မွၵ်ႇလူင်ႇလဵဝ်/တွၼ်ႈသၢမ်
ၸမ်ႁွတ်ႈၽႅဝ်ထိုင် ၶၢဝ်းယၢမ်းၶိုၼ်ႈႁူင်းႁဵၼ်းယဝ်ႉလႄႈ ၼၢင်းၸၢမ်သႅင်း မႃးၸူဝ်းၼၢင်းမူဝ်ၶၢဝ် ၵႂႃႇၶိုၼ်ႈႁူင်းႁဵၼ်းယဝ်ႉ မၼ်း ၼၢင်းၶဝ်ႈမႃးၼႂ်းႁိူၼ်း ၼၢင်းမူဝ်ၶၢဝ်ၶဝ်သေ ႁွင်ႉဝႃႈ-
“မူဝ် ... တၼ်းယဝ်ႉႁႃႉ? ၵႂႃႇႁဝ်းၵႂႃႇ”
“ပႂ်ႉၵမ်ႉလႄႈၼႃႉ ... တေယဝ်ႉယဝ်ႈ”
ၼၢင်းၸၢမ်သႅင်း ပႂ်ႉဝႆႉၵမ်ႉၼိုင်ႈယူႇ ၼၢင်းမူဝ်ၶၢဝ်ၵေႃႈ ဢဝ်ထူင်သေ ဢွၵ်ႇမႃးယဝ်ႉ
“မူဝ် ၵုမ်ႇႁဵတ်းသင်ယူႇၼႆႉ ... ၵုမ်ႇယၵ်ႉၸမ်ႈထုၵ်းမုၼ်ႈ ယူႇႁႃႉ သမ်ႉပေႃးႁၢင်ႈလီဝႆႉ ၸဵမ်ပိုင်းယဝ်ႉ ... ၵမ်ႉပႄႇၶႅၼ်းႁၢင်ႈလီ တိၵ်းတိၵ်းႁေယဝ်ႉဢိူဝ်ႈ
“ၸၢင်ႈပဵၼ်သင်လႃႇ ၶႅၼ်းၶႅမ်ႉဢိူဝ်ႈ”
“ပေႃးမွၵ်ႇႁၢင်ႈလီၵေႃႈ ၵူၼ်းၶႂ်ႈၼူမ်ၶႂ်ႈပိတ်းမၼ်းၵေႃႈ ၼမ်ဝႃႈ ပေႃးသၢဝ်ႁၢင်ႈလီၵေႃႈ ၵူၼ်းၶႂ်ႈႁၵ်ႉမၼ်း ၼမ်ဝႃႇၵွပ်ႈၼႆ”
“ၵွပ်ႈၼႆ ၸိူင်ႉႁိုဝ်?”
“ၵွပ်ႈၼႆ ... ပေႃးၼမ်ၼႆ ၵူဝ်မၢဝ်ႇလႆႈႁႃယၢပ်ႇဢိူဝ်ႈ ဢမ်ႇၸႂ်ႈႁႃႉ?”
“ၸၢမ်သႅင်းၸွႆႈလိူၵ်ႈပၼ်ၽွင်ႈလေႃႇ
“ဢမ်ႇပဵၼ်သင် ... ယႃႇပေမႆႈၸႂ် ၵူၺ်းၵႃႈ ပေႃးၸၢမ်သႅင်း လိူၵ်ႈပၼ်ၼႆ ၸွင်ႇမူဝ်တေႁပ်ႉဢဝ်ႁိုဝ် ... ၸွင်ႇတေလႆႈၸႂ်ႁိုဝ်?”
“လိူၵ်ႈပၼ်တူၺ်းၵွၼ်ႇလေႃႇ
“တႄႉႁႃႉ
ၼၢင်းမူဝ်ၶၢဝ် ယုမ်ႉငွၵ်းႁူဝ်သေဝႃႈ “ဢိူဝ်ႈ”ၼႆယဝ်ႉ
“ၸၢႆးလွႆလႅမ်”
ၼၢင်းမူဝ်ၶၢဝ်လႆႈငိၼ်းၼင်ႇၼၼ် မၼ်းၼၢင်းဢဝ်သၢႆထူင်မၼ်း ၽတ်ႉပၼ်ၼၢင်းၸၢမ်သႅင်းယူႇ ... ၶႃသွင်ၵေႃႉ တိုၼ်းပဵၼ်တႆးၵေႃႉႁၵ်ႉၵၼ်လႄႈ ၵႂႃႇၶိုၼ်ႈႁူင်းႁဵၼ်းၵေႃႈ တိုၼ်းၵႂႃႇၸွမ်းၵၼ်တႃႇသေႇယဝ်ႉ ... တၢင်းႁၢင်ႈလီဢွၼ်ႇၶႃသွင်ၵေႃႉၼႆၵေႃႈ ႁၢင်ႈလီမွၵ်ႇၵီႈမႂ်ႇဝႆႉတင်းသွင်ၵေႃႉ ... ၽႂ်ၵေႃႈဢမ်ႇၶျေႃႉ ၽႂ်ၵေႃႈ ဢမ်ႇယွမ်း ... ၽွင်းၶႃသွင်ၵေႃႉၸွမ်းၵၼ်ၼႆ ၽႅဝ်မႃး ၼႂ်းဝၢင်းႁူင်းႁဵၼ်းၼၼ်ႉ ၸၢႆးသႅင်မိူင်းၶဝ် ၽႅဝ်မႃးႁိမ်း ၶႃသွင်ၵေႃႉသေ ၸၢႆးသႅင်မိူင်း ၸင်ႇဝႃႈ-
“ၶိူဝ်သွင်ၵေႃႉ ပေႉၽႅဝ်မႃးလႃႈလႃႇမိူဝ်ႈၼႆႉ
ၼၢင်းၸၢမ်သႅင်းၸင်ႇတွပ်ႇဝႃႈ
“လႃႈၵေႃႈယဝ်ႉဢိူဝ်ႈ ၸွင်ႇပိူၼ်ႈၶိုၼ်ႈႁူင်းႁဵၼ်းယဝ်ႉၵေႃႈ ဢမ်ႇၸႂ်ႈ
ၼၢင်းမူဝ်ၶၢဝ်လႄႈ ၸၢႆးသႅင်မိူင်းၶဝ်ၼႆႉ ၶဝ်တိုၼ်းႁူႉ ၸၵ်းၵၼ်ဢဵၼ်ႈၵေႃႉၵၼ်မႃး ၸဵမ်မိူဝ်ႈလဵၵ်ႉယဝ်ႉ ... ပေႃႈမႄႈၶဝ်ၵေႃႈ ပဵၼ်ၵူၼ်းမိုတ်ႈၵိုဝ်းၸမ်ၸႂ်ၵၼ်တႄႉတႄႉ၊ ၵွပ်ႈၼႆ ပိူဝ်ႈပဵၼ်တႆး ၵေႃႉၵၼ်ၵၼ်မႃး ၸဵမ်လဵၵ်ႉမိူဝ်ႈဢွၼ်ႇလႄႈ ၼၢင်းမူဝ်ၶၢဝ်ၸင်ႇဝႃႈ
“ၸၢႆးသႅင်မိူင်း ... ပွႆးထၢမ်လိၵ်ႈႁဝ်းၵေႃႈ ၸမ်မႃးယဝ်ႉ ဢမ်ႇၸႂ်ႈႁႃႉ ... ၵွပ်ႈၼႆၶတ်းၸႂ်လိၵ်ႈလႄႈၼႃႈ ... မႂ်းၵူၺ်းၵုမ်ႇမူတ်းၶၢဝ်းယၢမ်းၸွမ်းတႆးၵေႃႉမႂ်းသေ တွႆႇတိင်ႇႁွင်ႉၵႂၢမ်းယူႇတိၵ်းတိၵ်းၼႆၸိုင် မႂ်းတေဢမ်ႇပဵၼ်တူၺ်းလိၵ်ႈသင်ယဝ်ႉ ပီၼႆႉႁဝ်းပဵၼ်လုၵ်ႈႁဵၼ်း ၸၼ်ႉသိပ်းၼႆ ၶႅၼ်းလူဝ်ႇၶတ်းၸႂ်ၵွၼ်ႇယဝ်ႉ
ၸၢႆးသႅင်မိူင်း ယၵ်ႉတူၺ်ႈၼႃႈၼၢင်းမူဝ်ၶၢဝ်သေ လၢတ်ႈဝႃႈ
“ဢၼ်ၵဝ်လူဝ်ႇသေလွင်ႈၶတ်းၸႂ်လိၵ်ႈၼႆႉတႄႉ ယၢမ်း လဵဝ်ပေႃးမႂ်းပၼ်လႆႈၼႆ ၵဝ်ၶႂ်ႈလႆႈတီႈမႂ်းမဵဝ်းလဵဝ်ၵူၺ်းယဝ်ႉ ၸွင်ႇမႂ်းတေပၼ်လႆႈႁိုဝ်
ၸၢႆႈသႅင်မိူင်းၶႂ်ႈလၢတ်ႈသင်ၼႆ ၼၢင်မူဝ်ၶၢဝ်ႁူႉပွင်ႇဝႆႉ ၸဵမ်မိူဝ်ႈတင်းႁိုင်ပုၼ်ႉယဝ်ႉ။ ၵွပ်ႈၼႆ မၼ်းၼၢင်းၸင်ႇဢမ်ႇတၵ်းသဵင် ၽွင်းမိူဝ်ႈၼၼ်ႉ သဵင်တွႆႇႁိင်ႇ တႃႇတေၶိုၼ်ႈႁူင်းႁဵၼ်းၵေႃႈ မေႃး လင်မႃးယဝ်ႉ။
“တႅင်းတႅင်းတႅင်း ... တႅင်းတႅင်းတႅင်း ... တႅင်ႈတႅင်း”
ၼၢင်းမူဝ်ၶၢဝ် ၸင်ႇဝႃႈတီႈၼၢင်ႈၸၢမ်သႅင်း
“ၸၢမ်သႅင်း ၵႂႃႇႁဝ်းၵႂႃႇ ပိူၼ်ႈၶိုၼ်ႈႁဵၼ်းယဝ်ႉၼေႈ”
ၸၢႆးသႅင်မိူင်း ၸင်ႇၶိုၼ်းထၢမ်ဝႃႈ
“ၼၢင်းမူဝ် ... ၼၢင်းမူဝ်တေဝႃႈႁိုဝ်?”
“ဢူဝ် ... မႂ်းယႃႇပေမႃးလၢတ်ႈၵႂၢမ်းမဵဝ်းၼႆႉ ၸၢႆးသႅင်မိူင်း လွင်ႈၸိူဝ်းၼႆႉ ၵဝ်ဢမ်ႇပႆႇၶဝ်ႈၸႂ်လႆႈ ၽွင်းယၢမ်းမိူဝ်ႈလဵဝ်ၼႆႉ ပဵၼ်ၽွင်းယၢမ်းလူဝ်ႇၶတ်းၸႂ်လိၵ်ႈ ပဵၼ်ၽွင်းယၢမ်းလူဝ်ႇၶိုၼ်ႈႁဵၼ်း ဢိူဝ်ႈ ၵဝ်ႁူႉလွင်ႈၼႆႉၵူၺ်းယဝ်ႉ”
ၼၢင်းမူဝ်ၶၢဝ် ဝႃႈၼင်ႇၼႆသေ ပႆၵႂႃႇၸူးႁွင်ႈႁဵၼ်းမၼ်း ၼၢင်းယဝ်ႉ ... ႁွတ်ႈၽႅဝ်ထိုင် ၼႂ်းၶၢၼ်းႁွင်ႈႁဵၼ်းၼႆ မၼ်းၼၢင်း ပဵၼ်ဢၼ်ၼၵ်းၸႂ် ယွၼ်ႉပိူဝ်ႈ ၸၢႆးသႅင်မိူင်းလႄႈ မၼ်းၼၢင်းထူၺ်ႈ ၸႂ်လူင်ယူႇယဝ်ႉ ... ၼၢင်းၸၢမ်သႅင်းၸင်ႇဝႃႈ
“မူဝ် ... ၸၢမ်သႅင်းဢမ်ႇဝႃႈယူႇႁိုဝ် မိူဝ်ႈၸဝ်ႉၼၼ်ႉ ပေႃႈ မွၵ်ႇႁၢင်ႈလီၵီႈၵေႃႈ ၵူၼ်းၶႂ်ႈပိတ်းမၼ်း မီးၼမ်ၼႆ ဢမ်ႇၸႂ်ႈႁႃႉ?”
“ၸႂ်ႈတႄႉၸႂ်ႈယူႇ ၸၢမ်သႅင်း ၵူၺ်းၵႃႈ မူဝ်တႄႉ မိုတ်ႈမၼ်း ယွၼ်ႉပိူဝ်ႈပဵၼ်တႆးၵေႃႉၵၼ် ၸဵမ်လဵၵ်ႉသေ ၶႂ်ႈႁႂ်ႈမၼ်းၶိုၼ်ႈယႂ်ႇ ၶႂ်ႈႁႂ်ႈမၼ်းၶတ်းၸႂ်လိၵ်ႈလႄႈ ၸင်ႇတိုၵ်းသူၼ်းမၼ်း ႁႂ်ႈမၼ်း ၶတ်းၸႂ်လိၵ်ႈယဝ်ႉ ... မၼ်းသမ်ႉဢမ်ႇဝႃႈၼၼ် လၢတ်ႈၵႂၢမ်းမိူဝ်ႈလႂ်ၵေႃႈ ၵုမ်ႇဢဝ်လေႃႈၸူး မၢၵ်ႇႁူဝ်ၸႂ်ယူႇတႃႇသေႇယဝ်ႉ”
“လွင်ႈမၢၵ်ႇႁူဝ်ၸႂ်ၼႆႉ မူဝ်ပႆႇဝူၼ်ႉႁႃႉ?”
“ပႆႇၸၢင်ႈဝူၼ်ႉၵွၼ်ႇ ပႆႇၸၢင်ႈပၼ်တီႈယူႇမၼ်းၵွၼ်ႇ”
တေဝူၼ်ႉတေပၼ်မိူဝ်ႈလႂ်လႃႇ”
“ၼႆႉတႄႉ ... မိူၼ်မွၵ်ႇလူင်ႇၵီႈမႃးၼၼ်ႉယဝ်ႉ ပေႃးဝႃႈ တူၼ်ႈမၼ်းၵေႃႈယႂ်ႇ တုမ်ႇမွၵ်ႇမၼ်းၵေႃႈ တုမ်ႇမႃးၼႆၸိုင် ထိုင်ၶၢဝ်းသၢႆလႅတ်ႇပိူင်းထွင်ႇမႃးၼႆတႄႉ မွၵ်ႇၼၼ်ႉၵေႃႈ တေမွၵ်ႇမႃးယူႇ ... ပေႃးဝႃႈ လူမ်းၵတ်းလူမ်းယဵၼ်ဢွၼ်ႇ ထွင်းပဝ်ႇမႃးၼႆၵေႃႈ မွၵ်ႇၼၼ်ႉတေႁွမ်ႁူၺ်းႁူၺ်း ၸွမ်းသၢႆလူမ်းယူႇ”
ၼၢင်းၸၢမ်သင်း ၸင်ႇယုမ်ႉတုမ်ႉၸႂ်သေလၢတ်ႈဝႃႈ
“ဢူဝ်း ... မူဝ်ပႄႉမေႃလၢတ်ႈပေႃးပဵၼ်တၢၼ်ႇၼႆႉလႃႇ ပေႃးၼႆမွၵ်ႇၼၼ်ႉ တေလႆႈႁွင်ႉဝႃႈမွၵ်ႇၸိူင်ႉႁိုဝ်လႃႇ”
“မွၵ်ႇၼၼ်ႉႁႃႉ ... တေလႆႈႁွင်ႉဝႃႈ မွၵ်ႇလူင်ႇလဵဝ်ဝႃႇ”
“မွၵ်ႇလူင်လဵဝ်”
“ၸႂ်ႈဢိူဝ်ႈ”
“ဢေႃ ... ပေႃးၼႆ မွၵ်ႇၼႂ်းၸႂ်မူဝ်ၼၼ်ႉၵေႃႈ ဢၢၼ်းႁႂ်ႈ ပဵၼ်မွၵ်ႇလူင်ႇလဵဝ်ၼႆႁႃႉ?”
“ဢဵၼ်းဢၢၼ်းဝႆႉၼင်ႇၼၼ်ယဝ်ႉ ဢၢၼ်းႁႂ်ႈပဵၼ်မွၵ်ႇလူင်ႇလဵဝ် ပုၼ်ႈတႃႇၵေႃႉလဵဝ်ၵူၺ်းၼႆဢိူဝ်ႈ”
“တေပဵၼ်ပုၼ်ႈတႃႇၽႂ်လႃႇ?”
“တႃႇၵေႃႉလဵဝ်ၼၼ်ႉဢိူဝ်ႈ”
“ၵေႃႉလဵဝ်ၼၼ်ႉလူး တေပဵၼ်ၽႂ်”
“ဢူဝ် ... ၼၼ်ႉတႄႉ ဢမ်ႇပႆႇႁူႉလႄႇ”
“ၸၢမ်သႅင်းတႄႉ လွမ်ႁူႉဝႆႉယဝ်ႉၵူၺ်း”
“လႃႈလီဝႃႈ ... ပဵၼ်ၽႂ်လၢတ်ႈလူး”
“ၸၢႆးသႅင်မိူင်း ... ဢမ်ႇၸႂ်ႈႁႃႉ?”
“ဢမ်ႇၸႂ်ႈ ဝႆႉၵႆၵႆလႃႈ”
“ဢၼ်ဝႆႉၵႆၵႆသေၼၼ်ႉ ယင်းမီးၵွၼ်ႇယူဝ်ႉမူဝ်”
“မီးတီႈလႂ်?”
“မီးတီႈလႅၼ်လီၸၵျႃႇဝလႃႇဢၼ်ၵႆၵႆသေပိူၼ်ႈ ပဵၼ်လွႆ ဢၼ်လႅမ်လႅမ်လုၵ်ႈၼိုင်ႈၼၼ်ႉ ဢမ်ႇၸႂ်ႈႁႃႉ”
ၼၢင်းၸၢမ်သႅင်း ၶႂ်ႈလၢတ်ႈၽၢတ်ႈဝႃႈလွႆလႅမ်ၼႆယဝ်ႉ ၼၢင်းမူဝ်ၶၢဝ် ဢမ်ႇပႆႇၵိုင်ႉၵၢင်ႉဝူၼ်ႉလႆႈလႄႈ မၼ်းၸင်ႇထၢမ်ဝႃႈ
“မီးတီႈလႅၼ်လိၼ်ၸၵျႃႇဝလႃႇဢၼ်ၵႆသေပိူၼ်ႈ ပဵၼ် လွႆဢၼ်လႅမ်သေပိူၼ်ႈၼၼ်ႉၼႆႁႃႉ”
ၼၢင်းၸၢမ်သႅင်း ၸင်ႇယုမ်ႉသေတွပ်ႇဝႃႈ
“ၸႂ်ႈဢိူဝ်ႈမူဝ် ... ယူဝ်ၶေးပဵၼ်လွႆလႅမ်လႅမ်ၼၼ်ႉယူဝ်ႉ”
ၼၢင်းမူဝ်ၶၢဝ် ၶိုၼ်းၵႂႃႇၶုၵ်းၸႂ်လႆႈ ပွင်ႇၸႂ်ထိုင်လွင်ႈဝႃႈ ၼၢင်းၸၢမ်သႅင်းၶႂ်ႈဝႃႈ ပဵၼ်ၸၢႆးမွၼ်းၶိူဝ်းလွႆလႅမ်ၼႆလႄႈ မၼ်းၼၢင်းၸင်ႇယၵ်းလိမ်ႇပၼ် ၶႅၼ်ၼၢင်းၸၢမ်သႅင်း ႁႅင်းႁႅင်းယဝ်ႉ “ယူဝ်ဝႃႈ ၸၢမ်သႅင်းလၢတ်ႈတႄႉတႄႉၼႆၼႃး ... ႁိုဝ်ႉ မိူဝ်ႈလႂ် ဢမ်ႇမိူဝ်ႈလႂ်ၵေႃႈ မႃးၵွႆတီႈလွႆလႅမ် ၼႆႉတိၵ်းတိၵ်းဝႃႇ” ၼၢင်းမူဝ်ၶၢဝ် ဝႃႈၼင်ႇၼႆသေ ယၵ်းပၼ်ၼၢင်းၸၢမ် သႅင်းႁႅင်းႁႅင်းလႄႈ ၼၢင်းၸၢမ်သႅင်းၸဵပ်းၼႃႇသေ
“ဢႃး ... ၸုတ်ႉ ... ၸုတ်ႉ ... ၸဵပ်းဝႃႈၸဵပ်းယဝ်ႉ”
“ပေႃးၸဵပ်းၵေႃႈ ဢဝ်မၢၵ်ႇၽိတ်ႉၽဵတ်းၽဵတ်းထုၵ်းႁေ ဢဝ်ၼင်ပွင်းၸမ်ႈလႄႈ”
ၼၢင်းၸၢမ်သႅင်းၶိုၼ်းႁူႉပွင်ႇ လွင်ႈဢၼ်ၼၢင်းမူဝ်ၶၢဝ် ဢဝ်ၸၢႆးၶမ်း ယွၵ်ႇၵူပ်းမၼ်းၼၢင်းၼၼ်ႉလႄႈ မၼ်းၶိုၼ်းဢဝ်တႃ မိုဝ်းမၼ်းၼၢင်း ထုပ်ႉပၼ်ၶႃၼၢင်းမူဝ်ၶၢဝ်ယဝ်ႉ ... ၽွင်းၼၼ်ႉ မေႃသွၼ်ၶဝ် ၽႅဝ်မႃးၼႂ်းႁွင်ႈႁဵၼ်းလႄႈ ၶဝ်လႆႈဢွၼ်ၵၼ်လုၵ်ႉ ၸုၵ်းသေ တူင်ႉတၵ်ႉၼပ်ႉယမ် မေႃသွၼ်ၶဝ်ယူႇ ... ဝၢႆးၼၼ်ႉ ၶဝ်ၶိုၼ်းသိုပ်ႇသွၼ်ႁဵၼ်းလိၵ်ႈၵႂႃႇ ၸိူင်ႉၼင်ႇၵူႈဝၼ်းၼၼ်ႉယဝ်ႉ။ ၶၢဝ်းယၢမ်းဝၼ်းၼိုင်ႈယဝ်ႉဝၼ်းၼိုင်ႈ လိူၼ်ၼိုင်ႈယဝ်ႉ လိူၼ်ၼိုင်ႈပူၼ်ႉၵႂႃႇမူတ်းၵႂႃႇတိၵ်းတိၵ်းယဝ်ႉ... ယွၼ်ႉပိူဝ်ႈ တၢင်းၶတ်းၸႂ် တဵမ်ထူၼ်ႈလႄႈ ၼၢင်းမူဝ်ၶၢဝ် ဢိၵ်ႇလူၺ်ႈ ၼၢင်းၸၢမ်သႅင်း ပူၼ်ႉၸၼ်ႉသိပ်းပီလဵဝ်ၼင်ႇၵၼ်ယဝ်ႉ ၸၢႆးသႅင်မိူင်းတႄႉဢမ်ႇပူၼ်ႉ...
ယွၼ်ႉပိူဝ်ႈ ပူၼ်ႉၸၼ်ႉသိပ်းလႄႈ ႁူင်းႁဵၼ်းၸၼ်ႉၸွမ် ပုၼ်ႈတႃႇပီၼိုင်ႈၶဝ် ပႆႇၽုၺ်ႇငၢႆႈငၢႆႈလႄႈ လုၵ်ႈႁဵၼ်းဢၼ်ပူၼ်ႉ ၸၼ်ႉသိပ်းၶဝ် ပဵၼ်ဢၼ်လႆႈလိုဝ်ႈႁိူဝ်ႉႁိုင်တႄႉတႄႉယူႇယဝ်ႉ။