မွၵ်ႇလူင်ႇလဵဝ်/တွၼ်ႈသိပ်းႁူၵ်း
ၸၢႆးၶမ်း လႄႈ ၸၢႆးမွၼ်းၶိူဝ်း ၸူဝ်းၵၼ်ၶီႇၵႃးမၢႆၼိုင်ႈ ၵႂႃႇၶိုၼ်ႈႁဵၼ်းယဝ်ႉ မိုဝ်းၸၢႆးၶိူဝ်းတိုၵ်ႉၶတ်းဝႆႉယူႇလႄႈ မၼ်းဢဝ် တေႇၸေႃးပၢၼ်းတႃးသေ ဢဝ်ၽႅၼ်ႇပၢတ်ႉတီး ပူၵ်ႉဝႆႉယဝ်ႉ၊ တီႈၼိူဝ်ၵႃးၼၼ်ႉ တႆးၵေႃႉမၼ်းၵေႃႈဢွၼ်ၵၼ်ထၢမ် ၵွပ်ႈသင်လႄႈ မိုဝ်းၸဵပ်းၼႆယဝ်ႉ၊ ၶႃသွင်ၵေႃႉၵေႃႈ တွပ်ႇလၢတ်ႈ လွင်ႈၶဝ်ၽိတ်းၵၼ်တင်း ၸၢႆးသႅင်မိူင်းၶဝ်ၼၼ်ႉယဝ်ႉ၊ တႆးၵေႃႉမၼ်းလႄႈ ၵူၼ်းၼိူဝ်ၵႃးၸိူဝ်းၼၼ်ႉ လႆႈငိၼ်းၼင်ႇၼၼ် ၶဝ်ဢွၼ်ၵၼ်ဝႃႈ
“ဢၢႆႈၸိူဝ်းၼႆႉ ၶႃႇၵႄႇၼႃႇလူင်”
“ၵျႃႉဢိူဝ်ႈ ... ၶဝ်ၸိူဝ်းၼႆႉ မႅၼ်းႁႅၼ်ႇၼႃႇလူင်” ၼႆၵူႈၵေႃႉယဝ်ႉ
ပေႃးဝႃႈႁွတ်ႈၽႅဝ် တီႈႁူင်းႁဵၼ်းၼႆ ၶႃသွင်ၵေႃႉ မႃးၼင်ႈပႂ်ႉ တီႈတင်ႇ တႂ်ႈတူၼ်ႈမႆႉ ဢၼ်ၶဝ်ၵႆႉၵႆႉ ၼင်ႈလဵၼ်ႈၼၼ်ႉယဝ်ႉ။ ယူႇၵႅပ်ႉၼိုင်ႈ ၼၢင်းမူဝ်ၶၢဝ် လႄႈ ၼၢင်းၸၢမ်သႅင်းၵေႃႈ ၽႅဝ်မႃးသေ ၼၢင်းမူဝ်ၶၢဝ် ၸင်ႇထၢမ်ဝႃႈ
“ပီႈၸၢႆးၶိူဝ်းၶဝ် ၽႅဝ်မႃးႁိုင်ယဝ်ႉႁႃႉ”
“ၸင်ႇႁႃၽႅဝ်မႃးၵူၺ်းၼင်ႇၵဝ်ႇ မႃးၼင်ႈလႄႈ မူဝ်ၶၢဝ်”
ၼၢင်းမူဝ်ၶၢဝ် မႃးၼင်ႈႁိမ်းၽၢႆႇၶႂႃ ၸၢႆးမွၼ်းၶိူဝ်းသေ မၼ်းၼၢင်းလႆႈႁၼ် မိုဝ်းၸၢႆးမွၼ်းၶိူဝ်း ပူၵ်ႉၽႅၼ်ႇၽိူၵ်ႇဝႆႉလႄႈ မၼ်းၼၢင်းၸင်ႇထၢမ်
“မိုဝ်း ... ပီႈၸၢႆးၶိူဝ်း ပဵၼ်သင်ၼႆႉ”
ၸၢႆးမွၼ်းၶိူဝ်း ပႆႇတၼ်းတွပ်ႇ ၸၢႆးၶမ်းၸင်ႇဝႃႈ
“ႁဝ်းၽိတ်းၵၼ်မိူဝ်ႈဝႃးသေ ၸၢႆးသႅင်မိူင်း ဢဝ်ၼၢၼ်ႇၶျႅၵ်ႉၵူႇ ႁႅမ်ၺႃးဢိူဝ်ႈ”
“သမ်ႉၽိတ်းၵၼ်ႁဵတ်းသင်လႃႇ ပီႈၸၢႆးၶမ်း”
“ၶဝ်မႃးႁႄႉတၢင်းႁႃးသေ မႃးႁႃၽိတ်းႁႃးၸၢႆးၶိူဝ်း ဢွၼ်တၢင်းလႄႈ ႁဝ်းၸူးလႆႈၽိတ်းၵၼ် မင်ၵၼ်ယဝ်ႉ”
“တႄႉႁႃႉ ... ပီႈၸၢႆးၶိူဝ်း”
“ၸႂ်ႈဢိူဝ်ႈ”
“ၶဝ်လၢႆၵေႃႉလႃႇ မႃးၽိတ်ႈပီႈၸၢႆးၶိူဝ်း”
“ၶဝ်ႁူၵ်းၵေႃႉဢိူဝ်ႈ”
“ပီႈၸၢႆးၶိူဝ်းလႄႈ ပီႈၸၢႆးၶမ်း ၸဵပ်းၼမ်ဝႆႉႁႃႉ”
“ပီႈၸၢႆးၶိူဝ်းတႄႉ ၸဵပ်းတီႈမိုဝ်းၼႆႉၵူၺ်း ... ၸၢႆးၶမ်းတႄႉ တေႃႉတႄႉ ၸဵပ်းတီႈႁူဝ်မႃႇမၼ်းၼႆဢိူဝ်ႈ”
“ပီႈၸၢႆးၶိူဝ်း ၶိုၼ်းမင်ၶဝ်ယူႇႁႃႉ”
ၸၢႆးၶမ်း ၸင်ႇဝႃႈ
“ပေႃးႁႃးဢမ်ႇမင်ၶဝ်ၼႆ ၶဝ်သမ်ႉတေမင်ႁႃးလႄႇ ၵွပ်ႈၼႆ ႁႃးၵေႃႈၶႄတူဝ်ႁႃးသေ ၶိုၼ်းမင်ၶဝ်ယဝ်ႉ။ ယွၼ်ႉပိူဝ်ႈ မူဝ်ၶၢဝ်ဝႃႈ ႁႅမ်လုၵ်ႈပိူၼ်ႈႁႂ်ႈႁႅမ်ၸဵပ်းၸဵပ်းၼႆလႄႈ ႁႃးသွင်ၵေႃႉၵေႃႈ မင်ပၼ်ၶဝ် ၸဵပ်းၸဵပ်းယဝ်ႉ”
“ၶဝ်ၸိူဝ်းၼၼ်ႉလူး ၸဵပ်းၼမ်ယူႇႁႃႉ”
“ၵႂႃႇထၢမ်တူၺ်း တူဝ်ၶဝ်ဢဝ်လႃႈ မူဝ်ၶၢဝ်”
ၼၢင်းၸၢမ်သႅင်း ၸင်ႇဝႃႈ
“မူဝ် ... မိူဝ်ႈၸဝ်ႉၼၼ်ႉ လွင်ႈၼႆႉ ၸၢမ်သႅင်းၵေႃႈ ဢၢင်ႈလၢတ်ႈၼႄမူဝ်ၼင်ႇၵဝ်ႇယဝ်ႉ၊ ၵူၺ်းၵႃႈ ၸၢမ်သႅင်း လိုမ်းၵႂႃႇဢိူဝ်ႈ၊ ၶၢဝ်ႇငၢဝ်းဢၼ်ၼႆႉတႄႉ ၸၢမ်သႅင်း လႆႈငိၼ်းၸဵမ်မိူဝ်ႈဝႃးယဝ်ႉ”
“ၸၢမ်သႅင်းငိၼ်းဝႃႈႁိုဝ်လႃႇ”
“တႆးၵေႃႉမူဝ် မိူဝ်ႈလဵၵ်ႉၸၢႆးသႅင်မိူင်းတႄႉ ႁူဝ်ၼႃႈၽၢၵ်ႇမၼ်း တႅၵ်ႇဢွၵ်ႇလိူတ်ႈၵႂႃႇၼႆယဝ်ႉ၊ ၼႂ်းၶဝ်ၸိူဝ်းၼၼ်ႉ မၢင်ၵေႃႉၵေႃႈ ၼႃႈလွၵ်ႈ မၢင်ၵေႃႉၼႃႈမၢၼ်ႉ မၢင်ၵေႃႉႁူဝ်သူတ်ႇသေ ၸဵပ်းၵႂႃႇ ၼမ်တႄႉတႄႉၼႆယဝ်ႉ”
လႆႈငိၼ်းၼင်ႇၼၼ် ၼၢင်းမူဝ်ၶၢဝ် ပဵၼ်ဢၼ်ၸႂ်ဢမ်ႇလီၵႂႃႇသေ မၼ်းၼၢင်း ထူၺ်ႈၸႂ်လူင်ၵမ်းၼိုင်ႈယဝ်ႉ၊ ၸၢႆးမွၼ်းၶိူဝ်း ၵေႃႈ ၸင်ႇလွမ်တူၺ်းၼႃႈၼၢင်းမူဝ်ၶၢဝ်သေ လၢတ်ႈဝႃႈ
“မူဝ်ၶၢဝ် ... ယွၼ်ႉပိူဝ်ႈ ပီႈၸၢႆးၶိူဝ်းၶဝ်လႆႈၽိတ်းမႅၼ်ႈၺႃး တႆးၵေႃႉမူဝ်ၶၢဝ် မိူဝ်ႈလဵၵ်ႉၼၼ်ႉၼႆလႄႈ ပီႈၸၢႆးၶိူဝ်းၶဝ်ၵေႃႈ ပဵၼ်ၸႂ်ဢမ်ႇလီလႆႈၼင်ႇၵဝ်ႇ ယူဝ်ၶႄး မူဝ်ၶၢဝ် ၶႂ်ႈၸႂ်လမ်တေႃႇ ပီႈၸၢႆးၶိူဝ်းၶဝ်ယဝ်ႉယူဝ်ႉ”
ၼၢင်းမူဝ်ၶၢဝ် ႁႅၼ်းတူၺ်းၼႃႈ ၸၢႆးမွၼ်းၶိူဝ်းၵႅပ်ႉၼိုင်ႈသေ
“မူဝ် ... ၸႂ်လမ်ဢမ်ႇၸႂ်ႈၵူၺ်း ပီႈၸၢႆးၶိူဝ်း ... ၵူၺ်ႈၵႃႈ လွင်းၽိတ်းၵၼ်မင်ၵၼ်ၼၼ်ႉတႄႉ မူဝ်တိုၼ်းဢမ်ႇၶႂ်ႈငိၼ်းယဝ်ႉ”
“မိူဝ်ႈဝႃႈၼၼ်ႉ ပီႈၸၢႆးၶိူဝ်းၶဝ်ၵေႃႈ ယင်းဝႄႈၶဝ်ၵွၼ်ႇ ယဝ်ႉ ၵူၺ်းၵႃႈ ၶဝ်တဵၵ်းၸွမ်းဢိုတ်းတၢင်းသေ ပၢၼ်းၽိတ်းႁဝ်းလႄႈ ၸင်ႇလႆႈၽိတ်းၵၼ်ယဝ်ႉ လိူဝ်သေၼၼ်ႉ ၶဝ်သမ်ႉ ဢဝ်ၶိူင်ႈယိပ်းသေ မႃးမင်ႁႃးလႄႈ ႁႃးသွင်ၵေႃႉၵေႃႈ ၸင်ႇလႆႈၶိုၼ်းတွပ်ႇၶဝ် ၵျၢမ်းၵျၢမ်းယဝ်ႉ”
ၸၢႆးၶမ်းၵေႃႈ ၸင်ႇလၢတ်ႈဝႃႈ
“တႄႉဢိူဝ်ႈ မူဝ်ၶၢဝ် ဢၼ်ႁူဝ်ၼႃႈၽၢၵ်ႇ ၸၢႆးသႅင်မိူင်း တႅၵ်ႇၵႂႃႇၼၼ်ႉၼႆၵေႃႈ ပဵၼ်ၶဝ်ၼင်ႇၵၼ် ၶိုၼ်းႁႅမ်ၺႃးၵၼ်ၵူၺ်းဢိူဝ်ႈၼၼ်ႉ၊ ပေႃးၸၢႆးၶိူဝ်းဢမ်ႇလႅတ်းၼႆတႄႉ ႁူဝ်ၸၢႆးၶိူဝ်းၵူၺ်းဢိူဝ်ႈ လူဝ်ႇတႅၵ်ႇ”
“ပီႈၸၢႆးၶိူဝ်း သမ်ႉႁဵတ်းၸိူင်ႉႁိုဝ်”
ၸၢႆးမွၼ်းၶိူဝ်း ၸင်ႇတွပ်ႇဝႃႈ
“ဢေႃႈ ... တႆးၵေႃႉၸၢႆးသႅင်မိူင်း ယူႇၽၢႆႇလင်ပီႈၸၢႆးၶိူဝ်းသေ ၶဝ်ၶွၼ်ႉမင်ႁူဝ် ပီႈၸၢႆးၶိူဝ်းယဝ်ႉ၊ ၽွင်းၼၼ်ႉ ၸၢႆးၶမ်း ၼႅတ်ႈပၼ်သတီႉ တီႈၸၢႆးၶိူဝ်းလႄႈ ၸၢႆးၶိူဝ်းၼႅတ်ႈငိူင်ႉဝႄႈ ၽႂ်းၽႂ်းလႄႈ ၶွၼ်ႉၼၼ်ႉ ၸင်ႇၵႂႃႇမင်ၺႃးႁူဝ်ၼႃႈၽၢၵ်ႇ ၸၢႆးသႅင်မိူင်းယဝ်ႉ”
“ဝၢႆးၼၼ်ႉ သမ်ႉႁဵတ်းၸိူင်ႉႁိုဝ်ယဝ်ႉၵႂႃႇလႃႇ”
“တႆးၵေႃႉ ပီႈၸၢႆးၶိူဝ်းၶဝ် ၵမ်ႈၽွင်ႈၽႅဝ်မႃးလႄႈ ၶဝ်ၸိူဝ်းၼၼ်ႉ ဢွၼ်ၵၼ်ဢႅၼ်ႇပၢႆႈၵႂႃႇဢိူဝ်ႈ”
“တႆးၵေႃႉၸၢမ်သႅင်းၶဝ်ႁၼ်သေ ၶိုၼ်းမႃးလၢတ်ႈၼႄ ၸၢမ်သႅင်းယဝ်ႉ ၶဝ်ဝႃႈတႄႉ ပီႈၸၢႆးၶိူဝ်းလႄႈ ပီႈၸၢႆးၶမ်းၶႅၼ်ႇလၢႆးၵျႃႉၼႆယဝ်ႉ”
ၸၢႆးၶမ်း ၸင်ႇယုမ်ႉသေ
“ၶဝ်လႅၼ်ယူဝ်ႉ”
“ဢမ်ႇလႅၼ်သႄႈ ၶဝ်ယင်းဝႃႈ ပေႃးပီႈၸၢႆးၶိူဝ်းလႄႈ ပီႈ ၸၢႆးၶမ်း ဢမ်ႇမေႃလၢႆး ဢမ်ႇၵတ်ႉၶႅၼ်ႇၼႆတႄႉ တီႈဢေႇသုတ်းမၼ်း လူဝ်ႇလႆႈၶိုၼ်ႈႁူင်းယႃ ဢမ်ႇႁၢင်ႉၼႆယဝ်ႉ၊ ပီႈၸၢႆးၶမ်းၶဝ် လႆႈသွၼ်မႃးတီႈလႂ်”
ၸၢႆးၶမ်း ၸင်ႇတွပ်ႇဝႃႈ
“ပီႈၸၢႆးၶမ်းတႄႉ ဢမ်ႇလႆႈသွၼ်ၵူၺ်း ... ၵမ်းၵမ်း ၵႂႃႇတူၺ်း ငဝ်းလၢႆးၶႄႇသေ ယိူင်ႈဢဝ်ၼႂ်းၼၼ်ႉဢိူဝ်ႈ ... ႁေး ႁေး”
ၼၢင်းမူဝ်ၶၢဝ်ၸင်ႇဝႃႈ
“ပိူၼ်ႈၶိုၼ်ႈႁဵၼ်းယဝ်ႉယူဝ်ႉ ... ၵႂႃႇႁဝ်းၵႂႃႇ”
ၶဝ်ဢွၼ်ၵၼ် ၵႂႃႇၶိုၼ်ႈႁဵၼ်းႁူမ်ႈၵၼ်ယဝ်ႉ ၸၢႆးမွၼ်းၶိူဝ်းတႄႉ မိုဝ်းမၼ်းၸဵပ်းဝႆႉလႄႈ မၼ်းပႆႇၸၢင်ႈတႅမ်ႈလိၵ်ႈ ၵွပ်ႈၼႆ ၽွင်းမိူဝ်ႈလူင်းႁူင်းႁဵၼ်းၼၼ်ႉ ၶဝ်သၢမ်ၵေႃႉ ယွၼ်းဢဝ်ပပ်ႉလိၵ်ႈမၼ်းသေ မိူဝ်ႈထုတ်ႇတႅမ်ႈပၼ်ယဝ်ႉ။
ထိုင်မႃးၵၢင်ၶမ်ႈ ၼၢင်းမူဝ်ၶၢဝ် မႃးထုတ်ႇတႅမ်ႈလိၵ်ႈပၼ် ၼႂ်းပပ်ႉၸၢႆးၶိူဝ်း ဢၼ်မၼ်းဢဝ်မႃးၼၼ်ႉယူႇ၊ ပေႃးဝႃႈ မၼ်းၼၢင်း တႅမ်ႈယဝ်ႉယဝ်ႈၼႆ မၼ်းၼၢင်း ၽိုၼ်ႉတူၺ်းပပ်ႉလိၵ်ႈၸၢႆးမွၼ်း ၶိူဝ်းယူႇ။
ၵမ်းလိုၼ်း တီႈၽၢႆႇလင်ပပ်ႉလိၵ်ႈၸၢႆးၶိူဝ်းၼၼ်ႉ လႆႈႁၼ် ၸၢႆးၶိူဝ်ႈတႅမ်ႈဝွၵ်းဢွၼ်ႇဝႆႉ ၼင်ႇၼႆယဝ်ႉ၊ ႁူဝ်ၶေႃႈမၼ်းတႄႉတႅမ်ႈ ဝႆႉ “ယူဝ်ၸၢႆးတူၵ်းလိုၼ်း” ၼႆယူႇ ...
✽ ယူဝ်ၸၢႆးတူၵ်းလိုၼ်ႈ ✽
တူၼ်ႈမႆႉယႂ်ႇမီးၽီ
ၵူၼ်းႁၢင်ႈလီမီးၸူႉ
ထုင်းၵႂၢမ်းႁူႉၼင်ႇၼႆ
ၼွင်ႉမိူင်းၵႆယၢၼ်ႁဝ်း
ယူဝ်သဝ်းမီးၸူႉဝႆႉ
ယူဝ်ၸၢႆးၼႆႉတူၵ်းလိုၼ်း
ဝၼ်းသိုၼ်းမိူဝ်ႈပၢၼ်ၵွၼ်ႇ
ယူဝ်ဢမ်ႇႁွၼ်ႇယွၼ်းသူး
တမ်ႈတီႈၵွင်းမူးၽြႃး
ႁူမ်ႈၵၼ်မႃးႁိုဝ်ၼေႃ ... ?
ၸၢႆးမွၼ်းၶိူဝ်း - လွႆလႅမ်
ၼၢင်းမူဝ်ၶၢဝ် ၶိုၼ်းမႄးလူတူၺ်းလီလီ ထႅင်ႈပွၵ်ႈၼိုင်ႈယဝ်ႉသေ မၼ်းလူယဝ်ႉ မၼ်းၼၢင်းၸင်ႇဝူၼ်ႉ ၼႂ်းၸႂ်မၼ်းၼင်ႇၼႆ
“ဢူဝ် ... ပီႈၸၢႆးၶိူဝ်း ... ဝွၵ်းဢွၼ်ႇပုၵ်ႈၼႆႉ ပီႈၸၢႆးၶိူဝ်း ယိူင်းဢၢၼ်းၵေႃႉလႂ်သေတႅမ်ႈၼေႃး ... ယူဝ်ၶႄး ပီႈၸၢႆးၶိူဝ်းၶႂ်ႈဝႃႈ တီႈမူဝ်ယူဝ်ႉၼေႃ ... မူဝ်တႄႉ ဢမ်ႇၸႂ်ႈၵူၼ်းမီးၸူႉၵူၺ်း ... ဢူဝ် ပီႈၸၢႆးၶိူဝ်း ဝႃႈတီႈမူဝ်တႄႉ ဢမ်ႇၸႂ်ႈယူဝ်ႉ မၼ်းပဵၼ်ၵူၼ်းမေႃတႅမ်ႈဝွၵ်းၵေႃႉၼိုင်ႈလႄႈ မၼ်းလႃႈလီတႅမ်ႈဝႆႉၵႂႃႈ”
ယွၼ်ႉပိူဝ်ႈ ဝွၵ်းဢွၼ်ပုၵ်ႈၼႆႉလႄႈ ၶမ်ႈၼၼ်ႉ ၼၢင်းမူဝ် ၶၢဝ်ၵုမ်ႇၵႂႃႇဝူၼ်ႉလွင်ႈဝွၵ်းလႄႈ လွင်ႈၸၢႆးမွၼ်းၶိူဝ်းယူႇ၊ ၵူၺ်းၵႃႈ ၽွင်းမိူဝ်ႈၶိုၼ်းပၼ်ပပ်ႉ ၸၢႆးၶိူဝ်းၼၼ်ႉတႄႉ မၼ်းၼၢင်းႁဵတ်းၵဵင်ႈ ဢမ်ႇႁူႉႁၼ် လွင်ႈဝွၵ်းၼၼ်ႉယူႉ။