မွၵ်ႇလူင်ႇလဵဝ်/တွၼ်ႈသိပ်းၸဵတ်း
ဝၼ်းၼိုင်ႈယဝ်ႉဝၼ်းၼိုင်ႈ လိူၼ်ၼိုင်ႈယဝ်ႉလိူၼ်ၼိုင်ႈ ၶဝ်သိုပ်ႇၶတ်းၸႂ်သေ ၶိုၼ်ႈႁဵၼ်းသွၼ်လိၵ်ႈယူႇ။
ထိုင်မႃးဝၼ်းၼိုင်ႈ ... ၶၢဝ်းယၢမ်းလူင်းႁူင်းႁဵၼ်းၼၼ်ႉ ၼၢင်းမူဝ်ၶၢဝ်ၶဝ် မႃးပႂ်ႉၵႃးယူႇ ၵူႈဝၼ်းဝၼ်း ၸိူဝ်းဢၼ်ပူၼ်ႉမႃးၼၼ်ႉတႄႉ ၵႃးႁိူၼ်းၼၢင်းမူဝ်ၶၢဝ်ၶဝ် ပေႃးမႃးပႂ်ႉဝႆႉ ၸဵမ်မိူဝ်ႈပႆႇလူင်းႁူင်း ႁဵၼ်းၼၼ်ႉယဝ်ႉ၊ ၸၢႆးမွၼ်းၶိူဝ်းၸင်ႇထၢမ်ဝႃႈ
“မူဝ်ၶၢဝ် ... ၵႃးမူဝ်ၶၢဝ်ၶဝ် ယင်းဢမ်ႇပႆႇမႃးလႃႇမိူဝ်ႈၼႆႉ”
“ႁဵတ်းသင်ၵေႃႈဢမ်ႇႁူႉယဝ်ႉ ၵူႈဝၼ်းတႄႉ ၶၢဝ်းၼႆႉပေႃးၽႅဝ်ယဝ်ႉ ယူဝ်ၶႄး ၵႃးတီႈႁိူၼ်းလႅဝ်ႁိုဝ်ၵေႃႈဢမ်ႇႁူႉ ... မူဝ်ၶဝ်တေ ပႂ်ႉတူၺ်းၵွၼ်ႇဢိူဝ်ႈ”
“ပေႃးၼႆ ပီႈၸၢႆးၶိူဝ်းၶဝ် တေမိူဝ်းထႃႈဢွၼ်တၢင်းၵွၼ်ႇၼႃႈ”
“ဢိူဝ်ႈ ... ဢိူဝ်ႈ ... မွၼ်း ... မွၼ်း”
ယွၼ်ႉပိူဝ်ႈ ၶႃလူဝ်ႇၵႂႃႇဝႄႉ တႆးၵေႃႉၶႃတီႈၼိုင်ႈလႄႈ ၶႃပႆ မႃးမိူဝ်းဢဝ်ယဝ်ႉ။ ၽွင်းၶႃၽႅဝ်တၢင်းလူင်ၼၼ်ႉ ၶႃမၼ်းႁူပ်ႉၵႃး ၸၢႆးသႅင်မိူင်းသေ ၵႃးၸၢႆးသႅင်မိူင်း ႁေႃႈပူၼ်ႉၶႃမႃး တီႈဝၢင်းႁူင်းႁဵၼ်းယဝ်ႉ ပေႃးဝႃႈ မၼ်းၽႅဝ်မႃးတီႈ ၼၢင်းမူဝ်ၶၢဝ်ၼႆ မၼ်းၸင်ႇဝႃႈ
“မူဝ် ... ၵႃးမူဝ်ၶဝ် တိုၵ်ႉၵႂႃႇသူင်ႇၶႅၵ်ႇလႄႈ မႄႈမူဝ်ၶဝ် သိုပ်ႇၽူင်းသေ ၸႂ်ႉႁႂ်ႈမႃးႁပ်ႉ မူဝ်ၶဝ်ၼႆယဝ်ႉ လၢတ်ႈၼႄတႆးၵေႃႉ မူဝ်ၸိူဝ်းၼၼ်ႉလႄႈ”
ၼၢင်းမူဝ်ၶၢဝ်ၵေႃႈ လၢတ်ႈၼႄတႆးၵေႃႉမၼ်းၸိူဝ်းၼၼ်ႉသေ ၶဝ်ဢွၼ်ၵၼ်မႃးၶိုၼ်ႈၶီႇၵႃး ၸၢႆးသႅင်မိူင်းယဝ်ႉ၊ ၸိူဝ်းၶဝ် ပဵၼ်ၼၢင်းယိင်းသၢဝ်ၵူၺ်းၵူၺ်း သမ်ႉပေႃးတဵမ်ၵႃးႁၢႆးလႅၵ်ႉလမ်းၼိုင်ႈ တႆးၵေႃႉၼၢင်းမူဝ်ၶၢဝ်ၶဝ်ၸိူဝ်းၼႆႉ ၶဝ်ပၼ်ငိုၼ်းႁူဝ်လိူၼ်ဝႆႉ တီႈၵႃးၼၢင်းမူဝ်ၶၢဝ်သေ ၸႂ်ႉသူင်ႇၸႂ်ႉႁပ်ႉၶဝ် ၵူႈဝၼ်းယဝ်ႉ၊ ၵွပ်ႈၼႆ ၶဝ်ၸင်ႇဢွၼ်ၵၼ်ၶိုၼ်ႈၵႃး ၸၢႆးသႅင်မိူင်းယဝ်ႉ ၸၢႆးသႅင်မိူင်းၵေႃႈ ႁေႃႈၵႃးဢွၵ်ႇမႃးယဝ်ႉ၊ ၸွမ်းတၢင်း ၽွင်းမိူဝ်ႈပူၼ်ႉ ၸၢႆးမွၼ်းၶိူဝ်းၶႃ ၸၢႆးၶမ်းၼၼ်ႉ ၸုမ်းၶဝ် ဢၼ်ၼင်ႈၽၢႆႇလင်ၵႃးၼႆႉ ဢွၼ်ၵၼ် ၵၵ်းၵႆမိုဝ်း “မွၼ်းမွၼ်း” ၼႄသေ ယွၵ်ႇဝႃႈ
“မွၼ်းမွၼ်းယဝ်ႉ ... ၸၢႆးတူၵ်းလိုၼ်းၶဝ်”
ၼႆသေ ပူၼ်ႉမိူဝ်းၵႂႃႇယဝ်ႉ။
ၵႃးၸၢႆးသႅင်မိူင်း ဢၼ်တၢင်ႇၼၢင်းမူဝ်ၶၢဝ်ၶဝ်ၼၼ်ႉ ၼမ်ႉမၼ်းမၼ်းပိၵ်ႉလႄႈ ၸၢႆးသႅင်မိူင်း ၵိုတ်းၵႃး တီႈႁိမ်းၽင်ႇတၢင်းသေ မႃးၽုၺ်ႇတူၺ်း တၢင်းၽိတ်းၵႃးမၼ်းယူႇ၊ မၼ်းၵူၺ်း မေႃႁေႃႈၵႃးၵူၺ်း မၼ်းဢမ်ႇမေႃမႄးလႄႈ တီႈလႂ်လႅဝ်တီႈလႂ်လူႉၵေႃႈ မၼ်းဢမ်ႇႁူႉ မၼ်းလွမ်တူၺ်း ၵႃးတၢင်ႇၸိူဝ်းသေ ဢၢင်ႈယွၼ်းတၢင်းၸွႆႈထႅမ်ၼႆၵေႃႈ မၼ်းဢမ်ႇၺႃး ၵေႃႉဢၼ်မၼ်းႁူႉၸၵ်း ၼၢင်းမူဝ်ၶၢဝ်ၸင်ႇထၢမ်ဝႃႈ
“ၵႃး ပဵၼ်သင်ၵႂႃႇ ၸၢႆးသႅင်မိူင်း”
ၵၢင်ၸႂ်ၸၢႆးသႅင်မိူင်းတႄႉ မၼ်းဢမ်ႇႁူႉတၢင်းၽိတ်းၵႃးၼႆၵေႃႈ မၼ်းဢမ်ႇၶႂ်ႈလၢတ်ႈ မၼ်းၸင်ႇဝႃႈ
“ၸၢၵ်ႈမၼ်းပိူင်ႈၵႂႃႇဢိူဝ်ႈ”
“တေႁိုင်ယူဝ်ႉ ... ၸၢႆးသႅင်မိူင်း ပေႃးလႅပ်ႈတေႁိုင်ၼႆ မူဝ်ၶဝ် တေၶီႇၵႃးတၢင်ႇလမ်း မိူဝ်းဢဝ်ဢိူဝ်ႈ”
“ပႂ်ႉတူၺ်းၵမ်းၼိုင်ႈလႄႈ ... မႄးတူၺ်းၵွၼ်ႇၵႂႃႈ”
ၸၢႆးသႅင်မိူင်းၵေႃႈ လႃႈလီၽုၺ်ႇတူၺ်း ၶိူင်ႈၵႃးၸိူဝ်းၼၼ်ႉ တီႈၼိုင်ႈယဝ်ႉတီႈၼိုင်ႈသေ ႁဵတ်းၵဵင်ႈမႄးယူႇ၊ မၼ်းမႄး တူၺ်းဢမ်ႇလႆႈလႄႈ မၼ်းလီဢၢႆသေ ႁိူဝ်ႇမၼ်းၵေႃႈ ၸိုမ်ႉဢွၵ်ႇ ၸွမ်းၼႃႈၽၢၵ်ႇမၼ်းမႃးယဝ်။ သၢဝ်ၸိူဝ်းၼိူဝ်ၵႃးၼၼ်ႉၵေႃႈ ဢွၼ်ၵၼ်ဝႃႈ မဵဝ်းၼိုင်ႈယဝ်ႉမဵဝ်းၼိုင်ႈသေ ဝႃႈၶိတ်ႉၸၢႆးသႅင်မိူင်းယူႇ။
“ၸဝ်ႈၵႃးမႂ်ႇၵေႃႉၼႆႉတႄႉ မၼ်းဢမ်ႇမေႃမႄးၵႃးယူဝ်ႉ”
“ၸႂ်ႈယူႇယူဝ်ႉ လူဝ်ႇႁႃထႅင်ႈၸဝ်ႈၵႃးမႂ်ႇတၢင်ႇၵေႃႉယဝ်ႉ ပေႃးပဵၼ်ၼႆတႄႉ ... ဢမ်ႇသႆႉ”
“ႁႃး ... ႁႃး ... ႁႃး ... ၶိၵ်း ... ၶိၵ်း ... ၶိၵ်း”
ၶဝ်ဢွၼ်ၵၼ်ဝႃႈၼၼ်သေ ႁူၼ်ႉၶူဝ်ယူႇ၊ ၸၢႆးသႅင်မိူင်း လႆႈငိၼ်းၼင်ႇၼၼ်သေ မၼ်းပဵၼ်ဢၼ်ယူႇယၢပ်ႇတႄႉတႄႉ ၶဝ်ၸိူဝ်းၼၼ်ႉၵေႃႈ ယူႇၽၢႆႇလင်ၵႃးသေ
“ပေႃးပဵၼ်ၼႆတႄႉ လူဝ်ႇလႆႈယွမ်း ၵႃႈႁူဝ်လိူၼ်မၼ်းယဝ်ႉ”
“ဢမ်ႇလူဝ်ႇပၼ်ၵွၼ်ယူဝ်ႉ”
“ႁေး ... သူၸိူဝ်းၼႆႉ လၢတ်ႈလွႆးလွႆးလေႃႇ ယူဝ်ၸဝ်ႈၵႃးမႂ်ႇ ငိၼ်းၵႂႃႇဢိူဝ်ႈ”
“မၼ်းဢမ်ႇငိၼ်းသႄႈ ႁူမၼ်းၼူၵ်ႇဝႆႉဢိတ်းဢိတ်းဢိူဝ်ႈ”
“ၶိၵ်း ၶိၵ်း ႁႃးႁႃးႁႃး ႁီႉႁီႉ”
ၸၢႆးမွၼ်းၶိူဝ်းလႄႈ ၸၢႆးၶမ်းၵေႃႈ ၽႅဝ်မႃးႁိမ်းၶဝ်သေ ၸၢႆးမွၼ်းၶိူဝ်းၸင်ႇဝႃႈ
“ၸၢႆးၶမ်း ... ၼၼ်ႉပဵၼ် ၵႃးၸၢႆးသႅင်မိူင်း ဢၼ်မႃးႁပ်ႉ မူဝ်ၶၢဝ်ၶဝ်ၼၼ်ႉ ဢမ်ႇၸႂ်ႈႁႃႉ”
“ၸႂ်ႈဢိူဝ်ႈ ... ၵႃးၶဝ်လႅဝ်ယူဝ်ႉ”
“ၵႂႃႇႁႃးၵႂႃႇတူၺ်း”
“မႂ်းတေၵႂႃႇမႄးပၼ်ႁႃႉ ... ၸၢႆးၶိူဝ်း”
“မႄးၵေႃႈဢမ်ႇဝႃႈ ဢမ်ႇမႄးၵေႃႈဢမ်ႇဝႃႈ လႃႈလီလဵပ်ႈၵႂႃႇတူၺ်းၵႂႃႈ”
ၶႃသွင်ၵေႃႉၵေႃႈ ပႆမႃးတီႈၼၼ်ႉယဝ်ႉ ၸၢႆးမွၼ်းၶိူဝ်း ၸင်ႇၵႂႃႇဝႃႈတီႈ သၢဝ်ၽၢႆႇလင်ၵႃးၸိူဝ်းၼၼ်ႉ
“ယူဝ်ဝႃႈ သူပေႃးၽႅဝ်ႁိူၼ်းယဝ်ႉၼႆၼႃး”
“ပႆႇၽႅဝ် ပႆႇၽႅဝ် ၵႃးႁဝ်းမႃးပဵၼ်တုၵ်ႉၶီႉတႃႉယူႇဢိူဝ်ႈ ၶိၵ်း ၶိၵ်း”
ၼၢင်းမူဝ်ၶၢဝ် လႆႈငိၼ်းသဵင်ၸၢႆးမွၼ်းၶိူဝ်း လႄႈ မၼ်း ၼၢင်းၸင်ႇမႃးၽၢႆႇလင်ၵႃးသေ
“ဢေႃႈ ... ပီႈၸၢႆးၶိူဝ်း ယူဝ်ဝႃႈ ပီႈၸၢႆးၶိူဝ်း ပေႃးပူၼ်ႉမိူဝ်းယဝ်ႉၼႆႉၼႃး ပီႈၸၢႆးၶိူဝ်းမႃးဝႄႉတီႈလႂ်”
“ဢၢင်ႈၵႂႃႇဝႄႉတီႈတႆးၵေႃႉလႄႈ ႁႃးပႆမႃးဢိူဝ်ႈ”
ၸၢႆးသႅင်မိူင်းၵေႃႈ ဝၢႆႇတူၺ်းမႃးလႆႈႁၼ် ပဵၼ်ၸၢႆးမွၼ်းၶိူဝ်း ၶႃသွင်ၵေႃႉလႄႈ မၼ်းတူၵ်းၸႂ်ၵႂႃႇသေ လွမ်ငႅဝ်ဝႆႉယူႇ၊ မၼ်းတေ ႁဵတ်းႁိုဝ်ၵေႃႈဢမ်ႇႁူႉ ၼၢင်းမူဝ်ၶၢဝ်ၶဝ် ၸင်ႇယွၼ်းတၢင်းၸွႆႈထႅမ်သေ လၢတ်ႈဝႃႈ
“ဢေႃႈ ... ပီႈၸၢႆးၶိူဝ်း ၶႅၼ်းတေႃႈတူၺ်းပၼ်ၵႃး ဢၼ်မူဝ်ၶဝ်ၶီႇမႃးၼႆႉ ၽွင်ႈလူး”
“ႁေႉ ... ႁေႉ ... တူၺ်းမႃးၸဵမ်မိူဝ်ႈၵႆႈယဝ်ႉ မူဝ်ၶၢဝ် တီႈလဵဝ်ၵေႃႈတူၺ်းယူႇၼင်ႇၵဝ်ႇလူး”
“ဢူဝ် ... ပီႈၸၢႆးၶိူဝ်း မူဝ်ၶဝ်မၢင်ၸိူဝ်း လူဝ်ႇၵႂႃႇၵျူႇသိၼ်ႇ မၢင်ၸိူဝ်းၵေႃႈ မီးၵၢၼ်ဢိူဝ်ႈ ၵွပ်ႈၼႆ ၸွႆႈထႅမ်ပၼ်မူဝ်ၶဝ်ၽွင်ႈလူး”
ၸၢႆးၶိူဝ်းတႄႉ တေလႆႈမႄးပၼ်ႁိုဝ် ဢမ်ႇၼၼ် တေဢမ်ႇမႄးပၼ်ႁိုဝ်ၼႆ မၼ်းပႆႇၸၢင်ႈတႅပ်းတတ်း၊ ၼၢင်းမူဝ်ၶၢဝ်ၵေႃႈ ယွၼ်းတၢင်းၸွႆႈထႅမ်မၼ်း ၶဝ်ၸိူဝ်းၼိူဝ်ၵႃးၼၼ်ႉၵေႃႈ ယွၼ်းတၢင်းၸွႆႈထႅမ်မၼ်းလႄႈ မၼ်းၵေႃႈ ၸင်ႇၵႂႃႇတီႈႁိမ်း ၸၢႆးသႅင်မိူင်းၼၼ်ႉယဝ်ႉ၊ ၸၢႆးသႅင်မိူင်းတႄႉ ႁိူဝ်ႇမၼ်းၸိုမ်ႉသေ ယွႆႉတူၵ်းဝႆႉယူႇ ... ၸၢႆးမွၼ်းၶိူဝ်း ၸင်ႇၵႂႃႇထၢမ်ဝႃႈ
“ၵႃးႁဵတ်းႁိုဝ်လူႉၵႂႃႇ ၸၢႆးသႅင်မိူင်း”
လႆႈငိၼ်းသဵင်ၸၢႆးမွၼ်းၶိူဝ်းထၢမ်မၼ်းလီလီ ၼင်ႇၼႆလႄႈ ၸၢႆးသႅင်မိူင်း ၸင်ႇသဵင်သၼ်ႇသေ လၢတ်ႈဝႃႈ
“ဢေႃႈ ... ဢေႃႈ ... ႁေႃႈၵႃးသေ ၸူးဢဝ်ၸၢၵ်ႈမၼ်း ၵိုတ်းၵႂႃႇဢိူဝ်ႈ ၶႅၼ်းတေႃႈ ၸွႆႈတူၺ်းပၼ်ၽွင်ႈၶႃႈလူး”
“ၸၢႆးသႅင်မိူင်း ၵႂႃႇၶတ်ႈၸၢၵ်ႈ(ၼူဝ်းၸၢၵ်ႈ)မၼ်းတူၺ်းလူး”
ၸၢႆးသႅင်မိူင်းၵေႃႈ ၵႂႃႇၽုၺ်ႇသေ ၼူဝ်တူၺ်းၸၢၵ်ႈၵႃးမၼ်းယဝ်ႉ၊ ၵူၺ်းၵႃႈ ဢမ်ႇပဵၼ်တူဝ် ၸၢႆးမွၼ်းၶိူဝ်းၵေႃႈ ႁူႉႁၼ်တီႈၽိတ်းမၼ်းလႄႈ မၼ်းၸင်ႇပိုတ်ႇၽုၺ်ႇၵႃႇပေႇတႃႇၵႃးၼၼ်ႉသေ တိုင်ႈပဝ်ႇတူၺ်းယဝ်ႉ မႄးတိုင်ႈပဝ်ႇလွတ်ႇၼမ်ႉမၼ်းၼၼ်ႉ လီလီ ၶိုၼ်းမႄးသိုပ်ႇသေ ၸႂ်ႉႁႂ်ႈ ၸၢႆးသႅင်မိူင်း ၸၢမ်းတူၺ်းယဝ်ႉ။
“ၸၢႆးသႅင်မိူင်း ... ၸၢမ်းတူၺ်းလူး”
ၸၢႆးသႅင်မိူင်းၵေႃႈ ၽုၺ်ႇသေႃးၵႃးသေ ၼူဝ်းတူၺ်းလႄႈ သဵင်ၵႃးၵေႃႈ ပဵၼ်တူဝ်သေ မေႃးပၼ်းၵႂႃႇယဝ်ႉ၊ ၶဝ်ၼိူဝ်ၵႃးၸိူဝ်းၼၼ်ႉၵေႃႈ ဢွၼ်ၵၼ်ၸူမ်းသိူဝ်းၵႂႃႇယဝ်ႉ ၸၢႆးသႅင်မိူင်းၵေႃႈ ၶိုၼ်းလူင်းၵႃးမႃးသေ မႃးသိမ်းၶိူင်ႈၵႂႃႉမၼ်းၸိူဝ်းၼၼ်ႉယဝ်ႉ။ ယွၼ်ႉပိူဝ်ႈ ၸၢႆးမွၼ်းၶိူဝ်းၸွႆႈထႅမ်မၼ်းလႄႈ မၼ်းၸူမ်းယူႇသေတႃႉ မၼ်းသမ်ႉ လွမ်ၵူဝ်ၼၢင်းမူဝ်ၶၢဝ် ထၢင်ႇလဵၵ်ႉမၼ်း ဢမ်ႇမေႃမႄးၵႃးၼႆလႄႈ ၶိုၼ်းလွမ်လွမ် ၸႂ်လမ်တေႃႇ ၸၢႆးမွၼ်းၶိူဝ်း ၼႂ်းၸႂ်ယူႇ သေတႃႉ မၼ်းၵေႃႈႁဵတ်းၵဵင်ႈဝႃႈ
“ၶွပ်ႈၸႂ်ယဝ်ႉ ၸၢႆးၶိူဝ်း”
ၼၢင်းမူဝ်ၶၢဝ်ၵေႃႈ ၸင်ႇဝႃႈ
“ၶွပ်ႈၸႂ်ယဝ်ႉ ... ပီႈၸၢႆးၶိူဝ်း”
“လႆႈယူႇ”
ၸၢႆးသႅင်မိူင်းၵေႃႈ ႁေႃႈၵႃးဢွၵ်ႇၵႂႃႇယဝ်ႉ ၶဝ်ၸိူဝ်းဢၼ်ယူႇၽၢႆႇလင်ၼၼ်ႉ ၵၵ်းၵႆဝႆမိုဝ်းတေႃႇ ၶႃသွင်ၵေႃႉသေ ယုမ်ႉၸုမ်ႉၶုမ်ႉယူႇ ၶႃသွင်ၵေႃႉ သိုပ်ႇပႆမႃးသေ ၸၢႆးၶမ်းၸင်ႇဝႃႈ
“ၸၢႆးၶိူဝ်း ... ပဵၼ်မႂ်းလႄႈ မႄးပၼ်မၼ်းယဝ်ႉ၊ သင်ပဵၼ် ၵဝ်တႄႉ ဢမ်ႇမႄးပၼ်ၵူၺ်း”
“ၵဝ်ၵေႃႈ တူၺ်းႁၼ်ၼႃႈ မူဝ်ၶၢဝ်လႄႈ တႆးၵေႃႉမၼ်း ၸိူဝ်းၼၼ်ႉသေ ၸင်ႇမႄးပၼ်ၼင်ႇၵဝ်ႇယဝ်ႉ”
“မၼ်းလၢတ်ႈတေႃႇမႂ်းလၢႆၶေႃႈ ၸၢႆးၶိူဝ်း”
“သွင်ၶေႃႈ ၵူၺ်းဢိူဝ်ႈ”
“ၼႂ်းသွင်ၶေႃႈၼၼ်ႉ ယင်းဢမ်ႇပႃးဢၼ်ႁွင်ႉမႂ်းၶီႇၵႃး မိူဝ်းၸွမ်းၶဝ် ဢမ်ႇၸႂ်ႈႁႃႉ”
“ဢမ်ႇပႃး”
“ၵူၼ်းမဵဝ်းၼႆႉ ၼၢၼ်းမီးဝႆႉၼင်ႇၵဝ်ႇယဝ်ႉ ၵဝ်တႄႉ တိုၼ်းဢမ်ႇတူၺ်းလႆႈသေဢိတ်းၵူၺ်း”
ၶႃသွင်ၵေႃႉမႃးဝႄႉဢႅဝ်ႇ တီႈတႆးၵေႃႉၶဝ်သေ ၶိုၼ်းပူၼ်ႉ မိူဝ်းယဝ်ႉ။