မွၵ်ႇလူင်ႇလဵဝ်/တွၼ်ႈသီႇ
ၽႅဝ်ႁွတ်ႈထိုင်မႃး ၶၢဝ်းဢွၵ်ႇဝႃႇ တမ်ႈတီႈၼႂ်းၼွင်ႁၢႆးယႃႈ (ဢၢင်းလေး) ပၢင်းၽြႃးလူင်းမိူင်း ပဵၼ်ပွႆးၽွင်ႇတေႃႇဢူးလႄႈ ၼင်ႇႁိုဝ်တေလႆႈၶဝ်ႈပွႆးၽြႃးၽွင်ႇတေႃႇဢူးၼၼ်ႉ ၽူႈလႂ်ၽႂ်ၵေႃႈၶတ်း ၸႂ်မႃးၶဝ်ႈပွႆးၽြႃးၵမ်ႉၼမ်ၼမ်ယဝ်ႉ ၸွမ်းၼင်ႇၾိင်ႈထုင်းမီးမႃးဝႆႉ ၸဵမ်ၵွၼ်ႇၼၼ်ႉ တႄႇဢဝ် လိူၼ်သိပ်းဢဵတ်းမႂ်ႇၶမ်ႈၼိုင်ႈတေႃႇ ထိုင်လိူၼ်သိပ်းဢဵတ်ႈလွင်ႈသၢမ်ၶမ်ႈၼႆ ၼင်ႇႁိုဝ်ၽူႈႁႃၵၢၼ်လီၶဝ် ပေႃးတေလႆႈလူႇလႆႈဝႆႈၽြႃးၽွင်ႇတေႃႇဢူး(ၽြႃးႁူဝ်ႁိူဝ်း)ၼၼ်ႉ ဢွၼ်ၵၼ်ပၢင်းဢဝ်ၽြႃး သႂ်ႇၼိူဝ်ၼူၵ်ႉၵရဝဵၵ်ႉသေ လဵပ်ႈသဝ်းတီႈဝၢၼ်ႈၸိူဝ်ႈၼႂ်းၼွင် ၸွမ်းၼင်ႇဢၼ်ၶဝ်မၢႆဝႆႉၼၼ်ႉယဝ်ႉ။ ဝၼ်း ဢၼ်ၵိုၼ်းသေပိူၼ်ႈၼၼ်ႉတႄႉ ပဵၼ်ဝၼ်းလိူၼ်သိပ်းဢဵတ်း လွင်ႈသၢမ်ၶမ်ႈ ဝၼ်းဢၼ်ၽြႃးၶဝ်ႈၵျွင်းၼၼ်ႉယဝ်ႉ။ ၼင်ႇႁိုဝ် တေလႆႈႁၼ် မိူဝ်ႈဢၼ်ၶိုၼ်းပၢင်းၽြႃးၶဝ်ႈၵျွင်းၼၼ်ႉၼႆ ၽူႈလႂ်ၽႂ်ၵေႃႈ ဢွၼ်ၵၼ်းၶတ်ႈၸႂ်တႄႉတႄႉ။
ၼၢင်းမူဝ်ၶၢဝ် ၼၢင်းၸၢမ်သႅင်း ဢိၵ်ႇလူၺ်ႈ ပေႃႈမႄႈၸုမ်း ပီႈၼွင်ႉၶဝ် သၢဝ်းပၢႆ လုၵ်ႉတီႈတူၼ်ႈတီးသေ ၽႅဝ်မႃးတီႈတႃႈႁိူဝ်း ယွင်ႈႁူၺ်ႇ(ၺွင်ႇသူၺ်ႇ) မိူဝ်ႈဝၼ်းလိူၼ်သိပ်းဢဵတ်းလွင်ႈသွင်ၶမ်ႈ ၼၼ်ႉယဝ်ႉ ၶဝ်မႃးၶၢတ်ႈႁိူဝ်းၸၢၵ်ႈသေ ၶိုင်ပွင်တႃႇတေၵႂႃႇ ၼႂ်းၼွင်ယူႇ။ ပေႃႈမႄႈၵူၼ်းလူင်ၶဝ် ဢွၼ်ၵၼ်ၶိုၼ်းဢဝ်တီႈယူႇ ၼိူဝ် ႁိူဝ်းၸၢၵ်ႈယူႇ ၼၢင်းမူဝ်ၶၢဝ် ၸင်ႇဝႃႈတီႈၼၢင်းၸၢမ်သႅင်း-
“ၸၢမ်သႅင်း ... ယႃႇၽူမ်ႈၶိုၼ်ႈၵွၼ်ႇ ႁႃးပႂ်ႉၶိုၼ်ႈဝၢႆးလင် ပိူၼ်ႈသေ ပႂ်ႉၶီတၢင်းႁူဝ်ႁိူဝ်းမၼ်းၼေႃႈ”
“ဢိူဝ်ႈ ... ဢိူဝ်ႈ ... လီယဝ်ႉ”
ၽွင်းၼၼ်ႉ ၸဝ်ႈႁိူဝ်းၸင်ႇဝႃႈ
“ၶိုၼ်ႈလႄႈ ၶိုၼ်ႈလႄႈ ... ႁဝ်းတေၵႂႃႇယဝ်ႉ”
ၵူၼ်းၸၢႆးၵေႃႉၼိုင်ႈ ၸင်ႇၽႅဝ်မႃးတီႈၼၼ်ႈသေ မႃးထၢမ် ၸဝ်ႈႁိူဝ်းယူႇ-
“ၶႃႈၶႂ်ႈၸွမ်းၵေႃႉၼိုင်ႈ ၸွင်ႇတေလႆႈႁိုဝ်”
ၼၢင်းမူဝ်ၶၢဝ်လႄႈ ၼၢင်းၸၢမ်သႅင်းလႆႈငိၼ်းၼင်ႇၼၼ် ၶႃသွင်ၵေႃႉဝၢႆႇတူၺ်းမႃးတၢင်းၸဝ်ႈႁိူဝ်းယဝ်ႉ ၸဝ်ႈႁိူဝ်းၸင်ႇဝႃႈ”
“ဢမ်ႇလႆႈယူဝ်ႉ ... ႁိူဝ်းႁဝ်းၼႆႉ ပိူၼ်ႈၶၢတ်ႈဢဝ်တင်း လမ်းဢိူဝ်ႈ ပေႃးၶႂ်ႈၸွမ်းၼႆ ထၢမ်တူၺ်းၶဝ်လႄႈ”
ၵူၼ်းၸၢႆးၵေႃႉၼၼ်ႉၵေႃႈ ဝၢႆႇတူၺ်းၵႂႃႇတၢင်း ၸဝ်ႈႁိူဝ်း ၸီႉၼႄၼၼ်ႉသေ လႆႈႁၼ်ၼၢင်းမူဝ်ၶၢဝ်ၶႃသွင်ၵေႃႉၼၼ်ႉယဝ်ႉ။ ဢမ်ႇမုင်ႈဢမ်ႇမွင်း ၶိုၼ်းလႆႈမႃးထူပ်းႁၼ်ၼင်ႇၼႆ မၼ်းၸၢႆးပဵၼ် ဢၼ်ဢၢမ်းၵႂႃႇတႄႉတႄႉ။ မၼ်းၸၢႆးတႄႉ ပဵၼ်ၸၢႆးမွၼ်းၶိူဝ်းလွႆလႅမ်ယဝ်ႉ၊ ၸၢႆးမွၼ်းၶိူဝ်း တေလီထၢမ်ႁိုဝ် ဢမ်ႇလီထၢမ်ႁိုဝ်ၼႆၵေႃႈ ဢမ်ႇၸၢင်ႈတႅပ်းတတ်းလႆႈ ၵၢင်ၸႂ်မၼ်းတႄႉ ၶႂ်ႈၵႂႃႇၼႂ်းၼွင်တႄႉတႄႉဝႃႈဝႃႈယဝ်ႉ။ မၼ်းတေလႆႈၵႂႃႇၸွမ်းၶဝ် ၸိူဝ်ႈၼႆႉႁိုဝ် ... ဢမ်ႇၼၼ် တေၵႂႃႇၸွမ်းႁိူဝ်းတၢင်ႇလမ်းႁိုဝ်ၼႆ မၼ်းတိုၵ်ႉဝူၼ်ႉယူႇ ၸဝ်ႈႁိူဝ်း ၸင်ႇထၢမ်ၼၢင်းမူဝ်ၶၢဝ်ယဝ်ႉ။
“ၼႄႈ ... မၼ်းၶႂ်ႈၵႂႃႇၸွမ်းသူၵေႃႉၼိုင်ႈယူႇ ၸွင်ႇတေလႆႈႁိုဝ်?”
ၸၢႆးမွၼ်းၶိူဝ်းၵေႃႈ ၸင်ႇထၢမ်ဝၢႆးလင်ၸဝ်ႈႁိူဝ်းၼၼ်ႉယဝ်ႉ။
“ၸွင်ႇတေၸွမ်းလႆႈႁိုဝ် ၼၢင်းမူဝ်”
ၼၢင်းမူဝ်ၶၢဝ်ၵေႃႈ ပေႃးတေဝႃႈ ဢမ်ႇလႆႈၵေႃႈ ဢမ်ႇလီ လႄႈ မၼ်းၼၢင်းၵိုင်ႉၵၢင်ႉ ပႆႇၸၢင်ႈဝႃႈႁိုဝ် ... ဢူႈၼၢင်းမူဝ်ၶၢဝ် ၸင်ႇဝႃႈတီႈလုၵ်ႈယိင်းမၼ်း
“ၶိူဝ်းသွင်ၵေႃႉ ဢမ်ႇၶိုၼ်းလႃႇလုၵ်ႈယိင်း”
ၼၢင်းမူဝ်ၶၢဝ် ၸင်ႇဝၢႆႇၸူးဢူႈၶဝ်သေ
“ဢေႃး ... ဢူႈ ... ၼႄႈ မၼ်းၶႂ်ႈၸွမ်းလုၵ်ႈယိင်းၶဝ်ၵႂႃႇၼႆဝႃႇ ၸွင်ႇတေၸွမ်းလႆႈႁိုဝ်ၼႆဝႃႇ”
ဢူႈၼၢင်းမူဝ်ၶၢဝ် ၶဝ်ၸင်ႇလွမ်တူၺ်း ၸၢႆးမွၼ်းၶိူဝ်းသေ ထၢမ်ဝႃႈ-
“ၸၢႆး ၶႂ်ႈၵႂႃႇၼႂ်းၼွင်ၼႆႁႃႉ?”
“ဢေႃႈ”
“ၸၢႆးယူႇတီႈဝဵင်းလႂ်”
“ယူႇလွႆလႅမ်ဢေႃႈ”
“ၵေႃႉလဵဝ်ၵူၺ်းႁႃႉ”
“ၸႂ်ႈဢေႃႈ”
“ဢိူဝ်ႈ ... ပေႃးၵေႃႉလဵဝ်ၵူၺ်းတႄႉ လႆႈယူႇ ၶိုၼ်ႈလႄႈ ၶိုၼ်ႈလႄႈ”
“ၸူမ်းၶႃႈယဝ်ႉ ... လုင်း”
“လႆႈယူႇ ... ၵူၼ်းၵႂႃႇဝႆႈၽြႃးၼင်ႇၵၼ်လူး”
ၶဝ်ဢွၼ်ၵၼ်ၶိုၼ်ႈမႃးၼင်ႈတင်းႁူဝ်ႁိူဝ်းယူႇယဝ်ႉ ဢူႈၼၢင်းမူဝ်ၶၢဝ် ၶဝ်ၸင်ႇထၢမ်
“လုၵ်ႈယိင်းၶဝ် ပဵၼ်ၵူၼ်းႁူႉၸၵ်းၵၼ်ႁႃႉ?”
ၼၢင်းမူဝ်ၶၢဝ် ၸင်ႇတွပ်ႇဝႃႈ
“ဢေႃႈ ... ႁူႉၸၵ်းၵေႃႈဝႃႈ ဢမ်ႇႁူႉၸၵ်းၵေႃႈဝႃႈယဝ်ႉ”
“ဢေႃႈ ... မိူဝ်ႈတူၼ်ႈတီးၼၼ်ႉ လုၵ်ႈယိင်းၶဝ်ယၢမ်ႈ ႁၼ်ၵၼ် တီႈၼႂ်းၵၢတ်ႇ ၽွင်းမိူဝ်ႈတိုၵ်ႉၵိၼ်ၶဝ်ႈသွႆးၼၼ်ႉဢေႃႈ ယၢမ်ႈႁူႉၸၵ်း ယၢမ်ႈႁၼ်ၵၼ်သေတႃႉ ဢမ်ႇပႆႇႁူႉၸၵ်းၸိုဝ်ႈၵၼ် လႄႈ လုၵ်ႈယိင်းၸင်ႇဝႃႈ ႁူႉၸၵ်းၵေႃႈဝႃႈ ဢမ်ႇႁူႉၸၵ်းၵေႃႈဝႃႈၼႆ ဢေႃႈ”
“ဢေႃႈ ၸိူင်ႉၼႆႁႃႉ ... ပေႃးၼႆ ၸိုဝ်ႈၸၢႆးဝႃႈႁိုဝ်လႃႇ”
“ဢေႃႈ ... ပဵၼ်ၸၢႆးမွၼ်းၶိူဝ်းၼႆဢေႃႈ”
“ဢေႃ ... ၸၢႆးမွၼ်းၶိူဝ်းၼႆႁႃႉ ဢိုဝ်ႈ ဢိုဝ်ႈ ၸိုဝ်ႈၸၢႆးၼႆႉ ၶႅမ်ႉယူႇလႄႈ ”
ၽွင်းၼၼ်ႉႁိူဝ်းၶဝ်ၵေႃႈ ႁေႃႈၽၢတ်ႇတႃႈႁိူဝ်းမႃးယဝ်ႉ ၸၢႆးမွၼ်းၶိူဝ်းၶိုၼ်းသိုပ်ႇလၢတ်ႈဝႃႈ
“မိူဝ်ႈၶႃႈၵေႃႉလဵၵ်ႉၼၼ်ႉတႄႉ ပိူၼ်ႈဢမ်ႇႁွင်ႉၶႃႈ ၸၢႆးမွၼ်းၶိူဝ်းၼႆၶႃႈ”
ၼၢင်းမူဝ်ၶၢဝ်လႄႈ ၼၢင်းၸၢမ်သႅင်းၵေႃႈ ၶဝ်ႈၸႂ်သေ ထွမ်ႇဝႆႉယူႇ ဢူႈၶဝ်ၸင်ႇဝႃႈ
“ႁွင်ႉဝႃႈႁိုဝ်လႃႇ?”
“မၢင်ၸိူဝ်းဝႃႈ မိူဝ်ႈၶႃႈၵိူတ်ႇၼၼ်ႉ ဢိင်ႇသၼ်ႇလႄႈ ၶဝ် ႁွင်ႉၶႃႈဝႃႈ ၸၢႆးမိူင်းၶွၼ်း ၼႆဢေႃႈ”
ၼၢင်းၸၢမ်သႅင်းၸင်ႇလွမ်လွမ် ယၵ်းၼၢင်းမူဝ်ၶၢဝ်သေ ၶႃၸင်ႇၵႂႃႇဝူၼ်ႉႁၼ်ထိုင် လွင်ႈဢၼ်ၶႃသွင်ၵေႃႉ လၢမ်းတၵ်ႉၸိုဝ်ႈ ၸၢႆးမွၼ်းၶိူဝ်းၼၼ်ႉယူႇ ဢူႈၼၢင်းမူဝ်ၶၢဝ်ၶဝ် ၶႂ်ႈၶူဝ်ၵႂႃႇတႄႉတႄႉသေ မၼ်းၸင်ႇဝႃႈ
“ႁႃး ... ႁႃး ... ဢိူဝ်ႈပေႃးၼႆ ပဵၼ်ၵဵင်သိူင်းမိူင်းၶွၼ်း ၼႂ်ႈဢပုမ်ႇတႆးၼၼ်ႉၵႂႃႇယဝ်ႉ”
ၶဝ်ဢွၼ်ၵၼ်သိူဝ်းၶူဝ် ယုမ်ႉၶူဝ်ယူႇ ... ၽွင်းၼၼ်ႉ ၸဝ်ႈႁိူဝ်းဢၼ်ယိပ်းၸၢၵ်ႈၼၼ်ႉ ၸင်ႇဝႃႈ ႁႂ်ႈသုတ်ႉမႃး တၢင်းလင်ၽွင်ႈၶႃႈၼႆယဝ်ႉ ဢူႈၼၢင်းမူဝ်ၶၢဝ်ၶဝ်ၸင်ႇဝႃႈ-
“ဢမ်ႇသုတ်ႉၵေႃႈလႆႈယဝ်ႉ ... ၵဝ်တေၵႂႃႇၼင်ႈတၢင်းလင် ၼၼ်ႉလႆ ... ၵဝ်လူဝ်ႇၶႆႈလၢတ်ႈၼႄ ပႃႈထဝ်ႈ ၸိူဝ်းဢၼ်ပႆႇယၢမ်ႈၽႅဝ်ၼၼ်ႉဢိူဝ်ႈ”
ဢူႈၼၢင်းမူဝ်ၶၢဝ်ၶဝ် လုင်းၸိုၼ်ႈလၢတ်ႈၼင်ႇၼၼ်သေ ၵႂႃႇၼင်ႈတၢင်းလင်ႁိမ်းၼၢႆးထဝ်ႈၸိူဝ်းၼၼ်ႉသေ မွၵ်ႇလၢတ်ႈၶႆႈၼႄ တီႈလႂ်ပဵၼ်တီႈလႂ်ၼႆယူႇ တီႈတၢင်းႁူဝ်ႁိူဝ်းၼႆႉ ၵူၼ်းၼုမ်ႇၼႆ ၵိုတ်းၶဝ်သၢမ်ၵေႃႉၵူၺ်းယဝ်ႉ ၸၢႆးမွၼ်းၶိူဝ်း ၸင်ႇထၢမ်ဝႃႈ-
“ၼၢင်းမူဝ် ... ယၢမ်ႈၽႅဝ်လၢႆပွၵ်ႈယဝ်ႉ ၼႂ်းၼွင်ၼႆႉ”
“ယၢမ်ႈၽႅဝ် သီႇပွၵ်ႈပႃးပွၵ်ႈၼႆႉယဝ်ႉ ပီႈၸၢႆးမွၼ်းၶိူဝ်း လူး”
“သၢမ်ပွၵ်ႈပႃးပွၵ်ႈၼႆႉယဝ်ႉ ၵူၺ်းၵႃႈ ဢမ်ႇပႆႇလႆႈႁၼ် မိူဝ်ႈၽြႃးၶဝ်ႈၵျွင်း သေပွၵ်ႈလႄႈ ပွၵ်ႈၼႆႉတႄႉ ဢဵၼ်းဢၢၼ်းႁႂ်ႈလႆႈႁၼ် ၼႆယဝ်ႉ ၼၢင်းမူဝ်လူး ယၢမ်ႈလႆႈႁၼ်ယဝ်ႉႁႃႉ?”
“ပႆႇယၢမ်ႈႁၼ်ၼင်ႇၵဝ်ႇ ... ၼႄး ... ၼၢင်းၸၢမ်သႅင်း ၵူၺ်းဢိူဝ်ႈ ယၢမ်ႈလႆႈမႃးၶိုတ်းပွၵ်ႈၼိုင်ႈၼႆဝႃႇ”
“ဢေႃး ... ပဵၼ်ၼၢင်းၸၢမ်သႅင်းၼႆႁႃႉ”
“ၸႂ်ႈဢေႃႈ”
“ပိူၼ်ႈဝႃႈ ဝၼ်းၽြႃးၶဝ်ႈၵျွင်းၼၼ်ႉ မီးပွႆးၽၢႆးႁိူဝ်းၶႄႉ ၵၼ်ၼႆ ၸွင်ႇၸႂ်ႈႁိုဝ်?”
“ၸႂ်ႈဢေႃႈ”
ၶဝ်သိုပ်ႇဢုပ်ႇၵၼ်မႃးသေ ၽႅဝ်မႃးၼႂ်းၵၢင်ၼွင်ယဝ်ႉ လႆႈႁၼ်ၼမ်ႉၼွင် ယႂ်ႇၵႂၢင်ႈလူင်ၼင်ႇၼၼ် ၽႂ်ႁၼ်ၵေႃႈ ပဵၼ် ဢၼ်သိူဝ်ႈၸႂ်ယဝ်ႉ၊ ၸၢႆးမွၼ်းၶိူဝ်း ၸင်ႇဢဝ်ၶဝ်ႈမုၼ်း ၼႂ်းထူင်မၼ်းၼၼ်ႉသေ ယုၵ်ႉၵၵ်းမိုဝ်း မၼ်းႁွင်ႉၼူၵ်ႉၼၢင်းဢီး(ၸိၼ်ႇယေႃႇ)ယူႇ ... မၼ်းၸၢႆးဢဝ်ၶဝ်ႈမုၼ်းမၼ်း ဝိုတ်ႉၶိုၼ်ႈ ၼိူဝ်ၵၢင်ႁၢဝ်သေ ဢွႆႇၼူၵ်ႉယူႇ၊ ယူႇၵမ်းၼိုင်ႈ ၼူၵ်ႉၸိူဝ်းၼၼ်ႉ ပဵၼ်ၽုင် မိၼ်သႅဝ်ႈပၼ်ႇမႃးၸွမ်းႁိူဝ်းၶဝ်ယဝ်ႉ ၊ ၸၢႆးမွၼ်းၶိူဝ်းၵေႃႈ ၸူမ်း သိူဝ်းထိုမ်ႈဢွႆႇယူႇ မၼ်းၸင်ႇဢဝ်ထုပ်ႉၶဝ်ႈမုၼ်း ပၼ်ၼၢင်းမူဝ်ၶၢဝ်သေ
“ယေႃႈ ... ၼၢင်းမူဝ် ဢဝ်ဢွႆႇလႄႈ”
ၼၢင်းမူဝ်ၵေႃႈ ယိုၼ်းႁပ်ႉဢဝ်သေ ၶႃသွင်ၵေႃႉၼၢင်းၸၢမ်သႅင်းဝိုတ်ႉဢွႆႇၼူၵ်ႉယူႇ။ ၸၢႆးမွၼ်းၶိူဝ်းၼႅတ်ႈၸဵတ်ႉမိုဝ်းမၼ်း ၽႂ်းၽႂ်းသေ ဢဝ်ၵႅမ်ႇမရႃႇ(ၵွင်ႈထႆႇ) ဢၼ်ထႆႇႁၢင်ႈမၼ်းဢွၵ်ႇမႃးယူႇ ယဝ်ႉ မၼ်းၸင်ႇဝႃႈ-
“ဢေႃႈ ... ၼၢင်းမူဝ်လႄႈၼၢင်းၸၢမ်သႅင်း ဝိုတ်ႉၶိုၼ်ႈ သုင်ဢိတ်းၼိုင်ႈလႄႈ ၽွင်းၼူၵ်ႉတိုၵ်ႉဢဝ်ၶဝ်ႈမုၼ်းၼၼ်ႉ ၶႂ်ႈထႆႇ ႁၢင်ႈၶဝ်ဢိူဝ်ႈ”
ၶႃသွင်ၵေႃႉၵေႃႈ ဝိုတ်ႉဢွႆႇၼူၵ်ႉယူႇ ၽွင်းမိူဝ်ႈၼူၵ်ႉတိုၵ်ႉ မိၼ်သႅဝ်ႈၵၢပ်ႈဢဝ်ၶဝ်ႈမုၼ်းၼၼ်ႉ ၸၢႆးမွၼ်းၶိူဝ်း ထႆႇဢဝ်ႁၢင်ႈ ၼူၵ်ႉၼၼ်ႉၶႅပ်းၼိုင်ႈယဝ်ႉ။ ၵူၼ်းဢၼ်ၸွမ်းမႃး ၼိူဝ်ႁိူဝ်ႈၸိူဝ်းၼၼ်ႉၵေႃႈ ပဵၼ်ဢၼ်ၸူမ်းတူၺ်းၼူၵ်ႉတႄႉတႄႉ၊ ၶဝ်ၵေႃႈၶႂ်ႈဢွႆႇ ၼူၵ်ႉၼင်ႇၵဝ်ႇလႄႈ ၶဝ်ၸင်ႇယွၼ်း ၶဝ်ႈမုၼ်းတီႈၼၢင်းမူဝ်ယဝ်ႉ။
“မူဝ် ... ၶဝ်ႈမုၼ်းဢမ်ႇမီးယဝ်ႉႁႃႉ ... မႅင်ႇႁဝ်းၽွင်ႈလူး”
ၸၢႆးမွၼ်းၶိူဝ်း ၸင်ႇဢဝ်ၶဝ်ႈမုၼ်းၼႂ်းထူင်မၼ်း ပၼ် ၼၢင်းမူဝ်ထႅင်ႈယဝ်ႉ
“ယေႃႈ ... ၼၢင်းမူဝ် ဢဝ်ပၼ်ၶဝ်ဢွႆႇလႄႈ”
ၼၢင်မူဝ်ၵေႃႈ ဢဝ်ထူင်ၶဝ်ႈမုၼ်းယိုၼ်ႈပၼ် ၶဝ်သေ ၶဝ်ၵုမ်ႇၸူမ်းဢွႆႇၼူၵ်ႉယူႇ ၼၢင်းမူဝ်ၶၢဝ်ၸင်ႇဝႃႈ-
“ဢေႃႈ ... ပီႈၸၢႆးမွၼ်းၶိူဝ်း ၽလိၼ်ႇ(ၾိမ်း)တိုၵ်ႉမီး ၼမ်ယူႇႁႃႉ?”
“မီးၼမ်ယူႇ ႁဵတ်းသင်?”
“ဢေႃႈ ... ၶႂ်ႈပိုင်ႈပီႈၸၢႆးမွၼ်းၶိူဝ်း လၵ်ႉထႆႇပၼ်ဢၼ် ဢူႈမူဝ်ၶဝ် တိုၵ်ႉဢွႆႇၼူၵ်ႉၼၼ်ႉဢိူဝ်ႈ ... ၸွင်ႇတေလႆႈႁိုဝ်?
“လႆႈယူႇ”
ၸၢႆးမွၼ်းၶိူဝ်းၵေႃႈ မႄးယိူင်းဝႆႉလီလီသေ ၽွင်းမိူဝ်ႈလုင်းၸိုၼ်ႈ တိုၵ်ႉဝိုတ်ႉၶဝ်ႈမုၼ်ႈဢွႆႇၼူၵ်ႉၼၼ်ႉ မၼ်ႈလၵ်ႇထႆႇဢဝ်ဝႆႉယဝ်ႉ၊ လုင်းၸိုၼ်ႈတႄႉ ဢမ်ႇတၼ်းႁူႉထိုင် ၸၢႆးမွၼ်းၶိူဝ်းၶႃ လၵ်ႉလွမ်ယုမ်ႉတေႃႇၵၼ်ဝႆႉယူႇ ၼၢင်းမူဝ်ၶၢဝ် ၸင်ႇထၢမ်ဝႃႈ-
“ပီႈၸၢႆးမွၼ်းၶိူဝ်း ... ၽုၺ်ႇသႅင်ႇထႆႇႁၢင်ႈဝႆႉတီႈလွႆလႅမ် ႁႃႉ?”
“ဢမ်ႇၸႂ်ႈလူင် ... တိုၼ်းမီးဝႃႇသၼႃႇလႄႈ ၸင်ႇသိုဝ်ႉ ၵႅမ်ႇမရႃႇဝႆႉယဝ်ႉ ... မၢင်ပွၵ်ႈ ပေႃးပိူၼ်ႈမႃးႁွင်ႉၼႆၵေႃႈ ၵႂႃႇပေႃႉပၼ် ပိူၼ်ႈယူႇ”
ၼၢင်းၸၢမ်သႅင်းၸင်ႇဝႃႈ
“ပေႃးပီႈၸၢႆးမွၼ်းၶိူဝ်းပေႃႉပၼ်ၶဝ်ၼႆ ၶဝ်ဢမ်ႇၸဵပ်း ႁႃႉ?”
ၶဝ်ၸူမ်းၶူဝ်ၵႂႃႇသေ ၸၢႆးမွၼ်းၶိူဝ်းၸင်ႇဝႃႈ
“ဢမ်ႇႁူႉလႄႇ ... ယူဝ်ၸဵပ်းယူႇယူဝ်ႉ”
ၼၢင်းမူဝ်ၶၢဝ် ၸင်ႇထၢမ်ဝႃႈ
“ပီႈၸၢႆးၶိူဝ်း ဢမ်ႇယူႇႁူင်းႁဵၼ်းႁႃႉ?”
“ယူႇဢိူဝ်ႈ”
“ယူႇၸၼ်ႉလႂ်”
“ယူႇၸၼ်ႉသိပ်းဢိူဝ်း ... ၼၢင်းမူဝ်ၶဝ်သွင်ၵေႃႉလူး”
“ယူႇၸၼ်ႉသိပ်းၼင်ႇၵဝ်ႇယဝ်ႉ ... ၸွင်ႇပီႈၸၢႆးၶိူဝ်းဢွင်ႇ ႁိုဝ်?”
“ဢွင်ႇၸိူင်ႉႁိုဝ်? ဢွင်ႇၼမ်ႉဢွႆႈႁႃႉ ဢွင်ႇၼမ်ႉၽိတ်ႉ ႁႃႉ”
“ဢေႃႈ ... ဢမ်ႇၸႂ်ႈၸိူင်ႉၼၼ် ၸွင်ႇပူၼ်ႉၸၼ်ႉသိပ်းႁိုဝ် ၼႆၵႂႃႈ”
“ပူၼ်ႉယူႇၼင်ႇၵဝ်”
“ဢမ်ႇပႃးတီႇၸေးသျိၼ်းႁႃႉ”
“မူဝ်တႄႉဢမ်ႇပႃး ... ၸၢမ်သႅင်းတႄႉ ပႃးပၢႆးၼပ်ႉလုၵ်ႈ ၼိုင်ႈဢိူဝ်ႈ”
“ပေႃးၼႆ ၸၢမ်သႅင်းလူဝ်ႇလဵင်ႉႁဝ်းၶဝ်ႈသွႆးယဝ်ႉၼႆႉ”
“လႆႈယူႇ ... ၸၢမ်သႅင်းတေလဵင်ႉပၼ်လႆ ... ပီႈၸၢႆးၶိူဝ်း ဢမ်ႇပႃးႁႃႉ”
ၸၢႆးမွၼ်းၶိူဝ်းယိပ်းၵႅမ်ႇမရႃႇ ဢၼ်ႁွႆႈၶေႃးမၼ်းၼၼ်ႉ ၼႄ
“တီႇတႄႉဢမ်ႇပႃး ... ပႃးၵႅမ်ႇမရႃႇလုၵ်ႈၼႆႉၵူၺ်းယဝ်ႉ ႁေးႁေး”
ၶဝ်ပဵၼ်ဢၼ်ၸူမ်းၶူဝ်ၵႂႃႇတႄႉတႄႉ ၼၢင်းမူဝ်ၶၢဝ်ၸင်ႇဝႃႈ
“ပီႈၸၢႆးၶိူဝ်းၼႆႉ မေႃလၢတ်ႈလွင်ႈမူၼ်ႈသိူဝ်းဝႆႉၼင်ႇၵဝ်ႇ ၼေႃ”
“ထုင်းၵႂၢမ်းမီးဝႆႉယူႇလူး ... ၽႅဝ်လႂ်ႁႂ်ႈမေႃမူၼ်ႈ ၸင်ႇတဵမ်ထူၼ်ႈလၢႆပိူင်ၼႆၼႃႇ ... ၵွပ်ႈၼႆ ပီႈၸၢႆးၶိူဝ်းတႄႉ ၶတ်းၸႂ်ႁႂ်ႈ မေႃမူၼ်ႈတႃႇသေႇယဝ်ႉ”
ၼၢင်းမူဝ်ၶၢဝ် ၸင်ႇဝႃႈ
“ပေႃးၼႆ ၶေႃႈၵႂၢမ်းဢၼ်ဝႃႈ“ၸင်ႇ”ၼႆၼၼ်ႉ ၸႂ်ႉတိုဝ်း တီႈလႂ်လႃႇ”
“ၸႂ်ႉတိုဝ်းမိူၼ်ၼင်ႇဝႃႈ ဢၼ်မႂ်းတႅမ်ႈမႃးၼႆႉၽိတ်းဢိူဝ်ႈ ပေႃးမႄးတႅမ်ႈၸိူင်ႉၼႆၼႆ “ၸင်ႇ” တေၸႂ်ႈယဝ်ႉ ... ပေႃးမႄးႁဵတ်း ၼႆ “ၸင်ႇ”တေၸႂ်ႈယဝ်ႉ ... လူဝ်ႇလႆႈၸႂ်ႉတိုဝ်း တီႈၶေႃႈသင်ႇ လၢတ်ႈၸိူင်ႉၼႆဢိူဝ်ႈ”
ၼၢင်းမူဝ်ၶၢဝ် ပဵၼ်ဢၼ်ပွင်ႇၸႂ်ၵႂႃႇသေ မၼ်းၼၢင်းၵေႃႈ ဝႃႈ
“ဢေႃး ... မူဝ်ပွင်ႇၸႂ်ယဝ်ႉ ... မူဝ်တေလၢတ်ႈတူၺ်းၼႃ”
“ယွၼ်ႉပိူဝ်ႈပီႈၸၢႆးမွၼ်းၶိူဝ်း ၶတ်းၸႂ်လိၵ်းလႄႈ ၸင်ႇ ပူၼ်ႉၸၼ်ႉသိပ်းယဝ်ႉ ၸွင်ႇၸႂ်ႈႁိုဝ်?”
ၸၢႆးမွၼ်းၶိူဝ်း ငွၵ်းႁူဝ်ၼႄသေ
“ၸႂ်ႈဢိူဝ်ႈ”
“ပီႈၸၢႆးမွၼ်းၶိူဝ်း တေသိုပ်ႇၶိုၼ်ႈၸၼ်ႉၸွမ်ယူႇ ဢမ်ႇၸႂ်ႈႁႃႉ?”
“သိုပ်ႇဢိူဝ်ႈ ...... ၼၢင်းမူဝ်ၶဝ်လူး”
“သိုပ်ႇဢိူဝ်ႈ ... ပီႈၸၢႆးမွၼ်းၶိူဝ်း တေဢၢၼ်းၵႂႃႇသိုပ်ႇ ၶိုၼ်ႈတီႈဝဵင်းလႂ်”
“ဢၢၼ်းမႃးၶိုၼ်ႈ တီႈဝဵင်းတူၼ်ႈတီး ၼၢင်မူဝ်ၶဝ်ၼႆဢိူဝ်ႈ ယူဝ်ၶေးၵူၼ်တူၼ်ႈတီးၶဝ် ဢမ်ႇၶႂ်ႈႁပ်ႉယူဝ်ႉ”
“ဢမ်ႇႁပ်ႉၼႆ မူဝ်ၶဝ်ဢမ်ႇဝႃႈသေၶေႃႈလူး ... တီႈတေ ၶဝ်ႈဝဵင်းတူၼ်ႈတီးၼၼ်ႉ တႅမ်ႈဝႆႉယူႇၼႃႇ ... “ဝဵင်းတူၼ်ႈတီး ႁပ်ႉတွၼ်ႈယူႇ” ၼႆဢမ်ႇၸႂ်ႈႁႃႉ ၵွပ်ႈၼႆ ၵူၼ်းဝဵင်းတူၼ်ႈတီးၶဝ် ႁပ်ႉတွၼ်ႈယူႇတႃႇသေႇဝႃႇ ဢမ်ႇၸႂ်ႈႁႃႉၸၢမ်သႅင်း”
ၼၢင်းၸၢမ်သႅင်းၵေႃႈ ၸင်ႇၵမ်ႉထႅမ်ဝႃႈ
“ၸႂ်ႈဢိူဝ်ႈ ... ဝဵင်းတူၼ်ႈတီးတႄႉတိုၼ်းႁပ်ႉတွၼ်ႈတႃႇသေႇယဝ်ႉ ၵူၺ်းၼႃႇ ၵူၼ်းၸိူဝ်းဢၼ်ၽႅဝ်မႃးဝဵင်းတူၼ်ႈတီးၼၼ်ႉ ၽႅဝ်မႃးၸူဝ်ႈၵႅပ်ႉၼိုင်ႈၵမ်းသေ ပေႃးတေဢွၵ်ႇမိူဝ်းၼႆၵေႃႈ တီႈတေဢွၵ်ႇဝဵင်းၼၼ်ႉ တၢင်တူဝ်ၵူၼ်းတူၼ်ႈတီးသေ တႅမ်ႈဝႆႉ “ၶိုၼ်းထူပ်းႁၼ်ၵၼ်ထႅင်ႈ” ၼႆယူႇၼႃႇ ... ၵွပ်ႈၼႆ ဝဵင်းတူၼ်ႈတီး ၶဝ်ႁပ်ႉတွၼ်ႈယူႇတႃႇသေႇ မုင်ႈမွင်းၶိုၼ်းထူပ်းႁၼ်ၵၼ်တႃႇသေႇ ယဝ်ႉဝႃႈ”
“တႄႉႁႃႉ ... ပေႃးမႃးယူႇၼႆ ႁပ်ႉတွၼ်ႈတႄႉတႄႉၼႃႈ”
“ႁပ်ႉတွၼ်ႈယူႇဝႃႈ”
ႁိူဝ်းၸၢၵ်ႈၶဝ် သိုပ်ႇၶၢဝ်းတၢင်း ဢႅၼ်ႇသႅတ်ႈ ၼိူဝ်ၽိဝ်ၼမ်ႉမႃးသေ ၽႅဝ်မႃးတီႈႁိူဝ်းၽြႃးၸူမ်ၼမ်ႉ တီႈဢၼ်မီးႁၢင်ႈၼူၵ်ႉႁၢင်းသႃႇၼၼ်ႉယဝ်ႉ။ ၼၢင်းမူဝ်ၶၢဝ်ၸင်ႇဝႃႈ
“တီႈၼႆႉ ပဵၼ်တီႈႁိူဝ်းပိၼ်ႈၼၼ်ႉ ဢမ်ႇၸႂ်ႈႁႃႉ?
“ၸႂ်ႈဢိူဝ်ႈ”
ၵူၼ်းၼိူဝ်ႁိူဝ်းၸိူဝ်းၼၼ်ႉ ဢွၼ်ၵၼ်ၸီႉမွၵ်ႇလၢတ်ႈၼႄၵၼ်ယူႇ ... ႁိူဝ်းၶဝ်သိုပ်ႇႁေႃႈၶဝ်ႈမႃး ၼႂ်းဝၢၼ်ႈႁၢႆးယႃႈယႂႃႇမသေ မႃးၵိုတ်းတီႈႁိူၼ်းတႆးၵေႃႉ ဢူႈၼၢင်းမူဝ်ၶၢဝ်ၶဝ်ယဝ်ႉ။ ၶဝ်ၵေႃႈ ဢွၼ်ၵၼ်လူင်းလိုဝ်ႈႁိူဝ်ႉ ဢဝ်ၶူဝ်းၶဝ်ၵမ်ႈၽွင်ႈၽၢၵ်ႇဝႆႉ တီႈၼၼ်ႈသေ ဝၢႆးဝၼ်းသၢမ်မူင်း ၶဝ်ၸင်ႇၶိုၼ်းပူၼ်ႉၵႂႃႇ တီႈၽြႃးၽွင်ႇတေႃႇဢူးယဝ်ႉ။
မိူဝ်ႈၽုၵ်ႈၼႆႉ တေပဵၼ်ဝၼ်းၽြႃးၶိုၼ်းၶဝ်ႈၵျွင်းလႄႈ ဝၼ်းမိူဝ်ႈၼႆႉ ၵူၼ်းပေႃးၵိုၼ်းဝႆႉထႃႈ ယူႇယဝ်ႉ၊ သဵင်ၸၢတ်ႈသဵင်သႅင်းဢိုတ်ႇၼၼ်ႈပၼ်းမေႃးလူင်ဝႆႉယူႇ ... ႁိူဝ်းၶဝ်မႃးၵိုတ်း တီႈႁိမ်းၼွင်သေ ၶဝ်ဢွၼ်ၵၼ် ဢွၵ်ႇႁိူဝ်းၶိုၼ်ႈမႃးၼိူဝ်ၶူဝ်ယူႇ ၽွင်း မိူဝ်ႈၼၢင်းမူဝ်ၶၢဝ် လုၵ်ႉၸုၵ်းသေ ဢၢင်ႈၶိုၼ်ႈၼိူဝ်ႁိူဝ်းၼၼ်ႉ ႁိူဝ်း ၶဝ်ၸွင်ႇၸႅင်ဢွင်ႇဢႅင်သေ ႁိူင်ႈၵိူင်းၵႂႃႇဢိတ်းၼိုင်ႈလႄႈ မၼ်းၼၢင်း ဢၢင်ႈလူမ်ႉယဝ်ႉ။ မၼ်းၼၢင်းတူၵ်းၸႂ် ႁွင်ႉဢွၵ်ႇသဵင်“ဢႃႉ” ၼႆသေ မၼ်းၼၢင်း ၼႅတ်ႈၸၼ်ယိပ်းဢဝ်ၶႅၼ်ၸၢႆႈမွၼ်းၶိူဝ်း ဝႆႉယဝ်ႉ။
ၼၢင်းၸၢမ်သႅင်းတႄႉ မၼ်းၼၢင်းသမ်ႉပေႃးတၼ်းၶိုၼ်ႈၽႅဝ်ၼိူဝ်ၶူဝ်ယဝ်ႉလႄႈ မၼ်းၼၢင်း ၸင်ႇလွမ်ယုမ်ႉသေ ဢဝ်မိုဝ်းမၼ်းယိုၼ်းႁပ်ႉဢဝ်ၼၢင်းမူဝ်ယူႇ-
“မူဝ် ... ၸၼ်မိုဝ်းႁဝ်းသေ ၶိုၼ်ႈမႃးလႄႈ”
ၼၢင်းမူဝ်ၶၢဝ် ၵိုင်ႉၵၢင်ႉၶိုင်ႉၶၢင်ႉ ပဵၼ်ၵႂႃႇၼင်ႇၼၼ်ၼႆ မၼ်းၼၢင်းၶိုၼ်းလွမ်လွမ်လီဢၢႆ ၸၢႆးမွၼ်းၶိူဝ်းယူႇ ... ႁူဝ်ၸႂ်မၼ်းၼၢင်း ဢမ်ႇပႆႇယၢမ်ႈတွတ်ႇႁႅင်းသေပွၵ်ႈၼၼ်ႉၵေႃႈ ၵိုင်ႉၵၢင်ႉၶိုင်ႉၶၢင်ႉ တွတ်ႇလင်ႁႅင်းမႃး ၵမ်းလဵဝ်ယဝ်ႉ ၸၢႆးမွၼ်းၶိူဝ်းၵေႃႈတေႃႈ ၼင်ႇၼၼ်ၼင်ႇၵဝ်ႇ။ လွင်ႈဢၼ်ႁူဝ်ၸႂ်ၶႃသွင်ၵေႃႉ တွတ်ႇလင်ႁႅင်းယူႇၼၼ်ႉ လွမ်လွမ်ယွၼ်ႈထိုင်ၵၼ်ယူႇ။ ၼၢင်းမူဝ်ၶၢဝ်ၵေႃႈ ယိပ်းၸၼ် မိုဝ်းၼၢင်းၸၢမ်သႅင်းသေ ၶိုၼ်ႈမႃးၼိူဝ်ၶူဝ်ယဝ်ႉ။ ၸၢႆးမွၼ်းၶိူဝ်းၵေႃႈ ၶိုၼ်းမႃးယိပ်းၸၼ်လၵ်း ဢၼ်ၼိုင်ႈသေ ၸၼ်ႁႂ်ႈႁိူဝ်းဢႅပ်ႈၽင်ႇၶူဝ်ႇဝႆႉ ... မၼ်းၸင်ႇဝႃႈတီႈၵူၼ်းၸိူဝ်းဢၼ်ၵိုတ်းၼိူဝ်ႁိူဝ်းၼၼ်ႉ “ၶိုၼ်ႈၶႃႈလႄႈ ... ၶိုၼ်ႈၶႃႈလႄႈ ... ၶႅပ်းတိၼ်ဝႆႉၼႂ်းႁိူဝ်း ၼႆႉၵေႃႈလႆႈယူႇၶႃႈ” ဝၢႆးသေ ၵူၼ်းၼိူဝ်ႁိူဝ်းၼၼ်ႉ ၶိုၼ်ႈယဝ်ႉ မၼ်းၸၢႆးၸင်ႇ ၶိုၼ်းမႃးၸွမ်းၽၢႆႇလင်ၶဝ်ယဝ်ႉ ... လႆႈႁၼ်ၼၢင်းမူဝ်ၶၢဝ်လႄႈ ၼၢင်းၸၢမ်သႅင်းပႂ်ႉထႃႈမၼ်းဝႆႉယူႇ ၼၢင်းမူဝ်ၶၢဝ်ၸင်ႇဝႃႈ
“ၵႂႃႇ ... ပီႈၸၢႆးမွၼ်းၶိူဝ်း”
ၶဝ်သၢမ်ၵေႃႉၵႂႃႇ ၸွမ်းၽၢႆႇလင် ၶဝ်ၸိူဝ်းၼၼ်ႉသေ ၶိုၼ်ႈမိူဝ်းဝႆႈၽြႃး ၼိူဝ်ၵျွင်းၽြႃးယဝ်ႉ။ ယွၼ်ႉပိူဝ်ႈၽြႃးပႆႇၶိုၼ်းၽႅဝ်လႄႈ တီႈၼႂ်းၵျွင်းၼၼ်ႉ ၵိုတ်းဝႆႉၽြႃးတူၼ်လဵဝ်(သူႇလဵဝ်)ၵူၺ်း ... ၼၢင်း ၸၢမ်သႅင်းၸင်ႇထၢမ်
“ၸဝ်ႈၼႆႉ ႁဵတ်းသင်ၶဝ်သမ်ႉဢမ်ႇပၢင်းၵႂႃႇၸွမ်းၼႆႉ ပီႈ ၸၢႆႈမွၼ်းၶိူဝ်း”
“ၶဝ်ဝႃႈ ၸဝ်ႈတူၼ်ၼႆႉ ဢမ်ႇပၢင်းလႆႈၼႆယဝ်ႉ”
ၼၢင်းမူဝ်ၶၢဝ် ၶိုၼ်းထၢမ်
“ဢေႃ ... ပေႃးပၢင်းပႃးၸဝ်ႈတူၼ်ၼႆႉ ၸၢင်ႈပဵၼ်ၽူၼ်လူမ်းလူင် မႃးၼႆၼၼ်ႉႁႃႉ ၸွင်ႇၸႂ်ႈႁိုဝ် ပီႈၸၢႆးမွၼ်းၶိူဝ်း”
“ဝႃႈၼၼ်ယဝ်ႉ ... တီႈဢၼ်ႁိူဝ်းပိၼ်ႈၼၼ်ႉ ၶဝ်ၸဝ်ႈ တင်းႁႃႈတူၼ်တူၵ်းၸူမ်ၵႂႃႇၼႂ်းၼမ်ႉသေ ၸဝ်ႈတူၼ်ၼႆႉ ၶဝ်လမ်ၼမ်ႉသေ ႁႃဢဝ်တင်းဝၼ်းၵေႃႈ ဢမ်ႇႁၼ်ၼႆယဝ်ႉ”
ၼၢင်းၸၢမ်သႅင်း ၸင်ႇၶိုၼ်းဝႃႈ
“ဢေႃ ... ဢၼ်ပိူၼ်ႈဝႃႈ မၼ်းၸဝ်ႈ ၶိုၼ်းၽႅဝ်မႃးႁင်းၵူၺ်းၼၼ်ႉၼႆႁႃႉ”
“ဢိူဝ်ႈ ... ၸႂ်ႈဢိူဝ်ႈ ၵွပ်ႈၼႆ ၸဝ်ႈတူၼ်ၼႆႉတႄႉ ၶဝ် ဢမ်ႇႁတ်းပၢင်းသေ ၸင်ႇဝႆႉဝႆႉ တီႈၵျွင်းၼႆႉၼႆယဝ်ႉ”
ၼၢင်းမူဝ်ၶၢဝ် ၸင်ႇၶိုၼ်းထၢမ်ထႅင်ႈ
“ဢေႃႈ ... ပေႃးၼႆ ၸဝ်ႈတူၼ်ၼႆႉၼႆႉ ပဵၼ်ၸဝ်ႈဢၼ် ပႂ်ႉၵျွင်းဢိူဝ်ႈၼေႃႈ”
“ၸႂ်ႈဢိူဝ်ႈ ... ပေႃးဝႃႈ တီႈၵျွင်းၼႆႉ ဢမ်ႇၵိုတ်းဝႆႉသေတူၼ်ၼႆ တီႈၵျွင်းၼႆႉ တၵ်ႉၵႃႇၶဝ် ဢမ်ႇၸၢင်ႈလူႇ ဢမ်ႇၸၢင်ႈဝႆႈ တီႈလႂ်လူး ၸဝ်ႈတူၼ်ၼႆႉတႄႉ ပဵၼ်ၸဝ်ႈရႁၢၼ်းတႃႇၼႆယဝ်ႉ”
“ဢေႃႈ ... ဝႃႈၼၼ်ႁႃႉ ... ၸၢမ်သႅင်းၶဝ်ထၢင်ႇဝႃႈ ပဵၼ် ၽြႃးၵူႈၸဝ်ႈၼႆၼႃး”
“မိူဝ်ႈၸဝ်ႉၼၼ်ႉ မူဝ်ၵေႃႈထၢင်ႇဝႃႈၼၼ်ဢိူဝ်ႈၼႆႉ ပေႃးပီႈၸၢႆးမွၼ်းၶိူဝ်း ဢမ်ႇလၢတ်ႈၼႄၼႆ မူဝ်ၶဝ်ယင်းဢမ်ႇႁူႉၵူၺ်း”
“မိူဝ်ႈၸဝ်ႉၼၼ်ႉ ပီႈၸၢႆးမွၼ်းၶိူဝ်းၵေႃႈထၢင်ႇဝႃႈၼၼ် ၼင်ႇၵဝ်ႇယဝ်ႉ ပိူၼ်ႈလၢတ်ႈၼႄလႄႈ ၸင်ႇတွင်းဝႆႉဢိူဝ်ႈ”
“ဢေႃႈ ... ပီႈၸၢႆးမွၼ်းၶိူဝ်း မူဝ်ၶဝ် ၶႂ်ႈလူႇၶမ်းၽြႃးဢေႃႈ”
“မိူဝ်ႈၽုၵ်ႈၸင်ႇလူႇလႄႈ ပေႃးမိူဝ်ႈၽုၵ်ႈၼႆ တေလႆႈလူႇ တင်းႁႃႈၸဝ်ႈယဝ်ႉ”
“ဢေႃႈ ... ဝႃႈၼၼ်ႁႃႉ ပေႃးၼႆၵေႃႈ မိူဝ်ႈၽုၵ်ႈမႃးၸင်ႇမႃးလူႇၼေႃႈ ၸၢမ်သႅင်း”
“လီယူႇၼႃႇ”
ၶဝ်ဢွၼ်ၵၼ်ဢႅဝ်ႇတူၺ်း တီႈၼိုင်ႈယဝ်ႉတီႈၼိုင်ႈသေ ၶဝ်သၢမ်ၵေႃႉ ၶိုၼ်းမႃးယူႇဝႆႉ တီႈႁိမ်းႁိူဝ်းယဝ်ႉ။ ၶဝ်သၢမ်ၵေႃႉ မႃးၼင်ႈတီႈၶူဝ်လႆ ႁိမ်းၽင်ႇၼၼ်ႉယူႇ ... ၵူၼ်းလူင်ၶဝ်ၸိူဝ်းၼၼ်ႉ ပႆႇၽႅဝ်မႃးလႄႈ ၼၢင်းမူဝ်ၶၢဝ်ၸင်ႇဝႃႈ
“ႁဵတ်းသင်ၼႆႉ ၵူၼ်းလူင်ၶဝ် ပႆႇမႃးၵွၼ်ႇလႃႇ”
ၸၢႆးမွၼ်းၶိူဝ်း ၶုၵ်းၸႂ်လႆႈမဵဝ်းၼိုင်ႈလႄႈ မၼ်းၸင်ႇၵႂႃႇ ယူႇၼိူဝ်ႁိူဝ်းသေ
“ႁေႉ ... ၼၢင်းမူဝ်လႄႈ ၼၢင်းၸၢမ်သႅင်း တူၺ်းမႃးတီႈၼႆႈလႄႈ တေထႆႈႁၢင်ႈဢိူဝ်ႈ”
“ယုမ်ႉဢိတ်းၼိုင်ႈလႄႈ ယႃႇပေၽႅပ်ႉတႃ ထႆႇယဝ်ႉၼႃ ၼိုင်ႈသွင်သၢမ်”
“ၶလႅၵ်ႉ...!
ၾႆးၵႅမ်ႇမရႃႇ မၢပ်ႈလႅင်းႁိူဝ်းၵႂႃႇသႂ်ႇၶႃသွင်ၵေႃႉယဝ်ႉ ဝၢႆးသေၼၼ်ႉ ၼၢင်းမူဝ်ၶၢဝ် ၶႂ်ႈထႆႇၵေႃႉလဵဝ် ၼၢင်းၸၢမ်သႅင်း ၶႂ်ႈထႆႇၵေႃႉလဵဝ်ၵေႃႈ မၼ်းထႆႇပၼ်သဵင်ႈသဵင်ႈယဝ်ႉ ၼၢင်းၸၢမ်သႅင်းၸင်ႇ ထၢမ်ဝႃႈ
“ဢၼ်ပီႈၸၢႆးမွၼ်းၶိူဝ်းထႆႇၼႆႉ ပဵၼ်သီ(ၵႃႇလႃႇ)ႁႃႉ”
“ၸႂ်ႈဢိူဝ်ႈ”
“ပေႃးဝႃႈၶႅပ်းႁၢင်ႈၸၢမ်သႅင်းၶဝ် ဢမ်ႇႁၢင်ႈလီၼႆတႄႉ ၸၢမ်သႅင်းဢမ်ႇဢဝ်ၵူၺ်းၼႃႈ”
“ႁၢင်ႈလီၵႂႃႈ ... တမ်းၸႂ်လႃႈ ... ၵူၼ်းႁၢင်ႈလီၸိူင်ႉၼင်ႇ ၼၢင်းၸၢမ်သႅင်းလႄႈ ၼၢင်းမူဝ်ၼႆႉ ပေႃးထႆႇႁၢင်ႈၼႆ ၶႅပ်းႁၢင်ႈၶဝ် ၶႅၼ်းႁၢင်ႈလီယဝ်ႉ”
ၶႃသွင်ၵေႃႉ ပဵၼ်ဢၼ်ႁၢၼ်ႉၸႂ်ၵႂႃႇတႄႉတႄႉသေ ၼၢင်းမူဝ် ၶၢဝ်ၸင်ႇဝႃႈ
“ပီႈၸၢႆးမွၼ်းၶိူဝ်း ႁႅင်ႉမေႃယွင်ႈၼႃႇၽႅဝ်လႄႈ မူဝ်ၶဝ်ၶႂ်ႈ ထႆႇထႅင်ႈၶႅပ်းၼိုင်ႈဢိူဝ်ႈ ၸွင်ႇတေလႆႈႁိုဝ်?”
“လႆႈယူႇ”
ၼၢင်းမူဝ်ၶၢဝ်ၵေႃႈ ၵႂႃႇၼင်ႈၼိူဝ်ႁိူဝ်းသေ ၸႂ်ႉႁႂ်ႈထႆႇပၼ် ထႅင်ႈၶႅပ်းၼိုင်ႈယဝ်ႉ။
ဝၢႆးသေၼၼ်ႉ ၶဝ်သိုပ်ႇပႂ်ႉထႅင်ႈၵမ်းၼိုင်ႈသေ ၵူၼ်းၶဝ်ၵေႃႈ ၽႅဝ်မႃးတၢင်းမူတ်းယဝ်ႉ ... ၸိူဝ်းဢၼ်ၶႂ်ႈထႆႇၶႅပ်းႁၢင်ႈၸိူဝ်းၼၼ်ႉၼႆၵေႃႈ ၸၢႆးမွၼ်းၶိူဝ်းထႆႇပၼ်သဵင်ႈသဵင်ႈယဝ်ႉ။ ၶဝ်တေၶိုၼ်း ပွၵ်ႈမိူဝ်း တီႈဝၢၼ်ႈႁၢႆးယႃႈယႂႃႇမလႄႈ ၼၢင်းမူဝ်ၶၢဝ်ၶဝ် ဢွၼ်ၵၼ် ၶိုၼ်ႈၼိူဝ်ႁိူဝ်းသေ ဢဝ်တီႈယူႇဝႆႉယဝ်ႉ။ ၸၢႆးမွၼ်းၶိူဝ်းတႄႉ မၼ်းဢမ်ႇၶိုၼ်ႈ ၼၢင်းမူဝ်ၶၢဝ်ၸင်ႇဝႃႈ
“ၶိုၼ်ႈမႃးလႄႈ ပီႈၸၢႆးမွၼ်းၶိူဝ်း”
“ဢမ်ႇၶိုၼ်ႈယဝ်ႉ ... ပီႈၸၢႆးမွၼ်းၶိူဝ်း လူဝ်ႇလႆႈပႂ်ႉတႆးၵေႃႉ ၵေႃႉၼိုင်ႈဢိူဝ်ႈ ... ၵွပ်ႈၼႆ ဢမ်ႇပဵၼ်ၸွမ်းယဝ်ႉ”
ဢူႈၼၢင်းမူဝ်ၶၢဝ်ၶဝ်ၵေႃႈၸင်ႇဝႃႈ
“ႁဵတ်းသင်လႃႇ ... မိူဝ်ႈၽုၵ်ႈလုင်းၶဝ်တေၶိုၼ်းမႃးၸဝ်ႉၸဝ်ႉယူႇလူး ... မိူဝ်ႈၽုၵ်ႈၸင်ႇမႃးႁႃ ဢမ်ႇလႆႈႁႃႉ?”
“ၶႃႈႁဝ်းၶဝ်လၢတ်ႈၵၼ်ဝႆႉ မိူဝ်ႈၼႆႉဢေႃႈ ... ႁဝ်းဝႃႈတေ မႃးထူပ်းၵၼ်တီႈၼႆႈၼႆၶႃႈယဝ်ႉ ... ၵွပ်ႈၼႆ ၶႃႈတေပႂ်ႉတူၺ်းၶဝ်ဢေႃႈ”
ဢူႈၼၢင်းမူဝ်ၶၢဝ်ၶဝ်ၵေႃႈ ဢမ်ႇၸၢင်ႈဝႃႈႁိုဝ်ထႅင်ႈယဝ်ႉ ၼၢင်းမူဝ်ၶၢဝ် လွမ်လွမ်ၸႂ်လဵၵ်ႉသေ ၶိုၼ်းလၢတ်ႈဝႃႈ
“ယူဝ်ၶႄး ၶဝ်ဢမ်ႇမႃးယူဝ်ႇ မိူဝ်ႈၽုၵ်ႈၸင်ႇမႃးႁႃၶဝ်ႁေယဝ်ႉၼႃႇ”
“လႆႈလၢတ်ႈၵၼ်ဝႆႉယဝ်ႉလူးၼၢင်းမူဝ် ... မိူဝ်ႈၽုၵ်ႈမႃး ၸင်ႇၶိုၼ်းထူပ်ႁၼ်ၵၼ်ထႅင်ႈယဝ်ႉ ပီႈၸၢႆးမွၼ်းၶိူဝ်းတေပႂ်ႉဝႆႉလႆ”
ၶဝ်ႁဵတ်းႁိုဝ်ႁွင်ႉၵေႃႈ ၸၢႆးမွၼ်းၶိူဝ်း ဢမ်ႇၸွမ်းလႃးလႃးလႄႈ ၶဝ်ၶီႇႁိူဝ်းသေ ဢွၵ်ႇမိူဝ်းယႂႃႇမယဝ်ႉ။ ၸၢႆးမွၼ်းၶိူဝ်းၵေႃႈ လွမ်တူၺ်းႁိူဝ်းၶဝ် တေႃႇပေႃးလပ်ႉသၢႆတႃၵႂႃႇယဝ်ႉ၊ ၼၢင်းမူဝ်ၶၢဝ် ၼႂ်းၵၢင် ၸႂ်မၼ်းၼၢင်းပဵၼ်ၵႂႃႇႁူဝ်ႇလူဝ်ႇႁၢင်းလၢင်းဝႆႉယူႇ ... ဝၢႆးႁိူဝ်းၶဝ် ပူၼ်ႉၵႂႃႇ ၸၢႆးမွၼ်းၶိူဝ်း ထူၺ်ႈၸႂ်လူင်ၵမ်းၼိုင်ႈယဝ်ႉ၊ ၵၢင်ၸႂ်မၼ်းတႄႉ ပဵၼ်ဢၼ်ၵဵင်ၸႂ်(ဢႃးၼႃႇ)ၵူႈပိူင်ပိူင်လႄႈ မၼ်းၸင်ႇလႅၼ်ၶဝ်သေ တင်ႈၸႂ်ၵိုတ်းဝႆႉယဝ်ႉ၊ ၶမ်ႈၼႆႉ မၼ်းတႅပ်းတတ်းဝႆႉ ဢၢၼ်းဢဝ်ပၢင်ပွႆး ႁဵတ်းတီႈၼွၼ်းမၼ်းၼႆယဝ်ႉ၊ ၶမ်ႈၼၼ်ႉ မၼ်းၵေႃႈ တူၺ်းပွႆးသေ ထိုင်ၶၢဝ်းမႃးၼွၼ်း မၼ်းမႃးၼွၼ်းၼိူဝ် ၵျွင်းလူင် ၸိူင်ႉၼင်ႇပိူၼ်ႈၼွၼ်းၼၼ်ႉယဝ်ႉ။