မွၵ်ႇလူင်ႇလဵဝ်/တွၼ်ႈသိပ်းၵဝ်ႈ
ၸၢႆးမွၼ်းၶိူဝ်း ၸၢႆးၶမ်း ၼၢင်းမူဝ်ၶၢဝ် ၼၢင်းၸၢမ်သႅင်းၶဝ် သီႇၵေႃႉ ႁူမ်ႈၵၼ်ၶိုၼ်ႈၸမ်ႉၸွမ် မူၼ်ႈမူၼ်ႈသိူဝ်းသိူဝ်းမႃးသေ ပုၼ်ႈတႃႇ ၶၢဝ်းယၢမ်းၼိုင်ႈပီ သမ်ႉပေႃးမူတ်းသဵင်ႈယူတ်းၵဵင်ႈၵႂႃႇယဝ်ႉ။ လွင်ႈတၢင်းမိုတ်ႈၵိုဝ်းၵၼ်ၼၼ်ႉၵေႃႈ တိုၼ်းဢမ်ႇယူပ်ႈဢမ်ႇယွမ်းပဵၼ် ဢၼ်တိူဝ်းတွၼ်းမႃးလိူဝ်သေ ဢွၼ်တၢင်းၼၼ်ႉတႄႉတႄႉ မၢၵ်ႁူဝ်ၸႂ်ၶဝ် ၵေႃႉၼိုင်ႈလႄႈၵေႃႉၼိုင်ႈတႄႉ လွမ်လွမ် လၢတ်ႈၵႂၢမ်းႁၵ်ႉတေႃႇၵၼ် ယူႇသေတႃႉ ၶဝ်ပႆႇႁတ်းလၢတ်ႈဢွၵ်ႇတီႈသူပ်း။
ဝၼ်းတွပ်ႇပွႆးထၢမ်လိၵ်ႈဝၼ်းလိုၼ်းသုတ်း ၸၢႆးၶမ်းလႄႈ ၸၢႆးမွၼ်းၶိူဝ်းတွပ်ႇယဝ်ႉသေ ၶဝ်ဢွၵ်ႇမႃးပႂ်ႉ တီႈတႂ်ႈတူၼ်ႈမႆႉ ဢၼ်ၶဝ်ၵႆႉထူပ်းၵၼ်သေႇသေႇ ၼၼ်ႉယဝ်ႉ ၸၢႆးၶမ်းၸင်ႇထၢမ်
“ၸၢႆးၶိူဝ်း မႂ်းတွပ်ႇလႆယူႇႁႃႉ”
“လႆႈယူႇ မႂ်းလႃႇ”
“လႆႈယူႇ ပီၼႆႉတႄႉႁဵတ်းႁိုဝ်ၵေႃႈ ပူၼ်ႉယဝ်ႉၵႂႃႈ ၵူၺ်းၵႃႈ မဵဝ်းၼိုင်ႈတႄႉ ပီၼႆႉႁႃးပႆႇပူၼ်ႉလႆႈၼေႃ”
“မဵဝ်းႁိုဝ် ... ၸၢႆးၶမ်း”
“ဢေႃ လွင်ႈဢၼ်မႂ်းမိုတ်ႈမူဝ်ၶၢဝ် လွင်ႈဢၼ်ၵဝ်မိုတ်ႈ ၸၢမ်သႅင်းၼၼ်ႉဢိူဝ်ႈ ႁႃးပႆႇပူၼ်ႉလႆႈ လွင်ႈမိုၼ်ႈၵၼ်ၼႆႉၼႆယဝ်ႉ”
“တႄႉဢိူဝ်ႈၼေႃ ... တေသိုပ်ႇပူၼ်ႉၵႂႃႇၸိူင်ႉႁိုဝ်”
“သိုပ်ႇပူၼ်ႉလွင်ႈမိုတ်ႈသေ ႁႂ်ႈၽႅဝ်လွင်ႈႁၵ်ႉၵၼ်ၼၼ်ႉ ဢိူဝ်ႈ မႂ်းဢမ်ႇဢၢၼ်းပိုတ်ႇမၢၵ်ႇႁူဝ်ၸႂ်မႂ်းယဝ်ႉႁႃႉ ၸၢႆးၶိူဝ်း”
“ၶႂ်ႈပိုတ်ႇယူႇဢိူဝ်ႈ ... ၵူၺ်းၵႃႈ”
“ၵူၺ်းၵႃႈၸိူင်ႉႁိုဝ်လႃႇ ၵႃႈလမ်းဝူင်းႁႃႉ ၵႃႈပၼ်ၵွင်ႁႃႉ”
“ၵူၺ်းၵႃႈ ၵဝ်ၵူဝ်လွင်ႈဢၼ်ႁဝ်းမိုတ်ႈၵိုဝ်းၵၼ်ၼၼ်ႉ လူႉလႅဝ်ၵႂႃႇၵူၺ်းဢိူဝ်ႈ”
“ပေႃးၽႅဝ်ၼိူဝ်သဵၼ်ႈတၢင်းႁၵ်ႉတႄႉ လီယူႇ ၵူၺ်ႈၵႃႈ ပေႃး ဢမ်ႇၽႅဝ်ၼိူဝ်သဵၼ်ႈတၢင်းႁၵ်ႉသေ သမ်ႉၽႅဝ်ၼိူဝ်သဵၼ်ႈတၢင်း ၸင်းၵႂႃႇ လွင်ႈတၢင်းမိုတ်ႈၵၼ်ၵေႃႈ လူႉလႅဝ်ၵႂႃႇၼႆ ၵူဝ်ပဵၼ်ၸိူင်ႉ ၼႆၵူၺ်းၼၼ်ႉဢိူဝ်ႈ မႂ်းလူး”
“ၵဝ်ၵေႃႈ ၵူဝ်ပဵၼ်ၸိူင်ႉၼၼ်ၼင်ႇၵဝ်ႇယဝ်ႉ ၸၢႆးၶိူဝ်း လွမ်ႁၵ်ႉလၵ်ႉမႆႈဝႆႉယူႇၵူၺ်းယဝ်ႉ”
ယူႇၵမ်ႉၼိုင်ႈ ၼၢင်းမူဝ်ၶၢဝ်လႄႈၼၢင်းၸၢမ်သႅင်းၵေႃႈ ၽႅဝ်မႃးယဝ်ႉ ၸၢႆးမွၼ်းၶိူဝ်း ၸင်ႇႁပ်ႉထၢမ်ဝႃႈ
“ၶိူဝ်သွင်ၵေႃႉ ၸွင်ႇတွပ်ႇလႆႈယူႇႁိုဝ်”
“တွပ်ႇလႆႈယူႇ ပီႈၸၢႆးၶိူဝ်းၶဝ်လူးၸွင်ႇလႆႈ”
“လႆႈဢိူဝ်ႈ”
“မူဝ်တႄႉ ပဵၼ်ဢၼ်ၸူမ်းသိူဝ်းမဝ်ၸႂ်ၵႂႃႇတႄႉတႄႉယဝ်ႉ ပီၼႆႉတႄႉ ပူၼ်ႉထႅင်ႈယဝ်ႉၵႂႃႈ”
ၶဝ်သီႇၵေႃႉၸူမ်းသိူဝ်းသေ တႅၵ်ႈတူၺ်းၶေႃႈတွပ်ႇၶဝ်ၼၼ်ႉ ပဵၼ်ပဵင်းၸႂ်ၵူႈၵေႃႉလႄႈ ၶဝ်ပဵၼ်ဢၼ်ၸူမ်းသိူဝ်းတႄႉတႄႉ ၼၢင်းမူဝ်ၶၢဝ်ၸင်ႇဝႃႈ
“ပေႃးၼႆတႄႉ ပီတေမႃး ႁဝ်းသီႇၵေႃႉ လူဝ်ႇလႆႈၶိုၼ်ႈ ပီသွင်ၸွမ်းၵၼ်ထႅင်ႈယဝ်ႉၼေႃ”
ၸၢႆးၶမ်းၵေႃႈ
“ႁဝ်းဝႃႈ ဢၼ်ႁဝ်းတွပ်ႇၵႂႃႇၼၼ်ႉ ႁဝ်းထၢင်ႇၸႂ်ႈယူႇသေတႃႉ မၢင်တီႈၵေႃႈ ၽိတ်းၼင်ႇၵဝ်ႇဢိူဝ်ႈ ၵွပ်ႈၼႆ တေပူၼ်ႉပႆႇပူၼ်ႉၼႆ ႁဝ်းတႄႉပႆႇႁတ်းလၢတ်ႈၵွၼ်ႇမူဝ်ၶၢဝ်”
ၸၢႆးၶိူဝ်း ၸင်ႇလွမ်တူၺ်း ၼႃႈႁၢင်ႈလီဢွၼ်ႇၼၢင်းမူဝ်ၶၢဝ်သေ
“ဢေႃႈ ... မူဝ်ၶၢဝ်”
“ဢီႈသင် ... ပီႈၸၢႆးၶိူဝ်း”
“ပေႃးဝႃႈ မၢႆၸိုဝ်ႈဢၼ်ပူၼ်ႉၸၼ်ႉၸွမ်ဢွၵ်ႇၼႆ တႅမ်ႈလိၵ်ႈမႃး တီႈပီႈၸၢႆးၶိူဝ်းၶဝ်ၼႃႈ”
“တမ်းၸႂ်လႃႈ ပီႈၸၢႆးၶိူဝ်း မူဝ်တေတႅမ်ႈပၼ်ၵႂႃႇလႆ ပီႈၸၢႆးၶိူဝ်း တေမိူဝ်းလွႆလႅမ်မိူဝ်ႈလႂ်”
“ဢၢင်ႈမိူဝ်းမိူဝ်ႈၼႆႉၼႆဢိူဝ်ႈ”
လႆႈငိၼ်းၼင်ႇၼၼ် ၼၢင်းမူဝ်ၶၢဝ် ပဵၼ်ဢၼ်ၸႂ်လမ်ၵႂႃႇ ၵမ်းလဵဝ်ယဝ်ႉ မၼ်းၼၢင်းၸင်ႇဝႃႈ
“ပႄႉၼႅတ်ႈမိူဝ်းလႃႇ ပီႈၸၢႆးၶိူဝ်း ယူႇထႅင်ႈသွင်သၢမ်ဝၼ်းသေ ၸွင်ႇမိူဝ်းဢမ်ႇလႆႈႁႃႉ”
“လႆႈတႄႉ လႆႈယူႇ ၵူၺ်းၵႃႈ”
“ၵူၺ်းၵႃႈၸိူင်ႉႁိုဝ်လႃႇ ၸႂ်ထိုင်သၢဝ်လွႆလႅမ်ၼႃႇလႄႈ ၶႂ်ႈၸဵဝ်းမိူဝ်းႁႃႉ ပီႈၸၢႆးၶိူဝ်း”
“ဢမ်ႇၸႂ်ႈၵူၺ်း ... ယွၼ်ႉပိူဝ်ႈၶႂ်ႈယွၵ်ႇမူဝ်ၶၢဝ်လႄႈ လႃႈလီလႅၼ် မူဝ်ၶၢဝ်ဢိူဝ်ႈ”
“ဢူဝ် ... ပီႈၸၢႆးၶိူဝ်းၼႆႉ မူဝ်ယူဝ်ဝႃႈ ပီႈၸၢႆးၶိူဝ်းလၢတ်ႈ တႄႉတႄႉၼႆၼႃး မူဝ်ပေႃးၸႂ်ဢမ်ႇလီလႆႈယဝ်ႉ”
ၼၢင်းမူဝ်ၶၢဝ် ဝႃႈၸိူင်ႉၼၼ်သေ ဢဝ်တႃမိုဝ်းမၼ်းထုပ် ပၼ်ၶႅၼ်ၸၢႆးၶိူဝ်းယူႇ ၸၢႆးမွၼ်းၶိူဝ်းၵေႃႈ ၺွပ်းဝႆႉၶေႃႈမိုဝ်းမၼ်း ၼၢင်းမူဝ်ၶၢဝ်ၶွၼ်ၼိုင်ႈသေ
“ႁႃး ... ႁႃး မိူဝ်းၵႆႈမူဝ်ၶၢဝ်ယုမ်ႇၵႂႃႇတႄႉတႄႉႁႃႉ”
“ယုမ်ႇဢိူဝ်ႈ ... ပီႈၸၢႆးၶိူဝ်းမေႃလႅၼ်”
မၼ်းၼၢင်း ဢဝ်မိုဝ်းမၼ်းထႅင်ႈၶွၼ်ၼိုင်ႈထုပ်ႉႁႅမ် ၸၢႆးမွၼ်ႈၶိူဝ်းထႅင်ႈယဝ်ႉ ၸၢႆးမွၼ်းၶိူဝ်းၵေႃႈ ၶိုၼ်းၺွပ်းဝႆႉ မိုဝ်းမၼ်းၼၢင်း ထႅင်ႈၶွၼ်ၼိုင်ႈသေ
“ယႃႇပေႁႅမ် ပိူၼ်ႈတိၵ်းတိၵ်းလေႃႇ မူဝ်ၶၢဝ်”
“ႁႅမ်ဢိူဝ်ႈ ... ၽႂ်ၸႂ်ႉပီႈၸၢႆးၶိူဝ်း ၶႂ်ႈမေႃလႅၼ်”
ၼၢင်းမူဝ်ၶၢဝ် ၶိုၼ်းၸၼ်မိုဝ်းမၼ်းဢွၵ်ႇသေတႃႉၵေႃႈ ၸၢႆးမွၼ်းၶိူဝ်ဢမ်ႇပွႆႇလႄႈ မၼ်းၼၢင်းၵေႃႈ ပႆႇၸၢင်ႈလွတ်ႈလႆႈ ၸၢႆးၶမ်း ၸင်ႇတူပ်းမိုဝ်းသေ
“ဢိူဝ်ႈ ... ဢိူဝ်ႈ သႂ်ႇလႄႈ ၽႂ်တေပႄႉ ႁဝ်းတႄႉပဵၼ် ၵူၼ်းတူၺ်းမၼ်းယဝ်ႉ ၵေႃႉၼိုင်ႈၺွပ်းဝႆႉၵႅၼ်ႇၵႅၼ်ႇ ၵေႃႉၼိုင်ႈသမ်ႉ ၸၼ်ဢွၵ်ႇႁႂ်ႈလႆႈလႄႈ”
ၼၢင်းမူဝ်ၶၢဝ် ဢမ်ႇၸၢင်ႈပႄႉလႆႈႁႅၼ်းၸၢႆးမွၼ်းၶိူဝ်းလႄႈ မၼ်းၼၢင်း ၸင်ႇဝူၼ်ႉလႆႈမဵဝ်းၼိုင်ႈသေ ၸင်ႇၼႅတ်ႈဝႃႈ
“ဢေႃႈ ဢေႃႈ ပီႈၸၢႆးၶိူဝ်း မိုဝ်းမူဝ် တီႈဢၼ်ပီႈၸၢႆးၶိူဝ်း ယိပ်းဝႆႉၼႆႉ မီးၸဵပ်းဝႆႉတင်းသွင်ၶွၼ်ဢိူဝ်ႈ”
ၸၢႆးၶိူဝ်းၵေႃႈ ထၢင်ႇၸႂ်ႈတႄႉလႄႈ မၼ်းၸင်ႇ ၼႅတ်ႈပွႆႇမိုဝ်း ၼၢင်းမူဝ်ၶၢဝ်ၽႂ်းၽႂ်းယဝ်ႉ
“တႄႉႁႃႉ မီးလႂ်မူဝ်ၶၢဝ်”
“ၶိၵ်း ... ၶိၵ်း မူဝ်လႃႈလီလႅၼ် ႁႂ်ႈပီႈၸၢႆးၶိူဝ်းပွႆႇမိုဝ်းမူဝ်ဢိူဝ်ႈ”
ၶဝ်ဢွၼ်ၵၼ်ၶူဝ် ၸၢႆးၶိူဝ်းယူႇ ၸၢႆးၶိူဝ်းၶိုၼ်းဝႃႈ
“ႁႄႉ တူၺ်းလႄႈ မူဝ်ၵေႃႈမေႃလႅၼ်ၼင်ႇၵဝ်ႇယဝ်ႉ”
“မူဝ်လႅၼ်ဢမ်ႇၸႂ်ႈသႄႈ မဵဝ်းၼႆႉ ပိူၼ်ႈႁွင်ႉပရိယႄႇၼႆဢိူဝ်ႈ”
ၸၢႆးၶမ်း ၸင်ႇဝႃႈ
“ၸၢႆးၶိူဝ်း မႂ်းဢၢၼ်းမိူဝ်းလွႆလႅမ်မိူဝ်လႂ်ၼႆႉ”
“ထႅင်ႈသွင်သၢမ်ဝၼ်းၵႂႃႈ”
“သွင်တီႈၼိုင်ႈ သၢမ်တီႈၼိုင်ႈၼႆ ပဵၼ်ၵႂႃႇႁႃႈဝၼ်းယဝ်ႉ ဢမ်ႇၸႂ်ႈႁႃႉ”
“ဢိူဝ်ႈ... တေပဵၼ်မိူဝ်ႈၼိုင်ႈၵႂႃႈ မႂ်းလူးၸၢႆးၶမ်း”
“ၵဝ်တႄႉ တေပႂ်ႉၶီႇၵႃးႁီးၼူဝ်းၵွၼ်ႇဢိူဝ်ႈ”
ၼၢင်းမူဝ်ၶၢဝ် ၸင်ႇဝႃႈ
“ပီႈၸၢႆးၶိူဝ်းၶဝ်ၼႆႉ ၵုမ်ႇလၢတ်ႈၶိူဝ်းတေမိူဝ်းယူႇတိၵ်းတိၵ်း ၵူဝ်ႁိူၼ်းပီႈၸၢႆးၶိူဝ်းၶဝ် ဢႅၼ်ႇပၢႆႈႁႃႉတေႃႈဝႃႈ”
ၼၢင်းၸၢမ်သႅင်းၵေႃႈ
“တႄႉဢိူဝ်ႈမႂ်း ... ဝၼ်းမိူဝ်ႈၼႆႉ ယွၼ်ႉပိူဝ်ႈပဵၼ်ဝၼ်း တွပ်ႇယဝ်ႉပွႆးထၢမ်လိၵ်ႈလႄႈ ပဵၼ်ဝၼ်းမဝ်ၸႂ်သိူဝ်းၸႂ်ယဝ်ႉ၊ ၵူၺ်းၵႃႈ ပေႃးလႆႈငိၼ်း ပီႈၸၢႆးၶိူဝ်းၶဝ် လၢတ်ႈၶိူဝ်းမိူဝ်းၼႆ ၸၢမ်သႅင်းၶဝ်တေ ႁဵတ်းႁိုဝ်သိူဝ်းၸႂ်ယဝ်ႉလႃႇ”
လႆႈငိၼ်း ၼၢင်းၸၢမ်သႅင်းလၢတ်ႈၼင်ႇၼႆ ၸၢႆးမွၼ်းၶိူဝ်း ၶႃသွင်ၵေႃႉ ငဝ်မိုင်ၵႂႃႇၵမ်းၼိုင်ႈယဝ်ႉ ၸၢႆးၶိူဝ်းၸင်ႇၶိုၼ်းဝႃႈ
“ပေႃးဢမ်ႇလၢတ်ႈဝႆႉသေ ပေႃးပီႈၸၢႆးၶိူဝ်းၶဝ် မိူဝ်းၵႂႃႇၼႆ ၸၢမ်သႅင်းၶဝ်သမ်ႉတေဝႃႈ‘တေမိူဝ်းၵေႃႈ ပေႃးဢမ်ႇလၢတ်ႈႁဝ်းဝႆႉ’ ၼႆယဝ်ႉ ဢမ်ႇၸႂ်ႈႁႃႉ”
ၼၢင်းမူဝ်ၶၢဝ် ၸင်ႇၼႃႈဢူၼ်ႈသေ တွပ်ႇဝႃႈ
“ၸႂ်ႈယူႇ ပီႈၸၢႆးၶိူဝ်းယၢမ်းလဵဝ် လွင်ႈတေမိူဝ်းၼၼ်ႉ ယႃႇပေၽုမ်ႈလၢတ်ႈၵွၼ်ႇလႃႈ မူဝ်ၶဝ်ပႆႇၶႂ်ႈငိၼ်း၊ လၢတ်ႈတၢင်ႇမဵဝ်းၵွၼ်ႇလႄႈ”
တေလႆႈလၢတ်ႈၸိူင်ႉႁိုဝ်လႃႇ”
“လၢတ်ႈ ဢၼ်တေလီသိူဝ်းၸႂ်ၼၼ်ႉဢိူဝ်ႈ”
ၸၢႆးၶမ်းၸင်ႇဝူၼ်ႉသေ လၢတ်ႈ ပဵၼ်တိၼ်ပဵၼ်မိုဝ်းယဝ်ႉ
“လၢတ်ႈဢၼ်တေလီသိူဝ်းၸႂ်ၼၼ်ႉၼႆႁႃႉ ထွမ်ႇလႄႈ ထွမ်ႇလႄႈ ဢိူဝ်ႈ မိူဝ်ႈၵွၼ်ႇၵွၼ်ႇ မီးၵွၼ်ႇတူဝ်ၼိုင်ႈ ယူႇၼိူဝ်ၵၢင်ႁၢဝ်သေ ၶီႈတူၵ်းမႃးၵွၼ်ႈၼိုင်ႈဝႃႈ ၺႃးမိူဝ်ႈၸၢႆးၶိူဝ်း တိုၵ်ႉမိတ်းၶၢၼ်ႉသေ လႅၼ်းယဵတ်ႇမိုဝ်းမၼ်းယူႇလႄႈ ၶီႈၵွၼ်ႇတူဝ်ၼၼ်ႉ တူၵ်းလူင်းမႃး ပႃႉၺႃးမိုဝ်းၸၢႆးၶိူဝ်း ပႅပ်ႉၼႆဝႃႇ ႁႃးႁႃး”
ၶဝ်ဢွၼ်ၵၼ် ၸူမ်းၶူဝ်ယူႇ ၸၢႆးၶိူဝ်းၸင်ႇၶိုၼ်းဝႃႈ
“ၶီႈၵွၼ်ႇ ဢၼ်တူၵ်းပႃႉသႂ်ႇမိုဝ်း ပီႈၸၢႆးၶိူဝ်းၼၼ်ႉ ၸၢႆးၶိူဝ်းၼႅတ်ႈၽႅတ်းပႅတ်ႈၽႂ်းၽႂ်းသေ ဝူင်ၵႂႃႇၸူးၸၢႆးၶမ်းယဝ်ႉ။ ၽွင်း ၼၼ်ႉ ၸၢႆးၶမ်းတိုၵ်ႉၶႂ်ႈၼွၼ်းသေ တိုၵ်ႉႁၢဝ်ၵၢင်း ဢႃႈပၢၵ်ႇယူႇလႄႈ ၶီႈၵွၼ်ႇၼၼ်ႉ ဝူင်ၶဝ်ႈၵႂႃႇၼႂ်းသူပ်းမၼ်းယဝ်ႉဝႃႇ ... ႁႃး ... ႁႃး ”
“မႄႈမႂ်းလႃး ... ထုၺ်ႉ ... ထုၺ်း”
ၸၢႆးၶမ်းဝႃႈၵႂႃႇၼင်ႇၼၼ် ထူမ်ႇၼမ်ႉလၢႆးမၼ်းသေ လမ်းႁႅမ်ၸၢႆးၶိူဝ်းယူႇ၊ ၸၢႆးၶိူဝ်းၵေႃႈ ဢႅၼ်ႇပၼ်ႇ ၼၢင်းမူဝ်ၶၢဝ်လႄႈ ၸၢမ်သႅင်းဝႆႉယူႇ။ ၶႃသွင်ၵေႃႉ ၵူဝ်ၸၢႆးၶိူဝ်း ၶႃ ၸၢႆးၶမ်း မႃးၽႃႇၺႃးၶႃလႄႈ ၶႃသွင်ၵေႃႉယိပ်းမိုဝ်းၵၼ်ဝႆႉသေ ၸူမ်းတူၺ်း ဢၼ်ၸၢႆးၶိူဝ်းလႄႈ ၸၢႆးၶမ်း ပၼ်ႇႁွပ်ႈၶႃၼၼ်ႉယူႇ။