၼႃႇသေၾႆးလၢမ်းပႃႇပႅၵ်ႇတႄႉတႄႉယဝ်ႉ၊ ၵွပ်ႈၼႆ လွင်ႈတၢင်းမႆႈၸႂ် တေလႆႈယဵၼ်ႁၢႆၼၼ်ႉၼႆ ၶမ်ႈဢၼ်ႁပ်ႉႁၼ်လိၵ်ႈ ၸၢမ်သႅင်းၼၼ်ႉ ပီႈၸၢႆးၶိူဝ်းပၢႆႈဢွၵ်ႇႁိူၼ်းသေ တေၵႂႃႇတီႈ ဢၼ်ယဵၼ်ၸႂ်ၼၼ်ႉၼႆယဝ်ႉ၊ ၽွင်းယၢမ်း ၸၢမ်သႅင်းတိုၵ်ႉလူလိၵ်ႈ ယူႇၼႆႉတႄႉ ပီႈၸၢႆးၶိူဝ်း ဢမ်ႇမီးတီႈလွႆလႅမ်ယဝ်ႉ၊ တိုၵ်ႉတေမီးၼိူဝ် သဵၼ်ႈတၢင်း ဢၼ်ႁႃတီႈယဵၼ်ၸႂ်ၼၼ်ႉယူႇ၊ ၵွပ်ႈၼႆ ဝၼ်းၼိုင်ႈ ၸဝ်ႉၸဝ်ႉ ပေႃးဝႃႈ ႁူဝ်ၸႂ်ပီႈၸၢႆးၶိူဝ်း ၵတ်းယဵၼ်ယဝ်ႉၼႆတႄႉ ပီႈၸၢႆးၶိူဝ်း တေၶိုၼ်းၽႅဝ်မႃး တီႈၸၢမ်သႅင်းၶဝ်ယူႇ။
လွင်ႈတၢင်းႁၵ်ႉဢၼ်ဝႃႈၼၼ်ႉ မၢင်ၸိူဝ်းဝႃႈ ပဵၼ်လွင်ႈပူတ်းပွႆႇဝၢင်းၶႂၢင်းပၼ်ၵၼ်ၼႆသေတႃႉ ယၢမ်းလဵဝ်ပီႈၸၢႆးၶိူဝ်းတႄႉ မၵ်းမၢႆဝႃႈ လွင်ႈတၢင်းႁၵ်ႉၼၼ်ႉ ပဵၼ်လွင်ႈတၢင်းသေးလၢႆၼႆယဝ်ႉ။ ဢဵၼ်းဢၢၼ်းၼႂ်းၸႂ် ပီႈၸၢႆးၶိူဝ်းတႄႉ ဢၢၼ်းပိတ်းမွၵ်ႇလူင်လဵဝ်ၵူၺ်း ၵပ်းၵၢႆႇလူၺ်ႈ လွင်ႈတေပိတ်းမွၵ်ႇလူင်လဵဝ်ၼၼ်ႉ ပီႈၸၢႆးၶိူဝ်း တႅမ်ႈဝႆႉ ဝွၵ်းဢွၼ်ႇပုၵ်ႈၼိုင်ႈတီႈတႂ်ႈၼႆႉယဝ်ႉ...
ယုၵ်ႉယိုၼ်းမိုဝ်းသေ
ဢၢၼ်းတေပိတ်းမွၵ်ႇ
ဢၼ်ဢွၵ်ႇလူင်ႇလဵဝ်
ၵူၼ်းၶဵဝ်တၢင်ႇၵေႃႉ
မႃးတေႃႉပိတ်းၵႂႃႇ
ပုၼ်ႈတႃႇၸၢႆး တေလႆႈပိတ်းဢၼ်လႂ်?
ၸၢႆးၶိူဝ်း - လွႆလႅမ်
ၼၢင်းၸၢမ်သႅင်း လႆႈလူႁၼ် လိၵ်ႈၸၢႆးၶိူဝ်းသေ မၼ်းၼၢင်း ပဵၼ်ဢၼ်ၶေႃးၶူမ်တၢင် ၸၢႆးမွၼ်းၶိူဝ်းတႄႉတႄႉ၊ မၼ်းၼၢင်း ၸင်ႇဝႃႈ
“ဢေႃႈ ... ပီႈၸၢႆးၶိူဝ်း ... ႁႂ်ႈၵၢင်ၸႂ်တၢင်းမႆႈ ပီႈၸၢႆးၶိူဝ်းၼၼ်ႉ ၸဵဝ်းယဵၼ်ႁၢႆသေၵမ်းၼႆ ၸၢမ်သႅင်း ယွၼ်းသူးပၼ်ယူႇ”
ယၢမ်းလဵဝ် ၼႂ်းၸႂ်မၼ်းၼၢင်း ပဵၼ်ဢၼ်ဢီးလူၸၢႆးၶိူဝ်း တႄႉတႄႉသေ ပဵၼ်ဢၼ်လီၸၢၼ်ႈ လီၸႂ်လမ်တေႃႇ ၼၢင်းမူဝ်ၶၢဝ် ဝႆႉယူႇ။
ၼၢင်းမူဝ်ၶၢဝ် ဢၢင်ႈမႃးဢႅဝ်ႇ ၼၢင်းၸၢမ်သႅင်းဝၼ်းလႂ်ၵေႃႈ မၼ်းၼၢင်းဢမ်ႇပဵၼ်မႃး၊ မိူဝ်ႈၼႆႉတႄႉ မၼ်းၼၢင်းတၼ်းသေ ၸၢမ်သႅင်းဢမ်ႇမႃးဢႅဝ်ႇမၼ်းလႄႈ မၼ်းၼၢင်းတင်ႈၸႂ် မႃးဢႅဝ်ႇ ၸၢမ်သႅင်းယဝ်ႉ၊ ၽွင်းမိူဝ်ႈမၼ်းမႃးၼၼ်ႉ မၼ်းမႃးႁၼ်ၸၢမ်သႅင်း တိုၵ်ႉတူၺ်းလိၵ်ႈယူႇ ၼႂ်းဝၢင်းသူၼ်ၶဝ်ၼၼ်ႉယဝ်ႉ မၼ်းၼၢင်း ၸင်ႇဝႃႈ
“ၸၢမ်သႅင်း”
ၼၢင်းၸၢမ်သႅင်းၵေႃႈႁူႉဝႃႈ ပဵၼ်သဵင်ၼၢင်းမူဝ်ၶၢဝ်ၼႆ ၵမ်းလဵဝ်ယဝ်ႉ မၼ်းၼၢင်းၸင်ႇၼႅတ်ႈဝၢႆႇတူၺ်း ၼၢင်းမူဝ်ၶၢဝ်ယဝ်ႉ၊ ယွၼ်ႉပိူဝ်ႈ ၼၢင်းၸၢမ်သႅင်း ဝႆႉၼႃႈၶဵင်ႈသေ တူၺ်းမၼ်းၼၢင်း ဢမ်ႇယုမ်ႉဢမ်ႇၶူဝ်တေႃႇမၼ်းၼၢင်းလႄႈ ၼၢင်းမူဝ်ၶၢဝ် ပဵၼ်ႁူဝ်ၸႂ် ႁူဝ်ႇလူဝ်ႇႁၢင်းလၢင်းၵႂႃႇယူႇ ၼၢင်းၸၢမ်သႅင်း ၸင်ႇဝႆႉသဵင်ၶၢတ်ႇ ၶၢတ်ႇသေလၢတ်ႈဝႃႈ
“မူဝ် ... မႂ်းမႃးႁဵတ်းသင် ... ဢွၵ်ႇၵႂႃႇလႄႈ ၸၢမ်သႅင်းဢမ်ႇ ၶႂ်ႁၼ်ၼႃႈမႂ်း”
ၼၢင်းမူဝ်ၶၢဝ် လႆႈငိၼ်းၼင်ႇၼၼ် ဢမ်ႇထၢင်ႇဢမ်ႇထိူမ် လႄႈ မၼ်းၼၢင်း ပဵၼ်ဢၼ်ဢၢမ်းၵႂႃႇတႄႉတႄႉသေ
“ၸၢမ်သႅင်း ... ၸၢမ်သႅင်းဝႃႈသင်ၼႆ မူဝ်တႄႉ ဝူၼ်ႉဢမ်ႇပွင်ႇယဝ်ႉၵူၺ်း”
ၼၢင်းၸၢမ်သႅင်း ၸင်ႇလုၵ်ႉၸုၵ်းတဝ်ႉဢႅင်ႈသေ
“မူဝ် ... ၵူၼ်းဢမ်ႇမီးၵတီႉသၸ်ႉၸႃႇၸိူင်ႉမႂ်းၼႆႉ ၸၢမ်သႅင်းဢမ်ႇၶႂ်ႈႁၼ်ၵူၺ်း ႁဵတ်းၵေႃႈ ဢမ်ႇၶႂ်ႈႁဵတ်းၵေႃႉ”
“ၸၢမ်သႅင်း ၶႂ်ႈဝႃႈပွင်ႉၸိူင်ႉႁိုဝ်ၼႆႉ ၸၢမ်သႅင်း”
ၼၢင်းၸၢမ်သႅင်း ၸင်ႇယုမ်ႉမီႇၼႃႈသေ
“ဢေႃ ... ႁိုဝ်ႉ ... ၵူၼ်းႁဵတ်းၵဵင်ႈၼွၼ်းလပ်းၼၼ်ႉ ပူၵ်းယၢပ်ႇသေပိူၼ်ႈယဝ်ႉ မူဝ်ႁဵတ်းသင်ၼႆ မူဝ်ဢမ်ႇႁူႉႁႃႉ၊ မၢႆၼိုင်ႈ လွင်ႈဝႃႈၸၢႆးသႅင်မိူင်း တေမႃးထၢမ်မူဝ်ၼၼ်ႉ မူဝ်လႅၼ်ဝႃႈ ႁဵတ်းပွႆး မၵ်းမၢႆပီလိုၼ်းသုတ်းၼႆ ဢမ်ႇၸႂ်ႈႁႃႉ ... မၢႆသွင် မူဝ်ဝႃႈ မူဝ်ႁၵ်ႉပီႈၸၢႆးၶိူဝ်းၵေႃႉလဵဝ်ၼႆသေ တင်ႈၸႂ်ၽႃႇမၢၵ်ႇႁူဝ်ၸႂ် ပီႈၸၢႆးၶိူဝ်းဢမ်ႇၸႂ်ႈႁႃႉ ... ၵွပ်ႈၼႆ မူဝ်ႁဵတ်းလႆႈၼႃႇလႄႈ ၸၢမ်သႅင်းၸဵပ်းၸႂ်တေႃႇမူဝ်တႄႉတႄႉယဝ်ႉ၊ ၵွပ်ႈၼႆ ၵူၼ်းၼင်ႇမႂ်းၼႆႉ လူဝ်ႇၶျႃႉသူးၽႃႇမိုဝ်း ပၼ်ၵူၺ်းယဝ်ႉ”
“ပၢပ်ႉ!” ၼၢင်းၸၢမ်သႅင်း ဢဝ်ၽႃႇမိုဝ်းမၼ်းသေ ၽတ်ႉႁႅမ်ပၼ် ၵႅမ်ႈၼၢင်းမူဝ်ၶၢဝ်ႁႅင်းႁႅင်းၵမ်းၼိုင်ႈယဝ်ႉ၊ ၼၢင်းမူဝ်ၶၢဝ်ၵေႃႈ ယိပ်းၵႅမ်ႈ မၼ်းၼၢင်းသေ ႁႆႈယူႇ မၼ်းၼၢင်းၸင်ႇဝႃႈ
“ၸၢမ်သႅင်း ... ၸၢမ်သႅင်းႁႅမ်တၢၼ်ႇႁိုဝ်ၵေႃႈ မူဝ်တေ ၶၢမ်ႇလႆႈယူႇ ၵူၺ်းၵႃႈ ဢၼ်ၸၢမ်သႅင်း ထၢင်ႇၽိတ်းၼၼ်ႉတႄႉ မူဝ် ဢမ်ႇၶၢမ်ႇလႆႈၵူၺ်း ႁႂ်ႈမူဝ်လႆႈသပ်းလႅင်း ၼႄသဵင်ႈသဵင်ႈၵွၼ်ႇလႄႈ ၸၢမ်သႅင်း”
“ဢမ်ႇလူဝ်ႇသပ်းလႅင်းသင်ယဝ်ႉမူဝ် ... ၸၢမ်သႅင်းဢမ်ႇ ၶႂ်ႈငိၼ်းၵူၺ်း ... မိူဝ်းလႃႈ”
ၼၢင်းမူဝ်ၶၢဝ် ႁႆႈသေ
“ၸၢမ်သႅင်း ... ႁႂ်ႈမူဝ်လႆႈလၢတ်ႈၼႄသဵင်ႈၵွၼ်ႇလႄႈ ၸၢမ်သႅင်း”
“ပေႃးလႃႈမူဝ် ... ၸၢမ်သႅင်းဢမ်ႇၶႂ်ႈငိၼ်း”
“ဢမ်ႇၶႂ်ႈငိၼ်းၼႆၵေႃႈ ၶႅၼ်းတေႃႈယိူၼ်ႉၸႂ်သေထွမ်ႇ လႄႈ ၸၢမ်သႅင်း ပေႃးမူဝ် လႆႈသပ်းလႅင်းၼႄယဝ်ႉၼႆ မူဝ်တေမိူဝ်းလႆ”
ၼၢင်းၸၢမ်သႅင်း ဢမ်ႇတၵ်းသဵင်သင် ၼၢင်းမူဝ်ၶၢဝ် ၸင်ႇႁႆႈသေ လၢတ်ႈဝႃႈ
“ၸၢမ်သႅင်း ဝၼ်းၼၼ်ႉ မူဝ်ၵေႃႈတိုၼ်းဢမ်ႇႁူႉထိုင် သေဢိတ်းတႄႉတႄႉယဝ်ႉ မႄႈမူဝ်ၶဝ် လႅၼ်မူဝ်ဝႃႈ မၵ်းမၢႆပီယဝ်ႉ ၸၼ်ႉၸွမ်သေ လဵင်ႉၶဝ်ႈၵူၼ်းလူင်ၶဝ်ၼႆႈဢိူဝ်ႈ၊ မူဝ်ၵေႃႈ ထၢင်ႇဝႃႈ ၸႂ်ႈတႄႉၼႆလႄႈ ၸင်ႇမႃးမွၵ်ႇလၢတ်ႈ ၸၢမ်သႅင်းၼင်ႇၼၼ်ယဝ်ႉ၊ ထိုင်ၵၢင်ၶမ်ႈမႃး ၽွင်းမိူဝ်ႈၶဝ်မႃးႁႅၼ်းထုၵ်ႈၼဵင်ႈၼႆ မူဝ်ၸင်ႇတေ လၢမ်းလႆႈ ဢၼ်ၶဝ်မႃးထၢမ်မူဝ်ၼၼ်ႉယဝ်ႉ မႄႈမူဝ်ၶဝ်ၵေႃႈမႃး လွမ်လၢတ်ႈဝႃႈ ယႃႇပေယႃႇသရေႇၼႃႈတႃၶဝ်ၼႆလႄႈ ၶမ်ႈၼၼ်ႉ မူဝ်ၵေႃႈ ဝူၼ်ႉထိုင်ၵူႈၽၢႆႇၽၢႆႇသေ ၸင်ႇလႆႈယူႇဝႆႇတဵတ်ႇတဵတ်ႇယဵၼ်ယဵၼ်ယဝ်ႉ”
“ယူႇတဵတ်ႇတဵတ်ယဵၼ်ယဵၼ်ၼၼ်ႉ ပိူၼ်ႈမၵ်းမၢႆပဵၼ်ဝႃႈ ႁပ်ႉၶၢမ်ႇ ဢမ်ႇၸႂ်ႈႁႃႉမူဝ်”
“ပိူၼ်ႈဝႃႈသေတႃႉ မူဝ်တႄႉဢမ်ႇဝႃႈၵူၺ်း ၸၢမ်သႅင်း ၶမ်ႈၼၼ်ႉ မူဝ်ယင်းၶႂ်ႈၽတ်ႉႁႅမ်ၵႅမ်ႈ ၸၢႆးသႅင်မိူင်း ႁႂ်ႈပေႃးဢွၵ်ႇလိူတ်ႈ ၵႂႃႇၵွၼ်ႇယဝ်ႉ၊ မူဝ်ၵေႃႈဢမ်ႇလၢတ်ႈတေႃႇမၼ်းသေၶေႃႈၵူၺ်း ၶမ်ႈ ၼၼ်ႉ မူဝ်ၵေႃႈ တိူဝ်ႉၸႂ်ၼႃႇလႄႈ မူဝ်လႅၼ်ၶဝ်ဝႃႈ မူဝ်ႁူဝ်ၶႆႈၼႆသေ ပၢႆႈၶဝ်ႈမိူဝ်းၼွၼ်းၸဵမ်ၸဝ်ႉယဝ်ႉ ၶမ်ႈၼၼ်ႉ မူဝ်လႆႈႁႆႈလႆႈ မႆႈတၢၼ်ႇႁိုဝ်ၼႆ လိူဝ်သေမူဝ်ၵေႃႉလဵဝ် ၽႂ်ၵေႃႈဢမ်ႇႁူႉထိုင်ၵူၺ်း မွၵ်ႇတၢင်းႁၵ်ႉမူဝ်ၼႆႉ ပဵၼ်မွၵ်ႇလူင်ႇလဵဝ် ပုၼ်ႈတႃႇပီႈၸၢႆးၶိူဝ်းၵေႃႉလဵဝ်ၼႆ မူဝ်းတႅပ်းတတ်းဝႆႉ ၸဵမ်မိူဝ်ႈလႂ်ယဝ်ႉ၊ ၵွပ်ႈၼႆ မိူဝ်ႈၽုၵ်ႈၼႆႉ ၶႂ်ႈပဵၼ်ႁိုဝ်ပဵၼ် မူဝ်ဢၢၼ်းပၢႆႈၵႂႃႇၸူး ပီႈၸၢႆးၶိူဝ်းလွႆလႅမ်ၼႆယဝ်ႉ၊ ၵွပ်ႈၼႆ မူဝ်မႃးလၢတ်ႈထိုင်ႁႂ်ႈ ၸၢမ်သႅင်းလႆႈႁူႉဢိူဝ်ႈၼႆႉ ၊ မူဝ် မူဝ် တေမိူဝ်းၵွၼ်ႇ ၸၢမ်သႅင်း”
ၼၢင်းမူဝ်ၶၢဝ် ၸဵတ်ႉၼမ်ႉတႃမၼ်းၼၢင်းသေ ဝၢႆႇၼႃႈ ဢၢင်ႈမိူဝ်းယဝ်ႉ ၼၢင်းၸၢမ်သႅင်း ၸင်ႇႁူႉထိုင် လွင်ႈတၢင်း ဢၼ်မၼ်းၼၢင်းထၢင်ႇၽိတ်းၼၢင်းမူဝ်ၶၢဝ်ၼၼ်ႉလႄႈ မၼ်းၼၢင်းၸင်ႇ ၶိုၼ်းၼႅင်ၸႂ်တႄႉတႄႉသေ
“မူဝ်ၵမ်ႉလႄႈ”
ၼၢင်းမူဝ်ၶၢဝ်ၵေႃႈၵိုတ်းသေ
“ဢီႈသင် ၸၢမ်သႅင်း”
“ဢေႃႈ ... မူဝ် မႃးၼင်ႈၵမ်ႉၵွၼ်ႇလႄႈ မိူဝ်ႈၸဝ်ႉၼၼ်ႉ ဢၼ်ၸၢမ်သႅင်းထၢင်ႇၽိတ်းမူဝ်သေ ဢၼ်လႆႈႁဵတ်းပူၼ်ႉပႅၼ်ၵႂႃႇၼၼ်ႉ ၸၢမ်သႅင်းၶိုၼ်းယွၼ်းတွင်းပၢၼ်ႇယူႇယဝ်ႉမူဝ်၊ မူဝ်ယႃႇပေ ၽိတ်းၸႂ်ၼႃႈ”
“လႆႈယူႇ ၸၢမ်သႅင်း ဢမ်ႇပဵၼ်သင်”
ယွၼ်ႉပိူဝ်ႈသင်ၵေႃႈဢမ်ႇႁူႉ ၶႃသွင်ၵေႃႉၶိုၼ်းၵွတ်ႇၵၼ်ဝႆႉ ၵမ်းၼိုင်ႈယဝ်ႉ ၼၢင်းၸၢမ်သႅင်း ၸင်ႇထၢမ်ဝႃႈ
“မူဝ် မူဝ်တေဢၢၼ်းပၢႆႈၵႂႃႇလွႆလႅမ်ႁႃႉ”
“ၸႂ်ႈဢိူဝ်ႈ ၸၢမ်သႅင်း”
“မူဝ် ... ပီႈၸၢႆးၶိူဝ်းဢမ်ႇမီးတီႈလွႆလႅမ်ယဝ်ႉ မိူဝ်ႈလဵဝ်” “ႁဵတ်းသင်လႃႇ သမ်ႉဢမ်ႇမီး”
“မူဝ်ဝၢႆးသေ ၶမ်ႈဢၼ်ၶဝ်မႃးထၢမ်မူဝ်ၼၼ်ႉ ထႅင်ႈဝၼ်းၼိုင်ႈ ၸၢမ်သႅင်းၵေႃႈ ၼႅတ်ႈတႅမ်ႈလိၵ်ႈသေ ပွင်ႇၶၢဝ်ႇမိူဝ်းတီႈ ပီႈၸၢႆးၶိူဝ်း ၵမ်းလဵဝ်ယဝ်ႉမူဝ် ပီႈၸၢႆးၶိူဝ်းၵေႃႈ လႆႈႁူႉငိၼ်းၶၢဝ်ႇမူဝ်သေ မၼ်းပဵၼ်ဢၼ်တိူဝ်ႉၸႂ်တႄႉတႄႉဢိူဝ်ႈ မူဝ် ... ၵွပ်ႈၼႆမၼ်းၶိုၼ်း တႅမ်ႈလိၵ်ႈမႃးဢိူဝ်ႈ မူဝ် ... လူတူၺ်းလႄႈ”
ၼၢင်းမူဝ်ၶၢဝ်ၵေႃႈ ဢဝ်လိၵ်ႈဢၼ်ၸၢႆးၶိူဝ်း ပၼ်မႃးၼၼ်ႉသေ လူတူၺ်းယူႇ မၼ်းလႆႈႁူႉထိုင် လွင်ႈမႄႈၸၢႆးၶိူဝ်းၶဝ်သဵင်ႈ လႆႈႁူႉထိုင်လွင်ႈၸၢႆးၶိူဝ်းလႆႈမႆႈၸႂ် လႆႈႁူႉထိုင်လွင်ႈ ၸၢႆးၶိူဝ်းပၢႆႈဢွၵ်ႇ ႁိူၼ်းၵႂႃႇလႄႈ မၼ်းၼင်းဢမ်ႇယိူၼ်ႉလႆႈသေ မၼ်းၼၢင်းႁႆႈယူႇယဝ်ႉ ၸၢမ်သႅင်းၵေႃႈ ၼႅတ်ႈၶျေႃးဝွၼ်း ၼၢင်းမူဝ်ၶၢဝ်ယူႇ။
“မူဝ် ... ယႃႇပေႁႆႈယဝ်ႉ ... တဵတ်ႇလႄႈ”
“ၸၢမ်သႅင်း မူဝ်တေလႆႈႁဵတ်းႁိုဝ်လႃႇ ... ပီႈၸၢႆးၶိူဝ်းၵႂႃႇလႂ် ၸၢမ်သႅင်းႁူႉယူႇႁႃႉ”
“ဢမ်ႇႁူႉမူဝ် ... ယွၼ်ႉပိူဝ်ႈ ၸၢမ်သႅင်းတႅမ်ႈလိၵ်ႈၵႂႃႇလႄႈ ပီႈၸၢႆးၶိူဝ်းၸင်ႇပၢႆႈဢွၵ်ႇႁိူၼ်းယဝ်ႉ၊ ၵွပ်ႈၼႆ ၸၢမ်သႅင်းၵေႃႈ တေၶတ်းၸႂ်ၸွပ်ႇၶၢဝ်ႇသေ ႁႃပၼ်ႁႂ်ႈလႆႈလႆမူဝ် ၸၢမ်သႅင်းတေထၢမ်တူၺ်း ပီႈၸၢႆးၶမ်းၵုၼ်ႁိင်းသေ တေႁႂ်ႈမၼ်းသိုပ်ႇႁႃၸွႆႈလႆ”
“ယူဝ်ၶႄး ... ပီႈၸၢႆးၶိူဝ်းၵႂႃႇတီႈပီႈၸၢႆးၶမ်းယူဝ်ႉၼေႃ”
“ဢမ်ႇႁူႉယဝ်ႉမူဝ် ၸၢမ်သႅင်းတေတႅမ်ႈလိၵ်ႈ ထၢမ်တူၺ်းလႆ”
“ၸၢမ်သႅင်းၸွႆႈႁႃပၼ် ႁႂ်ႈၸဵဝ်းႁၼ်ၼႃႈ”
“တေၸွႆႈႁႃယူႇမူဝ်”
“ပေႃးၸၢမ်သႅင်းၶဝ် ဢမ်ႇၸွႆႈႁႃပၼ်ၼႆတႄႉ မူဝ်ဢမ်ႇ ၸၢင်ႈၵႂႃႇၸႂ်ယႂ်ႇၽႂ်ယဝ်ႉ၊ ပိူင်ၼိုင်ႈလွမ်ၵူဝ်ဢူႈမႄႈၵူၼ်းလူင်ၶဝ် ၸဵဝ်းၶပ်းၶိုင်ပွႆးမင်ႇၵလႃႇ ပၢင်ၶႅၵ်ႇၼၼ်ႉၵူၺ်းယဝ်ႉ ၸၢမ်သႅင်း ၵွပ်ႈၼႆ မူဝ်ၸႂ်ယႂ်ႇၸၢမ်သႅင်းၵူၺ်းယဝ်ႉ ၸၢမ်သႅင်း”
“ၸၢမ်သႅင်းၵေႃႈ တေၶတ်းၸႂ်ႁႃပၼ်ယူႇမူဝ်”
ဝၼ်းၼၼ်ႉ ၶႃသွင်ၵေႃႉသိုပ်ႇဢုပ်ႇၵၼ်ထႅင်ႈတၢၼ်ႇတၢၼ်ႇသေ ၼၢင်းမူဝ်ၶၢဝ်ၵေႃႈ ၶိုၼ်းပွၵ်ႈမိူဝ်းႁိူၼ်းယဝ်ႉ။
ၼၢင်းၸၢမ်သႅင်းၵေႃႈ တႅမ်ႈလိၵ်ႈသေသႂ်ႇပၼ် မိူဝ်းတီႈၸၢႆးၶမ်းၵုၼ်ႁိင်းသေ ထၢမ်တူၺ်း လွင်ႈၶၢဝ်ႇငၢဝ်း ၸၢႆးၶိူဝ်းယူႇ၊ ၸၢႆးၶမ်းၵေႃႈ ၶိုၼ်းတွပ်ႇလိၵ်ႈမႃး လွင်ႈဝႃႈ ၸၢႆးၶိူဝ်းဢမ်ႇၽႅဝ်မႃးတီႈမၼ်း ၼၼ်ႉၼႆယူႇ...
ၶၢဝ်းယၢမ်းဝၼ်းၼိုင်ႈယဝ်ႉဝၼ်းၼိုင်ႈ ဝူင်ႈၼိုင်ႈယဝ်ႉဝူင်ႈ ၼိုင်ႈ လိူၼ်ၼိုင်ႈယဝ်ႉလိူၼ်ၼိုင်ႈ ပူၼ်ႉၵႂႃႇသေတႃႉၵေႃႈ ဢမ်ႇလႆႈ ငိၼ်းၶၢဝ်ႇၸၢႆးၶိူဝ်းသေဢိတ်း၊ ပီႈဢၢႆႈပီႈၼၢင်းၸၢႆးၶိူဝ်းၶဝ်ၵေႃႈ ဢမ်ႇလႆႈငိၼ်းၶၢဝ်ႇၼွင်ႉၸၢႆးၶဝ်သေဢိတ်း ၶဝ်ဢွၼ်ၵၼ်ၸွပ်ႇႁႃ ၶၢဝ်ႇငၢဝ်းၸၢႆးၶိူဝ်း ၵႂႃႇယူႇသဝ်းတီလႂ် ၼႆၵေႃႈ တေႃႈပႆႇႁူႉထိုင်လႆႈ။
ၸၢႆးသႅင်မိူင်းၵေႃႈ ႁဵတ်းႁၢႆႉတေႃႇ ဢူႈမႄႈၶဝ်ၵူႈပိူင်သေ ၸႂ်ႉႁႂ်ႈဢူႈမႄႈၶဝ် ၸဵဝ်းႁဵတ်းပၼ် ပွႆးၵူပ်ႉၵူႈပဵၼ်ႁိူၼ်းလူၺ်ႈ ၼၢင်းမူဝ်ၶၢဝ်ယူႇ
ၼၢင်းမူဝ်ၶၢဝ်ၵေႃႈ မွင်းပႂ်ႉထွမ်ႇၶၢဝ်ႇငၢဝ်း ၸၢႆးၶိူဝ်းယူႇ ၵူႈဝၼ်းသေတႃႉ ဢမ်ႇလႆႈႁူႉငိၼ်းတီႈလႂ် ... ပိူင်ၼိုင်ႈ ဢူႈမႄႈမၼ်းၼၢင်းၵေႃႈ ဢႃးၼႃႇဢူႈမႄႈၸၢႆးသႅင်မိူင်းၶဝ်သေ ၶႂ်ႈၶိုင်ပွႆးၵူပ်ႉၵူႈ ပဵၼ်ႁိူၼ်းၼၼ်ႉယူႇ ၼၢင်းမူဝ်ၶၢဝ်ၵေႃႈ ထၢင်ႇဝႃႈတေလႆႈငိၼ်းၶၢဝ်ႇ ၸၢႆးၶိူဝ်းၼႆသေ မၼ်းၼၢင်း လႆႈလၢတ်ႈၵႅတ်ႇဝႆႉ လွင်ႈဝႃႈမၼ်းပႆႇ ၶႂ်ႈတႄႉၼႃႈႁိူၼ်းၵွၼ်ႇၼႆယူႇ။
ၸၢႆးမွၼ်းၶိူဝ်း ႁွတ်ႈၽႅဝ်တီႈလႂ် ၵွႃႇမီးတီႈလႂ်ၼႆ ၶဝ်ၶတ်းၸႂ် ၸွပ်ႇႁႃတူၺ်းယူႇသေတႃႉ ဢမ်ႇငိၼ်း ဢမ်ႇႁၼ် သၢႆငၢႆၼၢင်းမူဝ်ၶၢဝ် တေပဵၼ်ၸိူင်ႉႁိုဝ်ၵႂႃႇၼႆၵေႃႈ ၽႂ်ဢမ်ႇလၢမ်းလႆႈ။