မွၵ်ႇလူင်ႇလဵဝ်/တွၼ်ႈသိပ်းႁႃႈ
ဝၼ်းဢႃးတိတ်ႉ
ၸၢႆးသႅင်မိူင်းလႄႈ တႆးၵေႃႈမၼ်း ၸၢႆးငူဝ်ႉ ၸၢႆးၸၢႆး ၸၢႆးၵွႆ ၸၢႆးထူဝ်ႉ ၸၢႆးထွၼ်းၶဝ်ႁူၵ်းၵေႃႉ ဢုပ်ႇၵၼ်သေ ပႆမႃး ၼိူဝ်သဵၼ်ႈတၢင်းၽၢႆႇၸၢၼ်းဝၢင်းမၢၵ်ႇၼင်ၼၼ်ႉယူႇ ... ၸၢႆးသႅင်မိူင်း ယၢႆးတိူၼ်ႇ တႃမိုဝ်းမၼ်းသေဝႃႈ
“ဢၢႆႈၸိူဝ်းၼႆႉ မိူဝ်ႈၼႆႉတႃမိုဝ်းၵဝ် ၶူမ်းၵျႃႉမႂ်း”
တႆးၵေႃႉမၼ်းၸၢႆးငူဝ်ႉ ၸင်ႇဝႃႈ
“ႁေး ႁေး ၶႄးတေလႆႈႁႆႇပိူၼ်ႈယူဝ်ႉ”
ၸၢႆးသႅင်မိူင်း ၸင်ႇယုမ်ႉသေဝႃႈ
“ၵျႃႉယူႇၼႃႇ ၵဝ်တႄႉတၼ်းသေႇသေႇယဝ်ႉ ပေႃးပဵၼ်မႃး တႄႉတႄႉၼႆ သူၸိူဝ်းၼႆႉ ယႃႇပေၶီႈယၢၼ်ႈသေ ဢႅၼ်ႇပၢႆႈၼႃႈ”
ၶဝ်ၸိူဝ်းၼၼ်ႉ ၸင်ႇဢွၼ်ၵၼ်ဝႃႈ
“ႁဝ်း ဢမ်ႇတွၼ်ႉပၢႆႈသေပွၵ်ႈၵူၺ်းဢၢႆႈ ... ၵူဝ်မႂ်းပၢႆႈဢွၼ် တၢင်းၵူၺ်းယဝ်ႉ”
“ႁႃး ... ႁႃး ... ႁႃး ... ႁႃး ... ႁႃး ”
တႆးၵေႃႉမၼ်း ဢွၼ်ၵၼ်ႁုၼ်ႉၶူဝ်မၼ်းယူႇ ၸၢႆးသႅင်မိူင်း ၶိုၼ်းဝႃႈ
“ႁေး ႁေး ယႃႇပေဢုပ်ႇဢဝ် ပႂ်ႉတူၺ်းဢဝ်လႄႈ”
ၶဝ်သိုပ်ႇပႆမႃး ၼင်ႇၼၼ်သေ ၶဝ်မႃးႁူပ်ႉၺႃး ၸၢႆးမွၼ်း ၶိူဝ်းလႄႈ ၸၢႆးၶမ်းယဝ်ႉ ၸၢႆးသႅင်မိူင်းၸင်ႇဝႃႈ
“ဢၢႆႈၸိူဝ်းၼႆႉ ဢၢႆႈသွင်ၵေႃႉ ဢၼ်ပႆမႃးၸူးတၢင်းႁဝ်းၼႆႉ ၽႂ်ၵေႃႈ ယႃႇပေဝႄႈပၼ်တၢင်း ပၼ်ၶႃၼႃႈ မိူဝ်ႈဝၼ်းပုၼ်ႉၵေႃႈ ႁဝ်းလႆႈၽိတ်းၵၼ် တီႈၼႂ်းလၢၼ်ႉၶၢႆ တူၼ်ႈတီးၼၼ်ႉ ပွၵ်ႈၼိုင်ႈယဝ်ႉ”
“ဢေႃႈ ... ဢၢႆႈသွင်တူဝ်ၼႆႉႁႃႉ”
“ၸႂ်ႈဢိူဝ်ႈ ဢၼ်ၸွမ်းၼၢင်းမူဝ်ၶၢဝ်ၼၼ်ႉၵေႃႈ ပဵၼ်ၶႃသွင်ၵေႃႉၼႆႉယဝ်ႉ ၵွပ်ႈၼႆ တႃမိုဝ်းၵဝ်ၶူမ်းၼၼ်ႉၵေႃႈ လူဝ်ႇပဵၼ် တႃႇသွင်ၵေႃႉၼႆႉယဝ်ႉ”
တႆးၵေႃႉမၼ်း ႁႃႈၵေႃႉၸိူဝ်းၼၼ်ႉၵေႃႈ ပၼ်ႁႅင်းဝႃႈ
“ပေႃးၼႆ ယႃႇပေၵူဝ် ႁႆႇလႄႈဢၢႆႈ”
ၶဝ်ႁူၵ်းၵေႃႉ မႄးပႆဢဝ်တီႈယူႇ တဵမ်တၢင်း ဢိုတ်းတၢင်း ၸၢႆးမွၼ်းၶိူဝ်းၶႃဝႆႉယဝ်ႉ ၸၢႆးမွၼ်းၶိူဝ်းၵေႃႈ လွမ်လွမ်ပၼ်သတိၸၢႆးၶမ်းယူႇ
“ၸၢႆးၶမ်း သတိဝႆႉ(ၾၢင်ႉဝႆႉ)ၼႃႈ”
“ၵဝ်ႁူႉယူႇ”
ၶဝ်ႁူၵ်းၵေႃႉလႄႈ ၶႃသွင်ၵေႃႉ ပႆမႃးတေႃႇၼႃႈၵၼ်သေ ပေႃးဝႃႈ ၶဝ်ၽႅဝ်မႃးၸမ်ၵၼ်ၼႆ ၶႃသွင်ၵေႃႉ ၸင်ႇၵိုတ်းသေ ၸၢႆးမွၼ်းၶိူဝ်းၸင်ႇဝႃႈ
“တႆးၵေႃႉၶဝ် ဢိုတ်းတၢင်းဝႆႉႁဵတ်းသင်လႃႇ”
ၸၢႆးသႅင်မိူင်း ၸင်ႇတဝ်ႉဢႅင်ႈသေ
“ဢိုတ်းၵေႃႈဢမ်ႇဝႃႈ ဢမ်ႇဢိုတ်းၵေႃႈဢမ်ႇဝႃႈၵူၺ်း”
“ပေႃးဢမ်ႇဢိုတ်းၵေႃႈ ပၢႆႈပၼ်လႄႈ”
“ႁေး ... ႁေး ...ၼႆႉတႄႉ ဢမ်ႇၸၢင်ႈပၢႆႈပၼ်ၵူၺ်း”
ၸၢႆးမွၼ်းၶိူဝ်း ဢမ်ႇၶႂ်ႈၽိတ်းၶဝ်လႄႈ မၼ်းၸင်ႇၸၼ်မိုဝ်း ၸၢႆးၶမ်းသေ
“ၸၢႆးၶမ်း ပေႃးၶဝ်ဢမ်ႇပၢႆႈပၼ်ၼႆၵေႃႈ တိူင်းမၼ်းလႃႈ မႃးလႄႈ ႁႃးဝႄႈပၼ်ၶဝ်ႁေယဝ်ႉၵႂႃႈ”
ပေႃးဝႃႈ ၶႃသွင်ၵေႃႉ ၸၼ်မိုဝ်းၵၼ်သေ ဢၢင်ႈဝႄႈဢွၵ်ႇ ၼွၵ်ႈတၢင်းၼႆ တႆးၵေႃႉၸၢႆးသႅင်မိူင်းၸိူဝ်းၼၼ်ႉ မႃးဢိုတ်းတၢင်းၶႃဝႆႉယဝ်ႉ ၸၢႆးၶမ်းၸင်ႇဝႃႈ
“သူဢၢၼ်းၶႂ်ႈပဵၼ်ႁိုဝ်လၢတ်ႈလူး”
ၸၢႆးငူဝ်ႉ ၸင်ႇၶူဝ်သေဝႃႈ
“ႁႃး ... ႁႃး ... ၸွင်ႇမႂ်းတွင်းႁိုဝ် ႁဝ်းၶႂ်ႈႁႂ်ႈပဵၼ်ၸိူင်ႉၼင်ႇ ႁဝ်းၺႃးၵၼ် တီႈလၢၼ်ႉၶၢႆတူၼ်ႈတီးၼၼ်ႉယဝ်ႉ ၸွင်ႇမႂ်းတိုၵ်ႉတွင်းၵဝ်ႁိုဝ်ဢၢႆႈ”
ၸၢႆးၶမ်းၵေႃႈ ၸင်ႇၸီႉၼႃႈ ၸၢႆးငူဝ်ႉသေဝႃႈ
“ႁိုဝ်ႉ ... တွင်းၼႅၼ်ႇယဝ်ႉ ... ၸိူင်ႉၼင်ႇမႂ်းၼႆႉ တၢႆသေ မႃတိုတ်ႉလၢၵ်ႈၵႂႃႇၵေႃႈ ၵဝ်ယင်းတေတွင်းၵွၼ်ႇယဝ်ႉ”
“ဢေႃ ... ၽႂ်တေတၢႆၼႆၵေႃႈ တူၺ်းၵွၼ်ႇၵႂႃႈ”
ၶဝ်ၸိူဝ်းၼၼ်ႉၵေႃႈ ၼႅတ်ႈဢဝ်တီႈယူႇသေ မႃးလွမ်ႉၶႃ သွင်ၵေႃႉဝႆႉယဝ်ႉ ၸၢႆးမွၼ်းၶိူဝ်း ၸင်ႇဝႃႈ
“ဝႆႉသတိယႂ်ႇယႂ်ႇၼႃႈ ၸၢႆၶမ်း”
ၸၢႆးၶမ်း ငွၵ်းႁူဝ်မၼ်းၵမ်းၼိုင်ႈသေ
“တမ်းၸႂ်လႃႈ ၸွင်ႇမႂ်းတွင်းႁိဝ် ပေႃးၵိၼ်ႁႂ်ႈၵိၼ်ဢိမ်ႇဢိမ်ႇ ပေႃးႁႅမ်လုၵ်ႈပိူၼ်ႈ ႁႂ်ႈႁႅမ်ၸဵပ်းၸဵပ်းၼႆၼၼ်ႉ”
“တွင်းဢိူဝ်ႈ”
“ပေႃးတွင်းၵေႃႈ ႁႆႇၸဵပ်းၸဵပ်းလႃႈ”
ၸၢႆးမွၼ်းၶိူဝ်းလႄႈ ၸၢႆးၶမ်းတႄႉ ၼုင်ႈၵူၼ်တႆးဝႆႉၼင်ႇၵၼ်ယဝ်ႉ ယၢမ်းလဵဝ် ၶႃၵွင်လင်တေႃႇၵၼ်သေ ႁၢင်ႈလၢႆးၶႃဝႆႉယူႇ ၸၢႆးၶမ်း ၸင်ႇဝႃႈ
“ၽႂ်ၶႂ်ႈၺႃးဢွၼ်တၢင်းၵေႃႈ ၶဝ်ႈမႃးလႄႈ”
ၸၢႆးငူဝ်ႉ ၸင်ႇႁွင်ႉဝႃႈ“ၵျႃး”ၼႆသေ ဝႅၼ်ၶဝ်ႈမႃးၸူး ၸၢႆးၶမ်းယဝ်ႉ၊ ၶဝ်ၸိူဝ်းၼၼ်ႉၵေႃႈ ဢွမ်ႇလွမ်ႉၽွမ်ႉၵၼ် ၶဝ်ႈမင် ၶႃသွင်ၵေႃႉယဝ်ႉ ... ၸၢႆးၶမ်း ၼႅတ်ႈငိူင်ႉဢွၵ်ႇတၢင်းၽၢႆႇၶၢင်ႈ ယၢင်ႈတိၼ်ဢွၵ်ႇၶွၼ်ၼိုင်ႈသေ ဢဝ်မိုဝ်းမၼ်း ၽၼ်းပၼ်ၵွင်ႇၵေႃႈ ၸၢႆးငူဝ်ႉ ဢၼ်လေႃႈၶဝ်ႈမႃးၸူးမၼ်းၼၼ်ႉယဝ်ႉ။
“ႁိူဝ်ႈ ... ၼႆႉပဵၼ် သၼ်မိုဝ်းၵုၼ်ႁိင်းယဝ်ႉ ၸိမ်းတူၺ်း လႄႈ ဝၢၼ်ဢိူဝ်ႈ”
တိုၵ်ႉ! ... ဢႃး ... ၸၢႆးငူဝ်ႉဢွၵ်ႇသဵင်ၼင်ႇၼၼ်သေ လူမ်ႉမူပ်ႇထူၵႂႃႇ ၼိူဝ်တၢင်းလႄႈ ၼႃႈမၼ်းၵေႃႈ လွၵ်ႈၵႂႃႇသေ ဢွၵ်ႇလိူတ်ႈလႅင်မႃးယဝ်ႉ။
ၸၢႆးထူဝ်ႉလႄႈ ၸၢႆးဢၢႆႈ ၶဝ်ႈမႃးၸူး ၸၢႆးမွၼ်းၶိူဝ်းယူႇ ၸၢႆးမွၼ်းၶိူဝ်း ပၢၵ်ႈပႅတ်ႈ တႃမိုဝ်းၸၢႆးထူဝ်ႉသေ တႃမိုဝ်းမၼ်းၶွၼ်ၼိုင်ႈ ပွႆႇသႂ်ႇၶီႈမႅပ်ႉ ၸၢႆးထူဝ်ႉလႄႈ ၵွၵ်းႁူဝ်ၸၢႆးထူဝ်ႉ ၵိူင်းႁိူင်ႈၵႂႃႇယဝ်ႉ၊ ၽွင်းၼၼ် တိၼ်မၼ်းၶွၼ်ၼိုင်ႈၵေႃႈ ပိတ်ႉၶိုၼ်းၽၢႆႇလင်သေ ၺႃးသႂ်ႇတွင်ႉ ၸၢႆးဢၢႆႈ ဢၼ်ၶဝ်ႈမႃးၸူးမၼ်းၼၼ်ႉလႄႈ ၸၢႆးဢၢႆႈ ၵမ်းတွင်းမၼ်းသေ ပိၼ်ႈလူမ်ႈၼင်ႈသွင်ႉသႂ်ႇ မၢၵ်ႇႁိၼ်လႅမ်ယဝ်ႉ
“ယေႃႈ တႃမိုဝ်းလွႆလႅမ်ဢိူဝ်ႈ ... ၼႆႉတႄႉ ပဵၼ်ၽႃႇတိၼ် လွႆလႅမ်ယဝ်ႉ”
ပပ်ႉ ... ဢိုဝ်ႉ ... ဢူႉ ... ဢႃႉ
ၸၢႆးသႅင်မိူင်း လႆႈႁၼ်တႆးၵေႃႉမၼ်း ၸဵပ်းၵႂႃႇလႄႈ မၼ်းၸင်ႇၼႅတ်ႈၶဝ်ႈမႃးသေ ဢဝ်တိၼ်ပိတ်ႉပၼ် ၸၢႆးမွၼ်းၶိူဝ်းယဝ်ႉ။ ၸၢႆးမွၼ်းၶိူဝ်းၵေႃႈ ၼႅတ်ႈႁူၼ်လင်ပႅတ်ႈ ယၢင်ႈၼိုင်ႈသေ ၶိုၼ်းသွၼ်ႉတိၼ်မၼ်း ၶိုၼ်းပိတ်ႉ ပၼ်ၸၢႆးသႅင်မိူင်း ဢၼ်ၶဝ်ႈမႃးၸူးမၼ်းၼၼ်ႉယဝ်ႉ ၸၢႆးသႅင်မိူင်းၵေႃႈ ၼႅတ်ႈၶိုၼ်း ပၢႆႈပႅတ်ႈတၢင်း ၶၢင်ႈယူႇ၊ ၸၢႆးသႅင်မိူင်း ၶိုၼ်းသိုပ်ႇၶဝ်ႈၸူး ၸၢႆးမွၼ်းၶိူဝ်းယဝ်ႉ၊ ၸၢႆးဢၢႆႈ လႄႈ ၸၢႆးထူဝ်ႉၵေႃႈ ႁူမ်ႈၵၼ်ၶဝ်ႈၸူး ၸၢႆးမွၼ်းၶိူဝ်းယဝ်ႉ။ ယွၼ်ႉပိူဝ်ႈ ၶဝ်သၢမ်ၵေႃႉ လွမ်ႉၵၼ်ၽွမ်ႉၵၼ် ၶဝ်ႈၸူးမၼ်းယူႇ ၸၢႆးမွၼ်းၶိူဝ်း ၶမ်ဝႆႉၼႂ်းၵႄႈၵၢင်ၶဝ်လႄႈ မၼ်းၸၢႆးၵေႃႈတႅပ်းတတ်း ၸႂ်မၼ်း ၶိုၼ်းၶဝ်ႈၸူး ၸၢႆးသႅင်မိူင်းသေ ပၢၵ်ႈၸၼ်ဢဝ်မိုဝ်း ဢၼ်ၸၢႆးသႅင်မိူင်းထုပ်ႉမႃးယဝ်ႉသေ ဢဝ်ၸၢႆးသႅင်မိူင်း ဢီးယဝ်ႈ ၸူးၸၢႆးထူဝ်ႉ လႄႈ ၸၢႆးဢၢႆႈယဝ်ႉ၊ ၽွင်းမိူဝ်ႈ ၸၢႆးမွၼ်းၶိူဝ်း ဢီးယဝ်ႈ ၸၢႆးသႅင်မိူင်းၵေႃႈ ဢမ်ႇသၢင်ႉတူဝ်လႆႈသေ ဝူၵႂႃႇၸူးၸၢႆးဢၢႆႈလႄႈ ၸၢႆးထူဝ်ႉယဝ်ႉ၊ ၶႃသွင်ၵေႃႉၵေႃႈ ၶိုၼ်းႁႅမ်ၺႃး ၼႃႈၸၢႆးသႅင်မိူင်းလႄႈ ၼႃးၸၢႆးသႅင်မိူင်း ၸဵပ်းႁႅင်းၵႂႃႇသေ လႅင်ၵမ်ႇမၢၼ်ႉသွမ်ႇၵႂႃႇယဝ်ႉ။
“တိုၵ်ႉ ... ပပ်ႉ ... ”
“ဢႃႉယႃႉ ... မႄႈသူလႃႈ ၶိူဝ်သမ်ႉမႃးႁႅမ်ၵဝ်လႃႇ”
ၸၢႆးၵွႆ ၸၢႆးငူဝ်ႉလႄႈ ဢၢႆႈထွၼ်းၵေႃႈ ဢမ်ႇၶဵင်ႇတႃႉလႆႈ ၸၢႆးၶမ်း ၸၢႆးၶမ်းႁႅမ်ပၼ်ၶဝ် ပဵၼ်ဢၼ်ၸဵပ်းၼမ်တႄႉတႄႉ၊ ၵွပ်ႈၼႆ တႃႇတေၶဵင်ႇလႆႈၼၼ်ႉ ၶဝ်ႁူၵ်းၵေႃႉ ဢွၼ်ၵၼ်ထူၵ်းၶိူင်းယိပ်းၶဝ် ၵူႈၵေႃႉယဝ်ႉ၊ ၸၢႆးမွၼ်းၶိူဝ်း ၸင်ႇဝၢႆႇတူၺ်းၸၢႆးၶမ်းသေ
“ၸၢႆးၶမ်း ... ယႃႇပေလႃႈလီၶဝ်ႈၼႃ”
ၵမ်းၼႆႉ ၶႃသွင်ၵေႃႉ ဢမ်ႇမီးၶိူင်းယိပ်းလႄႈ ၶႃသွင်ၵေႃႉ လႆႈႁူၼ်လင်ယဝ်ႉ၊ ၶဝ်ႁူၵ်းၵေႃႉ လွမ်ႉၶႃသွင်ၵေႃႉဝႆႉသေ ၶဝ်ႈၸူး ၶႃယဝ်ႉ၊ ၸၢႆးဢၢႆႈ ဢဝ်သၢႆလႅၼ်ႈလဵၵ်း ၽတ်ႉသႂ်ႇႁူဝ်ၸၢႆးမွၼ်းၶိူဝ်း ၸၢႆးမွၼ်းၶိူဝ်း ၼႅတ်ႈၵူမ်ႈႁူဝ်ပႅတ်ႈသေ ဢဝ်တိၼ်မၼ်း ပိတ်ႉၵွင်ႉတိၼ်ၸၢႆးဢၢႆႈလႄႈ ၸၢႆႈဢၢႆႈပလၢတ်ႈၵႂႃႇသေ လူမ်ႉၼင်ႈပႅတ်ႈယဝ်ႉ၊ ၸၢႆးမွၼ်းၶိူဝ်း ဢၢင်ႈဝႅၼ်ယဵပ်ႇတိုပ်ႈဢူၵ်း ၸၢႆးဢၢႆႈယူႇ ၵူၺ်းၵႃႈ ၸၢႆးသႅင်မိူင်းဢဝ် ၼၢၼ်ႇၶျႅတ်ႉၵူႇ(မႆႉသွင်ႁၵ်း) ၽတ်ႉမႃးသိုဝ်ႈၼႃႈ မၼ်းလႄႈ မၼ်းၼႅတ်ႈငိူင်ႉၼႃႈမၼ်း ဢဝ်မိုဝ်းမၼ်းသွင်ၶွၼ်ႁေႉ မႆႉသွင်ႁၵ်းၼၼ်ႉယူႇ မႆႉသွင်ႁၵ်းၼၼ်ႉၵေႃႈ ၽတ်ႉၺႃးၽႃႇမိုဝ်း ၽၢႆႇၶႂႃမၼ်း ပဵၼ်ဢၼ်ၸဵပ်းၵႂႃႇတၢၼ်ႇတၢၼ်ႇ ၵူၺ်းၵႃႈ ၸၢႆးမွၼ်းၶိူဝ်း ႁပ်ႉလႆႈဝႆႉ မႆႉသွင်ႁၵ်းၼၼ်ႉ ၽၢႆႇၼိုင်ႈသေ ၶႃသွင်ၵေႃႉ ၸၢႆးသႅင်မိူင်းတိုတ်ႉၸၼ်ၵၼ်ဝႆႉယူႇ ၼင်ႇၼၼ် ၸၢႆးသႅင်မိူင်း ဢမ်ႇပေႉလႆႈ ႁႅင်းၸၢႆးမွၼ်းၶိူဝ်း၊ ၽွင်းၶႃသွင်ၵေႃႉ တိုၵ်ႉတိုတ်ႉၵၼ်ယူႇၼၼ်ႉ ၸၢႆးထူဝ်ႉ ဢဝ်ၶွၼ်ႉ ဝူတ်ႇႁႅမ်ၽၢႆႇလင် ၸၢႆးမွၼ်းၶိူဝ်းႁႅင်းႁႅင်းယဝ်ႉ၊ ၸၢႆးၶမ်း လႆႈႁၼ်ၼင်ႇၼၼ်သေ မၼ်းၸင်ႇႁွင်ႉလၢတ်ႈဝႃႈ
“ၸၢႆးၶိူဝ်း ... ၽၢႆႇလင်ဢိူဝ်ႈ”
လႆႈငိၼ်းၼင်ႇၼၼ် ... ၸၢႆးၶိူဝ်းၵေႃႈ ၼႅတ်ႈၸၼ်မႆႉ သွင်ႁၵ်းၼၼ်ႉ ႁႅင်းႁႅင်းသေ ငိူင်ႉတူဝ်မၼ်း ဢွၵ်ႇၵႂႃႇတၢင်းၶၢင်ႈ ဢိတ်းၼိုင်ႈယဝ်ႉ၊ ယွၼ်းးပိူဝ်ႈ ၸၢႆးၶိူဝ်းၸၼ်ႁႅင်းႁႅင်းလႄႈ ၸၢႆးသႅင်မိူင်း ဝူမႃးၸူႈ ၸၢႆးၶိူဝ်းသေ ၶွၼ်ႉဢၼ်ၸၢႆးထူဝ်ႉႁႅမ်ၼၼ်ႉၵေႃႈ ႁႆႇၺႃး ၵွၵ်းႁူဝ်ၸၢႆးသႅင်မိူင်းထႅင်ႈယဝ်ႉ
“တၢၵ်ႉ!”
“ဢႃႉ”
ၵွပ်ႈႁူဝ်ၼႃႈၽၢၵ်ႇ ၸၢႆးသႅင်မိူင်းပွင်ႇၵႂႃႇသေ ဢွၵ်ႇလိူတ်ႈလႅင်ယွႆႉမႃးၸွမ်း ၼႃႈၽၢၵ်ႇမၼ်းယဝ်ႉ၊ ၽွင်းမိူဝ်း ၸၢႆးမွၼ်းၶိူဝ်း ငိူင်ႉတူဝ်မၼ်းၼၼ်ႉ မၼ်းဢဝ်တိတ်ပိတ်ႉထိပ်ႇသႂ်ႇႁူဝ်ၼဝ်ႇ ၸၢႆး ထူဝ်ႉလႄႈ ၸၢႆးထူဝ်ႉၼႃႈမီႇသေ ဢဝ်မိုဝ်းယိပ်းႁူဝ်ၼဝ်ႇမၼ်းယူႇ။
“ဢိုဝ်ႉ! ၸုတ်ႉၸုတ်ႉ”
ၶွၼ်ႉသွင်ႁၵ်းၼၼ်ႉၵေႃႈ ၽႅဝ်ၼႂ်းမိုဝ်းၸၢႆးမွၼ်းၶိူဝ်းယဝ်ႉ၊ ၸၢႆးၶမ်း ဢမ်ႇၸၢင်ႈၶဝ်ႈၸမ်လႆႈလႄႈ မၼ်းလႆႈႁူၼ်လင်ယူႇ မၼ်းၸင်ႇၶုၵ်းၸႂ်လႆႈ သၢႆၵႅတ်း တီႈဢႅင်ႈမၼ်းလႄႈ မၼ်းၸင်ႇ ၼႅတ်ႈပူတ်းၽႂ်းၽႂ်းသေ ၼႅတ်ႈၽတ်ႉပၼ်ၼႃႈဢၢႆႈထွၼ်းယဝ်ႉ။
“ပပ်ႉ”
“ဢႃႉ”
ၸၢႆးၶမ်း မီးႁႅင်းမႃးယဝ်ႉလႄႈ မၼ်းဢဝ်သၢႆၵႅတ်းမၼ်း ႁႅမ် ၶဝ်ယူႇ၊ ၽွင်းၼၼ်ႉ ၵူၼ်းၸၢႆးမဝ်ႇထႅင်ႈႁႃႈၵေႃႉ လႆႈႁၼ်ၶဝ် ၽိတ်းၵၼ်ဝႆႉလႄႈ ၶဝ်ၸင်ႇၼႅတ်ႈဢႅၼ်ႇမႃးၸမ်ၸမ်ယဝ်ႉ။
“ႁႃႉ ... ပဵၼ်ၸၢႆးသႅင်မိူင်းလႄႈ ၸၢႆးမွၼ်းၶိူဝ်းၶဝ် ၽိတ်း ၵၼ်ဢမ်ႇၸႂ်ႈႁႃႉၼႆႉ”
“ၸႂ်ႈဢိူဝ်ႈ ... ၸၢႆးမွၼ်းၶိူဝ်းၶႃသွင်ၵေႃႉၵူၺ်းဢိူဝ်ႈၼၼ်ႉ ၶဝ်ၸိူဝ်းၼၼ်ႉ မီးပဵၼ်ႁူၵ်းၵေႃႉၵမ်းလဵဝ်ယဝ်ႉ”
ၶဝ်ၸိူဝ်းၼၼ်ႉ ဢႅၼ်ႇမႃးၽႅဝ် တီႈၶဝ်ၽိတ်းၵၼ်သေ မႃးၸွႆႈၸၢႆးၶိူဝ်းၶဝ်ယဝ်ႉ
“ႁႆႇလႄႈ ၸၢႆးၶိူဝ်း ... ယႃႇပေၵူဝ် ႁဝ်းမႃးၸွႆႈသူဢိူဝ်ႈ”
“ၶဝ်ၸိူဝ်းၼႆႉ ... တိုၼ်းၶႃႇၵေႇယူႇသေႇသေႇယဝ်ႉ ဝတ်ႉပႅတ်ႈလႄႈ”
ၵူၼ်းၸၢႆးသႅင်မိူင်းၶဝ် ဢမ်ႇပႄႉလႆႈလႄႈ ၶဝ်ၸင်ႇဢွၼ်ၵၼ်ဢႅၼ်ႇပၢႆႈယဝ်ႉ၊ ၽွင်းမိူဝ်ႈၶဝ်ဢႅၼ်ႇပၢႆႈၼၼ်ႉ ၸၢႆးမွၼ်းၶိူဝ်း ၸင်ႇဢဝ်မႆႉသွင်ႁၵ်း သိုင်းၸွမ်းလင်ၶဝ် မႆႉသွင်ႁၵ်းၼၼ်ႉ ၵႂႃႇႁႆႇၺႃးၵွၵ်းႁူဝ် ၸၢႆးငူဝ်ႉ ၸၢႆးငူဝ်ႉၵေႃႈ လုပ်ႈၵမ်းႁူဝ်မၼ်းသေ ဢႅၼ်ႇပၢႆႈယူႇ၊ ၸၢႆးၶမ်း ၸင်ႇထၢမ်ဝႃႈ
“ၸၢႆးၶိူဝ်း ... မႂ်းၸဵပ်းတီႈလႂ်”
ၸၢႆးၶိူဝ်းၸင်ႇမိပ်ႇမိုဝ်းမၼ်း ၽၢႆႇၶႂႃႇသေ လၢတ်ႈဝႃႈ
“ၸဵပ်းတီႈမိုဝ်း ၽၢႆႇၶႂႃၼႆၵူၺ်းၼင်ႇၵဝ်ႇ မႂ်းလူး”
“ၺႃးတီႈႁူဝ်မႃႇၼႆႉ ဢိတ်းၼိုင်ႈဢိူဝ်ႈ ဢမ်ႇပေႃးၸဵပ်း ၼင်ႇၵဝ်ႇ”
တႆးၵေႃႉၸၢႆးမွၼ်းၶိူဝ်း ၸင်ႇထၢမ်ဝႃႈ
“သူႁဵတ်းႁိုဝ်လႄႈ မႃးၽိတ်းၵၼ်ၼႆႉ ၸၢႆးၶိူဝ်း”
“ႁႃးပႆမႃးၼႆ ၶဝ်တင်ႈၸႂ်မႃးဢိုတ်းတၢင်းႁႃးဢိူဝ်ႈ”
“ဢေႃႈ ... ဝႃႈၼၼ်ႁႃႉ ဢၢႆႈၸိူဝ်းၼႆႉ တိုၼ်းၶႃႇၵေႇၶႂ်ႈ ၽိတ်းပိူၼ်ႈတႃႇသေႇယဝ်ႉ၊ ႁဝ်းၵေႃႈ ၶႂ်ႈႁႆႇၶဝ်ႁိုင်ၼႃႇယဝ်ႉ”
“ဢၢႆႈသႅင်မိူင်းတႄႉ ႁူဝ်ပွင်ႇၵႂႃႇယဝ်ႉဢမ်ႇၸႂ်ႈႁႃႉ”
“တႄႉႁႃႉ ... တၢႆၵေႃႈလီယဝ်ႉ မၼ်းပဵၼ် ၵူၼ်းဢွၼ်ႁူဝ်ၶဝ်ဢိူဝ်ႈၼၼ်ႉ”
“ဢေႃႈ ... ၸၢႆးၶိူဝ်း ယႃႇပေၵူဝ် ၶဝ်ၸိူဝ်းၼၼ်ႉၼႃႈ ပေႃးၶဝ်ၶတ်းသူထႅင်ႈၼႆ မႃးႁွင်ႉႁဝ်းလႄႈၼႃႈ”
“လီယဝ်ႉ”
ၼႂ်းၶဝ်ၼၼ်ႉ ၵေႃႉၼိုင်ႈၸင်ႇဝႃႈ
“ၸၢႆးၶိူဝ်းတႄႉ ... တေဢမ်ႇၵူဝ်ၶဝ်ႈသႄႈ ၵဝ်လႆႈႁၼ် လၢႆးမၼ်းၶႅၼ်ႇဝႆႉဢိူဝ်ႈမႂ်း ဢၢႆႈၸိူဝ်းၼၼ်ႉတႄႉ တေပဵၼ်ဢၼ် ၵူဝ်ၵႂႃႇတႄႉတႄႉယဝ်ႉ၊ ၸဵမ်မိူဝ်ႈႁဝ်းပႆႇၽႅဝ်ၼၼ်ႉ ၶဝ်ပေႃးဢႅၼ်ႇပၢႆႈယူႇယဝ်ႉ”
“ၸႂ်ႈဢိူဝ်ႈ ... ၶဝ်ဢမ်ႇပႆႇၺႃး ပိူၼ်ႈႁႅမ်ၶဝ်ၸိူင်ႉၼင်ႇၼႆသေပွၵ်ႈ ၶဝ်ၸႂ်ယႂ်ႇၵူၼ်းၼမ်သေ ႁႃၶႃႇၵႄႇတေႃႇပိူၼ်ႈမႃး တၢင်းႁိုင်ယဝ်ႉ၊ ပွၵ်ႈၼႆႉတႄႉ ၵဝ်ထၢင်ႇၶဝ်တေလၢပ်ႇၽိဝ်းယဝ်ႉၵႂႃႈ”
“လၢပ်ႇပေႃးတၢၼ်ႇမႃတွၼ် ဢမ်ႇႁတ်းႁွၼ်သေပွၵ်ႈယဝ်ႉ ၵႂႃႈ”
“ႁႃး ... ႁႃး ... ႁႃး ... ႁႃး ...”
“ဢေႃႈ ၸၢႆးၶိူဝ်း ၶိူဝ်ဢၢင်ႈၵႂႃႇတၢင်းလႂ်”
“ႁႃးဢၢင်ႈၵႂႃႇဢႅဝ်ႇၼိူဝ်လွႆၼႆႉၼႆဢိူဝ်ႈ”
“ဝႃႈၼၼ်ႁႃႉ ... ယႃႇပေၵႂႃႇယဝ်ႉ”
“ၵွပ်ႈသင်လႃႇ”
“ဢေႃ ... ႁဝ်းတေၵႂႃႇလဵင်ႉၶိူဝ်သွင်ၵေႃႉ ၼမ်ႉၼဵင်ႈဝၢၼ် ၼႆဢိူဝ်ႈ”
“ၵွပ်ႈပိူဝ်ႈသင်လႄႈ လဵင်ႉလႃႇ”
“ဢေႃႈ ... ၵွပ်ႈပိူဝ်ႈလႆႈၸႂ် ဢၼ်ၶိူဝ်သင်ႇသွၼ်ၸၢႆးသႅင်မိူင်းၶဝ်ၼၼ်ႉယဝ်ႉ”
ၸၢႆးၶမ်း ၸင်ႇယုမ်ႉသေဝႃႈ
“ပေႃးမီး ၵူၼ်းတေလဵင်ႉတႄႉ ဢၢႆႈႁႃးၼႆႉ တၼ်းၵိၼ်တႃႇ သေႇယဝ်ႉ ... ၵႂႃႇပေႃးၼႆ”
“ၵူၼ်းတေလဵင်ႉ ပဵၼ်ၽႂ်”
“ပဵၼ်မႄႈ ပုမ်လူင်ဢၼ်တိုၵ်ႉၶိုၼ်ႈႁူင်းၵိူတ်ႇလုၵ်ႈၼၼ်ႉၼႃႇ ၸၢႆးၶမ်းတၼ်းၵိၼ်တႃႇသေႇၼႆဢိူဝ်ႈ ႁႃး ႁႃး ႁႃး”
“မႄႈသူလႃႇ ... ထုၺ်ႉ”
ၶဝ်ဢွၼ်ၵၼ်ယုမ်ႉၶူဝ်သေ ... ၵႂႃႇၵိၼ်ၼမ်ႉၼဵင်ႈဝၢၼ် ၼႂ်းသႅင်ႇယဝ်ႉ။