မွၵ်ႇလူင်ႇလဵဝ်/တွၼ်ႈသိပ်းသီႇ
ဝၼ်းမိူဝ်ႈၼႆႉ ပဵၼ်ဝၼ်းသဝ်
ၸၢႆးၶမ်း ၼၢင်းမူဝ်ၶၢဝ် ၼၢင်းၸၢမ်သႅင်း ၶဝ်သၢမ်ၵေႃႉ ၸူဝ်းၵၼ်သေ မႃးၸူးတီႈႁိူၼ်း ၸၢႆးမွၼ်းၶိူဝ်းၶဝ်ယဝ်ႉ၊ ၶဝ်သၢမ်ၵေႃႉ ပႆၶဝ်ႈမႃး ၼႂ်းဝၢင်းႁိူၼ်းယူႇ လႆႈမႃးႁၼ်ၸၢႆးမွၼ်းၶိူဝ်းတိုၵ်ႉ ၸင်ႇႁႃမႄးႁဵတ်းယဝ်ႉ တီႈလဵၼ်ႈႁႅင်းမၼ်းၼၼ်ႉၵူၺ်း လွင်ႈဝႃႈ ၶဝ်သၢမ်ၵေႃႉ ၶဝ်ႈမႃးသေ မႃးလၵ်ႉလွမ်တူၺ်းမၼ်းၼၼ်ႉယူႇၼႆ မၼ်းပႆႇႁူႉထိုင် မႆႉသီႇလၵ်းသွင်ႁၢဝ်း(ပႃး)မၼ်းၼၼ်ႉ ၵိုမ်းမၼ်ႈ ဢမ်ႇၵိုမ်းမၼ်ႈၼႆ မၼ်းၼၢဝ်ႉသေ ၶွၼ်းတူၺ်းယူႇ မၼ်းၸင်ႇလွမ် လွမ်ဝႃႈ
“ႁိုဝ်ႉ ... ၵမ်းၼႆႉတႄႉ ၵိုမ်းမၼ်ႈလီၼႃႇယဝ်ႉ၊ ၵဝ်တေ လဵၼ်ႈႁႅင်းသေ ဝူတူၺ်းၵွၼ်ႇ”
မၼ်းၸၢႆးလွၼ်ႈသိူဝ်ႈမၼ်းဝႆႉသေ ၶိုၼ်းလဵၼ်ႈပႃးမၼ်းယဝ်ႉ၊ မၼ်းမႃးယိပ်းၼဵင်ႇၶိုၼ်ႈ မႆႉႁၢဝ်းသွင်ၽၢႆႇၼၼ်ႉသေ ဝူၶိုၼ်ႈ ဝူလူင်း ဝူၵႂႃႇ ဝူမႃး မဝ်တူဝ်မဝ်ၸႂ်ယူႇ၊ မၼ်းၸၢႆးပဵၼ်ၵူၼ်းဢၼ် ယၢမ်ႈလဵၼ်ႈပႃးႁိုင်ယဝ်ႉလႄႈ မၢင်ၵမ်းမၢင်ၵမ်း မၼ်းၸၢႆးယုၵ်ႉပူၵ်း တိၼ်မၼ်းသုင်သုင်သေ ၶိုၼ်းပွႆႇတူဝ်မၼ်းလူင်း တီႈတႂ်ႈ ၶိုၼ်းယုၵ်ႉၶိုၼ်ႈ မၢင်ပွၵ်ႈယင်းလိမ်ႇတူဝ်သေ လၢႆႈ မိုဝ်းမၼ်းၼိူဝ်မႆႉပႃး ၼၼ်ႉၵွၼ်ႇယဝ်ႉ။ ၶဝ်သၢမ်ၵေႃႉၼၼ်ႉၵေႃႈ ငဝ်တူၺ်းမၼ်းၸၢႆးဝႆႉယူႇ ၽွင်းမိူဝ်ႈမၼ်းၸၢႆး ပူၵ်းတိၼ်ၶိုၼ်ႈသေ လၢႆႈမိုဝ်းၼၼ်ႉ လႆႈ ႁၼ်ၼင်ႇၼၼ် ၼၢင်းမူဝ်ၶၢဝ်တႄႉ မၼ်းၼၢင်းလွမ်လွမ် ၸႂ်ၶိုၼ်ႈဝႆႉယူႇ ၸၢႆးၶိူဝ်းဝူၵႂႃႇဝူၶိုၼ်းၼင်ႇၼၼ် မၼ်းႁိူဝ်ႉယဝ်ႉလႄႈ ၵမ်းလိုၼ်းသုတ်းၼႆႉ မၼ်းဢဝ်တိၼ်မၼ်း တင်းသွင်ၶွၼ် ၵၢႆႇပၢႆႉၼိူဝ် မႆႉႁၢဝ်း ၶိုၼ်ႈၼင်ႈၼိူဝ်မႆႉႁၢဝ်းသေ ထူၺ်ႈၸႂ်လူင်ႁႅင်းႁႅင်း ၵမ်းၼိုင်ႈယဝ်ႉ။
ၶဝ်သၢမ်ၵေႃႉၼၼ်ႉ ဢမ်ႇႁတ်းတၵ်းသဵင်သင် ၸၢႆးၶမ်း ၼႄတိၼ်ၼႄမိုဝ်းသေ ယႃႇပေၽူမ်ႈမေႃး ပႂ်ႉတူၺ်းထႅင်ႈၵွၼ်ႇၼႆယဝ်ႉ၊ ၸၢႆးၶိူဝ်းၵေႃႈ လိုဝ်ႈႁိူဝ်ႉသေ ႁိူဝ်ႉမၼ်းပေႇၵႂႃႇတၢၼ်ႇတၢၼ်ႇယဝ်ႉ လႄႈ မၼ်းပဵၼ်ဢၼ်သိူဝ်းၸႂ်ယူႇ မၼ်းၸင်ႇဝတ်ႉၵႂၢမ်း“ၶၢၼ်ၸႂ် ၸၢႆးႁၵ်ႉမႅၼ်ႈသူ” ၼၼ်ႉသေ မႄးသိမ်း ၶွၼ်ႉၸွၵ်းလဵၵ်းလိူဝ်ႈမၼ်း ၸိူဝ်းၼၼ်ႉယူႇ...
✽ တေႁၵ်ႉၼၢင်းၵေႃႈ ၼၢင်းမိူၼ်လၢဝ်မီးတီႈသုင်
တၢင်းႁၵ်ႉဢွၼ်ႇပီႈ ယိုၼ်ႈဢမ်ႇထိုင် ဢၢၼ်းတေၶိုင်ၼႆႉ
မီးတၢင်းမႆႈၸႂ်ယူႇ ... ၶၢၼ်ၸႂ်ၸၢႆးႁၵ်ႉမႅၼ်ႈသူ
မၼ်းၽိဝ်လူမ်းသေ သိုပ်ႇဝတ်ႉၵႂၢမ်း တေႃႇပေႃးသုတ်းယဝ်ႉ ၶဝ်သၢမ်ၵေႃႉလွမ်လွမ် ယုမ်ႉတေႃႇၵၼ်သေ လွမ်ထွမ်ႇဝႆႉယူႇ။
✽ ဢေႃး ... သၢဝ်ၼွင်ႉၼၢင်းဢွၼ်ႇဢိူၺ် ဢမ်ႇထၢင်ႇ တေလႆႈမႃး ထူပ်းၺႃးသူ ယၢပ်ႇၸႂ်ပီႈႁဝ်း မႆႈၸွမ်းၵွပ်ႈသူၼၢင်း ၶၢၼ်ၸႂ်ပီႈၸၢႆး ႁၵ်ႉမႅၼ်ႈသူ”
ပေႃးဝႃႈမၼ်းၸၢႆးဝတ်ႉၵႂၢမ်းၵိုတ်းၵႂႃႇယဝ်ႉၼႆႉ ၸၢႆးၶမ်း ဢွၼ်ၶႃသွင်ၵေႃႉ တူပ်းမိုဝ်းလႄႈ သဵင်တူပ်းမိုဝ်းၶဝ်သၢမ်ၵေႃႉ လင်မေႃးလူင်ၵႂႃႇယဝ်ႉ။
“ပပ်ႉ ... ပပ်ႉ ... ပပ်ႉ ... ပပ်ႉ ... ပပ်ႉ”
လႆႈငိၼ်းသဵင်တူပ်းမိုဝ်းလႄႈ ၸၢႆးၶိူဝ်းတူၵ်းၸႂ်သေ ၼႅတ်ႈဝၢႆႇတူၺ်းၽႂ်းၽႂ်းယဝ်ႉ ၶဝ်သၢမ်ၵေႃႉၼၼ်ႉ ပႆႇမႃးၸူး တီႈမၼ်းသေ ၸၢႆးၶမ်းၸင်ႇဝႃႈ
“ႁေး ... ႁေး ... ၸၢႆးသၢႆမႅဝ်းၵေႃႈ သဵင်လီၵျႃႉ”
ၶဝ်ဢွၼ်ၵၼ်ၸူမ်းၶူဝ်ယူႇ ၸၢႆးမွၼ်းၶိူဝ်းလွမ်လွမ် လီဢၢႆတူဝ်မၼ်းၶိုၼ်းယူႇ မၼ်းၸင်ႇထၢမ်ဝႃႈ
“သူ သၢမ်ၵေႃႉ ၽႅဝ်မႃးႁိုင်ယဝ်ႉႁႃႉ”
“ၽႅဝ်မႃးၸဵမ်မိူဝ်ႈ မႂ်းတေႇဝူပႃးၼၼ်ႉယဝ်ႉ”
“တႄႉႁႃႉ ... သူဢၢင်ႈၵႂႃႇလႂ်ၼႆႉ”
“ႁဝ်းမႃးဢႅဝ်ႇမႂ်းဢိူဝ်ႈ မိူဝ်ႈဝႃး ႁဵတ်းသင်မႂ်းဢမ်ႇၶိုၼ်ႈႁဵၼ်း”
“ၵဝ်မၢင်ႉမႄးႁဵတ်း တီႈလဵၼ်ႈႁႅင်ႈၼႆႉဢိူဝ်ႈ”
“ယူဝ်ဝႃႈ မႂ်းဢမ်ႇယူႇလီၼႆၼႃး”
“ယူႇလီယူႇ”
“ႁဝ်းထၢင်ႇမႂ်း ၼၢဝ်သႅင်ၼႆဢိူဝ်ႈ”
လွင်ႈဝႃႈၼၢဝ်သႅင်ၼၼ်ႉ ၸၢႆးမွၼ်းၶိူဝ်းႁူႉၵမ်းလဵဝ်ယဝ်ႉ၊ မၼ်းၸင်ႇတွပ်ႇဝႃႈ
“ႁေး ႁႄး ... ဢမ်ႇၸႂ်ႈၵူၺ်း ၼၢဝ်မဵဝ်းၼၼ်ႉတႄႉႁဝ်း ပႆႇႁတ်းၼၢဝ် ယႃႈယႃမၼ်းႁႃယၢပ်ႇဢိူဝ်ႈ”
ၼၢင်းၸၢမ်သႅင်း ၸင်ႇဝႃႈ
“ပေႃးပီႈၸၢႆးၶိူဝ်း ၼၢဝ်သႅင်တႄႉ ဢီႈယႃမၼ်းၸၢမ်သႅင်း တေႁႃပၼ်လႆႈယူူႇၵူၺ်း ပေႃးဢမ်ႇယုမ်ႇၵေႃႈ ၼၢဝ်တူၺ်းလႄႈ”
“တႄႉႁႃႉ ၸၢမ်သႅင်း ... မီးတီႈလႂ်”
“ဢူဝ် ... ၼႆႉတႄႉ ပေႃးပီႈၸၢႆးၶိူဝ်းၼၢဝ်မႃးၵွၼ်ႇၵႂႃႇ ၸင်ႇတေၸၢင်ႈၼႄယဝ်ႉ တီႈလဵဝ်တႄႉ ပႆႇၸၢင်ႈၼႄၵွၼ်ႇ”
“ၸၢမ်သႅင်း ပိူၼ်ႈဝႃႈ... Prevention is better than cure လွင်ႈၵႅတ်ႇၶႄဝႆႉၼႆႉ လီသေ ယူတ်းယႃဢဝ်ၼႆ ဢမ်ႇၸႂ်ႈႁႃႉ၊ ၵွပ်ႈၼႆ တႃႇတေဢမ်ႇၼၢဝ်သႅင်ၼၼ်ႉ ထုၵ်ႇလီၵႅတ်ႇၶႄဝႆႉယဝ်ႉ ယႃယႃႈ ဢၼ်ၸၢမ်သႅင်းတေႁႃပၼ်ၼႆၼၼ်ႉ မီးတီႈလႂ်”
ၼၢင်းၸၢမ်သႅင်း ၸင်ႇၶိုၼ်းဝႃႈ
“ပေႃးၶႂ်ႈလႆႈတီႈလဵဝ်ၼႆ ၸၢမ်သႅင်းတႄႉ လူဝ်ႇၸႂ်ႉႁႂ်ႈမူဝ် ၵႂႃႇႁႃမႃးပၼ်ၵူၺ်းယဝ်ႉ”
လွင်ႈဝႃႈၼၢင်းၸၢမ်သႅင်း တေဝႃႈမႃးၼင်ႇၼႆၼႆ ၼၢင်းမူဝ်ၶၢဝ်ၵေႃႈ လွမ်လွမ်ႁူႉဝႆႉထႃႈယဝ်ႉ ၵွပ်ႈၼႆ မၼ်းၼၢင်းၸင်ႇၶိုၼ်းတွပ်ႇဝႃႈ
“မူဝ်တေၵႂႃႇႁႃပၼ် တၢင်းပၢင်လွင်းၼၼ်ႉလႆ ပီႈၸၢႆးၶိူဝ်း”
ၸၢႆးၶမ်း ၸင်ႇဝႃႈ
“ႁေႉ ... ၸၢႆးၶိူဝ်း ... ယႃႈယႃၼၢဝ်သႅင်မႂ်း မီးဝႆႉတၢင်း ပၢင်လွင်းၼၼ်ႉႁႃႉ”
“ဢမ်ႇၸႂ်ႈၵူၺ်း ... ဢမ်ႇမီး ... မူဝ်ၶၢဝ်လႃႈလီဝႃႈဢိူဝ်ႈၼၼ်ႉ မီးတီႈၵုၼ်ႁိင်းသူဢိူဝ်ႈ မႂ်းၶႂ်ႈႁူႉၵေႃႈ”
ၼၢင်းၸၢမ်သႅင်း ၸင်ႇၶိုၼ်းဝၢႆႇတူၺ်း ၸၢႆးၶမ်းသေထၢမ်ဝႃႈ
“ၼႄႈ ... ပီႈၸၢႆးၶမ်း ၸိုင်ဝႃႈ မီးတီႈၵုၼ်ႁိင်းၼႆလႃႇ ပီႈ ၸၢႆးၶမ်း ဢမ်ႇႁူႉၸၵ်းႁႃႉ လၢတ်ႈၼႄၸၢမ်သႅင်းၶဝ်ၽွင်ႈလူး”
ၸၢႆးၶမ်း ပႆႇတၼ်းတွပ်ႇသင် ၸၢႆးမွၼ်းၶိူဝ်းၸင်ႇတွပ်ႇဝႃႈ
“မၼ်းဢမ်ႇၶႂ်ႈလၢတ်ႈၵူၺ်းၼၼ်ႉ ၸၢမ်သႅင်း ပဵၼ်ၼွင်ႉယိင်းမၼ်းဢိူဝ်ႈ”
“တေႉႁႃႉ ... ပီႈၸၢႆးၶမ်း ၼွင်ႉယိင်းပီႈၸၢႆးၶမ်းၼၼ်ႉ ၸွင်ႇႁၢင်ႈလီႁိုဝ်”
ၸၢႆးၶမ်းၵေႃႈ ၸင်ႇယုမ်ႉသေၶိုၼ်းတွပ်ႇဝႃႈ
“ၸၢမ်သႅင်း ၶႂ်ႈႁၼ်ၼွင်ႉယိင်း ပီႈၸၢႆးၶမ်းယူႇႁႃႉ”
“ၶႂ်ႈႁၼ်ဢိူဝ်ႈ”
“ၼွင်ႉယိင်း ပီႈၸၢႆးၶမ်းတႄႉ ႁၢင်ႈၵေႃႈႁၢင်ႈလီ ၶၢဝ်ၵေႃႈ ၶၢဝ်လီသေ ပဵၼ်ဢၼ်လီႁၵ်ႉၵေႃႉၼိုင်ႈယဝ်ႉ ပေႃးၶႂ်ႈႁၼ်မၼ်းတႄႉ တူၺ်းဢဝ်မူဝ်ၶၢဝ်ၼႆႉလႃႈ ၶႃသွင်ၵေႃႉ ၶႂ်ႈငၢႆးၵၼ်ဝႆႉဢိူဝ်ႈ”
“တႄႉႁႃႉ ... ပီႈၸၢႆးၶမ်းလႃႈလီဝႃႈယူဝ်ႉ ၸၢမ်သႅင်းတႄႉ ဢမ်ႇပေႃးၶႂ်ႈယုမ်ႇ”
“ပေႃးဢမ်ႇယုမ်ႇၵေႃႈ ထၢမ်တူၺ်း ၸၢႆးၶိူဝ်းလႄႈ”
“တႄႉႁႃႉ ... ပီႈၸၢႆးၶိူဝ်း”
“တႄႉဢိူဝ်ႈ”
“ပေႃးၼႆတႄႉ ၸၢမ်သႅင်းယုမ်ႇလႆႈၶိုင်ၼိုင်ႈယဝ်ႉ၊ ၵူၺ်း ၵႃႈ ၽႂ်ႁၢင်ႈလီတွၼ်းသေၽႂ်လႃႇ ၼွင်ႉယိင်းပီႈၸၢႆးၶမ်းလႄႈ တင်းမူဝ်ၶၢဝ်ႁဝ်းၼႆႉ”
ၸၢႆးမွၼ်းၶိူဝ်းၵေႃႈ ၸင်ႇတွပ်ႇဝႃႈ
“ႁၢင်ႈလီၼင်ႇၵၼ်ယဝ်ႉ တၢင်းႁၢင်ႈလီၽႂ်မၼ်း မီးဝႆႉႁင်းၽႂ်ႁင်းမၼ်းၼႆၼႃႇ ၼွင်ႉယိင်းၸၢႆးၶမ်းၵေႃႈ ႁၢင်ႈလီ မူဝ်ၶၢဝ်ၵေႃႈ”
ၸၢႆးၶိူဝ်းလၢတ်ႈပႆႇတၼ်းသုတ်း ၼၢင်းမူဝ်ၶၢဝ်ၸင်ႇၼႅတ်ႈ လၢတ်ႈဝႃႈ
“ပေႃးလႃႈ ပီႈၸၢႆးၶိူဝ်း ယႃႇပေသိုပ်ႇလၢတ်ႈထႅင်ႈယဝ်ႉ၊ မိူဝ်ႈၼႆႉ မူဝ်တေဢၢၼ်းၵႂႃႇလဵင်ႉၶဝ်ႈ ပီႈၸၢႆးၶိူဝ်းၶဝ် တီႈသႅင်ႇၶၢဝ်းၵတ်းမိူင်းတႆး ဢိမ်ႇဢိမ်ႇလႆ”
“တႄႉႁႃႉ ... မူဝ်ၶၢဝ်”
“တႄႉဢိူဝ်ႈ ... မိူဝ်ႈၼႆႉပဵၼ်ဝၼ်းၵိူတ်ႇမူဝ်ယဝ်ႉ”
“ႁႃႉ ... ပေႃးၼႆတႄႉ လူဝ်ႇၵိၼ်ဢိမ်ႇဢိမ်ႇယဝ်ႉ၊ ၵူၺ်းၵႃႈ သင်လႆႈႁူႉဝႆႉ ၸဵမ်မိူဝ်ႈဝႃးၼႆ ၶႅၼ်းတေလီယဝ်ႉ”
“လီၸိူင်ႉႁိုဝ် ပီႈၸၢႆးၶိူဝ်း”
“ဢေႃႈ ... သင်ႁူႉဝႆႉတႄႉ ပီႈၸၢႆးၶိူဝ်းဢၢၼ်းၵိၼ်ယႃႈၶျႃးတွင်ႉဝႆႉၼႆၵႂႃႈ ႁႃး ...ႁႃး ... ႁႃး ... ”
ၶဝ်ဢွၼ်ၵၼ် သိူဝ်းၼူဝ်ၸူမ်းၶူဝ်ၵႂႃႇၼင်ႇၵၼ်ယဝ်ႉ ၸၢႆးၶမ်း ၸင်ႇဝႃႈ
“ၸၢႆးၶိူဝ်း မႂ်းလူဝ်ႇႁဵတ်းသင်ထႅင်ႈ ႁဝ်းပေႃးလူဝ်ႇၵႂႃႇယဝ်ႉၼႆႉ ၵဝ်တႄႉ ပေႃးတွင်ႉမႆႈၼႃႇယဝ်ႉ”
“ပေႃးမႂ်းတွင်ႉမႆႈၵေႃႈ ၵႂႃႇမိူဝ်းၵိၼ်ၼမ်ႉၵတ်းၼႂ်းႁိူၼ်း ၼၼ်ႉၼမ်ၼမ်လႄႈ မိူဝ်ႈၽုၵ်ႈ ဢိုတ်းႁဵၼ်းယူႇၼႃႇ” “ၵိၼ်ၼမ်ႉၼမ်ၼမ်လႄႈ ဢိုတ်းႁဵၼ်းၼၼ်ႉ ၵပ်းၵၢႆႇၵၼ်သင်”
“ၵပ်းၵၢႆႇဢိူဝ်ႈ ... ပေႃးမႂ်းၵိၼ်ၼမ်ႉၼမ်ၼမ်ၼႆ ယွၼ်ႉပိူဝ်ႈ ပဵၼ်ဝၼ်းဢိုတ်းႁဵၼ်းလႄႈ မႂ်းၸၢင်ႈမီးၶၢဝ်းယၢမ်းတၼ်းလွႆးၽႃႈ တၢၵ်ႇယူႇၼႆၵႂႃႈ”
“ဢႃ ... မႄႈမႂ်းလႃႈ”
ၶဝ်ဢွၼ်ၵၼ် ၸူမ်းၶူဝ်ယူႇ ၸၢႆးမွၼ်းၶိူဝ်းၸင်ႇဝႃႈ
“ဢေႃႈ ... သူသၢမ်ၵေႃႉ မိူဝ်းၼင်ႈၼႂ်းႁိူၼ်းၵမ်ႉၼိုင်ႈ လႄႈ ၵဝ်တေဢၢပ်ႇၼမ်ႉၵွၼ်ႇဢိူဝ်ႈၼႃႈ”
ဝၢႆးၶဝ်သၢမ်ၵေႃႉ ၶဝ်ႈမိူဝ်းၼႂ်းႁိူၼ်း ၸၢႆးၶိူဝ်းၵေႃႈ ၼႅတ်ႈ ဢၢပ်ႇၼမ်ႉသေ မိူဝ်းလၢႆႈသိူဝ်ႈၶူဝ်းမၼ်း ဝႂ်းဝႂ်းယဝ်ႉ ဝၢႆးၼၼ်ႉ ၶဝ်သီႇၵေႃႉ ဢွၵ်ႇႁိူၼ်းမႃးသေ မႃးပႂ်ႉၶီႇၵႃးတႅၵ်ႇၸီႇ ... လႆႈႁၼ်ၵႃး တႅၵ်ႇၸီႇလိူင်လိူင်ဢွၼ်ႇ လမ်းၼိုင်ႈ ႁေႃႈမႃးၸူႈၶဝ်ယူႇလႄႈ ၼၢင်းမူဝ်ၶၢဝ်ၸင်ႇဝႃႈ
“ပီႈၸၢႆးၶိူဝ်း ႁွင်ႉၵႃးတႅၵ်ႉၸီႇလမ်းၼႆႉလႄႈ”
ၸၢႆးမွၼ်းၶိူဝ်းၵေႃႈ ယုၵ်ႉမိုဝ်းမၼ်းၼႄၵႃးၼၼ်ႉလႄႈ ၵႃႈလမ်းၼၼ်ႉ မႃးၵိုတ်းၽၢႆႇၼႃႈၶဝ်သေ ၶဝ်ၵေႃႈၸႂ်ႉႁႂ်ႈၵႂႃႇသူင်ႇ တီႈသႅင်ႇၶၢဝ်းၵတ်းမိူင်းတႆးယဝ်ႉ၊ ၽွင်းၵႃးၶဝ်ဢွၵ်ႇၵႂႃႇၼၼ်ႉ လွင်ႈဝႃႈ ၵႃးလႅင်လႅင်ဢွၼ်ႇလမ်းၼိုင်ႈ လမ်းတူၺ်းၶဝ်ယူႇၼႆ ၶဝ်ဢမ်ႇႁူႉထိုင် ၵေႃႉဢၼ်ႁေႃႈၵႃးဢွၼ်ႇၼၼ်ႉတႄႉ ပဵၼ်ၸၢႆးသႅင်မိူင်းယဝ်ႉ။
ၵႃးလိူင်ဢွၼ်ႇၶဝ်ၼၼ်ႉ ႁေႃႈၽႅဝ်ၼိူဝ်သဵၼ်ႈတၢင်းလူင်သေ သိုပ်ႇႁေႃႈမႃးတီႈ သႅင်ႇၶၢဝ်းၵတ်းမိူင်းတႆးယဝ်ႉ ပေႃးဝႃႈႁွတ်ႈၽႅဝ်မႃးၼႆ ၶဝ်ဢွၼ်ၵၼ်လူင်းၵႃးသေ ၶဝ်ႈၵႂႃႇၼႂ်းသႅင်ႇယူႇ။
ၵႃးလႅင်ဢွၼ်ႇၼၼ်ႉတႄႉ မၼ်းသိုပ်ႇႁေႃႈၵႂႃႇ ၼိူဝ်သဵၼ်ႈတၢင်းလူင်သေ ပူၼ်ႉၶဝ်ၵႂႃႇယဝ်ႉ၊ ၼႂ်းၸႂ်ၸၢႆးသႅင်မိူင်းတႄႉ ပဵၼ် ဢၼ်ၸႂ်လမ်တႄႉတႄႉ မၼ်းႁေႃႈၵႃးမၼ်းၽႂ်းၽႂ်းသေ ပူၼ်ႉမိူဝ်းႁိူၼ်း ၶဝ်ယဝ်ႉ ၶဝ်သီႇၵေႃႉတႄႉ မႃးဢဝ်တီႈယူႇ ၼႂ်းၶၢၼ်း ဢၼ်ၼိုင်ႈသေ ၼၢင်းမူဝ်ၶၢဝ် ၸင်ႇဝႃႈ
“ပီႈၸၢႆးၶိူဝ်း ... ပီႈၸၢႆးၶမ်း ... ၸၢမ်သႅင်း ၶႂ်ႈၵိၼ်ၽၵ်းသင်ၵေႃႈ လၢတ်ႈလႄႈသင်ႇလႄႈ ယႃႇပေဢဝ်သရေႇသင်ၼႃႈ”
ၸၢႆးၶမ်း ၸင်ႇယိပ်းၸၼ်ဢဝ် ၸေႈတႅမ်ႈလႄႈ ၵမ်ၸိုမ်းသေ
“လၢတ်ႈလႄႈ လၢတ်ႈလႄႈ ၵဝ်တေတႅမ်ႈလႆ”
ၶဝ်ၸိူဝ်းၼၼ်ႉ ၵေႃႈဢွၼ်ၵၼ်သင်ႇၽၵ်း ဢၼ်ၶဝ်ၶႂ်ႈ ၵိၼ်ၼၼ်ႉယဝ်ႉ၊ ပႅင်ႈၼင်ႇဢၼ်ၶဝ်သင်ႇၼၼ်ႉ ၸဝ်ႈသႅင်ႇၵေႃႈ ၶပ်ႉၶိုင်သေ မႃးတမ်းပၼ်ၶဝ်ယဝ်ႉ၊ ပေႃးဝႃႈၶဝ်ႈၽၵ်း ၶဝ်ၽႅဝ်မႃး မူတ်းယဝ်ႉၼႆ ၼၢင်းမူဝ်ၶၢဝ်ၸင်ႇဝႃႈ
“ၵိၼ်လႄႈၼႃႈ ... ပေႃးဢမ်ႇၵိၼ်ၼမ်ၼမ်တႄႉ မူဝ်ဢမ်ႇၽွမ်ႉၵူၺ်း”
ၸၢႆးၶမ်းၸင်ႇတွပ်ႇဝႃႈ
“တမ်းၸႂ်လႃႈ တေၵိၼ်ဢိမ်ႇဢိမ်ႇယူႇ”
ၶဝ်ႁူမ်ႈၵၼ်ၵိၼ်ၶဝ်ႈ ၼင်ႇၼၼ် ၸၢႆးမွၼ်းၶိူဝ်း ၸင်ႇႁၼ်တပ်းၵႆႇၶူဝ်ႈပွတ်းၼိုင်ႈလႄႈ မၼ်းဢဝ်ထူႇမၼ်းၵိပ်ႈသေ သႂ်ႇၼႂ်းဝၢၼ်ႇၼၢင်းမူဝ်ၶၢဝ်ယဝ်ႉ ... ၼၢင်းမူဝ်ၶၢဝ် ၵေႃႈၸင်ႇယုမ်ႉႁၢင်ႈ လီသေ
“ဢူဝ် ... ပီႈၸၢႆးၶိူဝ်း ... မူဝ်တေဢဝ်ဢဝ် ႁၢင်းၵူၺ်းလႆ”
“ဢေႃ ... မၼ်းမီးၵႆလႄႈ ယူဝ်မူဝ်ၶၢဝ် ဢမ်ႇယိုၼ်းထိုင် ၼႆဢိူဝ်ႈ”
“ထိုင်ယူႇၵူၺ်း”
“ဢေႃႈ ... မူဝ်ၶၢဝ်မိုဝ်းယၢဝ်းယူႇႁႃႉ ပေႃးၼႆ”
“ယၢမ်းမိူဝ်ႈၵိၼ်ၶဝ်ႈၼႆႉၵူၺ်း ... တီႈၼွၵ်ႈမၼ်းတႄႉ ဢမ်ႇတွၼ်ႉယၢဝ်းသေပွၵ်ႈ”
ၼၢင်းမူဝ်ၶၢဝ်ၵေႃႈ ၶိုၼ်းၵွၼ်ႉၽၵ်းသႂ်ႇပၼ်ၸၢႆးၶိူဝ်းယဝ်ႉ
“ၵိၼ်ၽၵ်းၼမ်ၼမ်လႄႈ ပီႈၸၢႆးၶိူဝ်း”
“ၵိၼ်ယူႇလႄႈ မူဝ်ၶၢဝ်”
ၼၢင်းမူဝ်ၶၢဝ် ၶိုၼ်းၵွၼ်ႉၽၵ်း ဢၼ်မီးႁိမ်းမၼ်းၼၼ်ႉ သႂ်ႇပၼ် ၸၢႆးၶမ်း လႄႈ ၼၢင်းၸၢမ်သႅင်းယူႇယဝ်ႉ”
“ယေႃႈ ပီႈၸၢႆးၶမ်း ယေႃႈၸၢမ်သႅင်းၵိၼ်ၼမ်ၼမ်လႄႈ ယိုၼ်းယၢဝ်းယၢဝ်း တၢဝ်းၵႆၵႆလေႃႇ ယႃႇပေၵဵင်ၸႂ်သင်ၼႃႈ ပိူၼ်ႈဝႃႈ “ပေႃးၵိၼ်ႁႂ်ႈၵိၼ်ဢိမ်ႇဢိမ်ႇ ပေႃးႁႅမ်လုၵ်ႈပိူၼ်ႈႁႂ်ႈႁႅမ်ၸဵပ်းၸဵပ်း”ၼႆဝႃႇ၊ ၵွပ်ႈၼႆ ၵိၼ်ဢိမ်ႇဢိမ်ႇလႄႈၼႃႈ”
ၼၢင်းၸၢမ်သႅင်း ၸင်ႇထၢမ်ဝႃႈ
“မူဝ် ဢၼ်မူဝ်ဝႃႈ “ပေႃးၵိၼ်ႁႂ်ႈၵိၼ်ဢိမ်ႇဢိမ်ႇ ပေႃးႁႅမ်လုၵ်ႈ ပိူၼ်ႈႁႂ်ႈႁႅမ်ၸဵပ်းၸဵပ်း ၼႆၼၼ်ႉ သပ်းလႅင်းၼႄၽွင်ႈလူး”
“ဢေႃ ... ပေႃးပိူၼ်ႈလဵင်ႉႁဝ်းၼႆ ႁဝ်းတေႃႉတႄႉၵိၼ် ဢိတ်းၼိုင်ႈၵူၺ်းၵေႃႈ ပိူၼ်ႈဝႃႈ ႁဝ်းၵိၼ်ၼႆယဝ်ႉ၊ ႁဝ်းၵိၼ်ၼမ်ၼမ် ၼႆၵေႃႈ ပိူၼ်ႈဝႃႈႁဝ်းၵိၼ်ၼႆၼင်ႇၵဝ်ႇယဝ်ႉ ... ၵွပ်ႈၼႆႁႂ်ႈပေႃးၵိုင်ႇ တၢၼ်ႇပိူၼ်ႈဝႃႈ ႁဝ်းၵိၼ်ၼႆၼၼ်ႉ လူဝ်ႇၵိၼ်ၼမ်ၼမ် ဢိမ်ႇဢိမ်ႇ ၸင်ႇတေတူၵ်းထုၵ်ႇယဝ်ႉ ဢမ်ႇၸႂ်ႈႁႃႉ ၸၢမ်သႅင်း”
“ၸႂ်ႈဢိူဝ်ႈ ... ဢၼ်ႁႅမ်လုၵ်ႈပိူၼ်ႈၼၼ်ႉလႃႇ”
“ဢၼ်ႁႅမ် လုၵ်ႈပိူၼ်ႈၼၼ်ႉၵေႃႈ တေႃႈၼင်ႇၼၼ် ၼင်ႇၵဝ်ယဝ်ႉ ၸၢမ်သႅင်း ႁဝ်းတေႃႉတႄႉႁႅမ်ၼႆၵေႃႈ ဢူႈမႄႈပိူၼ်ႈ မၵ်းမၢႆဝႃႈ ႁဝ်းႁႅမ်လုၵ်ႈပိူၼ်ႈၼႆယဝ်ႉ၊ ႁဝ်းႁႅမ်ၸဵပ်းၸဵပ်းၼႆၵေႃႈ ဢူႈမႄႈၶဝ် မၵ်းမၢႆဝႃႈ ႁဝ်းႁႅမ်လုၵ်ႈပိူၼ်ႈၼင်ႇၵဝ်ႇယဝ်ႉ ... ယွၼ်းပိူဝ်ႈႁဝ်း ႁႅမ်လုၵ်ႈပိူၼ်ႈလႄႈ ပေႃႈမႄႈပိူၼ်ႈ တေၸဵပ်းၸႂ်တေႃႇႁဝ်းၼၼ်ႉ ႁႂ်ႈႁႅမ်ၸဵပ်းၸဵပ်းၼႆဝႃႇ”
ၸၢႆးၶမ်း လႆႈၸႂ်ၵႂႃႇသေ မၼ်းၸင်ႇဝႃႈ
“ႁဝ်းတေတွင်းဝႆႉ ၶႅမ်ႉၶႅမ်ႉလႆမူဝ်ၶၢဝ် ပေႃးႁႅမ်ပိူၼ်ႈတႄႉ တီႈဢေႇသုတ်းမၼ်းလူဝ်ႇႁႂ်ႈလႆႈၶိုၼ်ႈႁူင်းယႃ”
“ပီႈၸၢႆးၶမ်း သင်ပဵၼ်လႆႈၼၼ်ႉ ယႃႇပေႁႅမ်သေဢိတ်းၼၼ်ႉ လီသေပိူၼ်ႈယဝ်ႉ ဢၼ်ဢမ်ႇၽိတ်းပိူၼ်ႈၼၼ်ႉ လီသေပိူၼ်ႈယဝ်ႉ ဢမ်ႇၸႂ်ႈႁႃႉ”
“ၸႂ်ႈယူႇ”
ၶဝ်ႈၼႂ်းဝၢၼ်ႇ ၸၢႆးမွၼ်းၶိူဝ်း မူတ်းၵႂႃႇယဝ်ႉလႄႈ မၼ်းၸင်ႇဝႃႈ
“မူဝ်ၶၢဝ် ... သႂ်ႇပၼ်ၶဝ်ႈထႅင်ႈဢိတ်းၼိုင်ႈလူး”
“ဢေႃႈ ... တႄႉဢိူဝ်ႈၼေႃ ... မူဝ်ပေႃးလိုမ်းတူၺ်းၵႂႃႇယဝ်ႉၼႆႉ”
မၼ်းၼၢင်း ၵွၼ်ႉၶဝ်ႈၼႂ်းဢၢင်ႇ ဢၼ်မီးႁိမ်းမၼ်းၼၼ်ႉသေ သႂ်ႇပၼ်ၼႂ်းဝၢၼ်ႇၶဝ်ႈ ၸၢႆးၶိူဝ်းလႄႈ ၶဝ်ၸိူဝ်းၼၼ်ႉယဝ်ႉ ၶဝ်ႁူမ်ႈၵၼ်ၵိၼ်ၶဝ်ႈဝၢၼ်ဝၢၼ်မၼ်းမၼ်းယူႇ ... ဝၼ်းၼၼ်ႉဝၢႆးသေၵိၼ် ၶဝ်ႈယဝ်ႉ ၶဝ်ၶိုၼ်းၵႂႃႇတူၺ်း ငဝ်းႁူမ်ႈၵၼ်ၵွၼ်ႇယဝ်ႉ။
ၼၢင်းမူဝ်ၶၢဝ်ၶဝ် တူၺ်းငဝ်းယဝ်ႉသေ ၶဝ်ၽၢတ်ႇၵၼ် ပွၵ်ႈမိူဝ်းႁိူၼ်းၽႂ်မၼ်းယဝ်ႉ၊ ၼၢင်းမူဝ်ၶၢဝ်တႄႉ ယွၼ်ႉပိူဝ်ႈမၼ်း လႆႈလဵင်ႉၶဝ်ႈၶဝ်ၸိူဝ်းၼၼ်ႉသေ ၼႄငဝ်းပၼ်ၶဝ်လႄႈ မၼ်း ပဵၼ်သိူဝ်းၸႂ်တႄႉတႄႉ၊ မိူဝ်ႈဢၼ် ၸၢႆးမွၼ်းၶိူဝ်း ဢဝ်တပ်းၵႆႇပွတ်း ၼိုင်ႈသႂ်ႇပၼ် ၼႂ်းဝၢၼ်ႇမၼ်းၼၢင်းၼၼ်ႉၵေႃႈ မၼ်းၼၢင်း တိုၵ်ႉႁၼ်ဝႆႉၼႂ်းတႃမၼ်းယူႇ။
ႁွတ်ႈထိုင်မႃးတၢမ်းၶမ်ႈ ၼၢင်းမူဝ်ၶၢဝ် တိုၵ်ႉယိပ်းလွတ်ႇၼမ်ႉသေ သိတ်းႁူတ်းသူၼ်ႇမွၵ်ႇၼႂ်းသူၼ်ၶဝ်ယူႇ ဝၼ်းမိူဝ်ႈၼႆႉ မၼ်းၼၢင်းတိုၵ်ႉသိူဝ်းၸႂ်ဝႆႉယူႇလႄႈ မၼ်းၼၢင်းသိူဝ်းၸႂ်သေ လွမ်လွမ်ဝတ်ႉၵႂၢမ်း“မၢဝ်ႇၵူၼ်းၽၢၼ် ယႃႇၸႂ်လဵၵ်ႉ”ၼၼ်ႉယဝ်ႉ။
✽ ၽႂ်ၽႂ်ၵေႃႈ မႃးယွၼ်း ႁူဝ်ၸႂ်တၢင်းႁၵ်ႉၼွင်ႉၼၢင်းယဝ်ႉ
ၽႂ်ၽႂ်ၵေႃႈ မႃးယွၼ်း ႁူဝ်ၸႂ်တၢင်းႁၵ်ႉၼွင်ႉၼၢင်းယဝ်ႉ သိူဝ်ႇသၢႆသဵၼ်ႈ တၢင်းငိုၼ်းၶမ်း ၶႂ်ႈႁႂ်ႈၼၢင်းပႆ
တေႃႇထိုင်ယၢမ်းၼႆ ၼၢင်းဢမ်ႇပႆ
ၵၢင်ၸႂ်ၼွင်ႉၼၢင်းတႄႉ ဢၢၼ်းႁၵ်ႉပီႈၸၢႆးႁဝ်းၵေႃႉလဵဝ်
ၵၢင်ၸႂ်ၼွင်ႉၼၢင်းတႄႉ ဢၢၼ်းႁၵ်ႉပီႈၸၢႆးႁဝ်းၵေႃႉလဵဝ်
လိူဝ်သေ သဵၼ်ႈတၢင်းၸၢႆးၼႆႉ ၼၢင်းဢမ်ႇဢၢၼ်းပႆ
မၢဝ်ႇပီႈၸၢႆး ႁူႉပွင်ႇၸႂ်
မၢဝ်ႇပီႈၸၢႆး ၵူၼ်းၽၢၼ် ယႃႇၸႂ်လဵၵ်ႉၼႃႈ
မၢဝ်ႇပီႈၸၢႆး ၵူၼ်းၽၢၼ် ယႃႇၸႂ်လဵၵ်ႉၼႃႈ
သၢဝ်ၼွင်ႉၼၢင်းၼႆႉ ဢမ်ႇလိူၵ်ႈၼႃႈငိုၼ်းၶမ်း
သၢဝ်ၼွင်ႉၼၢင်းၼႆႉ ဢမ်ႇလိူၵ်ႈၼႃႈငိုၼ်းၶမ်း
ပိူၼ်ႈဝႃႈဝႆႉၼၼ်ႉတႄႉ တၢင်းႁၵ်ႉဢမ်ႇမီးတႃ
ပိူၼ်ႈဝႃႈဝႆႉၼၼ်ႉတႄႉ တၢင်းႁၵ်ႉဢမ်ႇမီးတႃ
မၼ်းၼၢင်းသိူဝ်းၸႂ်ဝတ်ႉၵႂၢမ်းသေ ႁူတ်းၼမ်ႉမွၵ်ႇမႃး ၼင်ႇၼၼ် မၼ်းၼၢင်းႁူတ်းၽႅဝ်ထိုင် ႁိမ်းၽၵ်းတူ တီႈၶဝ်ႈဝၢင်း ႁိူၼ်းၶဝ်ၼၼ်ႉယဝ်ႉ၊ မၼ်းၼၢင်းဝတ်ႉၵႂၢမ်းယဝ်ႉၵႂႃႇပုၵ်ႈၼိုင်ႈ လႄႈ မၼ်းၼၢင်းဢဝ်လွတ်ႇၼမ်ႉမၼ်း သိတ်းၶၢမ်ႈယုမ်းမွၵ်ႇသေ ပူၼ်ႉတူၵ်းၵႂႃႇၼိူဝ်တၢင်း ဢၼ်ၶဝ်ႈမႃးၼႂ်းဝၢင်းႁိူၼ်းၶဝ်ၼၼ်ႉယဝ်ႉ။
ၽွင်းၼၼ်ႉ ၸၢႆးသႅင်မိူင်းၵေႃႈ ႁေႃႈၵႃးၶဝ်ႈမႃးၼႂ်းဝၢင်း ႁိူၼ်းၶဝ်လႄႈ ၼမ်ႉဢၼ်ၼၢင်းမူဝ်ၶၢဝ် သိတ်းၶၢမ်ႈယုမ်းၵႂႃႇၼၼ်ႉ ၵႂႃႇၺႃးသႂ်ႇၼႃႈ ၸၢႆးသႅင်မိူင်းလီလီယဝ်ႉ ယွၼ်ႉပိူဝ်ႈ ၼမ်ႉၶဝ်ႈတႃမၼ်းလႄႈ ၸၢႆးသႅင်မိူင်းၵေႃႈ ၼႅတ်ႈယဵပ်ႇပလိၵ်ႈၵႃးမၼ်း ၵိုတ်းသေ ႁွင်ႉလၢတ်ႈဝႃႈ
“ႁေႉ ႁေႉ ... ဢႃ ယႃႇပေႁူတ်းမႃးတၢင်းၼႆႉ ဢူဝ် ယမ်းမူတ်းယဝ်ႉ”
လႆႈငိၼ်းသဵင်လၢတ်ႈၼင်ႇၼၼ်လႄႈ ၼၢင်းမူဝ်ၶၢဝ် ၸင်ႇၼႅတ်ႈၶၢႆႉလွတ်ႇၼမ်ႉမၼ်းသေ ငွၵ်ႈတူၺ်းယဝ်ႉ
“ဢူဝ် ... ၵၼ်ႇတေႃး ၵၼ်ႇတေႃး ... ၸၢႆးသႅင်မိူင်း မူဝ် ယူဝ်ဝႃႈဢမ်ႇမီးၽႂ်ၼႆဢိူဝ်ႈ”
ၸၢႆးသႅင်မိူင်းၵေႃႈ ၽုၺ်ႇၽၵ်းတူၵႃး လူင်းၵႃးမႃးသေ မႄးဢဝ်ၽႃႈၸဵတ်ႉၼႃႈမၼ်းယူႇ သိူဝ်ႈမၼ်းၵေႃႈ ယမ်းၵႂႃႇၽွင်ႈလႄႈ မၼ်းဢဝ်မိုဝ်းမၼ်း ပတ်းၼမ်ႉၸိူဝ်းၼၼ်ႉသေ သၼ်ႇသိူဝ်ႈမၼ်းယူႇ မၼ်းၸင်ႇလွမ်တူၺ်း ၼၢင်းမူဝ်ၶၢဝ်သေ
“မူဝ် ဢမ်ႇငိၼ်းသဵင်ၵႃးမႃးႁႃႉ”
မိူဝ်ႈၸဝ်ႉၼၼ်ႉ ယွၼ်ႉပိူဝ်ႈမၼ်းၼၢင်းတိုၵ်ႉဝတ်ႉၵႂၢမ်း ယူႇလႄႈ မၼ်းၼၢင်းဢမ်ႇငိၼ်းသဵင်ၵႃး ၵွပ်ႈၼႆ မၼ်းၼၢင်းၸင်ႇဝႃႈ
“ႁိုဝ်တေၵႂႃႇငိၼ်းလႃႇ ၸၢႆးသႅင်မိူင်း ယင်းဢမ်ႇၼဵၵ်းႁွၼ်း ၵႃးလႄႇဢိူဝ်ႈ”
“တူၺ်းလူး ၸွင်ႇဢမ်ႇယမ်းမူတ်းယဝ်ႉႁိုဝ် ၸိူဝ်းၼႆႉ”
“ဢေႃႈ ယွၼ်ႉပိူဝ်ႈဢမ်ႇႁူႉလႄႈ ၸင်ႇလႆႈပဵၼ်ၵႂႃႇယဝ်ႉ ၸၢႆးသႅင်မိူင်း မူဝ်ယွၼ်းတွင်းပၢၼ်ႇယူႇ ယႃႇပေၶႂ်ႈၸႃႉၼႃႈ”
“ယွၼ်ႉပိူဝ်ႈလွင်ႈၼႆႉ ဢွၼ်ႇၵူၺ်းတႄႉ ဢမ်ႇၶႂ်ႈၸႃႉသင်ၼင်ႇၵဝ်ႇ ၵူၺ်းၵႃႈ”
“ၵူၺ်းၵႃႈ ၸိူင်ႉႁိုဝ်ထႅင်ႈ ၸၢႆးသႅင်မိူင်း”
“ၵူၺ်းၵႃႈ လွင်ႈဢၼ်ၶႂ်ႈၸႃႉၼၼ်ႉ မီးမဵဝ်းၼိုင်ႈဢိူဝ်ႈ”
“မီးမဵဝ်းလႂ် ၸၢႆးသႅင်မိူင်း”
“မိူဝ်ႈၵၢင်ဝၼ်းၼၼ်ႉ မူဝ်ၶဝ်ၵႂႃႇႁဵတ်းသင် တီႈသႅင်ႇၶၢဝ်းၵတ်းမိူင်းတႆးၼၼ်ႉ”
“ဢူဝ် ... သုတ်းတီႈဝႃႈ ပဵၼ်သႅင်ႇၶဝ်ႈၼႆၼႃႇ ၵႂႃႇၵိၼ်ၶဝ်ႈဢိူဝ်ႈ”
“ဢၼ်မူဝ်ၵႂႃႇၸွမ်းၵၼ်ၼၼ်ႉ ပဵၼ်ၽႂ်”
“ပဵၼ်တႆးၵေႃႉ မူဝ်ၶဝ်ဢိူဝ်ႈ”
ၸၢႆးသႅင်မိူင်း ၸင်ႇယုမ်ႉၼႃႈမီႇသေ
“ပဵၼ်တႆးၵေႃႉၵၼ် လၢႆလၢႆၵူၺ်းတႄႉ ဢမ်ႇၸႂ်ႈယူဝ်ႉ”
ၼၢင်းမူဝ်ၶၢဝ်ၵေႃႈ ၶႂ်ႈၸႂ်လမ်မႃးသေ ၸင်ႇထၢမ်ဝႃႈ
“ႁိုဝ်ႉ ... ၸၢႆးသႅင်မိူင်း ... ၶႂ်ႈဝႃႈပွင်ႇၸိူင်ႉႁိုဝ်လႃႇ”
“ႁႃး ႁႃး ႁႃး ၶႂ်ႈဝႃႈပွင်ႇၸိူင်ႉႁိုဝ်ၼႆၵေႃႈ မူဝ်ႁူႉယူႇၵႂႃႈ ၵူၼ်းဢၼ်ႁဵတ်းၵဵင်ႈၼွၼ်းလပ်းၼၼ်ႉ ပူၵ်းလုၵ်ႉယၢပ်ႇၵျႃႉဝႃႇ ... ၵူၼ်းဢၼ်ႁဵတ်းၵဵင်ႈဢမ်ႇႁူႉၼၼ်ႉ ၶႅၼ်းလၢတ်ႈယၢပ်ႇယဝ်ႉဝႃႇ”
“ၸၢႆးသႅင်မိူင်း ပေႃးၶႂ်ႈႁူႉၵေႃႈ ထွမ်ႇလႄႈ ႁဝ်းပဵၼ်တႆးၵေႃႉၵၼ် ၶိုၼ်ႈႁူင်းႁဵၼ်း ဢၼ်လဵဝ်ၵၼ်ယဝ်ႉ”
“ၼႆႉတႄႉ ဢမ်ႇလၢတ်ၵေႃႈ ႁူႉဝႆႉၸဵမ်မိူဝ်ႈဝၼ်းပုၼ်ႉယဝ်ႉ။ မၢင်ၽဝ်ႇယင်းတေ ႁူႉလိူဝ်သေ ၼၼ်ႉၵွၼ်ႇယူဝ်ႉ ႁေး ႁေး”
“ၸၢႆးသႅင်မိူင်း ၶႂ်ႈႁူႉၸိူင်ႉႁိုဝ်ၵေႃႈယဝ်ႉဢိူဝ်ႈ ႁဝ်းတႄႉ ပဵၼ်တႆးၵေႃႉမိုတ်ႈၵၼ်ၵူၺ်း”
“ပေႃးပဵၼ်တႆးၵေႃႉမိုတ်ႈၵၼ်ၵူၺ်းၼႆ သမ်ႉၵႂႃႇတူၺ်းငဝ်း ၸွမ်းၵၼ်ႁဵၻ်းသင်လႃႇ”
“တူၺ်ဢိူဝ်ႈ ... ၸၢင်ႈပဵၼ်သင်လႃႇ ... မိူဝ်ႈၼႆႉ ပဵၼ်ဝၼ်းၵိူတ်ႇမူဝ်လႄႈ မူဝ်ၵႂႃႇၼႄပၼ်ၶဝ်ဢိူဝ်ႈ မီးတၢင်းၽိတ်းသင်”
“မီးဢမ်ႇမီးတႄႉ ဢမ်ႇႁူႉယဝ်ႉ ၵူၺ်းၵႃႈ လွင်ႈဢၼ်သူ ၵႂႃႇၸွမ်းၵၼ်ၼၼ်ႉတႄႉ ၵဝ်ဢမ်ႇလႆႈၸႂ်သေဢိတ်း”
လႆႈငိၼ်းၼင်ႇၼၼ် ၼၢင်းမူဝ်ၶၢဝ် လွမ်လွမ်ၶူဝ် ၼႂ်းၸႂ်မၼ်းယူႇ
“လႆႈၸႂ် ဢမ်ႇလႆႈၸႂ်ၼၼ်ႉ ဢမ်ႇသႅင်ႇသင် ၸၢႆးသႅင်မိူင်းၵူၺ်း”
“ဢမ်ႇသႅင်ႇသင်သေတႃႉ ၵပ်းၵၢႆႇယူႇဢိူဝ်ႈ”
“ၵပ်းၵၢႆႇၸိူင်ႉႁိုဝ်”
“ဢေ ... ၵပ်းၵၢႆႇႁႃးပဵၼ်တႆးၵေႃႉၵၼ်မိူဝ်ႈလဵၵ်ႉၼၼ်ႉ ပိူင်ၼိုင်ႈ ... ၶႃသွင်ၵေႃႉၼၼ်ႉ သမ်ႉပဵၼ်ၵူၼ်းၶတ်းတႃၵဝ် ၽူႈၶဵၼ်ၵဝ်ပိူင်ၼိုင်ႈလႄႈ ၵဝ်ၸင်ႇဢမ်ႇလႆႈၸႂ်ယဝ်ႉ”
“ၵွပ်သင် ၸၢႆးသႅင်မိူင်း သမ်ႉမၵ်းမၢႆ ၶႃသွင်ၵေႃႉ ပဵၼ် ၽူႈၶဵၼ်ၸၢႆးသႅင်မိူင်းၼႆလႃႇ”
“မိူဝ်ႈဝၼ်းပူၼ်ႉ ႁဝ်းၽိတ်းၵၼ် တီႈလၢၼ်ႉၶၢႆတူၼ်ႈတီး ပွၵ်ႈၼိုင်ႈယဝ်ႉ”
“ၵွပ်ႈသင်သမ်ႉၽိတ်းၵၼ်လႃႇ”
“ႁဝ်းၽႃႇၺႃးၵၼ်သေ ၽိတ်းၵၼ်ဢိူဝ်ႈ”
“ၶဝ်မႃးၽႃႇ ၸၢႆးသႅင်မိူင်းဢွၼ်တၢင်းႁႃႉ”
“ၶႃလူင်း ၶူဝ်လႆမႃးသေ ၵုမ်ႇတူၺ်းၶိူဝ်သွင်ၵေႃႉ ၸၢမ်သႅင်းယူႇလႄႈ ၵဝ်တင်ႈၸႂ်ၵႂႃႇၽႃႇ ၶႃသွင်ၵေႃႉယဝ်ႉ”
“ပေႃးၼႆတႄႉ ၶႃသွင်ၵေႃႉၼၼ်ႉ ယင်းဢမ်ႇမီးတၢင်းၽိတ်းသင် ဢမ်ႇၸႂ်ႈႁႃႉ ဢၼ်တႄႇၽိတ်းၼၼ်ႉတႄႉ ပဵၼ်ၵွပ်ႈ ၸၢႆးသႅင်မိူင်း ၵႂႃႇၽႃႇၺႃးၶႃသွင်ၵေႃႉ ဢွၼ်တၢင်းဢမ်ႇၸႂ်ႈႁႃႉ”
“ဢေႃ ... မူဝ်ပဵၼ်ၽူႈတၢင်ၼႃႈ(သေႉၼႄႇ)ၶႃသေ ပဵၼ် ၸႂ်ၶႃသွင်ၵေႃႉ ဝႆႉဢိူဝ်ႈၼေႃႈ”
“ပဵၼ်တႄႉ ဢမ်ႇၸႂ်ႈၼင်ႇၵဝ်ၼႃး မူဝ်လၢတ်ႈၸွမ်း ဢၼ်ၸႂ်ႈမၼ်းဢိူဝ်ႈၼၼ်ႉ”
“ဝႆႉသေၵွၼ်ႇလႃႈၸိူဝ်းၼႆႉ ၵူၺ်းၵႃႈ ဢၼ်မူဝ်ၶဝ် ၵႆႉၸွမ်းၵၼ်ၼၼ်ႉ တူၺ်းဢမ်ႇလႆႈၵူၺ်း”
“ပေႃးတူၺ်းဢမ်ႇလႆႈၵေႃႈ ယႃႇပေတူၺ်းႁေယဝ်ႉၼႃႇ ၸၢႆးသႅင်မိူင်း”
“ဢမ်ႇတူၺ်းသေတႃႉ သူသမ်ႉၸွမ်းၵၼ်လႄႇဢိူဝ်ႈ ဢၼ်ၵဝ်တူၺ်းတႄႉ ၵဝ်တူၺ်းမူဝ်ၵေႃႉလဵဝ်ယဝ်ႉ၊ ၵွပ်ႈပိူဝ်ႈသင် လႄႈ တူၺ်းၼႆတႄႉ ယွၼ်ႉပိူဝ်ႈ ႁဝ်းပဵၼ်တႆးၵေႃႉၵၼ်မိူဝ်ႈလဵၵ်ႉ လႄႈ ပိူင်ၼိုင်ႈ ယၢမ်းလဵဝ် သမ်ႉမီးၸႂ်ႁၵ်ႉမူဝ်ဝႆႉလႄႈ ပိူင်ၼိုင်ႈယဝ်ႉ မူဝ်ဢမ်ႇၶိုၼ်းႁၵ်ႉလႆႈႁႃႉမူဝ်”
“ဢူဝ် ... ၸၢႆးသႅင်မိူင်း ပေႃးမႂ်းၶႂ်ႈလၢတ်ႈၵႂၢမ်းၸိူင်ႉၼႆ ၼႆတႄႉ ယႃႇပေမႃးၸူးမူဝ်ယဝ်ႉ၊ မူဝ်တႄႉ မိုတ်ႈမႂ်းမိူၼ်တႆးၵေႃႉမူဝ် ၵေႃႉၼိုင်ႈၵူၺ်း”
“ဢမ်ႇလိူဝ်လႆႈသေၼၼ်ႉယဝ်ႉႁႃႉ မူဝ်”
“မူဝ်လၢတ်ႈယဝ်ႉလူး ၸၢႆးသႅင်မိူင်း တိုၼ်းဢမ်ႇလိူဝ်လႆႈယဝ်ႉ”
ၽွင်းၼၼ် မႄႈၼၢင်းမူဝ်ၶၢဝ်ၶဝ် ယူႇၼႂ်းႁိူၼ်းသေ ႁွင်ႉလၢတ်ႈဝႃႈမႃး
“လုၵ်ႈယိင်း ... မူဝ် ...မႃးၵိၼ်ၶဝ်ႈလႄႈ”
“ဢေႃႈ ဢေႃး ... မႃးၶႃႈယဝ်ႉ”
မၼ်းၼၢင်းၸင်ႇၶိုၼ်းလၢတ်ႈတီႈ ၸၢႆးသႅင်မိူင်း
“ဢေႃႈ ... ၸၢႆးသႅင်မိူင်း ... မႃးၵိၼ်ၶဝ်ႈၸွမ်းမူဝ်ၶဝ်လႄႈ”
“လႆႈယဝ်ႉမူဝ်ႈ ... ၶဝ်ႈတႄႉဢမ်ႇၵိၼ်ၵေႃႈ ဢမ်ႇၸႂ်လဵၵ်ႉ ဢၼ်ပႆႇလႆႈတၢင်းႁၵ်ႉမူဝ်ၼၼ်ႉၵူၺ်းယဝ်ႉ လီၸႂ်လဵၵ်ႉၼႃႇ တေမိူဝ်းၵွၼ်ႇၼႃႈ”
ၸၢႆးသႅင်မိူင်း လၢတ်ႈၼင်ႇၼၼ်သေ ၶိုၼ်ႈၶီႇၵႃးႁေႃႈၵႃး မၼ်းပွၵ်ႈမိူဝ်းယဝ်ႉ မၼ်းပဵၼ်ၸႂ်လမ်ဝႆႉ ဢမ်ႇပဵင်းၸႂ်ဝႆႉလႄႈ မၼ်းႁေႃႈၵႃးမၼ်း ဢွၵ်ႇၵႂႃႇႁႅင်းႁႅင်းယဝ်ႉ၊ ၼၢင်းမူဝ်ၶၢဝ် လႆႈႁၼ်ၼင်ႇၼၼ် ဝၢႆးသေ ၸၢႆးသႅင်မိူင်းပူၼ်ႉၵႂႃႇၼႆ မၼ်းၼၢင်းလွမ်ယွမ်ယုမ်ႉ သေ လွမ်လွမ်ဝႃႈတီႈ ၸၢႆးသႅင်မိူင်းယူႇ...
“ႁိုဝ်ႉ! ... ၸႂ်လမ်သေ ဢမ်ႇမႃးသေပွၵ်ႈၵေႃႈ ၶႅၼ်းလီယဝ်ႉ”
မၼ်းၼၢင်း ဢဝ်လွတ်ႇၼမ်ႉဝၢင်းဝႆႉသေ မႃးၵိၼ်ၶဝ်ႈ ၸွမ်းဢူႈမႄႈၶဝ် ၼႂ်းသွင်ႇၾႆးယဝ်ႉ။