မွၵ်ႇလူင်ႇလဵဝ်/တွၼ်ႈသိပ်းဢဵတ်း
ၸၢႆးမွၼ်းၶိူဝ်း ဢၢင်ႈဢၢပ်ႇၼမ်ႉၼႆလႄႈ မၼ်းၸၢႆးတိုၵ်ႉ လဵၼ်ႈႁႅင်းလွင်ႈၽၢႆႇယူႇလီ မၼ်းၸၢႆးၼုင်ႈၵူၼ် ၵူၼ်းလဵၼ်ႈႁႅင်း ဢၼ်ပွတ်း ၼိုင်ႈသိူဝ်ႈႁွင်းၶႆးသေ တိုၵ်ႉလဵၼ်ႈပႃး(မႆႉသီႇလၵ်းသွင် ႁၢဝ်း) ၼႂ်းသူၼ်ၶဝ်ယူႇ။
မၼ်းၸၢႆးမႃးၼၢဝ်ႉၶိုၼ်ႈ တၢင်းပၢႆမၼ်းၽၢႆႇၼိုင်ႈသေ ဢဝ်တူဝ်မၼ်း ဝူၵႂႃႇဝူၶိုၼ်း ၸိူင်ႉၼင်ႇပိူၼ်ႈဢဵၼ်ႈၼၼ်ႉယဝ်ႉ တူၺ်းႁၼ်မၼ်းၸၢႆး ဝူၵႂႃႇဝူၶိုၼ်းၼင်ႇၼၼ် ဢၢပ်ႈဢမ်ႇယၢပ်ႇသင်၊ ယွၼ်ႉပိူဝ်ႈ မၼ်းဢဵၼ်ႈၵူႈဝၼ်းလႄႈ ၶႅၼ်မၼ်းၼႆၵေႃႈ ယႂ်ႇမႃး ဢူၵ်းမၼ်းၸၢႆးၵေႃႈၵႂၢင်ႈမႃး တူဝ်ၶိင်းမၼ်းၵေႃႈ ႁၢင်ႈလီၶိူင်ႇၵိုမ်းမႃး မၢင်တီႈပဵၼ်မၢၵ်ႇႁႅင်းဢဵၼ်ႁႅင်း တိုင်ႇၽူတ်ႉမႃးဝႆႉယူႇ။
ၽွင်းမၼ်း ဢဵၼ်ႈပႃးၼၼ်ႉ ၸၢႆးၼႃထိုဝ်မႃးသေ မႃးလွမ်တူၺ်း ဢၼ်ၸၢႆးမွၼ်းၶိူဝ်း တိုၵ်ႉဝူပႃးၼၼ်ႉယူႇ မၼ်းဢၢၼ်ႇ တူၺ်းမီးၵႂႃႇသၢဝ်းႁႃႈၵမ်းယဝ်ႉလႄႈ ၵမ်းလိုၼ်းသုတ်းၼၼ်ႉ ၸၢႆးမွၼ်းၶိူဝ်း ဢဝ်တိၼ်မၼ်းၵၢႆႇသႂ်ႇၼိူဝ်မႆႉသွင်ႁၵ်းၼၼ်ႉ မႄးၼင်ႈၼိူဝ်ၼၼ်ႉသေ လိုဝ်ႈႁိူဝ်ႉမၼ်းယူႇ ၸၢႆးၼႃထိုဝ်ၸင်ႇမႃးထၢမ်
“ႁိူဝ်ႉယဝ်ႉႁႃႉ ... ၸၢႆးၶိူဝ်း”
“ဢေႃႈ ၸၢႆးယွတ်ႈ ၽႅဝ်မႃးယဝ်ႉႁႃႉ မိူဝ်ႈၼႆႉ”
“ဢမ်ႇၸဝ်ႉ ၸင်ႇႁႃၽႅဝ်ၵူၺ်းၼင်ႇၵဝ်ႇ ၵဝ်လႆႈဢီႈယႃ ႁိူဝ်ႉႁၢႆမႃးပၼ်မႂ်းဢိူဝ်ႈ မိူဝ်ႈၼႆႉ”
“ဢီႈယႃၸိူင်ႉႁိုဝ် မီးလႂ်”
ၸၢႆးၼႃထိုဝ် ၸင်ႇဢဝ်ၶွင်ၽၢၵ်ႇ ဢၼ်ၼၢင်းမူဝ်ၶၢဝ်ပၼ်မႃးၼၼ်ႉ ယုၵ်ႉၼႄၸၢႆးမွၼ်းၶိူဝ်းသေ
“ၼႆႉၼႃႇ”
“ပဵၼ်ပူၵ်ႉသင်ၼၼ်ႉ”
“ဢေႃႈ ... ၼၢင်းမူဝ်ၶၢဝ် ၽၢၵ်ႇမႃးပၼ်မႂ်းဝႃႇ ... ယေႃႈ လိၵ်ႈၵေႃႈပႃးၽိုၼ်ၼိုင်ႈဢိူဝ်ႈ”
ၸၢႆးမွၼ်းၶိူဝ်းၵေႃႈ ႁပ်ႉဢဝ်ၽႂ်းၽႂ်းယဝ်ႉ မၼ်းၼင်ႈၼိူဝ် မႆႉႁၢဝ်းပႃးၼၼ်ႉသေ ၽုၺ်ႇတူၺ်းလိၵ်ႈ ၼၢင်းမူဝ်ၶၢဝ်ၼၼ်ႉယူႇ
တႅမ်ႈတွပ်ႇၼွပ်ႇထိုင်
ပီႈၸၢႆးၶိူဝ်း ...
မူဝ် ၸူမ်းသိူဝ်းႁပ်ႉႁၼ်လိၵ်ႈလႄႈ ၶႅပ်းႁၢင်ႈ ဢၼ်ပီႈၸၢႆးၶိူဝ်း ၽၢၵ်ႇပၼ်မႃးၸွမ်းၸၢႆးၼႃထိုဝ်ၼၼ်ႉသေ ၶိုၼ်းပွင်ႇၶၢဝ်ႇ တွပ်ႇလိၵ်ႈၶွပ်ႈၸႂ်မႃးဢေႃႈ...
ၼႂ်းလိၵ်ႈၼၼ်ႉ ပီႈၸၢႆးၶိူဝ်းတႅမ်ႈမႃး ၶႅပ်းႁၢင်ႈၸိူဝ်းၼႆႉ ႁႂ်ႈလႆႈပဵၼ်ၶွင်ၽၢၵ်ႇဝႃႈၼႆလႄႈ မူဝ်ၶဝ်ပဵၼ်ဢၼ်ၵဵင်ၸႂ်တႄႉတႄႉယဝ်ႉ ပီႈၸၢႆးၶိူဝ်း လိူဝ်သေၼၼ်ႉ ပဵၼ်ဢၼ်ၼပ်ႉယမ် ၶွပ်ႈၸႂ် ဢဝ်ၵုင်ႇမုၼ်ၼမ်ႉၸႂ်ၸေႇတၼႃႇ ပီႈၸၢႆးၶိူဝ်းတႄႉတႄႉသေ တေဢမ်ႇလိုမ်းလႆႈသေပွၵ်ႈယဝ်ႉ၊ ၶႅပ်းႁၢင်ႈတင်းမူတ်းၵေႃႈ ပဵၼ်ဢၼ် ထုၵ်ႇၸႂ်ပဵင်းၸႂ်ၵူႈၶႅပ်းသေ ပေႃးဢမ်ႇမီႈတီႈၼႄးသင်ယဝ်ႉ။
ၵွပ်ႈၼၼ် မူဝ်ၶဝ်ၶွပ်ႈၸႂ်ယႂ်ႇၼမ်ပေႃးဢမ်ႇမီးတီႈတႅၵ်ႈ လႄႈ ၼင်ႇႁိုဝ်တေပဵၼ်တၢင်းယိပ်းတိုဝ်း ပီႈၸၢႆးၶိူဝ်းၼၼ်ႉ မူဝ်ၶဝ် ၶိုၼ်းၽၢၵ်ႇတွၼ်ႈပၼ်မႃး ၾိမ်းၵႃႇလႃႇသီႇၵဵၼ်ယဝ်ႉ၊ သၢမ်ၵဵၼ် တႄႉ ပဵၼ်မူဝ်လႄႈ ဢူႈမူဝ်ၶဝ် ၽၢၵ်ႇပၼ်မႃးယဝ်ႉ၊ ၵဵၼ်ၼိုင်ႈၼၼ်ႉတႄႉ ပဵၼ်ၶွင်ၽၢၵ်ႇၸၢမ်သႅင်းယဝ်ႉ ယုမ်ႇယမ်ဝႃႈတေပဵၼ် တၢင်းတိုဝ်းလီ ပီႈၸၢႆးၶိူဝ်းယူႇၼႆယဝ်ႉ။
ၶႅပ်းႁၢင်ႈမူဝ်လႄႈ ၸၢမ်သႅင်း ဢၼ်ပီႈၸၢႆးၶိူဝ်းဢဝ်ယွၼ်းဝႆႉၼၼ်ႉၵေႃႈ မူဝ်ၶဝ်ႁူမ်ၸူမ်းသေ ပၼ်ပီႈၸၢႆးၶိူဝ်းယူႇ ၶႅပ်းႁၢင်ႈ ပီႈၸၢႆးၶိူဝ်းဢၼ်ပၼ်မႃးတီႈမူဝ်ၶၢဝ်ၼၼ်ႉၵေႃႈ ပဵၼ်ဢၼ်ႁၢင်ႈလီ တႄႉတႄႉ၊ ၶႅပ်းႁၢင်ႈၸၢႆးငဝ်းၼွၵ်ႈမိူင်းၶဝ် ယင်းတေသုမ်းၶႅပ်းႁၢင်ႈ ပီႈပီႈၸၢႆးၶိူဝ်းၵႂႃႇၵွၼ်ႇယဝ်ႉ၊ တႄႉဢိူဝ်ႈ မူဝ်ၶဝ်ဝႃႈတႄႉတႄႉဢိူဝ်ႈၼႆႉ ပီႈၸၢႆးၶိူဝ်း ... ၶိၵ်း ၶိၵ်း ယႃႇပေလိုမ်းသိုဝ်ႉလဵင်ႉၶဝ်ႈသွႆးၼႃႈ...
ယူႇယၢၼ်ၵႆသေ - တေသိုပ်ႇသူးယွၼ်း
ႁႂ်ႈတွၼ်းၶိုၼ်ႈယႂ်ႇ - ၸိုၼ်ႈမႂ်ႇသႂ်လီ
လွင်ႈၶီႁႂ်ႈၵၢင်း - တၢင်းလီႁႂ်ႈထူၼ်ႈ
ႁႂ်ႈလႆႈမူၼ်ႈၸႂ် - ၵူႈၶမ်ႈဝၼ်းၼႂ်သေၵမ်း။
ၸၢႆးမွၼ်းၶိူဝ်း တူၺ်းလိၵ်ႈၼၼ်ႉယဝ်ႉၵႂႃႇသေ မၼ်းလွမ်ယုမ်ႉႁၢၼ်ႉၸႂ်ယူႇ ၸၢႆးၼႃထိုဝ် ၸင်ႇလွမ်တူၺ်း ၸၢႆးမွၼ်းၶိူဝ်းသေ လၢတ်ႈဝႃႈ
“ၸၢႆးၶိူဝ်း သိူဝ်းၸႂ်ၵႂႃႇယဝ်ႉႁႃႉ သမ်ႉပေႃးယုမ်ႉၸုတ်းၵုတ်းဝႆႉလႃႇ”
“တိုၵ်ႉသိူဝ်းၶိုင်ႈၼိုင်ႈၵူၺ်း ၸၢႆးယွတ်ႈ ၶဝ်မႃးပၼ်မႂ်းတီႈလႂ် ၾိမ်းလႄႈလိၵ်ႈၼႆႉ”
“မႃးပၼ်ၵဝ် တီႈတႃႈၵႃးဢိူဝ်ႈ”
“ၶဝ်မႃးသင်ႇသင်လၢႆလၢႆဝႃႈ”
“ဢမ်ႇသင်ႇသင် ၼၢင်းမူဝ်ၶၢဝ်မႃးဝႃႈ ႁႂ်ႈဢဝ်လိၵ်ႈလႄႈ ၾိမ်းမႃးပၼ်မႂ်းၼႆႉၵူၺ်းဢိူဝ်ႈ ... ၵဝ်ယင်းလႃႈလီယွၵ်ႇမၼ်းၵွၼ်ႇဢိူဝ်ႈ”
“ယွၵ်ႇဝႃႈႁိုဝ်”
“ၵဝ်ဝႃႈ ပဵၼ်လိၵ်ႈလိူင်လႄႈ လိၵ်ႈသွမ်ႇလေႃးၵၼ်ႁႃႉၼႆယဝ်ႉ”
“မၼ်းသမ်ႉတွပ်ႇဝႃႈ ႁိုဝ်လႃႇ”
“မၼ်းၵေႃႈႁူႉၵမ်းလဵဝ်ဢိူဝ်ႈ လွင်ႈဢၼ်ၵဝ်ၶႂ်ႈဝႃႈ လိၵ်ႈၶဵဝ်ၼႆၼၼ်ႉ မၼ်းၵေႃႈတွပ်ႇဝႃႈ ဢမ်ႇၸႂ်ႈၼႆၵမ်းလဵဝ်ယဝ်ႉ”
“ဝၢႆးၼၼ်ႉ ၶႃၶိုၼ်းမိူဝ်းၵႂႃႇၵမ်းလဵဝ်ႁႃႉ”
“ၸႂ်ႈဢိူဝ်ႈ ၽွင်းၶႃမိူဝ်ႈၼၼ်ႉ ပဵၼ်ၽႂ်ၵေႃႈဢမ်ႇႁူႉ ႁေႃႈၵႃးသလုၼ်းလႅင်သေ မႃးၺႃးၶႃ တီႈသိုဝ်ႈၼႃႈတႃႈၵႃးလႄႈ ၶဝ်သွင်ၵေႃႉၵေႃႈ ၸွမ်းၵႃးမၢဝ်ႇၵေႃႉၼၼ်ႉသေ မိူဝ်းၵႂႃႇယဝ်ႉ၊ ယူဝ်ၶႄး ပဵၼ်မၢဝ်ႇမၼ်းယူဝ်ႉ ၸၢႆးၶိူဝ်း”
“ဢမ်ႇႁူႉလႄႇ”
“ၵဝ်လၢမ်းတူၺ်းတႄႉ ဢၢပ်ႈတေပဵၼ်လုၵ်ႈၸၢႆးသထေး ၵေႃႉၼိုင်ႈယဝ်ႉ ပေႃးပဵၼ်မၢဝ်ႇမၼ်းၼႆတႄႉ မႂ်းတူၵ်းလိုၼ်းယဝ်ႉၵႂႃႈ ၸၢႆးၶိူဝ်း”
ၸၢႆးမွၼ်းၶိူဝ်းလႆႈငိၼ်းၼင်ႇၼၼ် မၼ်းႁိူဝ်ႉၸႂ်သေ မၼ်းထူၺ်ႈၸႂ်လူင် ၵမ်းၼိုင်ႈယဝ်ႉ
“ႁူး”
“ဢၢႆႈဢၼ်ႁေႃႈၵႃးၼၼ်ႉတႄႉ ယွမ်တၢၼ်ႇတၢၼ်ႇသေ ၼႃႈယၢဝ်းဝႆႉဢိူဝ်ႈ”
လႆႈငိၼ်းၼင်ႇၼၼ် ၸၢႆးမွၼ်းၶိူဝ်းၵႂႃႇဝူၼ်ႉႁၼ်ထိုင် ၵေႃႉဢၼ်ၶဝ်ၽိတ်းၵၼ်တီႈ လၢၼ်ႉၶၢႆတူၼ်ႈတီးၼၼ်ႉယဝ်ႉ၊ မၼ်းၸၢႆးငဝ်သေဝူၼ်ႉယူႇၼင်ႇၼၼ် ၸၢႆးၼႃထိုဝ် ၸင်ႇဝႃႈ
“ႁဵတ်းႁိုဝ် ၸၢႆးၶိူဝ်း မႂ်းၵုမ်ႇငဝ်ၵဝ်ႉယူႇလႃႇ တၢင်းၸူမ်းသိူဝ်းမႂ်း ႁၢႆလၢႆၵႂႃႇၼႂ်းလူမ်းမူတ်းယဝ်ႉႁႃႉ ဢမ်ႇမီးသေဢိတ်းယဝ်ႉယူဝ်ႉ”
“မိူဝ်ႈၸဝ်ႉၸဝ်ႉၼၼ်ႉ ၵဝ်ဝႃႈယူႇလူး တိုၵ်ႉၸူမ်းၶိုင်ႈၼိုင်ႈ ၵူၺ်းၼႆ ဢမ်ႇၸႂ်ႈႁႃႉ”
“ဢိူဝ်ႈ ... ၸၢႆးၶိူဝ်း ၼင်ႇႁိုဝ်မႂ်းတေလႆႈၸူမ်းသိူဝ်းတဵမ်တဵမ်ထူၼ်ႈထူၼ်ႈၼၼ်ႉ ၵဝ်ယွၼ်းသူးပၼ်ယူႇဢၢႆႈ ... လူဝ်ႇတၢင်းၸွႆႈထႅမ်ၵေႃႈ ၵဝ်တေၸွႆႈပၼ်လႆ ၵူၺ်းၵႃႈ ယႃႇပေလိုမ်းလဵင်ႉၶဝ်ႈသွႆးၼႃႈ ႁေး ... ႁေး ၵဝ်တေမိူဝ်းၵွၼ်ႇယဝ်ႉ”
“ၶွပ်ႈၸႂ်ယဝ်ႉ ... ၸၢႆးယွတ်ႈ”
ဝၢႆးသေ ၸၢႆးၼႃထိုဝ်ပူၼ်ႉမိူဝ်းၵႂႃႇယဝ်ႉ ၸၢႆးမွၼ်းၶိူဝ်း ၼင်ႈငဝ်သေ ၵိုတ်းဝႆႉယူႇၵေႃႉလဵဝ် ... မၼ်းလွမ်လွမ်ဝူၼ်ႉၶိုၼ်း ၶိူဝ်းၼၢင်းမူဝ်ၶၢဝ်ၼႂ်းၸႂ်မၼ်းယူႇ
“ယူဝ်ၶႄး ၸၢႆးမွၼ်းၶိူဝ်းတူၵ်းလိုၼ်းယဝ်ႉယူဝ်ႉ မူဝ် ၵေႃႉတူၵ်းလိုၼ်းၼၼ်ႉ ပဵၼ်ၸၢႆးမွၼ်းၶိူဝ်းယူဝ်ႉမူဝ် ပိူၼ်ႈဝႃႈ တူၼ်ႈမႆႉယႂ်ႇမီးၽီ ၵူၼ်းႁၢင်ႈလီမီးၸူႉ ၼႆႉလႄႈ ယူဝ်ၶႄးမူဝ်မီးၸူႉဝႆႉယဝ်ႉ ၼေႃ ဢေႃး ... မူဝ် ... မူဝ်”
မၼ်းၸၢႆးဝူၼ်ႉဢွၵ်ႇၼႂ်းၸႂ်တူၵ်းမၼ်းၼင်ႇၼႆယူႇ ... ဝၢႆး သေဢၢပ်ႇၼမ်ႉယဝ်ႉ မၼ်းၸင်ႇမႃးတႅမ်ႈဝႆႉၼႂ်းပပ်ႉမၼ်း ၼင်ႇၼႆ ယူႇယဝ်ႉ။
✽ ယူဝ်ၸၢႆးတူၵ်းလိုၼ်း ✽
တူၼ်ႈမႆႉယႂ်ႇမီးၽီ - ၵူၼ်းႁၢင်ႈလီမီးၸူႉ
ထုင်းၵႂၢမ်းႁူႉၼင်ႇၼႆ - ၼွင်ႉမိူင်းၵႆယၢၼ်ႁဝ်း
ယူဝ်သဝ်းမီးၸူႉဝႆႉ - ယူဝ်ၸၢႆးၼႆႉတူၵ်းလိုၼ်း
ဝၼ်းသိုၼ်းမိူဝ်ႈပၢၼ်ၵွၼ်ႇ - ယူဝ်ဢမ်ႇႁွၼ်ႇယွၼ်းသူး
တီႈၵွင်းမူးၽြႃး - ႁူမ်ႈၵၼ်မႃးႁိုဝ်ၼေႃး။