မွၵ်ႇလူင်ႇလဵဝ်/တွၼ်ႈသိပ်းသွင်
ၶၢဝ်းယၢမ်း မူတ်ႈၵဵင်ႈယူတ်းသဵင်ႈၵႂႃႇ ၶၢဝ်းၼိုင်ႈယဝ်ႉၶၢဝ်းၼိုင်ႈ ယၢမ်းၼိုင်ႈယဝ်ႉယၢမ်းၼိုင်ႈသေ ယၢမ်းလဵဝ်ႁွတ်ႈၽႅဝ်မႃး ၶၢဝ်းယၢမ်းဢၼ်ပိူၼ်ႈပိုတ်ႇၽုၺ်ႇၸၼ်ႉၸွမ်ယဝ်ႉလႄႈ တီႈၼႂ်း ဝၢင်းၸၼ်ႉၸွမ်တူၼ်ႈတီး လုၵ်ႈႁဵၼ်းၸၼ်ႉၸွမ်ၶဝ် ၵႂႃႇၵႂႃႇမႃးမႃး ၵိုၼ်းဝႆႉဢိုၵ်ႉဢိုၵ်ႉဝႆႉယူႇ။
ၸိူဝ်းလုၵ်ႈႁဵၼ်း ၸၼ်ႉၸွမ်ၶဝ်ၼႆႉၵေႃႈ တူၺ်းႁၼ်ၼႃႈၶဝ် ပဵၼ်ဢၼ်ၸူမ်းသိူဝ်းဝႆႉၵူႈၵေႃႉယဝ်ႉ ယွၼ်ႉပိူဝ်ႈ ၸိူဝ်းၶဝ်ၼၼ်ႉ ပဵၼ်လုၵ်ႈႁဵၼ်းၵူႈတီႈတီႈ ၵူႈဝဵင်းဝဵင်း မႃးယူႇသဝ်းၶိုၼ်ႈၸၼ်ႉၸွမ်ႁူမ်ႈ ၵၼ်လႄႈ မၢင်ၸိူဝ်းၵေႃႈ ပဵၼ်တႆးၵေႃႉၵၼ် ၶိုၼ်းမႃးထူပ်းႁၼ်ၵၼ် ပဵၼ်ဢၼ်ၸူမ်းသိူဝ်းတႄႉတႄႉ ၼႂ်းလုၵ်ႈႁဵၼ်းၸၼ်ႉၸွမ်ၼမ်ၼၼ်ႉ ၸၢႆးမွၼ်းၶိူဝ်းတႄႉ ၼုင်ႈၵူၼ်တႆးပႃးထူင်တႆးသေ ဢိၵ်ႇလူၺ်ႈတႆး ၵေႃႉမၼ်း ၸၢႆးၶမ်း ၶႃသွင်ၵေႃႉ လွမ်ႁႃတူၺ်းတႆးၵေႃႉၶႃၸိူ င်ႉၼင်ႇ ပိူၼ်ႈၸိူဝ်းၼၼ်ႉယူႇ၊ ၸၢႆးၶမ်းၸင်ႇထၢမ်
“မႂ်းတေသိုပ်ႇၵႂႃႇလႂ်ၼႆႉ ၸၢႆးၶိူဝ်း”
“ၵႂႃႇဢႅဝ်ႇတူၺ်းတီႈၸၼ်ႉၼိူဝ်ၼၼ်ႉ ၵမ်းၼိုင်ႈၵႂႃႈ”
“မႂ်းတေၵႂႃႇႁႃၽႂ် ... ၵႂႃႇႁႃသၢဝ်မႂ်းႁႃႉ”
“ဢိူဝ်ႈ ... လႃႈလီၵႂႃႇဢႅဝ်ႇတူၺ်းၵႂႃႈ”
ၶႃသွင်ၵေႃႉၵေႃႈ ဢုပ်ႇၵၼ်သေ ၽွင်းမိူဝ်ႈတိုၵ်ႉမႃးၶိုၼ်ႈ ၶူဝ်လႆၼၼ်ႉ ၸၢႆးမွၼ်းၶိူဝ်း လႆႈငိၼ်း သဵင်ႁွင်ႉၸိုဝ်ႈမၼ်းၶေႃႈၼိုင်ႈယဝ်ႉ။
“ပီႈၸၢႆးၶိူဝ်း”
ၸၢႆးမွၼ်းၶိူဝ်းၵေႃႈ ဝၢႆႇတူၺ်းၵေႃႉဢၼ်ႁွင်ႉ ၸိုဝ်ႈမၼ်း ဢၼ်တိုၵ်ႉလူင်းၶူဝ်လႆမႃးၼၼ်ႉယဝ်ႉ၊ လႆႈႁၼ်ၼၢင်းမူဝ်ၶၢဝ်လႄႈ ၼၢင်းၸၢမ်သႅင်းၼႆ ၸၢႆးမွၼ်းၶိူဝ်းၸူမ်းသိူဝ်းသေ
“ဢေႃႈ ... မူဝ်ၶၢဝ်လႄႈၸၢမ်သႅင်း”
ၼၢင်းမူဝ်ၶၢဝ် ၸင်ႇထၢမ်ဝႃႈ
“ပီႈၸၢႆးၶိူဝ်းၵုမ်ႇၵႂႃႇလႂ်ၼႆႉ မူဝ်ၶဝ်ႁႃပီႈၸၢႆးၶိူဝ်း ၸဵမ်မိူဝ်ႈၸဝ်ႉၼၼ်ႉယဝ်ႉ”
“ပီႈၸၢႆးၶိူဝ်းၵေႃႈ ႁႃမူဝ်ၶဝ်ၼင်ႇၵဝ်ႇဢိူဝ်ႈ”
“ႁဵတ်းသင်ပီႈၸၢႆးၶိူဝ်း ၽႅဝ်မႃးတူၼ်ႈတီးသေတႃႉ ယင်းဢမ်ႇမႃးဢႅဝ်ႇႁိူၼ်းမူဝ်ၶဝ်လႃႇ”
“ဢၢင်ႈမႃးၼင်ႇၵဝ်ႇဢိူဝ်ႇ ... ၵူၺ်းၵႃႈ ဢမ်ႇတၼ်းဢိတ်းၼိုင်ႈဢိူဝ်ႈ”
ၼၢင်းၸၢမ်သႅင်းၸင်ႇဝႃႈ
“မူဝ် ... ႁဝ်းၵုမ်ႇမႃးၸုၵ်းတီႈၶူဝ်လႆၼႆႉသေ ဢုပ်ႇၵၼ်ယူႇလႃႇ ၵိတ်ႇတၢင်းပိူၼ်ႈဢိူဝ်ႈ ၵႂႃႇႁဝ်းၵႂႃႇတၢင်ႇတီႈ”
ၼၢင်းမူဝ်ၶၢဝ်ၵေႃႈ ၸင်ႇၸူဝ်းဝႃႈ
“တႄႉဢိူဝ်ႈၼေႃ ... ပေႃးၼႆ ... ပီႈၸၢႆးၶိူဝ်း ၵႂႃႇႁဝ်းၵႂႃႇတီႈ ၵႅၼ်ႇတိင်း(သႅင်ႇတၢင်းၵိၼ်)”
“လီယဝ်ႉ ဢေႃႈ မူဝ်ၶၢဝ်လႄႈၸၢမ်သႅင်း ၼႆႉပဵၼ်တႆးၵေႃႉပီႈၸၢႆးၶိူဝ်းဢိူဝ်ႈ ၸိုဝ်ႈမၼ်းတႄႉ ပဵၼ်ၸၢႆးၶမ်း ယူႇၵုၼ်ႁိင်း ဢိူဝ်ႈ ... ၸၢႆးၶမ်း ၼႆႉပဵၼ်ၼၢင်းမူဝ်ၶၢဝ်လႄႈ ၼၢင်းၸၢမ်သႅင်း တူၼ်ႈတီး ... တွင်းဝႆႉလႄႈၼႃႈ”
ၸၢႆးၶမ်းၵေႃႈ ... ၸင်ႇတူင်ႉတၵ်ႉဝႃႈ
“ၸူမ်းယဝ်ႉ ... ၼၢင်းမူဝ်ၶၢဝ်လႄႈ ၼၢင်းၸၢမ်သႅင်း ယွၼ်ႉပိူဝ်ႈလႆႈႁူႉၸၵ်းမၵ်းၸိုဝ်ႈၵၼ်ၼင်ႇၼႆ”
“ဢေႃႈ ... မူဝ်ၶဝ်ၵေႃႈၸူမ်းယူႇ ... ပီႈၸၢႆးၶမ်း”
“ၸၢမ်သႅင်း ၶဝ်ၵေႃႈၸူမ်းယူႇ”
ၶဝ်ပႆမႃးသေ ၸၢႆးမွၼ်းၶိူဝ်းၶိုၼ်းသိုပ်ႇဝႃႈ
“မူဝ်ၶၢဝ် ၶဝ်လႄႈ ၸၢႆးၶမ်ႈတႄႉ တေၵႆႉၵႆႉႁၼ်ၵၼ်ယူႇၵႂႃႈ ဢွၼ်တၢင်းၼၼ်ႉ ၵူၺ်းၵႃႈ တေဢမ်ႇပႆႇမိုတ်ႈ ပႆႇႁူႉၸၵ်းၵၼ် ၵႂႃႈၼေႃႈ”
“ၸႂ်ႈဢိူဝ်ႈ ... ပီႈၸၢႆးၶိူဝ်း ... ဢၼ်မူဝ်တွင်းလီလီၼၼ်ႉ တႄႉ ပဵၼ်မိူဝ်ႈပီႈၸၢႆးၶမ်း ၵိၼ်ၺႃးမၢၵ်ႇၽိတ်ႉၽဵတ်းၽဵတ်း တီႈသႅင်ႇၶဝ်ႈသွႆးသေ ဢဝ်ၼင်ပွင်းဝူင်သႂ်ႇ ၼႂ်းဝၢၼ်ႇမူဝ်ၼၼ်ႉယဝ်ႉ”
ၶဝ်သိုပ်ႇဢုပ်ႇၵၼ်သေ မႃးၼင်ႈၵိၼ်တၢင်းၵိၼ်တီႈၵႅၼ်ႇတိင်းယဝ်ႉ ... ၸၢႆးမွၼ်းၶိူဝ်းၸင်ႇထၢမ်ဝႃႈ
“မူဝ်ၶၢဝ်လႄႈ ၸၢမ်သႅင်းဢဝ်ဝႆႉ ပၢႆးလႂ်ၼႆႉ”
“ဢဝ်ဝႆႉပၢႆးထၢတ်ႈဢိူဝ်ႈ ပီႈၸၢႆးၶိူဝ်းၶဝ်လူး ဢဝ်ဝႆႉပၢႆးလႂ်”
“ပၢႆးထၢတ်ႈၼင်ႇၵဝ်ႇယဝ်ႉ”
“တႄႉႁႃႉ ပေႃးၼႆတႄႉ မူဝ်ၶဝ်လူဝ်ႇလႆႈၶိုၼ်ႈႁွင်ႈႁဵၼ်း လဵဝ်ၵၼ်ဢိူဝ်ႈၼေႃႈ”
“ၸႂ်ႈဢိူဝ်ႈ”
ၸၢႆးၶမ်း ၸင်ႇထၢမ်ဝႃႈ
“ၸၢႆးၶိူဝ်းလႄႈ ၼၢင်းမူဝ်ၶၢဝ်ၶဝ် ႁူႉၸၵ်းၵၼ်မိုၼ်ႈၵၼ် ႁိုင်ယဝ်ႉႁႃႉ”
ၼၢင်းမူဝ်ၶၢဝ်ၸင်ႇတွပ်ႇဝႃႈ
“ႁူႉၸၵ်းၵၼ်တႄႉ ပဵၼ်မိူဝ်ႈၵိၼ်ၶဝ်ႈသွႆးသေ ပႃႈၶဝ်ႈသွႆး တုမ်ႉငိုၼ်းၽိတ်းၼၼ်ႉယဝ်ႉ”
“ဢၼ်မိုတ်ႈၵၼ်ၼၼ်ႉလႃႇ”
“ဢၼ်မိုတ်ႈၵၼ်ၼၼ်ႉတႄႉ ပဵၼ်မိူဝ်ႈၵႂႃႇပွႆးၽြႃးၽွင်ႇတေႃႇဢူး ၼႂ်းၼွင်ၼၼ်ႉယဝ်ႉ”
“ၸႂ်ႈတႄႉႁႃႉ ၸၢႆးၶိူဝ်း”
“ၸႂ်ႈဢိူဝ်ႈ ၸၢႆးၶမ်း မႂ်းဢမ်ႇၶႂ်ႈယုမ်ႇႁႃႉ”
“ယုမ်ႇၵေႃႈယုမ်ႇ ဢၢမ်းၵေႃႈလွမ်ဢၢမ်းဝႆႉယဝ်ႉ”
ၼၢင်းမူဝ်ၶၢဝ် ၸင်ႇထၢမ်ဝႃႈ
“ၵွပ်ႈသင်လႃႇ ပီႈၸၢႆးၶမ်း” “ဢေႃႈ ... ယူဝ်ဝႃႈ တေႁၼ်ၵၼ်တီႈသႅင်ႇၶဝ်ႈသွႆးၼၼ်ႉသေ ဢမ်ႇၶိုၼ်းႁၼ်ၵၼ်ထႅင်ႈယူဝ်ႉၼႆၵႂႃႈ”
ၼၢင်းၸၢမ်သႅင်း ၸင်ႇတွပ်ႇဝႃႈ
“ပေႃးဢမ်ႇပႆႇႁၢႆ ဢမ်ႇပႆႇတၢႆၼႆတႄႉ ဢမ်ႇၸၢင်ႈၶိုၼ်းၺႃး ၵၼ်ထႅင်ႈယဝ်ႉၼႆ ဢမ်ႇၸၢင်ႈတႅပ်းတတ်းလႆႈယူဝ်ႉ ပီႈၸၢႆးၶမ်း”
“ၸႂ်ႈဢိူဝ်ႈ ဢမ်ႇၸၢင်ႈၼင်ႇၵဝ်ႇ ၵူၺ်းၵႃႈ တႃႇတေၶိုၼ်းမႃးႁၼ်ၵၼ်သေ မိုတ်ႈၵၼ်ၼၼ်ႉ မၼ်းဢမ်ႇလႃႈလီၼပ်ႉတေႃႈပဵၼ် ဢမ်ႇၸႂ်ႈႁႃႉ ၼၢင်းၸၢမ်သႅင်းလႄႈ ၼၢင်းမူဝ်ၶၢဝ်”
ယွၼ်ႉပိူဝ်ႈ ၸၢႆးၶမ်းႁွင်ႉၸိုဝ်ႈၶႃသွင်ၵေႃႉဝႃႈ ၼၢင်းမူဝ်ၶၢဝ် ၼၢင်းၸၢမ်သႅင်း တိုၵ်ႉသႂ်ႇပႃး“ၼၢင်း”ယူႇၼႆလႄႈ ၼၢင်းမူဝ်ၶၢဝ် ဢမ်ႇပေႃးလႆႈၸႂ် ၵွပ်ႈၼႆမၼ်းၼၢင်းၸင်ႇဝႃႈ
“ပီႈၸၢႆးၶမ်း ယႃႇပေသႂ်ႇပႃး“ၼၢင်း”သေႁွင်ႉၸိုဝ်ႈ မူဝ် ၶဝ်လေႃႇ”
“ပေႃးသႂ်ႇပႃး ၼၢင်းၼႆ ပဵၼ်သင်လႃႇ”
“မူဝ်ၶဝ်ဢမ်ႇလႆႈၸႂ်”
“ပေႃးၼႆၵေႃႈ လူဝ်ႇလႆႈဝႃႈ ပႃႈလွႆမူဝ်ၶၢဝ် ပႃႈလွႆၸၢမ်သႅင်း ၼႆယူဝ်ႉ ... ႁေးႁေး”
ၶဝ်ဢွၼ်ၵၼ် ၸူမ်းၶူဝ်ၵႂႃႇၵူႈၵေႃႉသေ ၼၢင်းမူဝ်ၶၢဝ်ၸင်ႇဝႃႈ
“ဢူဝ် ... ပီႈၸၢႆးၶမ်းၼႆႉ ယႃႇပေဝႃႈၼၼ် ႁွင်ႉဝႃႈ မူဝ်ၶၢဝ် ၸၢမ်သႅင်းၼႆၵူၺ်းၵွၼ်ႇလေႃႇ”
ၶဝ်သိုပ်ႇၵိၼ်တၢင်းၵိၼ်ၶဝ်သေ ၼၢင်းၸၢမ်သႅင်း ၸင်ႇထၢမ်ဝႃႈ
“ပီႈၸၢႆးၶိူဝ်း မႃးယူႇတီႈလႂ် မႃးၶၢတ်ႈယူႇႁူင်းသဝ်းႁႃႉ”
“ဢမ်ႇၸႂ်ႈ ... မႃးးယူႇတီႈႁိူၼ်းမႄႈၼႃႉႁဝ်း ပွၵ်ႉပႃႇမႆႉဢိူဝ်ႈ”
“ပီႈၸၢႆးၶမ်းလူး မႃးယူႇတီႈလႂ်”
“ယူႇတီႈႁူင်းသဝ်းဢိူဝ်ႈ”
ၽွင်းၼၼ် ၼၢင်းမူဝ်ၶၢဝ်ၸင်ႇဝႃႈ
“ၵႂႃႇႁဝ်း ၵႂႃႇၼႂ်းႁွင်ႈႁဵၼ်း ... ယူဝ်ပိူၼ်ႈၶိုၼ်ႈႁဵၼ်းယဝ်ႉယူဝ်ႉ”
ၶဝ်ၵေႃႈသိုပ်ႇပႆမႃးၸူး ၼႂ်းႁွင်ႈႁဵၼ်းသေ မႃးၶိုၼ်ႈလိၵ်ႈ ၸိူင်ႉၼင်ႇပိူၼ်ႈယူႇ ... ဝၢႆသေၶိုၼ်ႈလိၵ်ႈယဝ်ႉ ၽွင်းယၢမ်းတၼ်းၼၼ်ႉ ၸၢႆးမွၼ်းၶိူဝ်းလႄႈ ၸၢႆးၶမ်း ဢွၵ်ႇႁူင်းႁဵၼ်းမႃးသေ မႃးပႆ လဵၼ်ႈၸွမ်းဝၢင်းႁူင်းႁဵၼ်းယူႇ ... ၸၢႆးၶမ်းၸင်ႇဝႃႈ
“ၸၢႆးၶိူဝ်း ... လႆႈမႃႈၶိုၼ်းၸၼ်ႉၸွမ်ၼႆႉ ၸွင်ႇမႂ်းသိူဝ်းၸႂ်ႁိုဝ်”
“ဢၼ်သိူဝ်းၸႂ်ၼၼ်ႉ ဢမ်ႇၸႂ်ႈပိူင်လူင်မၼ်းၵူၺ်း ၸၢႆးၶမ်း”
“ဢၼ်လႂ်လႃႇ ပဵၼ်ပိူင်လူင်မၼ်း မႂ်းဝႃႈ”
“ပိူင်လူင်မၼ်းတႄႉ ပဵၼ်တႃမႃးသွၼ်ႁဵၼ်းဢဝ်လိၵ်ႈလၢႆး ယဝ်ႉ ဢမ်ႇၸႂ်ႈႁႃႉ”
“ၸႂ်ႈယူႇလႆ ... ၵူၺ်းၵႃႈ ပိူၼ်ႈဝႃႈ “ပိင်ႇၺႃႇ”ၵေႃႈႁႃ “ၵိင်ႇၺႃႇ” သၢဝ်ၵေႃႈလူဝ်ႁႃၼႆၼႃႇ ... မႂ်းပႆႇၶႂ်ႈႁႃႁႃႉ”
“တေၵႂႃႇႁႃတီႈလႂ်မႂ်းဝႃႈ”
“ႁႃၼႂ်းၸၼ်ႉၸွမ်ၼႆႉဢိူဝ်ႈ ၸၢႆးၶိူဝ်း”
“ၵဝ်ၶႂ်ႈမိူဝ်းႁႃတီႈ ၵုၼ်ႁိင်းသူၵူၺ်းယဝ်ႉ ၸွင်ႇတေလႆႈ မႂ်းဝႃႈ”
“ဢဝ်ၸႂ်မႂ်းဝႃႈဢိူဝ်ႈ လႆႈယူႇၵႂႃႈ”
“မႂ်းၵေႃႈလူဝ်ႇလႆႈၸွႆႈႁႃပၼ်ဢိူဝ်ႈ ... ၸၢႆးၶမ်း”
“ၵဝ်ဢမ်ႇမေႃႁႃပၼ်မႂ်းဢေႉ ၸၢႆးၶိူဝ်း မႂ်းလႆႈၸႂ်ၵေႃႉလႂ် ၵေႃႈ မိူဝ်းႁႃဢဝ်လႄႈ”
“တႄႉႁႃႉ”
“တႄႉဢိူဝ်ႈ”
“ၵဝ်လႆႈၸႂ် ၼွင်ႉယိင်းမႂ်းဝႆႉယဝ်ႉ ၸၢႆးၶမ်း ႁေး ႁေး ဢမ်ႇၽွမ်ႉႁႃႉ”
ယွၼ်ႉပိူဝ်ႈၸၢႆးၶိူဝ်း ယွၵ်ႇမၼ်းၼင်ႇၼၼ်လႄႈ ၸၢႆးၶမ်း ၶၢၼ်ႉၶၢမ်ႇသေ ဢဝ်တႃမိုဝ်းထုပ်ႉပၼ်ၶႅၼ် ၸၢႆးၶိူဝ်းႁႅင်းႁႅင်း ၵမ်းၼိုင်ႈယဝ်ႉ
“ၼွင်ႉယိင်းၵဝ် ဢမ်ႇႁၢင်ႈလီတၢၼ်ႇၼၢင်းမူဝ်ၶၢဝ်သႄႈ ၸၢႆးၶိူဝ်း”
“ၵဝ်လႆႈႁၼ် ၶႅပ်းႁၢင်ႈၼွင်ႉယိင်းမႂ်းယူႇလူး ... ႁၢင်ႈလီယူႇ မႂ်းဢမ်ႇၽွမ်ႉႁႃႉ”
“ဢမ်ႇၽွမ်ႉ”
“ပေႃးၼႆ မႂ်းၽွမ်ႉၵေႃႉလႂ်လႃႇ ... ပုၼ်ႈတႃႇၵဝ်ၼႆႉ”
ၸၢႆးၶမ်း ၸင်ႇဢဝ်မိုဝ်းမၼ်း ပွတ်ႈၵၢင်းမၼ်းသေလၢတ်ႈဝႃႈ
“တႃႇမႂ်းၼႆႉတႄႉ ဢၼ်ၵဝ်ႁၼ်ဝႆႉတႄႉ ပဵၼ်ၼၢင်းမူဝ်ၶၢဝ်ၵူၺ်းယဝ်ႉ ၸၢႆးၶိူဝ်း မႂ်းၶတ်းၸႂ် ႁႂ်ႈလႆႈလႃႈ ၸွမ်းၼင်ႇသၢႆငၢႆ ဢၼ်ၵဝ်တူၺ်းႁၼ်ဝႆႉၼၼ်ႉတႄႉ သၢႆငၢႆမၼ်းလီယူႇၵူႈမဵဝ်ႈယဝ်ႉ”
ၸၢႆးၶိူဝ်းလႆႈငိၼ်းၼင်ႇၼၼ်သေ မၼ်းထူၺ်ႈၸႂ်လူင်ဝႆႉယူႇ ၸၢႆးၶမ်းၸင်ႇၶိုၼ်းသိုပ်ႇလၢတ်ႈ
“မႂ်းဢမ်ႇလႆႈၸႂ်ႁႃႉ ၸၢႆးၶိူဝ်း ပေႃးမႂ်းလႆႈၸႂ်ၼႆ လူဝ်ႇသိုပ်ႇၶၢဝ်းတၢင်းၵႂႃႇထႅင်ႈတိၵ်းတိၵ်းသေ လူဝ်ႇႁႂ်ႈလႆႈၽႅဝ်တီႈၸိၵ်းမၼ်းၼၼ်ႉ ၵူၺ်းၼႃႇ”
“တီႈလဵဝ်တႄႉ ႁဝ်းတိုၵ်ႉယူႇၼိူဝ်သဵၼ်ႈတၢင်းမိုတ်ႈၵၼ် ၵူၺ်းၸၢႆးၶမ်း”
“ထုင်းၸၢမ်ႇမၼ်းယဝ်ႉၼႆႉ ... ၸၢႆးၶိူဝ်း ... ထုင်းၵႂၢမ်းမီး ဝႆႉယူႇလူး လုၵ်ႉၼိူဝ်သဵၼ်ႈတၢင်းမိုတ်ႈၵၼ်သေ တေၸၢင်ႈၽႅဝ် ႁွတ်ႈသဵၼ်ႈတၢင်းႁၵ်ႉၵၼ်ယူႇၼႆဝႃႇ ၵွပ်ႈၼႆ ၼင်ႇႁိုဝ် တေဢမ်ႇတူၵ်းလိုၼ်းၼၼ်ႉ မႂ်းလူဝ်ႇလႆႈပႆဝႆႉ ဢွၼ်တၢင်းပိူၼ်ႈယဝ်ႉ ၵဝ်ထၢင်ႇတႄႉ”
“ၸၢႆးၶမ်း မၼ်းပဵၼ်ၵူၼ်းဝဵင်းလူင်ၵေႃႉၼိုင်ႈလႄႈ ယူဝ်ၶႄးမၼ်းပေႃးမီးဝႆႉယဝ်ႉႁိုဝ်ၵေႃႈ ဢမ်ႇႁူႉလူင်”
ၸၢႆးၶမ်းၵေႃႈ ၸင်ႇဝူၼ်ႉၵႅပ်ႉၼိုင်ႈသေ
“ၼႆႉတႄႉ ဢမ်ႇႁူႉယဝ်ႉ ဢွၼ်တၢင်းၼႆႉတႄႉ ၵဝ်ယၢမ်ႈ ႁၼ်ၶႃသွင်ၵေႃႉ ၸၢမ်သႅင်း ၶီႇၵႃးၸွမ်း ဢၢႆႈဢၼ်ႁဝ်းၽိတ်းၵၼ် တီႈလၢၼ်ႉၶၢႆတူၼ်ႈတီးၼၼ်ႉယူႇဢိူဝ်ႈမႂ်း ... ဢၢႆးၼၼ်ႉၵေႃႈၵႆႉၵႆႉ မိူဝ်းဢႅဝ်ႇႁိူၼ်းၶဝ်ဝႆႉ ၼင်ႇၵဝ်ႇဢိူဝ်ႈ ... ၵူၺ်းၵႃႈ ၶဝ်တေပဵၼ်ၸူႉၵၼ်ႁိုဝ် ဢမ်ႇပဵၼ်ႁိုဝ်ၼႆတႄႉ ၵဝ်ၵေႃႈဢမ်ႇႁူႉၼင်ႇၵဝ်ႇ ... ၶႄး ဢမ်ႇၸႂ်ႈယူဝ်ႉ”
“လွင်ႈၼႆႉ ၸၢႆးယွတ်ႈၵေႃႈ လၢတ်ႈၼႄၵဝ်ၼင်ႇၵဝ်ႇ ဢိူဝ်ႈ”
“မၼ်းဝႃႈႁိုဝ်လႃႇ”
“မၼ်းဝႃႈ ယူဝ်ၶႄး ပဵၼ်မၢဝ်ႇမၼ်းႁိုဝ် ဢမ်ႇႁူႉၼႆယဝ်ႉ”
“ၸၢႆးယွတ်ႈ လၢတ်ႈၼၼ်ႉၵေႃႈ တိုၵ်ႉပႃးယူဝ်ၶႄႈၼႆယူႇလႄႇ ပႆႇတႅတ်ႈၼႅတ်ႈၵွၼ်ႇ ၸၢႆးၶိူဝ်း တႃႇတေႁူႉလႆႈတႅတ်ႈတႅတ်ႈၼႅတ်ႈၼႅတ်ႈၼၼ်ႉတႄႉ ၵဝ်ႁၼ်ဝႆႉလၢႆးၼိုင်ႈယဝ်ႉ”
“ၸိူင်ႉႁိုဝ် လၢတ်ႈလူး”
“ၸၢင်ႈၵႂႃႇယၢပ်ႇသင် ၵႂႃႇထၢမ်တူၺ်းတူဝ်ၼၢင်းမူဝ်ၶၢဝ်ႁေ ယဝ်ႉၼႃႇ”
“တေၵႂႃႇႁဵတ်းႁိုဝ်ထၢမ်လႃႇ”
“ဢေႃႈ ထၢမ်ဝႃႈဢၢႆႈဢၼ်ႁေႃႈၵႃးလႅင် ဢၼ်ႁဝ်ႈၽိတ်းၵၼ် တီႈလၢၼ်ႉၶၢႆတူၼ်ႈတီးၼၼ်ႉ ပဵၼ်ၸူႉၼၢင်းမူဝ်ၶၢဝ်ႁႃႉၼႆဢိူဝ်ႈ”
“မႂ်းတေ ႁတ်းထၢမ်ယူႇႁႃႉ ၸၢႆးၶမ်း”
“ႁတ်းၵႂႃႈ ... ၵႂႃႇႁႃးၵႂႃႇထၢမ်တီႈလဵဝ်”
“တႄႉႁႃႉ”
“တႄႉဢိူဝ်ႈ ... ၵႂႃႇ ... မႃးလႄႈ”
ၸၢႆးမွၼ်းၶိူဝ်းၵေႃႈ လႃႈလီပႆၸွမ်းလင် ၸၢႆးၶမ်းမႃးယဝ်ႉ ၶႃသွင်ၵေႃႉ လႆႈႁၼ်ၼၢင်းမူဝ်ၶၢဝ်လႄႈ ၼၢင်းၸၢမ်သႅင်းတိုၵ်ႉ ၼင်ႈတင်ႇတီႈတႂ်ႈတူၼ်ႈမႆႉ ဢၼ်ၼိုင်ႈသေ ဢုပ်ႇၵၼ်ဝႆႉယူႇ ၸၢႆးၶမ်း ၸင်ႇဝႃႈ
“ၼႄႈ ... ၸၢႆးၶိူဝ်း ၶႃသွင်ၵေႃႉ မီးတီႈၼၼ်ႈဢိူဝ်ႈ ၵႂႃႇ ႁႃးၵႂႃႇ မႂ်းဢမ်ႇႁတ်းႁႃႉ ... မႂ်းၵူဝ်ႁႃႉ”
ၸၢႆးမွၼ်းၶိူဝ်းၵေႃ ဢမ်ႇၶႂ်ႈၶၢမ်ႇလႄႈ မၼ်းၸင်ႇဝႃႈ
“ႁတ်းၵႂႃႈ ... ၵူဝ်သင် ... ၵႂႃႇပေႃးၼႆ”
ၶႃသွင်ၵေႃႉၵေႃႈ ပႆမႃးၸူးတီႈၼၢင်းၸၢမ်သႅင်းၶႃ ၼၢင်းမူဝ်ၶၢဝ်ယဝ်ႉ ၸၢႆးမွၼ်ႈၶိူဝ်းတႄႉ ႁူဝ်ၸႂ်လွမ်တွတ်ႇတိုၵ်ႉတိုၵ်ႉဝႆႉယူႇ ၼႂ်းၸႂ်မၼ်းတႄႉ ဝူၼ်ႉဝႃႈ မၼ်းလွမ်ၵူဝ်ၸၢႆးၶမ်းၵႂႃႇထၢမ် ၸိူင်ႉၼင်ႇ ဢၼ်ၶႃလၢတ်ႈၵၼ်မႃးၼၼ်ႉယူႇ ... ၵၢင်ၸႂ်ၸၢႆးၶမ်းၼႆႉ မၢင်ပွၵ်ႈပွၵ်ႈၵႆႉၵႆႉလႃႈလီႈႁတ်းလၢတ်ႈႁတ်းၸႃပႅတ်ႈ တႄႉတႄႉလႄႈ ၸၢႆးမွၼ်းၶိူဝ်း ပဵၼ်ဢၼ်မႆႈၸႂ်တႄႉ တႄႉယဝ်ႉ ... ၼၢင်းမူဝ်ၶၢဝ် ႁၼ်ၶႃသွင်ၵေႃႉမႃး လႄႈ မၼ်းၼၢင်းၸင်ႇဝႃႈ
“ဢေႃႈ ... ပီႈၸၢႆးၶမ်းလႄႈ ပီႈၸၢႆးၶိူဝ်း မႃးၼင်ႈလႄႈ”
ၸၢႆးမွၼ်းၶိူဝ်းၵေႃႈ မႃးၼင်ႈႁိမ်းၼၢင်းမူဝ်ၶၢဝ်ဝႆႉယဝ်ႉ၊ ၸၢႆးၶမ်းတႄႉ ၼင်ႈႁိမ်းၸၢႆးၶိူဝ်းဝႆႉယူႇ ၼၢင်းမူဝ်ၶၢဝ်ၸင်ႇဝႃႈ-
“ပီႈၸၢႆးၶိူဝ်းၶဝ် ဢုပ်ႇၵၼ်ဢီႈသင်လၢႆလၢႆ မိူဝ်ႈၵႆႈၼၼ်ႉ မူဝ်ၶဝ်ယူႇတီႈၼႆႈသေတူၺ်းၵႂႃႇၼႆႉ သမ်ႉပေႃး ပဵၼ်တိၼ်ပဵၼ်မိုဝ်းသေ ဢုပ်ႇၵၼ်ယူႇတႄႉတႄႉဝႃႈဝႃႈ ဝႆႉယဝ်ႉ”
ၸၢႆးမွၼ်းၶိူဝ်းပႆႇၸၢင်ႈတွပ်ႇသင် ၸၢႆးၶမ်းၸင်ႇဝႃႈ
“ဢေႃႈ ... ႁႃးသွင်ၵေႃႉဢုပ်ႇၵၼ် လွင်ႈႁႃးသွင်ၵေႃႉသေ ဢၢင်ႈမႃးထၢမ်မူဝ်ၶၢဝ် မဵဝ်းၼိုင်ႈယဝ်ႉ”
“တႄႉႁႃႉ ... ထၢမ်လႄႈ ... ၶႂ်ႈထၢမ်သင်ၵေႃႈ”
ၸၢႆးၶမ်းလွမ်ယုမ်ႉတူၺ်း ၸၢႆးၶိူဝ်းသေ
“ၸၢႆးၶိူဝ်း ... တေလႆႈထၢမ်ယူႇႁႃႉ”
ၸၢႆးၶိူဝ်း ပဵၼ်ဢၼ်ယူႇယၢပ်ႇလိူတ်ႇမႆႈၵႂႃႇတၢင်းတူဝ်သေ မၼ်းၸၢႆးတေလႆႈဝႃႈႁိုဝ်ၵေႃႈ ဢမ်ႇႁူႉယဝ်ႉ တေဝႃႈ“ယႃႇပေထၢမ် ၼႆႁိုဝ်” ပေႃးဝႃႈၼၼ် ၸၢႆးၶမ်းသမ်ႉ တေဝႃႈတီႈမၼ်း “ဢမ်ႇမီး တၢင်းႁတ်းႁၢၼ်” ပေႃးဝႃႈ “ထၢမ်လႄႈ”ၼႆ ၸၢႆးၶမ်းသမ်ႉတေဝႃႈ ၸၢႆးၶိူဝ်းၸႂ်ႉထၢမ်ၼႆသေ မၼ်းသမ်ႉတေဢမ်ႇလီ မၼ်းၵုမ်ႇဝူၼ်ႉ ၼင်ႇၼႆသေ ပဵၼ်ဢၼ်ၵပ်ႉႁိပ်ႇတိပ်ႇၸႂ်ဝႆႉယူႇ မၼ်းပႆႇၸၢင်ႈ တွပ်ႇဝႃႈႁိုဝ် ၼၢင်းမူဝ်ၶၢဝ်ၶႃၵေႃႈ ပႂ်ႉထွမ်ႇဝႆႉယူႇ ၸၢႆးၶမ်း ၸင်ႇၶိုၼ်းဝႃႈ
“ၸၢႆးၶိူဝ်း တေလႆႈထၢမ်ယူႇႁႃႉ ၵဝ်ဝႃႈ”
ၸၢႆးၶိူဝ်းၵေႃႈ တေဝႃႈႁိုဝ်ၵေႃႈ ပႆႇသၢင်ႇထုၵ်ႇလႄႈ မၼ်း ပဵၼ်ဢၼ်ႁူဝ်ၸႂ်တွတ်ႇတိုၵ်ႉတိုၵ်ႉသေ လၢတ်ႈဢွၵ်ႇသူပ်းမၼ်းၵႂႃႇၼင်ႇ ၼႆယဝ်ႉ။
“ဢဝ်မႂ်းဝႃႈလႃႈ”
ၸၢႆးၶမ်းၵေႃႈ လွမ်တူၺ်းၸၢႆးၶိူဝ်း လွမ်တူၺ်းၼၢင်းမူဝ်ၶၢဝ် သေထၢမ်ဝႃႈ
“ၸွင်ႇမူဝ်ၶၢဝ် ... မီး ... ဢေႃႈ ဢိူဝ်ႈ ... ၸွင်ႇၵႂႃႇသိုဝ်ႉ ပပ်ႉယဝ်ႉႁိုဝ်”
လႆႈငိၼ်းၸၢႆးၶမ်းထၢမ်ၵႂႃႇၼင်ႇၼႆ ၸၢႆးၶိူဝ်းပဵၼ်ဢၼ် လူမ်ၸႂ်ၵႂႃႇၵမ်းလဵဝ်ယဝ်ႉ ၼၢင်းမူဝ်ၶၢဝ်ၸင်ႇတွပ်ႇဝႃႈ
“ပႆႇၵႂႃႇသိုဝ်ႉၵွၼ်ႇ ၵူၼ်းတိုၵ်ႉၼမ်ၼႃႇၽႅဝ်ဢိူဝ်ႈ ပီႈၸၢႆးၶမ်းၶဝ်ၼႃႇ သိုဝ်ႉယဝ်ႉႁႃႈ”
“ပႆႇၼင်ႇၵဝ်ႇ ... ပေႃးမူဝ်ၶၢဝ်လႄႈ ၸၢမ်သႅင်းဢမ်ႇၶႂ်ႈၵႂႃႇ ၽိုတ်ႉၵႄႈၵူၼ်းၼမ်ၼႆ ႁႃးသွင်ၵေႃႉ ၸၢႆးၶိူဝ်း လၢတ်ႈၵၼ်ဝႃႈ ဢၢင်ႈၵႂႃႇသိုဝ်ႉပၼ်ၼႆၵႂႃႈ”
“တႄႉႁႃႉ ... ပီႈၸၢႆးၶိူဝ်း”
ၸၢႆးၶိူဝ်းၵေႃႈ လႃႈလီႈလႅၼ်တွပ်ႇဝႃႈ
“တႄႉ ... တႄႉဢိူဝ်ႈ ... မူဝ်ၶၢဝ်”
“ပေႃးၼႆ ... မိူဝ်ႈၽုၵ်ႈၵႂႃႇသိုဝ်ႉပၼ်မူဝ်ၶဝ်ၼႃႈ”
“လႆႈယူႇ”
ၶဝ်သိုပ်ႇဢုပ်ႇၵၼ် ထႅင်ႈတၢၼ်ႇတၢၼ်သေ ၶိုၼ်းၵႂႃႇသိုပ်ႇ ၶိုၼ်ႈႁဵၼ်းယဝ်ႉ။