မွၵ်ႇလူင်ႇလဵဝ်/တွၼ်ႈသိပ်းသၢမ်
ႁဵတ်းၼႆ ၶိုၼ်ႈႁဵၼ်းႁူမ်ႈၵၼ်မႃး ဝၼ်းၼိုင်ႈယဝ်ႉဝၼ်းၼိုင်ႈ ဝူင်ႈၼိုင်ႈယဝ်ႉဝူင်ႈၼိုင်ႈ လိူၼ်ၼိုင်ယဝ်ႉလိူၼ်ၼိုင်ႈလႄႈ လွင်ႈတၢင်းဢၼ်ၶဝ်မိုတ်ႈၵိုဝ်းၵၼ်ၼႆၵေႃႈ ပဵၼ်ဢၼ်ယႂ်ႇတွၼ်း လိူဝ်ႁႅင်းမႃးသေၵဝ်ႇတႄႉတႄႉ၊ တီႈတင်ႇၼင်ႈ တႂ်ႈတူၼ်ႈမႆႉႁူမ်ႈႁူမ်ႈၸိူဝ်းၼၼ်ႉၵေႃႈ ၶဝ်ၵႆႉၵႆႉ ၼင်ႈႁူမ်ႈၵၼ်သေ ဢုပ်ႇၵၼ်ယူႇ။ တီႈၼႂ်းႁွင်ႈႁဵၼ်းၵေႃႈၶဝ် ၼင်ႈႁိမ်းၵၼ်သေ ၶိုၼ်ႈႁဵၼ်းယူႇ တီႈၼႂ်းသႅင်ႇ တၢင်းၵိၼ်ၸိူဝ်းၼၼ်ႉၵေႃႈ ၶဝ်ၵႆႉၵႆႉၵႂႃႇၵိၼ်တၢင်းၵိၼ်ႁူမ်ႈၵၼ်ယူႇ။
ၼႂ်းၶဝ်သီႇၵေႃႉၼႆႉ ပေႃးဝႃႈ ဢမ်ႇႁၼ်ၵၼ်ၼႆၵေႃႈ လွမ်လွမ် မုင်ႈမွင်းၵၼ် လွမ်လွမ်ၸႂ်တိတ်းၵၼ်သေ ထၢမ်ၶၢဝ်ႇၵၼ်ယူႇ၊ ဝၼ်းမိူဝ်ႈၼႆႉ ဢမ်ႇလႆႈႁၼ်ၸၢႆးမွၼ်းၶိူဝ်း မႃးၶိုၼ်ႈႁဵၼ်းလႄႈ ၼၢင်းမူဝ်ၶၢဝ် ၸင်ႇထၢမ်ၸၢႆးၶမ်းယဝ်ႉ
“ပီႈၸၢႆးၶမ်း ... ပီႈၸၢႆးၶိူဝ်း ဢမ်ႇမႃးၶိုၼ်ႈႁဵၼ်းႁႃႉ မိူဝ်ႈ ၼႆႉ”
“ဢမ်ႇႁၼ်မႃးလူင် မူဝ်ၶၢဝ်”
“ႁဵတ်းသင် မၼ်းဢမ်ႇမႃးလႃႇ”
“ဢမ်ႇႁူႉလႄႇ”
“မၢင်ပွၵ်ႈတႄႉ ႁႃးၺႃးၵၼ်ၼိူဝ်ၵႃးဢိူဝ်ႈ ... မၢင်ပွၵ်ႈၵေႃႈ မၼ်းၽႅဝ်မႃးဢွၼ်တၢင်းယဝ်ႉ”
“ယူဝ်ၶႄး မၼ်းဢမ်ႇပေႃးယူႇလီယူဝ်ႉၼေႃ ပီႈၸၢႆးၶမ်း”
“ၸႂ်ႈယူႇယူဝ်ႉ ... ယူဝ်ၶႄးမၼ်းၼၢဝ်ယူဝ်ႉ ၸၢႆးၶိူဝ်းၼႆႉ ပေႃးမၼ်းၼၢဝ်ၼႆ မၼ်းဢမ်ႇမိူၼ်ပိူၼ်ႈၵူၺ်း”
“မၼ်းယၢမ်ႈၼၢဝ်ၸိူင်ႉႁိုဝ် ပီႈၸၢႆးၶိူဝ်း”
“မၼ်းယၢမ်ႈ “ၼၢဝ်သႅင်” ဢိူဝ်ႈ”
ၼၢင်းမူဝ်ၶၢဝ်ဢမ်ႇပွင်ႇၸႂ်လႄႈ မၼ်းၼၢင်းႁူႇၼႃႈၽၢၵ်ႇ မၼ်းသေထၢမ်
“ၼၢဝ်သႅင် ၸိူင်ႉႁိုဝ်ၼႆႉ ပီႈၸၢႆးၶမ်း”
ၼၢင်းၸၢမ်သႅင်းတႄႉ လွင်ႈဢၼ် ၸၢႆးၶမ်းဝႃႈ“ၼၢဝ်သႅင်”ၼႆၼၼ်ႉ မၼ်းၼၢင်းၶိုၼ်းမႄး ပိၼ်ႈၵႂၢမ်းသေပွင်ႇဝႃႈ “ၼႅင်သၢဝ်” ၼႆ မၼ်းၼၢင်းႁူႉၵမ်းလဵဝ်ယဝ်ႉ မၼ်းၼၢင်းၸင်ႇထၢမ်ဝႃႈ
“မူဝ် ... မူဝ်ဢမ်ႇႁူႉႁႃႉ ၼၢဝ်သႅင်ၼႆႉ”
ၼၢင်းမူဝ်ၶၢဝ် ပႆႇဝူၼ်ႉပွင်ႇ ပႆႇႁူႉထိုင်လႄႈ မၼ်းၼၢင်း ၶိုၼ်းထၢမ်ဝႃႈ
“ၸၢမ်သႅင်း “ၼၢဝ်သႅင်” ၼႆႉ ပဵၼ်ၼၢဝ်ၸိူင်ႉႁိုဝ်ဢေႉ မူဝ်တႄႉ ယင်းဢမ်ႇယၢမ်ႈငိၼ်းသေပွၵ်ႈလႃႈ”
ၸၢႆးၶမ်းလႄႈ ၼၢင်းၸၢမ်သႅင်း လွမ်လွမ်ယုမ်ႉၶူဝ်ဝႆႉယူႇ။ ၼၢင်းၸၢမ်သႅင်းၸင်ႇလၢတ်ႈဝႃႈ
“မူဝ် ... ၼၢဝ်သႅင်မဵဝ်းၼႆႉ ဢီႈယႃမၼ်းႁႃသိုဝ်ႉယၢပ်ႇဝႆႉဢိူဝ်ႈ”
“တႄႉႁႃႉ ... ပီႈၸၢႆးၶမ်း”
“တႄႉဢိူဝ်ႈ ... တီႈတူၼ်ႈတီးၼႆႉ တေမီးႁိုဝ်ဢမ်ႇမီးႁိုဝ်ၵေႃႈ ဢမ်ႇႁူႉယဝ်ႉ”
“ပီႈၸၢႆးၶိူဝ်း ဢမ်ႇႁႃသိုဝ်ႉၵိၼ်ႁႃႉ ပီႈၸၢႆးၶမ်း”
“မိူဝ်ႈဝၼ်းၼၼ်ႉ မၼ်းဝႃႈတႄႉ ၶႂ်ႈသိုဝ်ႉၵိၼ်ယူႇၼႆယဝ်ႉ၊ ၵူၺ်းၵႃႈ မၼ်းဝႃႈ ငိုၼ်းၶမ်း ဢမ်ႇပေႃးမီးၼမ်ၼႆယဝ်ႉ”
ၼၢင်းမူဝ်ၶၢဝ် ပႆႇဝူၼ်ႉပွင်ႇလွင်ႈ“ၼၢဝ်သႅင်”ၼၼ်ႉသေဢိတ်းလႄႈ မၼ်းထၢင်ႇဝႃႈ ၸၢႆးၶိူဝ်းၼၢဝ်ယူႇတႄႉတႄႉၼႆယဝ်ႉ။
ၵွပ်ႈၼႆ လွင်ႈဢၼ်ၸၢႆးၶမ်းဝႃႈ ၸၢႆးမွၼ်းၶိူဝ်း ဢမ်ႇပေႃးမီးငိုၼ်းၼမ်ၼႆၼၼ်ႉၵေႃႈ မၼ်းၼၢင်းထၢင်ႇၸႂ်ႈတႄႉသေ မၼ်းၼၢင်းၸင်ႇထၢမ်ဝႃႈ
“ပီႈၸၢႆးၶမ်း ... ယႃႈယႃမဵဝ်းၼၼ်ႉ ၵႃႈၶၼ်မၼ်းယႂ်ႇဝႆႉႁႃႉ”
“ယႂ်ႇဢိူဝ်ႈ”
“ၵႃႈႁိုဝ်ဝႃႈ ... ပီႈၸၢႆးၶမ်း”
“မူဝ်ၶၢဝ် ထၢမ်တူၺ်းၸၢမ်သႅင်းလႄႈ”
“ၵႃႈႁိုဝ်ဝႃႇ ၸၢမ်သႅင်း ယႃႈယႃမဵဝ်းၼၼ်ႉ”
“မူဝ်တေ သိုဝ်ႉပၼ်လႆႈယူႇႁႃႉ”
“ပေႃးသၢင်ႇထုၵ်ႇၼႆတႄႉ တေသိုဝ်ႉလႆႈယူႇယူဝ်ႉ ၵႃႈႁိုဝ်ဝႃႈ”
“ယႃႈယႃၼၢဝ်သႅင်ၼၼ်ႉႁႃႉမူဝ်”
“ဢိူဝ်ႈ ... ယႃႈယႃၼၢဝ်သႅင် ဢၼ်ဝႃႈၼၼ်ႉဢိူဝ်ႈ”
“မူဝ် ... မူဝ်ဝူၼ်ႉတူၺ်းလီလီလေႃႇ ဢၼ်ပီႈၸၢႆးၶမ်းဝႃႈ “ၼၢဝ်သႅင်”ၼႆၼၼ်ႉ ပေႃးၶိုၼ်းပိၼ်ႈၵႂၢမ်းၼႆ ပဵၼ်“ၼႅင်သၢဝ်” ၼႆယဝ်ႉ၊ ၵႃႈၶၼ်မၼ်းတႄႉ ပေႃးမူဝ်တေသိုဝ်ႉယႃႈပၼ်ပီႈၸၢႆးၶိူဝ်း ၼႆတႄႉ ဢမ်ႇပေႃးၼမ်ၼင်ႇၵဝ်ႇ ႁဵင်ႁႃႈပၢၵ်ႇၵေႃႈတဵမ်ထူၼ်ႈယဝ်ႉ ၶိၵ်း ... ၶိၵ်း”
လွင်ႈဝႃႈၸၢႆးၶမ်း လႄႈ ၼၢင်းၸၢမ်သႅင်း တင်ႈၸႂ်ယွၵ်ႇ မၼ်းၼၢင်းၼႆ ၼၢင်းမူဝ်ၶၢဝ် ႁူႉထိုင်ၵႂႃႇလႄႈ မၼ်းၼၢင်း ပဵၼ်ဢၼ်လီဢၢႆၵႂႃႇသေ မၼ်းၼၢင်းဢဝ်သၢႆထူင်ပႃးမၼ်း ၽတ်ႉပၼ်ၼၢင်း ၸၢမ်သႅင်းယဝ်ႉ။
“ဢိုဝ်ႉႁိုဝ် ... ၸၢမ်သႅင်းၶဝ်ၼႆႉ ... မူဝ်ယူဝ်ဝႃႈပဵၼ်ယႃႈယႃတႄႉတႄႉၼႆၼႃး”
ၸၢႆးၶမ်းၵေႃႈ ၸင်ႇယုမ်ႉၶူဝ်သေဝႃႈ
“ႁေး ... ႁေး မူဝ်ၶၢဝ် ယႃႈယႃၼၢဝ်သႅင်ၼႆႉၵေႃႈ ပဵၼ် ယႃႈယႃမဵဝ်းၼိုင်ႈၼင်ႇၵဝ်ႇယဝ်ႉ ဢမ်ႇၸႂ်ႈႁႃႉ”
“ဢူဝ် ... ဢမ်ႇႁူႉ ဢမ်ႇႁူႉ ယႃႇပေမႃးထၢမ်မူဝ်”
ၼၢင်းၸၢမ်သႅင်း ၸင်ႇၶိုၼ်းဝႃႈ
“မူဝ် ... မိူဝ်ႈၵႆႈၼၼ်ႉ မူဝ်ဝႃႈ ပေႃးသၢင်ႇထုၵ်ႇ တေသိုဝ်ႉပၼ်လႆႈယူႇၼႆ ဢမ်ႇၸႂ်ႈႁႃႉ”
“မူဝ်ယူဝ်ဝႃႈ ... ပဵၼ်ဢီႈယႃဢၼ်ပိူၼ်ႈၶၢႆတႄႉတႄႉၼၼ်ႉ ၼႆဢိူဝ်ႈ”
“ယႃႈယႃၼၢဝ်သႅင်ၼႆၵေႃႈ ပိူၼ်ႈတေႃႈၶၢႆတႄႉတႄႉၼင်ႇၵဝ်ႇလႄႈ မူဝ် ၵႃႈၶၼ်မၼ်းတႄႉ ႁဵင်ႁႃႈပၢၵ်ႇၼႆႉ တိုၼ်းဢမ်ႇၸၢင်ႈ ယွမ်းသေဢိတ်းယဝ်ႉ ဢမ်ႇၸႂ်ႈႁႃႉ”
“ယႃႈယႃ မဵဝ်းၼႆႉ မူဝ်တႄႉ ငိၼ်းၵေႃႈပႆႇယၢမ်ႈငိၼ်း သိုဝ်ႉၵေႃႈဢမ်ႇမေႃသိုဝ်ႉ ၶၢႆၵေႃႈဢမ်ႇမေႃၶၢႆ ဢၼ်ယၢမ်ႈငိၼ်းယၢမ်ႈႁူႉ ယၢမ်ႈၶၢႆဝႆႉတႄႉ ပဵၼ်ပီႈၸၢႆးၶမ်းလႄႈ ၸၢမ်သႅင်းၵူၺ်းယဝ်ႉ၊ ၵွပ်ႈၼႆ ၶိူဝ်သွင်ၵေႃႉ သိုဝ်ႉၶၢႆတေႃႇၵၼ်လႃႈ”
ယွၼ်ႉပိူဝ်ႈၼၢင်းမူဝ်ၶၢဝ် ဝႃႈၼင်ႇၼႆ ၸၢႆးၶမ်းလႄႈ ၼၢင်းၸၢမ်သႅင်း ၶိုၼ်းပဵၼ်ဢၼ်ၼႃႈမႆႈ ၵႂႃႇတၢင်းသွင်ၵေႃႉယဝ်ႉ။ ၸၢႆး ၶမ်းၸင်ႇတွပ်ႇဝႃႈ
“မူဝ်ၶၢဝ် ... ပီႈၸၢႆးၶမ်းတႄႉ ဢမ်ႇၼၢဝ်မဵဝ်းၼၼ်ႉလူး ၸၢႆးၶိူဝ်းၵူၺ်းဢိူဝ်ႈ ... ၵႆႉၵႆႉၼၢဝ်သႅင်သေႇသေႇယဝ်ႉ”
“ဝၢႆးၼႆႉမႃး ပီႈၸၢႆးၶမ်းၵေႃႈ တေၼၢဝ်ယူႇဢမ်ႇႁၢင်ႉၵူၺ်း မူဝ်ႁူႉယူႇ ၵွပ်ႈၼႆ ပေႃးပီႈၸၢႆးၶမ်းၼၢဝ်တႄႉ လူဝ်ႁႂ်ႈၸၢမ်သႅင်း ႁႃယႃႈယႃမၼ်းပၼ်ၵူၺ်းယဝ်ႉ”
ၼၢင်းၸၢမ်သႅင်း လီဢၢႆၵႂႃႇလႄႈ မၼ်းၼၢင်းယၵ်းၸၼ်ပၼ်ၶႅၼ် ၼၢင်းမူဝ်ၶၢဝ်ႁႅင်းႁႅင်းယဝ်ႉ
“ဢႃး ... ၸုတ်ႉ ... ၸုတ်ႉ ၸၢမ်သႅင်းၼႆႉ ယၵ်းမူဝ် ႁႅင်းဝႃႈႁႅင်းယဝ်ႉ၊ ဢမ်ႇၶႂ်ႈယႃပၼ်ႁႃႉတေႃႈဝႃႈ”
ၼၢင်းၸၢမ်သႅင်း ဢၢင်ႈၶိုၼ်းႁႅမ်ၼၢင်းမူဝ်ၶၢဝ်လႄႈ ၼၢင်းမူဝ်ၶၢဝ်ၼႅတ်ႈဢႅၼ်ႇၵႂႃႇယူႇၽၢႆႇလင် ၸၢႆးၶမ်းသေ ဢဝ်ၸၢႆးၶမ်း ႁႄႉမၼ်းၼၢင်းဝႆႉယဝ်ႉ၊ ၸၢႆးၶမ်းၵေႃႈ ပဵၼ်ဢၼ်ယူႇယၢပ်ႇၼႂ်းၵႄႈ ၵၢင်ၶႃလႄႈ မၼ်းၸင်ႇဝႃႈ
“ဢူဝ် ... ၶိူဝ်သွင်ၵေႃႉၼႆႉ တိုၵ်ႉမႃးတေႃႇမီလမ်းၵၼ်ယူႇဝႃႇ လုၵ်ႈဢွၼ်ႇၵေႃႈဢမ်ႇၸႂ်ႈ ၵူၼ်းလူင်ၵေႃႈဢမ်ႇပဵၼ်”
“ၸၢင်ႈပဵၼ်သင်လႃႇ မူဝ်ၶဝ်ၶႂ်ႈတေႃႇလႄႇဢိူဝ်ႈ”
“ပေႃးၶႂ်ႈတေႃႇၵေႃႈ ဢႅၼ်ႇၵႂႃႇၵႆၵႆလေႃႇ”
“ဢမ်ႇဢႅၼ်ႇ ... လူဝ်ႇဢႅၼ်ႇပၼ်ႇ ပီႈၸၢႆးၶမ်းႁဵတ်းၼႆ တိၵ်းတိၵ်းၵူၺ်းယဝ်ႉ ၶႂ်ႈႁူႉၵေႃႈ”
“ၸုတ်ႉ ... ၶိူဝ်သွင်ၵေႃႉၼႆႉ ဝႃႈယၢပ်ႇၵျႃႉၼေႃ သင်ပဵၼ် လုၵ်ႈဢွၼ်ႇတႄႉ လူဝ်ႇဢဝ်ၶွၼ်ႉတၢပ်ႇပၼ်ၵေႃႉၵမ်းၵမ်းယဝ်ႉ”
“ၶိၵ်း ... ၶိၵ်း ...ၸၢမ်သႅင်းဝႃႈယၢပ်ႇသေမူဝ်ဢိူဝ်ႈ ပီႈၸၢႆးၶမ်း ၵွပ်ႈၼႆ ဢဝ်ၶွၼ်ႉတၢပ်ႇပၼ်မၼ်း ႁႅင်းႁႅင်း ဢွၼ်တၢင်းလေႃႇ”
ၼၢင်းၸၢမ်သႅင်း ႁဵတ်းၵဵင်ႈၸႂ်လမ်သေ ပၢႆႈၵႂႃႇၼင်ႈ တီႈတင်ႇတႂ်ႈတူၼ်ႈမႆႉဢၼ်ၼိုင်ႈယဝ်ႉ ၸၢႆးၶမ်းလႄႈ ၼၢင်းမူဝ်ၶၢဝ်ၵေႃႈ ၶိုၼ်းပႆၵႂႃႇၸူး တီႈမၼ်းၼၢင်းသေ ၵႂႃႇၼင်ႈလဵၼ်ႈၼိူဝ်တင်ႇၼၼ်ႉယူႇ ၼၢင်းမူဝ်ၶၢဝ်ၸင်ႇဝႃႈ
“ၸၢမ်သႅင်း ၸႂ်လမ်ၵႂႃႇတႄႉတႄႉယဝ်ႉႁႃႉ”
“ၸႂ်လမ်ၵႂႃႇတႄႉတႄႉဢိူဝ်ႈ”
“ဢၼ်ၸႂ်လမ်ၵႂႃႇၼၼ်ႉ လီသေပိူၼ်ႈယဝ်ႉ”
“မူဝ်ပွင်ႇဝႃႈသင်ၼႆႉ ၸၢမ်သႅင်းတႄႉ ဢမ်ႇႁူႉပွင်ႇယဝ်ႉ”
ၼၢင်းမူဝ်ၶၢဝ် ၸင်ႇယုမ်ႉႁၢင်ႈလီသေ လၢတ်ႈဝႃႈ
“ၸၢမ်သႅင်းၸူၺ်ႉတူၺ်းလီလီလေႃႇ ၵူၼ်းၵေႃႉၼိုင်ႈၼႆႉ ပေႃးဝႃႈ မၼ်းၼင်ႈယူႇတီႈၼႆႈၼႆ မၼ်းမီးဝႆႉ တီႈၼႆႈဢမ်ႇၸႂ်ႈႁႃႉ”
“ပေႃးၼင်ႈယူႇဝႆႉၵေႃႈ ႁူႉမီးဢိူဝ်ႈ မူဝ်”
“ပေႃးဝႃႈ မၼ်းၵႂႃႇယဝ်ႉယဝ်ႈၼႆလူး ၸွင်ႇမၼ်းတိုၵ်ႉမီး တီႈၼႆႈယူႇႁိုဝ်”
“ဢမ်ႇမီးၼႃး”
“ဢိူဝ်ႈ ... ဢၼ်မူဝ်ၶႂ်ႈဝႃႈၼၼ်ႉၵေႃႈ မိူဝ်ႈၵႆႈၼၼ်ႉ ၸၢမ်သႅင်းဝႃႈ“ၸႂ်လမ်ၵႂႃႇတႄႉတႄႉဢိူဝ်ႈ”ၼႆ ဢမ်ႇၸႂ်ႈႁႃႉ ပေႃးၸႂ်လမ်ၵႂႃႇၵေႃႈ ၸႂ်လမ်ၼၼ်ႉဢမ်ႇမီးယဝ်ႉ ဢမ်ႇၸႂ်ႈႁႃႉ ... ၵွပ်ႈၼႆ မူဝ်ၸင်ႇဝႃႈ ဢၼ်ၸႂ်လမ်ၵႂႃႇၼၼ်ႉ လီသေပိူၼ်ႈယဝ်ႉ” တွင်းဝႆႉလႄႈ”
“လီယဝ်ႉ ... လီယဝ်ႉ ၸၢမ်သႅင်းတေတွင်းဝႆႉတေႃႇၸူဝ်ႈ ဢေႃ ... မိူဝ်ႈၽုၵ်ႈၼႆႉ ပဵၼ်ဝၼ်းသဝ် ပဵၼ်ဝၼ်းဢိုတ်းႁဵၼ်း ဢမ်ႇၸႂ်ႈႁႃႉမူဝ်”
“ၸႂ်ႈဢိူဝ်ႈ ... ပဵၼ်ဝၼ်းၵိူတ်ႇမူဝ်ၵွၼ်ႇဢိူဝ်ႈ”
“ႁဵတ်းႁိုဝ် ... မူဝ်ပဵၼ်လုၵ်ႈဝၼ်းသဝ်ႁႃႉ ပိူၼ်ႈဝႃႈယိင်း တူဝ်ပၢႆၸၢႆးတူဝ်ငဝ်ႈၼႆ မူဝ်ၶၢဝ်ၼႆ လူဝ်ႇပဵၼ်လုၵ်ႈဝၼ်းၸၼ် ဢမ်ႇၸႂ်ႈႁႃႉ”
ၸိုဝ်ႈမူဝ် ... မိူဝ်ႈလဵၵ်ႉၼၼ်ႉ ႁွင်ႉဝႃႈ “ၼူၼ်းၼူၼ်း” ၼႆယဝ်ႉ၊ ယႂ်ႇမႃးၶိုၼ်းမႄႈလၢႆႈဝႃႈ မူဝ်ၶၢဝ်ၼူၼ်းၼႆဢိူဝ်ႈ ၵူၺ်ႈၵႃႈ တီႈလဵဝ်တႄႉ ၼူၼ်းၼၼ်ႉႁၢႆလၢႆသေ ၸူးပဵၼ်ဝႆႉ မူဝ်ၶၢဝ်ၼႆႉၵူၺ်းယဝ်ႉ ... ပွင်ႇၸႂ်ယဝ်ႉႁႃႉ”
“ပွင်ႇယဝ်ႉ ပေႃးၼႆ မိူဝ်ႈၽုၵ်ႈၼႆႉ ပဵၼ်ဝၼ်းၵိူတ်ႇမူဝ်ၼႆ လႄႈ မူဝ်တေလဵင်ႉသင်ၸၢမ်သႅင်းၶဝ် ... လၢတ်ႈလူး”
“မူဝ်ႁႃႉ ... တေလဵင်ႉ ဢိမ်ႇဢိမ်ႇ”
“ၸၢမ်းသႅင်း ၶဝ်တေၵိၼ် ဢိမ်ႇဢိမ်ႇ”
“ၶိၵ်း ၶိၵ်း မူဝ်တေလဵင်ႉၼမ်ႉၵတ်းဢိမ်ႇဢိမ်ႇဝႃႇ”
“ႁိုဝ်ႉ... ၸၢမ်သႅင်းယူဝ်ဝႃႈ လဵင်ႉသင်ၼႆၼႃး ပေႃးပဵၼ်ၼႆတႄႉ ဢမ်ႇၶႂ်ႈၵိၼ် ၵူဝ်လႆႈလွႆးၽႃႈ ... ၶိၵ်းၶိၵ်း”
“ဝႃႈတႄႉၵေႃႈ မူဝ်တေၵႂႃႇလဵင်ႉၶဝ်ႈ တီႈသႅင်ႇၶၢဝ်းၵတ်း မိူင်းတႆးလႆ”
“တႄႉႁႃႉ မူဝ်”
“တႄႉဢိူဝ်ႈ မူဝ်တိုၼ်းဢဵၼ်းဢၢၼ်းဝႆႉ ၸဵမ်မိူဝ်ႈဝၼ်းပုၼ်ႉယဝ်ႉ ႁဝ်းတင်းသီႇၵေႃႉၼႆဢိူဝ်ႈ”
ၸၢႆးၶမ်း ၸင်ႇဝႃႈ
“ပေႃးၸၢႆးၶိူဝ်းၼၢဝ်သေ ဢမ်ႇပဵၼ်ၸွမ်းၼႆလူး မူဝ်ၶၢဝ်”
“ဢမ်ႇၼၢဝ်ယူဝ်ႉ ယူဝ်ၶေး မၼ်းမီးၵၢၼ်လႄႈမၼ်းဢမ်ႇမႃးၶိုၼ်ႈႁဵၼ်းယူဝ်ႉ၊ မူဝ်တႄႉထၢင်ႇၸိူင်ႉၼႆၵူၺ်းယဝ်ႉ ပေႃးၼႆ မိူဝ်ႈၽုၵ်ႈမႃး ႁဝ်းသၢမ်ၵေႃႉ မိူဝ်းတူၺ်းမၼ်း တီႈႁိူၼ်းၶဝ်ၼေႃႈ ပီႈၸၢႆးၶမ်း”
“လီယူႇၼႃႇ ... ပီႈၸၢႆးၶမ်း တေမႃးႁွင်ႉမူဝ်ၶၢဝ်လႄႈ ၸၢမ်သႅင်းတီႈႁိူၼ်းမူဝ်ၶဝ်ၼႃႈ ၸၢမ်သႅင်းၵေႃႈ မႃးပႂ်ႉတီႈၼၼ်ႈလႄႈ”
ဝၢႆးသေၼၼ်ႉ ၶဝ်ၶိုၼ်းၵႂႃႇသိုပ်ႇၶိုၼ်ႈႁဵၼ်း ၸိူင်ႉၼင်ႇၵူႈ ဝၼ်းၼၼ်ႉယဝ်ႉ။