မွၵ်ႇလူင်ႇလဵဝ်/တွၼ်ႈသွင်
ၼၢင်းမူဝ်ၶၢဝ်လႄႈ ၼၢင်းၸၢမ်သႅင်းၶႃသွင်ၵေႃႉ ပွၵ်ႈၽႅဝ် မႃႈတီႈႁိူၼ်းၼၢင်းမူဝ်ၶၢဝ်ၶဝ်သေ ၶႃသွင်ၵေႃႉ မႃးၼင်ႈလိုဝ်ႈႁိူဝ်ႉ ၼႂ်းသူၼ်မွၵ်ႇၶဝ်ဝႆႉယူႇ ... ၼၢင်းၸၢမ်သႅင်းၸင်ႇဝႃႈ-
“ႁိူဝ်ႉၼႃႇႁႃႉ မူဝ်ၶၢဝ်”
“ႁိူဝ်ႉ ဢိူဝ်ႈ”
“ၸႂ်ႁိူဝ်ႉသေ တူဝ်ယူဝ်ႉမိူဝ်ႈၼႆႉ”
ၼၢင်းမူဝ်ၶၢဝ် ဢဝ်တႃမိုဝ်းထုပ်ႉပၼ်ၶႅၼ်ၼၢင်ႈၸၢမ်သႅင်း သေ
“ၸၢမ်သႅင်းၼႆႉၼႃ ဝႃႈပွင်ႇသင်ၵေႃႈဢမ်ႇႁူႉ”
ၼၢင်းၸၢမ်သႅင်းယုမ်ႉၶူဝ် ၶိၵ်းၶိၵ်းသေၶိုၼ်းတွပ်ႇဝႃႈ
“ဢၼ်ၶဝ်ၽိတ်းၵၼ်ၼၼ်ႉဢိူဝ်ႈ ... ယူဝ်ၶႄးမူဝ်ၶၢဝ် မႆႈၸႂ်ႁိူဝ်ႉၸႂ်တၢင်ၸၢႆႈသႅင်မိူင်းယူဝ်ႉ”
“ဢူဝ် ... ၸၢင်ႈၵႂႃႇသႅင်သင်”
“သႅင်ႇၶၢႆၶူဝ်း ... ဢေႃႈဢမ်ႇၸႂ်ႈ ... ၶိၵ်းၶိၵ်း သႅင်ႇမၢၵ်ႇလေႃႉ ၵိင်ႈၽၢႆႇလဵဝ် ... ဢမ်ႇၸႂ်ႈႁႃႉ”
“ဢမ်ႇႁူႉ”
“ႁဵတ်းၵဵင်ႈဢမ်ႇႁူႉယူဝ်ႇ သူပဵၼ်တႆးၵေႃႉၵၼ်မႃး ၸဵမ်မိူဝ်ႈလဵၵ်ႉဢမ်ႇၸႂ်ႈႁႃႉ ၵွပ်ႈၼႆ မၼ်းလွမ်ႁၵ်ႉမူဝ်ၶၢဝ်ဝႆႉယူႇယဝ်ႉၼၼ်ႉ”
“ဢူဝ် ... ယႃႇပေလၢတ်ႈယဝ်ႉ ... ၶၢၼ်ႉငိၼ်းဢေႉလၢတ်ႈ တၢင်ႇမဵဝ်းလႄႈ”
“တေလႆႈလၢတ်ႈတၢင်ႇမဵဝ်းၸိူင်ႉႁိုဝ်ၼႆႉ ... ဢေႃႈ ... ဢေႃႈ ... ႁူႉယဝ်ႉ လၢတ်ႈၶိူဝ်းၵႂႃႇၵိၼ်ၶဝ်ႈသွႆးၼၼ်ႉၼေႃႈ ... ဢၼ်လႅၵ်ႈငိုၼ်းပၼ်မူဝ်ၶၢဝ်ၼၼ်ႉ မၼ်းယူႇလွႆလႅမ်ၼႆ ဢမ်ႇၸႂ်ႈႁႃႉ ၸိုဝ်ႈမၼ်းဝႃႈႁိုဝ်ၵေႃႈဢမ်ႇႁူႉၼေႃ”
“ၸၢမ်သႅင်ႈၶႂ်ႈႁူႉႁႃႉ ပေႃးၶႂ်ႈႁူႉၵေႃႈ ၸွမ်းမိူဝ်းထၢမ်တူၺ်း တီႈလွႆလႅမ်ႁေယဝ်ႉၼႃႇ”
“ဢမ်ႇပဵၼ်သင် ... ႁဝ်းတေထၢမ်ပၼ်ပုၼ်ႈတႃႇ မူဝ်ၶၢဝ်လႆ ဢမ်ႇၸႂ်ႈႁႃႉ”
“ဢူဝ် ... မူဝ်ဢမ်ႇၶႂ်ႈႁူႉ ယႃႇပေမႃးလၢတ်ႈ”
“မူဝ် ဢမ်ႇၶႂ်ႈႁူႉတႄႉတႄႉႁႃႉ”
“ဢမ်ႇၶႂ်ႈႁူႉ”
“တီႈထူင်ပႃးမၼ်းၼၼ်ႉ တႅမ်ႈဝႆႉတူဝ်လိၵ်ႈၸိုဝ်ႈမၼ်းယူႇလူး မူဝ်ၶၢဝ်ဢမ်ႇႁၼ်ႁႃႉ”
ၼၢင်းမူဝ်ၶၢဝ်ဢမ်ႇတူၺ်းၺႃးတႄႉတႄႉလႄႈ မၼ်းၸင်ႇထၢမ်ဝႃႈ
“တႄႉႁႃႉ ... တႅမ်ႈဝႆႉဝႃႈႁိုဝ်”
ၼၢင်းၸၢမ်သႅင်း ၸင်ႇယုမ်ႉၶူဝ်သေဝႃႈ
“ၶိၵ်း ၶိၵ်း ... မိူဝ်ႈၵႆႈဝမ်ႉဝႃႈဢမ်ႇၶႂ်ႈႁူႉ ... ၵမ်းၼႆႉသမ်ႉ ဝႃႈတႅမ်ႈဝႆႉဝႃႈႁိုဝ်ၼႆဝႃႇ ၶဝ်ႈၸႂ်ၼႃႇယဝ်ႉႁႃႉ မူဝ်ၶၢဝ်”
ၼၢင်းမူဝ်ၶၢဝ် လီဢၢႆၵႂႃႇသေ ယၵ်းလိမ်ႇပၼ်ၶႅၼ် ၼၢင်းၸၢမ်သႅင်းၵမ်းၼိုင်ႈယဝ်ႉ
“ႁိုဝ်ႉ ... ဢမ်ႇၶႂ်ႈလၢတ်ႈၵေႃႈယဝ်ႉဢိူဝ်ႈ”
“တီႈထူင်မၼ်းၼၼ်ႉ တႅမ်ႈဝႆႉတူဝ်လိၵ်ႈဢင်းၵိတ်း (MK) ဢႅမ်ႇၶေႇ ၼႆၼႃႇ ပေႃးဢမ်ႇၶႂ်ႈငိၼ်းၵေႃႈ ဢိုတ်းႁူဝႆႉလႄႈ”
“ဢူဝ် ... ၸၢမ်သႅင်းၼႆႉ လၢတ်ႈႁႂ်ႈပိူၼ်ႈငိၼ်းယဝ်ႉသေ သမ်ႉဝႃႈ ပေႃးဢမ်ႇၶႂ်ႈငိၼ်းၵေႃႈဢိုတ်းႁူဝႆႉဝႃႇ ... ယွၵ်ႇလႆႈၵျႃႉ”
“ဢႅမ်ႇ ၶေႇၼႆႉတေပွင်ႇဝႃႈသင် ဝူၼ်ႉတူၺ်းလႄႈ ဢႅမ်ႇ ၼႆႉ ပဵၼ်“မ” ၶေႇၼႆႉပဵၼ်“ၶ” ဢမ်ႇၸႂ်ႈႁႃႉ ...မၶၼႆတေပဵၼ် ၸိုဝ်ႈမၼ်းယဝ်ႉ ဝူၼ်ႉတူၺ်းလႄႈ”
ၶႃသွင်ၵေႃႉၶဝ်ႈၸႂ်ဝူၼ်ႉတူၺ်း ၵႅပ်ႉၼိုင်ႈသေ ၼၢင်းၸၢမ်သႅင်းၸင်ႇဝႃႈ
“တေပဵၼ်မိူင်းၶွၼ်း ၼႆယူဝ်ႉ ၶိၵ်းၶိၵ်း”
“ဢေႃ ... ၵဵင်သိူင်းမိူင်းၶွၼ်းၼၼ်ႉႁႃႉ ၶႄးၸႂ်ႈယူႇယူဝ်ႉ ဢမ်ႇၼၼ်ၵေႃႈမူဝ်ၶၢဝ်ထၢင်ႇတႄႉ မႉၶၼႆႉ တေပဵၼ်မွၼ်းၶမ်းၼႆ ႁိုဝ်?”
“ၼႆႉၵေႃႈ ၸၢင်ႈပဵၼ်လႆႈယူႇ”
ၽွင်းမိူဝ်ႈၼၼ်ႉ မႅဝ်းၼၢင်းမူဝ်ၶၢဝ်တူဝ်ၼိုင်ႈ တိုၵ်ႉမႃးၶီႈယူႇ ၼႂ်းသူၼ်မွၵ်ႇႁိမ်း ၶႃသွင်ၵေႃႉၼၼ်ႉလႄႈ ၼၢင်းၸၢမ်သႅင်း ၸင်ႇၸီႉမႅဝ်းၶီႈတူဝ်ၼၼ်ႉသေလၢတ်ႈဝႃႈ-
“ၼႄႈ ... မႉၶ ၼႆႉပဵၼ်ဢၼ်ၼၼ်ႉယူဝ်ႉ”
ၼၢင်းမူဝ်ၶၢဝ် ပႆႇပွင်ႇၸႂ်လႄႈ မၼ်းၸင်ႇထၢမ်ဝႃႈ
“ဢၼ်လႂ်”
“ၼၼ်ႉၼႃႇ မႉၶ ၼႆႉၸွင်ႇဢမ်ႇပဵၼ် မႅဝ်းၶီႈႁိုဝ်”
ၶႃသွင်ၵေႃႉ ၸူမ်းၶူဝ်ၵႂႃႇတႄႉတႄႉသေ ၼၢင်းမူဝ်ၶၢဝ်ၸင်ႇဝႃႈ
“ဢူဝ် ... ၸၢမ်သႅင်းၼႆႉ ... လႃႈလီဝႃႈဝီႈလူင်ၵႂႃႇ ၸိုဝ်ႈမၼ်းတေလူႉလႅဝ်မူတ်းယဝ်ႉ”
“ၶိၵ်း ... မူဝ်ၶၢဝ်ၼေႃ ပေႃးလၢတ်ႈၵႂၢမ်းတိူဝ်ႉၵူၼ်းလွႆလႅမ်ၼႆ ဢမ်ႇၶႂ်ႈၶၢမ်ႇႁႃႉ”
ၼၢင်းမူဝ်ၶၢဝ် ဢဝ်တႃမိုဝ်းမၼ်းထုပ်ႉပၼ် ၼၢင်းၸၢမ်သႅင်းတင်းသွင်ၶွၼ်ယဝ်ႉ ၼၢင်းၸၢမ်သႅင်း ၵိူင်းတူဝ်မၼ်းၼၢင်း သေ ၶၢမ်ႇဝႆႉယူႇ
“ဢိုဝ်ႉႁိုဝ် ဢိုဝ်ႉႁိုဝ် ယွၵ်ႇပိူၼ်ႈတိၵ်းတိၵ်းလႄႈ
“ဢလူဝ်ႉ ... ပေႃးယဝ်ႉလေႃႇမူဝ်ၶၢဝ် မိူဝ်ႈၸၢႆးလွႆလႅမ် လႄႈ ၸၢႆးသႅင်မိူင်းၶဝ်ၽိတ်းၵၼ်ၼၼ်ႉ ႁဝ်းယူဝ်ဝႃႈ ၸၢႆးလွႆလႅမ် မေႃလၢႆးၶႅၼ်ႇၵျႃႉၼႆၼႃး ... ႁွႆးဝႃႈမူဝ်ၶၢဝ်ၵေႃႈ မေႃမိူၼ်မၼ်း ႁဝ်းႁူႉယဝ်ႉ။
ၼၢင်းမူဝ်ၶၢဝ် ႁဵတ်းၵဵင်ႈၶႂ်ႈၸႃႉသေ
“ၸၢမ်သႅင်းၼႆႉၼႃ ႁိုဝ်ႉ ယွၵ်ႇပိူၼ်ႈၵိုၵ်းလွႆလႅမ်တိၵ်းတိၵ်းဝႃႇ
“ဢမ်ႇလႆႈၸႂ်ႁႃႉ”
“ဢမ်ႇလႆႈ”
“ပေႃးၼႆ လုၵ်ႈၸၢႆႈသထေး ၸၢႆးသႅင်မိူင်းလူး”
“ၶႅၼ်း ... ဢမ်ႇလႆႈၸႂ်ယဝ်ႉ”
“ၶိၵ်းၶိၵ်း... လွႆလႅမ်တႄႉ မူဝ်ၶၢဝ်ဝႃႈ ဢမ်ႇလႆႈၸႂ် ၸၢႆးသႅင်မိူင်းၼႆႉသမ်ႉဝႃႈ ၶႅၼ်းဢမ်ႇလႆႈၸႂ် ၼႆလႄႈ ၼႂ်းသွင်ၵေႃႉၼႆႉ လွႆလႅမ်သႃႇသေ သႅင်မိူင်းဝႆႉယဝ်ႉ ... ၶိၵ်းၶိၵ်း”
ၼၢင်းမူဝ်ၶၢဝ် ဢမ်ႇၶႂ်ႈၶၢမ်ႇလႄႈ ၸင်ႇၶိုၼ်းဝႃႈ
“ဢေႃႈ ... ၸၢမ်သႅင်း”
“ဢီႈသင်”
“မိူဝ်ႈႁဝ်းႁၼ် ၸၢႆးလွႆလႅမ်ၶဝ်ၼၼ်ႉ မီးၶႃသွင်ၵေႃႉ ဢမ်ႇၸႂ်ႈႁႃႉ?”
“ၸႂ်ႈဢိူဝ်ႈ”
“ၸၢႆးလွႆလႅမ် ႁွင်ႉၸိုဝ်ႈၵေႃႉၼၼ်ႉတႄႉ မူဝ်တၼ်းငိၼ်းယူႇ”
“ႁွင်ႉဝႃႈႁိုဝ်”
ၼၢင်မူဝ်ၶၢဝ် ၶိုၼ်းၶႂ်ႈတွပ်ႇၼၢင်းၸၢမ်သႅင်းလႄႈ မၼ်း ၸင်ႇယုမ်ႉသေ
“ၶိၵ်းၶိၵ်း ... ၸၢမ်သႅင်းၶဝ်ႈၸႂ်သေ ၶႂ်ႈႁူႉႁႃႉ?”
ၼၢင်းၸၢမ်သင်းၶိုၼ်းၼႃႈမႆႈၵႂႃႇသေ ဢဝ်မိုဝ်းမၼ်းယၵ်း ပၼ်ၶႅၼ်ၼၢင်းမူဝ်ၶၢဝ်ယူႇ ... ၼၢင်းမူဝ်ၶၢဝ်ၶိုၼ်းဝႃႈ
“မူဝ်ယၢမ်ႈႁၼ်ယူႇၵူၺ်း ... ၵေႃႉၼၼ်ႉ မၼ်းယူႇတီႈ တူၼ်ႈတီးၼႆႉၼင်ႇၵဝ်ႇယဝ်ႉ။ ၸိုဝ်ႈမၼ်းတႄႉ မိူဝ်ႈမၼ်းၵိၼ်ၶဝ်ႈသွႆးၼၼ်ႉ မၢၵ်ႇၽိတ်ႉၽဵတ်းၼႃႇၼႆလႄႈ ၸိုဝ်းမၼ်းၵေႃႈဝႃႈ ၸၢႆး မၢၵ်ႇၽိတ်ႉၽဵတ်းဝႃႇ ... ၶိၵ်း ... ၶိၵ်း ... ထႅင်ႈပိူင်ၼိုင်ႈ မၼ်းႁၵ်း ၼင်ပွင်းသေ ၼင်ပွင်းမၼ်းဝူင်လႄႈ ၸိုဝ်ႈမၼ်းထႅင်ႈဢၼ်ၼိုင်ႈ သမ်ႉႁွင်ႉဝႃႈ ၸၢႆးၼင်ပွင်းဝူင် ၼႆဝႃႈ
ၶႃသွင်ၵေႃႉ ယုမ်ႉၶူဝ်ၵႂႃႇႁူမ်ႈၵၼ်သေ ၶႃသွင်ၵေႃႉသိုပ်ႇ ဢုပ်ႇၵၼ်တၢၼ်ႇတၢၼ်ႇသေ ၼၢင်းၸၢမ်သႅင်း ပွၵ်ႈမိူဝ်းၶိုၼ်းႁိူၼ်းၶဝ်ယဝ်ႉ။ ဝၼ်းၼၼ်ႉ ၸၢႆးမွၼ်းၶိူဝ်း ႁွတ်ႈၽႅဝ်မိူဝ်းလွႆလႅမ်သေ ၶိုၼ်းၵုမ်ႇဝူၼ်ႉထိုင် လွင်ႈဢၼ်မၼ်းႁူပ်ႉထူပ်းႁၼ် ၼၢင်းမူဝ်ၶၢဝ် တီႈသႅင်ၶဝ်ႈသွႆးတုမ်ႉပၼ်ငိုၼ်းၽိတ်း၊ လွင်ႈဢၼ်ၶႃသွင်ၵေႃႉ ၶိုၼ်းလႅၵ်ႈပၼ်ငိုၼ်းၵၼ်ၼၼ်ႉယူႇ၊ ၵၢင်ၸႂ်ၸၢႆးမွၼ်းၶိူဝ်းတႄႉ ၽွင်းမိူဝ်ႈမၼ်းဢဝ်ငိုၼ်းၸေႈၶၼ်သွင်မၢင် ပၼ်ၼၢင်းမူဝ်ၶၢဝ် ၼၼ်ႉၼႆ မၼ်းၶႂ်ႈဢဝ်ပႃးမၢၵ်ႇႁူဝ်ၸႂ်မၼ်း ၽၢၵ်ႇပၼ်ၵမ်းလဵဝ်ယဝ်ႉ။ ငိုၼ်းသၢဝ်းၼိုင်ႈၼၼ်ႉတႄႉ ၼၢင်းမူဝ်ၶၢဝ် ႁပ်ႉဢဝ်ၵမ်းလဵဝ်သေတႃႉ ဢၼ်မၼ်းၶႂ်ႈဢဝ်မၢၵ်ႇႁူဝ်ၸႂ်မၼ်း ၽၢၵ်ႇပၼ်ၼၼ်ႉ ၸွင်ႇၼၢင်းမူဝ်ၶၢဝ် တေႁပ်ႉဢဝ်ၵမ်းလဵဝ်ႁိုဝ်ၼႆ မၼ်းဢမ်ႇဝူၼ်ႉထိုင်လႆႈ ... လိူဝ်သေၼၼ်ႉ မၼ်းဢဝ်ႁဵတ်းတီႈမၢႆတွင်း ထူပ်းႁၼ်ၵၼ်သေ မၼ်ႈဢဝ်သိမ်းဝႆႉ ၶႅမ်ႉၶႅမ်ႉယဝ်ႉ တီႈၼိူဝ်ၸေႈႁႃႈပျႃးၼၼ်ႉၵေႃႈ မၼ်းတႅမ်ႈလိၵ်ႈမၢႆသႂ်ႇဝႆႉၼင်ႇၼႆယဝ်ႉ။
လႆႈမႃႈႁၼ်ၵၼ် ၊ ၸိူဝ်ႈဢၼ်ၼိုင်ႈၵႅပ်ႉ
ၸူဝ်ႈၽႅပ်ႉတႃၵေႃႈ ၊ ႁဝ်းတေႃႈဢမ်ႇလိုမ်း
တွင်းၵိုမ်းၼႂ်းၸႂ် ၊ မိူဝ်ႈလႂ်ႁဝ်းႁႃး
တေၶိုၼ်းၺႃးၵၼ်ထႅင်ႈၼေႃႈ။ ။ မၼ်ႈၸၢႆးတႅမ်ႈၼင်ႇၼႆသေ ႁၢင်ႈၽၢင်ၼႃႈတႃသႂ်ဢွၼ်ႇ ၼၢင်းမူဝ်ၶၢဝ်ၵေႃႈ မၼ်းၶိုၼ်းဝူၼ်ႉႁၼ်မႃး ၼႂ်ႈတႃမၼ်းယဝ်ႉ၊ တၢင်းႁၢင်ႈလီဢွၼ်ႇ ၼၢင်းမူဝ်ၶၢဝ်ၼၼ်ႉ မႃးမုင်းသုမ်ႇၼႂ်းတၢင်းဝူၼ်ႉ မၼ်း ၼၼ်ႉယူႇ-
ၶမ်ႈၼၼ်ႉ ၼၢင်းမူဝ်ၶၢဝ်ၵေႃႈ ၼွၼ်းဢဝ်မိုဝ်းတၢင်ႇၼႃႈၽၢၵ်ႇမၼ်းသေ ဝူၼ်ႉႁၼ်ထိုင်လွင်ႈ ၸၢႆးမွၼ်းၶိူဝ်းယူႇ၊ မၼ်းဢမ်ႇလႆႈႁူႉၸိုဝ်ႈၸၢႆးမွၼ်းၶိူဝ်းသေတႃႉ ၸၢႆးမွၼ်းၶိူဝ်းတႄႉႁူႉၸၵ်းၸိုဝ်ႈ မၼ်းၵွႃႇယဝ်ႉ - လၢတ်ႈဝႃႈ “ယေႃႈ ... ၼၢင်းမူဝ်”ၼႆၼၼ်ႉ မၼ်းၼၢင်း တိုၵ်ႉငိၼ်းမီးဝႆႉ ၼႂ်းႁူမၼ်းယူႇ ... ႁၢင်ႈၽၢင်ၼႃႈတႃ တၢင်းလၢတ်ႈတၢင်းၸႃ တၢင်းယုမ်ႉၸၢႆးမွၼ်းၶိူဝ်းၸိူဝ်းၼၼ်ႉ ယၢမ်းလဵဝ် လွမ်လွမ် မႃးတုမ်ႉသႂ်ႇ ၸႂ်မၼ်းၼၢင်းဝႆႉယူႇ၊ ၶမ်ႈၼႆႉ မၼ်းဝူၼ်ႉပူၼ်ႉ လႄႈ မၼ်းၼၢင်းပဵၼ်ဢၼ်ၼၢၼ်းလပ်းတႄႉတႄႉ။