မွၵ်ႇလူင်ႇလဵဝ်/တွၼ်ႈသိပ်းပႅတ်ႇ
တီႈဢၼ်ၸၢႆးမွၼ်းၶိူဝ်းၶဝ် ႁူပ်ႉထူပ်းၵၼ်ၼႆႉတႄႉ ပဵၼ်ၼႂ်းဝၢင်းၸၼ်ႉၸွမ် ၼိူဝ်တင်ႇ တႂ်းႁူမ်ႈမႆႉၼၼ်ႉသေႇသေႇယဝ်ႉ။ မိူဝ်ႈၼႆႉ ၶဝ်မႃးႁူပ်ႉထူပ်းၵၼ်သေ ဢုပ်ႇလၢတ်ႈၶိူဝ်းၵႃးလူႉ မိူဝ်ႈဝႃးၼၼ်ႉယူႇ ၼၢင်းမူဝ်ၶၢဝ် ၸင်ႇဝႃႈ
“ပီႈၸၢႆးၶိူဝ်း ... မိူဝ်ႈဝႃးၼၼ်ႉ မူဝ်ပဵၼ်ၸႂ်ဢမ်ႇလီတႄႉတႄႉယဝ်ႉ”
ၸၢႆးၶိူဝ်းၸင်ႇယုမ်ႉသေ
“ပေႃးပဵၼ်ၵူၼ်းႁူဝ်ၸႂ်ဢမ်ႇလီၼႆ လူဝ်ႇပဵၼ်ၵူၼ်းယွင်ႇၵူၺ်းဢိူဝ်ႈ”
ၼၢင်းမူဝ်ၶၢဝ် ဢဝ်သၢႆထူင်မၼ်းၽတ်ႉပၼ် ၸၢႆးမွၼ်းၶိူဝ်းသေ
“ဢီႉ ... ပီႈၸၢႆးၶိူဝ်းၼႆႉ ပႂ်ႉထွမ်ႇၵႂၢမ်းမူဝ်ႁႂ်ႈသုတ်းၵွၼ်ႇလေႃႇ”
“လၢတ်ႈလႄႈ ... ၵွပ်ႈသင်ၸႂ်ဢမ်ႇလီလႃႇ”
“ဢေႃႈ... ပီႈၸၢႆးၶိူဝ်းၵိၼ်ႉမၢင်ႉမႄးၵႃးပၼ် ၸၢႆးသႅင်မိူင်းသေ ၸၢႆးသႅင်မိူင်း သမ်ႉဢမ်ႇႁွင်ႉၶီႇၵႃးမၼ်း မိူဝ်းၸွမ်းၼႆလႄႈ မူဝ် ၸႂ်ဢမ်ႇလီတၢင် ပီႈၸၢႆးၶိူဝ်းဢိူဝ်ႈ”
“မူဝ်ၶၢဝ် ပိၵ်ႉသမ်ႉဝႃႈ ႁွင်ႉၶီႇၼႆၵေႃႈ ပီႈၸၢႆးၶိူဝ်းၶဝ် ဢမ်ႇၶီႇၼင်ႇၵဝ်ႇ”
“ၵွပ်ႈသင်လႃႇ”
“ၵွပ်ႈပိူဝ်ႈ ဢမ်ႇမီးတီႈၶီႇၼၼ်ႉယဝ်ႉ၊ ယွၼ်ႉပိူဝ်ႈ ဢမ်ႇမီး ၶီႇလႄႈ ၸၢႆးသႅင်မိူင်းၵေႃႈ ၸင်ႇဢမ်ႇႁွင်ႉႁႃး ၸၢႆးၶမ်းၵႂႃႈ”
ၸၢႆးၶမ်းၵေႃႈ ၸင်ႇဝႃႈ
“ၸၢႆးၶိူဝ်း ... ၸုၵ်းၸွမ်းၵူၼ်ႈၵႃးၵေႃႈ လႆႈယူႇလူး”
“ဢမ်ႇၶႂ်ႈၸုၵ်းဢေႉ ... ၵူဝ်မဝ်းဢိူဝ်ႈ ... ၸၢႆးၶမ်း”
“ၵူဝ်မဝ်း ဢၢႆမုၼ်ႈတႆးၵေႃႉမူဝ်ၶဝ်ႁႃႉ ... ပီႈၸၢႆးၶိူဝ်း”
“ၸႂ်ႈဢိူဝ်ႈ ... ၵူဝ်မဝ်းဢၢႆမုၼ်ႈၵေႃႈ ပိူင်ၼိုင်ႈ ဢၢႆဢၼ် ငိၼ်းသဵင်သေ ဢမ်ႇႁၼ်တူဝ်ၼၼ်ႉၵေႃႈ ပိူင်ၼိုင်ႈယဝ်ႉ”
ၶေႃႈၵႂၢမ်းဢၼ်ၸၢႆးမွၼ်းၶိူဝ်းဝႃႈ“ဢၢႆဢၼ်ငိၼ်းသဵင် ဢမ်ႇႁၼ်တူဝ်” ၼၼ်ႉ မၼ်းပွင်ႇဝႃႈ ဢၢႆတူတ်းၼႆလႄႈ ၶဝ်သၢမ်ၵေႃႉ ႁူႉပွင်ႇသေ ဢွၼ်ၵၼ်ၶူဝ်ၵူႈၵေႃႉယဝ်ႉ ၼၢင်းၸၢမ်သႅင်းၸင်ႇဝႃႈ
“ပီႈၸၢႆးၶိူဝ်း လွင်ႈဢၼ်ပီႈၸၢႆးၶိူဝ်းဝႃႈတီႈၶဝ်ၼၼ်ႉ ၸၢမ်သႅင်း တေၵႂႃႇလၢတ်ႈထိုင်တႆးၵေႃႉ ၸၢမ်သႅင်းၶဝ်ယူႇၼႃႈ”
“လၢတ်ႈလႄႈၸၢင်ႈပဵၼ်သင် ဢၼ်ပီႈၸၢႆးၶိူဝ်းလၢတ်ႈၼႆႉၵေႃႈ ပဵၼ်ဢၼ်ၸိုဝ်ႈဢၼ်ၸႂ်ႈမၼ်းယူႇလူး ပေႃးဢမ်ႇယုမ်ႇၵေႃႈ ထၢမ်တူၺ်းၸၢႆးၶမ်းလႄႈ”
“ၸႂ်ႈတႄႉႁႃႉ ... ပီႈၸၢႆးၶမ်း”
“ၸႂ်ႈဢိူဝ်ႈ မိူဝ်းႁႃးတေၽႅဝ်ၵႂႃႇၼၼ်ႉ ငိၼ်းဢၢႆသႅဝ် ဢၼ်ငိၼ်းသဵင်ဢမ်ႇႁၼ်တူဝ်ၼၼ်ႉယူႇဢိူဝ်ႈ”
“ဢမ်ႇၸႂ်ႈယူဝ်ႉ၊ ပီႈၸၢႆးၶမ်းၶဝ် သႂ်ႇၺၢၼ်ႇၵၼ်သေ တင်ႈၸႂ်ၶၢႆသရေႇ တႆးၵေႃႉၸၢမ်သႅင်းၶဝ်ယူဝ်ႉ”
ၸၢႆးမွၼ်းၶိူဝ်းၸင်ႇလၢတ်ႈဝႃႈ
“ၶၢႆသရေႇၵၼ်တႄႉ ဢမ်ႇၸႂ်ႈၵူၺ်းၸၢမ်သႅင်း ပီႈၸၢႆးၶိူဝ်း ၶႂ်ႈလၢတ်ႈၼႄလွင်ႈ တႆးၵေႃႉၸၢမ်သႅင်းၶဝ် ပဵၼ်ၵူၼ်းၵျႃႉၼႆဢိူဝ်ႈၼၼ်ႉ”
“ႁဵတ်းႁိုဝ်လႄႈ သမ်ႉဝႃႈၼၼ်လႃႇ ပီႈၸၢႆးၶိူဝ်း”
“ဢေႃႈ... ပိူၼ်ႈဝႃႈ “ၵူၼ်းတူတ်းၵူၼ်းၵျႃႉ မႃႉတူတ်းမႃႉလီၼႆၼႃႇ” ၵွပ်ႈၼႆ မိူဝ်ႈဝႃး ဢၼ်ၼင်ႈၽၢႆႇလင်ၵႃးၼၼ်ႉ ပႃးၵူၼ်းၵျႃႉၵေႃႉၼိုင်ႈယူႇဢမ်ႇႁၢင်ႉယဝ်ႉ”
ၼၢင်းမူဝ်ၶၢဝ် ၸင်ႇယုမ်ႉသေလၢတ်ႈဝႃႈ
“ပေႃးလွင်ႈလၢတ်ႈၵႂၢမ်းၼႆတႄႉ မူဝ်ၶဝ်ဢမ်ႇပႄႉလႆႈ ပီႈၸၢႆးၶိူဝ်းၶဝ်ယဝ်ႉ ၵွပ်ႈၼႆ မူဝ်ၶဝ်ပၼ်သုမ်းယူႇယဝ်ႉ ပီႈၸၢႆးၶိူဝ်း”
ၼၢင်းၸၢမ်သႅင်း ၸင်ႇၶိုၼ်ႈလၢတ်ႈဝႃႈ
“မိူဝ်ႈဝႃး ပေႃးဝႃႈ ပီႈၸၢႆးၶိူဝ်းၶဝ် ဢမ်ႇၽႅဝ်မႃးၼႆ ၸၢမ်သႅင်း ဢၢင်ႈပႂ်ႉၶီႇၵႃး မၢႆၼိုင်ႈမိူဝ်းၼႆဢိူဝ်ႈ ဢၢင်ႈႁႂ်ႈမူဝ်ၶၢဝ်လႄႈ ၸၢႆးသႅင်မိူင်း ၵိုတ်းဝႆႉသွင်ၵေႃႉၵူၺ်းၼႆယဝ်ႉ”
“ၵွပ်ႈသင် ၸၢမ်သႅင်းၶဝ်သမ်ႉ ဢမ်ႇႁဵတ်းၼၼ်လႃႇ”
“ပီႈၸၢႆးၶိူဝ်းၶဝ် ၼႅတ်ႈၽႅဝ်မႃးလႄႇဢိူဝ်ႈ သင်ပီႈၸၢႆးၶိူဝ်းၶဝ် ၼၢၼ်းၽႅဝ်တႄႉ တေၵိုတ်းၶႃသွင်ၵေႃႉ ဢၼ်ပဵၼ်တႆးၵေႃႉၵၼ် မိူဝ်ႈလဵၵ်ႉၼၼ်ႉယူႇဢမ်ႇႁၢင်ႉယဝ်ႉ”
ၸၢႆးၶမ်းၵေႃႈၸင်ႇဝႃႈ
“ဢေႃႈ ... မူဝ်ၶၢဝ်လႄႈ ၸၢႆးသႅင်မိူင်း ပဵၼ်တႆးၵေႃႉၵၼ် ၸဵမ်လဵၵ်ႉႁႃႉ မိူဝ်ႈဝႃးၼၼ်ႉ တႃႉႁႃးၸၢႆးၶိူဝ်း ယႃႇၽူမ်ႈမႃးလႃႈ”
ၼၢင်းမူဝ်ၶၢဝ် ၸင်ႇၶၢၼ်ႉငိၼ်းသေတွပ်ႇဝႃႈ
“ဢၼ်ပူၼ်ႉပဵၼ်မႃးၸိူဝ်းၼၼ်ႉ ၵိုတ်းဝႆႉၽၢႆႇလင်သဵင်ႈသဵင်ႈယဝ်ႉ မၼ်းဢမ်ႇၶိုၼ်းပဵၼ်လႆႈထႅင်ႈယဝ်ႉ ယႃႇပေသိုပ်ႇလၢတ်ႈထႅင်ႈယူႇလႃႈ”
ႁွတ်ႈထိုင်မႃး ၶၢဝ်းယၢမ်းၶိုၼ်ႈႁဵၼ်းယဝ်ႉလႄႈ ၶဝ်ၵေႃႈ ဢွၼ်ၵၼ်ၵႂႃႇၶိုၼ်ႈႁဵၼ်းယဝ်ႉ ... ဝၢႆးသေၶိုၼ်ႈႁဵၼ်းယဝ်ႉ ၶၢဝ်းၼိုင်ႈ ၸၢႆးမွၼ်းၶိူဝ်းၸင်ႇဝႃႈ တီႈၸၢႆးၶမ်း
“ၸၢႆးၶမ်း မႂ်းသိုပ်ႇၶိုၼ်ႈလႄႈၼႃႈ ၵဝ်တႄႉၶၢၼ်ႉဝႆႉဢိူဝ်ႈ မိူဝ်ႈၼႆႉ”
“မႂ်းတေၵႂႃႇလႂ်လႃႇ”
“ၵဝ်တေၵႂႃႇလဵၼ်ႈတီႈၼွၵ်ႈၼၼ်ႉဢိူဝ်ႈ မႂ်းၵေႃႈတေၵႂႃႇ ယူႇႁႃႉ”
“ဢမ်ႇၵႂႃႇယဝ်ႉ ... ၵဝ်လူဝ်ႇတႅမ်ႈလိၵ်ႈဢိူဝ်ႈ”
ၸၢႆးမွၼ်းၶိူဝ်းၵေႃႈ ဢွၵ်ႇမႃးၼင်ႈဢဵၼ်ႈ တီႈတႂ်ႈတူၼ်ႈမႆႉ တီႈၼိုင်ႈသေ လိုဝ်ႈႁူမ်ႈမၼ်းယူႇ၊ မၼ်းဢဝ်ပပ်ႉမၼ်းဢွၵ်ႇမႃးသေ မႃးတႅမ်ႈဝွၵ်းလဵၼ်ႈယူႇ၊ မၼ်းၶဝ်ႈၸႂ်ဝူၼ်ႉတႅမ်ႈဝွၵ်းဢွၼ်ႇ ပုၵ်ႈၼိုင်ႈဢၼ်ၸိုဝ်ႈဝႃႈ“ပိုၼ်းတၢင်းႁၵ်ႉတႆး” ၼႆၼၼ်ႉယူႇ၊ ၽွင်း မိူဝ်ႈ ၸၢႆးမွၼ်းၶိူဝ်း တႅမ်ႈယဝ်ႉၵႂႃႇၼၼ်ႉ ၼၢင်းမူဝ်ၶၢဝ်လႄႈ ၼၢင်းၸၢမ်သႅင်း ၽႅဝ်မႃးတီႈမၼ်းသေ ၼၢင်းမူဝ်ၶၢဝ်ၸင်ႇဝႃႈ
“ႁေႉ ... ပီႈၸၢႆးၶိူဝ်း ... ႁဵတ်းသင်ဢမ်ႇၶိုၼ်ႈႁဵၼ်းသေ မႃးၼင်ႈငဝ်ယူႇတီႈၼႆႈလႃႇ ... ၶုၵ်းၸႂ်လႆႈ သၢဝ်ပၢင်လွင်းယူဝ်ႉ ၶိၵ်း ၶိၵ်း”
“ဢေႃႈ ... ဢမ်ႇၸႂ်ႈၵူၺ်း မူဝ်ၶၢဝ်”
“ပီႈၸၢႆးၶိူဝ်း ယႃႇပေလႅၼ်လႄႈ”
“ဢမ်ႇလႅၼ်ၵူၺ်းမူဝ်ၶၢဝ် ... သၢဝ်ပၢင်လွင်းတႄႉဢမ်ႇ ၶုၵ်းၸႂ်လႆႈ ပီႈၸၢႆးၶိူဝ်းၵႂႃႇၶုၵ်းၸႂ်လႆႈ သၢဝ်မိူင်းၵိုင်ဢိူဝ်ႈ”
“တႄႉႁႃႉ ... ပဵၼ်ၽႂ် ပီႈၸၢႆးၶိူဝ်း”
“ပဵၼ်သၢဝ် ဢၼ်ၶဝ်ႈပႃး ၼႂ်းပိုၼ်းတၢင်းႁၵ်ႉတႆးၼၼ်ႉယဝ်ႉ”
“ၸိုဝ်ႈမၼ်းဝႃႈႁိုဝ်လႃႇ”
“ၼၢင်းဢူးပဵမ်ႇဝႃႇ ... ပီႈၸၢႆးၶိူဝ်း ၶုၵ်းၸႂ်လႆႈ ၶႃသွင်ၵေႃႉ ၶုၼ်သၢမ်လေႃးသေ တႅမ်ႈ လွင်ႈၶႃသွင်ၵေႃႉႁၵ်ႉၵၼ်ယူူဢိူဝ်ႈ”
“တႅမ်ႈယဝ်ႉယဝ်ႈႁႃႉ ပီႈၸၢႆးၶိူဝ်း”
“ယဝ်ႉယဝ်ႈ”
“ပၼ်မူဝ်ၶဝ်တူၺ်းၽွင်ႈလူး”
ၸၢႆးမွၼ်းၶိူဝ်း ၶႂ်ႈယွၵ်ႇၼၢင်းမူဝ်ၶၢဝ်လႄႈ မၼ်းၸင်ႇလႅၼ်ဝႃႈ
“ပီႈၸၢႆးၶိူဝ်း ဢမ်ႇတႅမ်ႈသင်လူင် မူဝ်ၶၢဝ်”
“မိူဝ်ႈၵႆႈ ပီႈၸၢႆးၶိူဝ်းၽုၺ်ႇပပ်ႉသေ တႅမ်ႈယူႇၼၼ်ႉ မူဝ်ၶၢဝ်ႁၼ်ယူႇၵူၺ်း ယူဝ်ၶႄး ပဵၼ်လိၵ်ႈၶဵဝ်လႄႈ ဢမ်ႇၶႂ်ႈပၼ်မူဝ်ၶဝ် တူၺ်းယူဝ်ႉ”
“ဢမ်ႇၸႂ်ႈၵူၺ်း မူဝ်ၶၢဝ်”
“ပေႃးဢမ်ႇၸႂ်ႈၵေႃႈ ပၼ်တူၺ်းလႄႈ”
“ဢမ်ႇပၼ်”
“ပေႃးဢမ်ႇပၼ်တႄႉ ပဵၼ်လိၵ်ႈၶဵဝ်ၵူၺ်းယဝ်ႉ”
“ဢမ်ႇၸႂ်ႈလိၵ်ႈၶဵဝ်ၵူၺ်း ပေႃးပဵၼ်လိၵ်ႈၶဵဝ်ပႄႇ ပၼ်မူဝ်ၶၢဝ် တူၺ်းဢွၼ်တၢင်းပိူၼ်ႈယဝ်ႉ ပဵၼ်ဝွၵ်းပုၵ်ႈၼိုင်ႈဢိူဝ်ႈ တူၺ်းလႄႈ”
ၶေႃႈၵႂၢမ်းဢၼ် ပီႈၸၢႆးၶိူဝ်းဝႃႈ “ပေႃးပဵၼ်လိၵ်ႈၶဵဝ်ပႄႇ ပၼ်မူဝ်ၶၢဝ်တူၺ်းဢွၼ်တၢင်းပိူၼ်ႈယဝ်ႉ”ၼႆၼၼ်ႉ ပဵၼ်ၵႂၢမ်း ဢၼ်မီးတီႈပွင်ႇတီႈယမ်ၶေႃႈၼိုင်ႈလႄႈ တိူဝ်ႉၸႂ်ၼၢင်းမူဝ်ၶၢဝ်ၵႂႃႇတႄႉတႄႉ မၼ်းၼၢင်းၵေႃႈ ႁဵတ်းၵဵင်ႈဢမ်ႇႁူႉသေ ဢဝ်ပပ်ႉၸၢႆးမွၼ်းၶိူဝ်းၼၼ်ႉ မႃးလူတူၺ်းယဝ်ႉ၊ ၶႃသွင်ၵေႃႉ ၼၢင်းၸၢမ်သႅင်း ၽုၺ်ႇတူၺ်းႁူမ်ႈၵၼ်သေ ၸၢႆးမွၼ်းၶိူဝ်းၸင်ႇဝႃႈ
“မူဝ်ၶၢဝ်လႄႈ ၸၢမ်သႅင်း လူဢွၵ်ႇသဵင်တူၺ်းလူး ပီႈၸၢႆးၶိူဝ်းတေထွမ်ႇတူၺ်းဢိူဝ်ႈ ... ၸွင်ႇမၼ်းတေလီၼႆၵႂႃႈ”
ၶႃသွင်ၵေႃႉၵေႃႈ ႁူမ်ႈၵၼ်လူတူၺ်းယဝ်ႉ...
“ပိုၼ်းတၢင်းႁၵ်ႉတႆး”
ႁၵ်ႉၵၼ်လိူဝ်ၸႂ်
တၢၼ်ႇလႂ်ၵေႃႈယၢၼ်
ပၢၼ်ဢွၼ်ဝၼ်းသိုၼ်း
တိုၼ်းမီးဝူတ်ႈလႄႈ
မႄႈၸဝ်ႈၸွမ်းယႃႉ
ၽဝသၢမ်လေႃး
သမ်ႉပေႃးလႆႈလူႉ
ဢူႉပဵမ်ၵေႃႈတၢႆ
သၢႆၸႂ်လႆႈၶၢတ်ႇ
လႆႈၽၢတ်ႇယၢၼ်ၵၼ်
ၼင်ႇၼၼ်သေတႃႉ
ၽဝဢွၼ်ႇၶႃ
လွမ်ႁႃႁူမ်ႈႁွမ်း
တႃႇသဝ်းၸွမ်းၵၼ်
ၵူႈဢၼ်ၵူႈၶၢဝ်း
ယိုၼ်းယၢဝ်းတၢင်းႁၵ်ႉ
ၶွတ်ႇတၵ်ႉပိူင်းၾႆး
ပိုတ်ႇၼႄပိုၼ်းလွင်ႈတၢင်းႁၵ်ႉတႆးယူႇ။ ။
ဝၢႆးသေ ၶႃလူယဝ်ႉ ၸၢႆးမွၼ်းၶိူဝ်း ၸင်ႇထၢမ်ဝႃႈ
“ပဵၼ်ႁိုဝ် ... ၸွင်ႇၶႅမ်ႉလႅပ်ႈယူႇႁိုဝ်”
ၼၢင်းမူဝ်ၶၢဝ် ၸင်ႇတွပ်ႇဝႃႈ
“ၶႅမ်ႉတႄႉဢိူဝ်ႈ ပီႈၸၢႆးၶိူဝ်း မူဝ်တႄႉလႆႈၸႂ်တႄႉတႄႉယဝ်ႉ”
ၼၢင်းၸၢမ်သႅင်းၵေႃႈဝႃႈ
“ၶႅမ်ႉတႄႉဢိူဝ်ႈ ပီႈၸၢႆးၶိူဝ်း ဝူၼ်ႉလႆႈလီၵျႃႉ”
“မူဝ်ၶၢဝ်ၶဝ်လႃႈလီႈဝႃႈ ယွင်ႈဢဝ်ၵူၺ်းယူဝ်ႉ”
“မၼ်းၶႅမ်ႉတႄႉတႄႉလႄႈ မူဝ်ၶဝ်ၵေႃႈၸင်ႇလၢတ်ႈတႄႉတႄႉ ဢိူဝ်ႈၼႆႉ ၼႂ်းပိုၼ်းတၢင်းႁၵ်ႉတႆးၼႆႉ ၶုၼ်သၢမ်လေႃးလႄႈ ၼၢင်းဢူးပဵမ်ႇ ပဵၼ်ဢၼ်ၸိုဝ်ႈသဵင်ယႂ်ႇသေပိူၼ်ႈတႄႉတႄႉယဝ်ႉ”
“ၵွပ်ႈပိူဝ်ႈသင်လႄႈ သမ်ႉၸိုဝ်ႈသဵင်ယႂ်ႇလႃႇမူဝ်ၶၢဝ်”
“ၵွပ်ႈပိူဝ်ႈၶႃႁၵ်ႉၵၼ်တႄႉတႄႉၼၼ်ႉယဝ်ႉ ဢမ်ႇၸႂ်ႈႁႃႉ ပီႈၸၢႆးၶိူဝ်း”
“ၸႂ်ႈယူႇ ... ၵွပ်ႈပိူဝ်ႈၶႃႁၵ်ႉၵၼ်ၵေႃႈပိူင်ၼိုင်ႈ မီးသႅတ်ႉၸႃႇၼိူဝ်ၵၼ်လႄႈပိူင်ၼိုင်ႈသေ လွင်ႈတၢင်းႁၵ်ႉၶႃၼၼ်ႉ ၸင်ႇၵိုၵ်း ပိုၼ်းတႆးဝႆႉယဝ်ႉ”
ၼၢင်းၸၢမ်သႅင်းၵေႃႈၸင်ႇဝႃႈ
“မႄႈၶုၼ်သၢမ်လေႃးၶဝ်ၼၼ်ႉ လႃႈလီႁဵတ်းလႆႈ တီႈၼၢင်းဢူးပဵမ်ႇၼႃႇၼေႃႈ ... မိူဝ်ႈၸၢမ်သႅင်းၶဝ် တႄႇလႆႈငိၼ်း ပိူၼ်ႈၶႆႈၼႄၼၼ်ႉၼႆ လီၸင်းမႄႈသၢမ်လေႃးၶဝ်တႄႉတႄႉယဝ်ႉ၊ ပၢႆ သလိူဝ်ၼၢင်းဢူးပဵမ်ႇတူဝ်လူင် တူဝ်ၼၵ်းဝႆႉယူႇၼၼ်ႉ သမ်ႉလႃႈလီပၼ်တၢင်းတုၵ်ႉယၢၵ်ႈၵူႈပိူင်ပိူင်လႄႈ ၸၢမ်သႅင်းၶဝ် ၶေႃးၶူမ်ၸွမ်း မၼ်းၼၢင်းဢူးပဵမ်ႇတႄႉတႄႉသေ သမ်ႉပေႃးႁႆႈၵွၼ်ႇယဝ်ႉ”
“မူဝ်ၵေႃႈ လီဢီးလူၼၢင်းဢူးပဵမ်ႇတႄႉတႄႉဢိူဝ်ႈ” ၽၢႆသလိူင် တီႈၸႂ်ယႂ်ႇမၼ်း ၶုၼ်သၢမ်လေႃး သမ်ႉဢွၵ်ႇၶၢဝ်းတၢင်း မႄႈသၢမ်လေႃးၶဝ် သမ်ႉပၼ်တၢင်းတုၵ်ႉယၢၵ်ႈမၼ်းၼၢင်းၵူႈပိူင်ပိူင်ၼႆ မူဝ်ၵေႃႈဝူၼ်ႉတူၺ်း မၼ်းၼၢင်းတေပဵၼ်တၢင်းၸႂ်လဵၵ်ႉၶေႃးၶူမ် တၢၼ်ႇႁိုဝ်ၼႆယဝ်ႉ”
ၸၢႆးမွၼ်းၶိူဝ်းၵေႃႈ ၸင်ႇဝႃႈ
“ၸႂ်ႈတႄႉဢိူဝ်ႈ မူဝ်ၶၢဝ် ... ထုင်းၵႂၢမ်းမီးဝႆႉယူႇလူး“ၼၢင်းမႄးထူပ်းၽေးၶဵၼ် - ၽူဝ်ပဵၼ်တီႈၸႂ်ယႂ်ႇ” မၼ်းၼၢင်းၼႆႉ ထူပ်းၽေးၶဵၼ်ၼင်ႇၼၼ် ၶုၼ်သၢမ်လေႃး သမ်ႉဢမ်ႇမီးလႄႈ မၼ်း ၼၢင်းပဵၼ်ဢၼ်ၸႂ်လဵၵ်ႉၶေႃးၶူမ် ပေႃးဢမ်ႇမီးတီႈတႅၵ်ႈယဝ်ႉ”
ၼၢင်းၸၢမ်သႅင်း ၸင်ႇဝႃႈ
“လွင်ႈဢၼ် ၶႃသွင်ၵေႃႉ လႆႈၽၢတ်ႇၵၼ်ၼႆႉ ပဵၼ်လူၺ်ႈ ဝူတ်ႈဝၼ်းလင်ၶႃၼင်ႇၵဝ်ႇဢိူဝ်ႈၼေႃႈ ပီႈၸၢႆးၶိူဝ်း”
“ၼင်ႇႁိုဝ်တေပဵၼ်တီႈယႃၸႂ်ၼၼ်ႉ လူဝ်ႇလႆႈဝႃႈ ပဵၼ် ဝူတ်ႈဝၼ်းလင်ၶႃၼႆၵူၺ်းယဝ်ႉ ၸၢမ်သႅင်း”
ၼၢင်းၸၢမ်သႅင်း ၸင်ႇတူၺ်းၼၢင်းမူဝ်ၶၢဝ်သေလၢတ်ႈဝႃႈ
“မူဝ် ... မူဝ် ဢမ်ႇၵူဝ်ထူပ်းၺႃးၸိူင်ႉၼၼ်ႁႃႉ”
“ၵူဝ်ဢိူဝ်ႈ ... ၸၢမ်သႅင်း ၼင်ႇႁိုဝ်တေဢမ်ႇလႆႈပဵၼ် ၸိူင်ႉၼင်ႇ ၶုၼ်သၢမ်လေႃးလႄႈ ၼၢင်းဢူးပဵမ်ႇ လႆႈၽၢတ်ႇၵၼ်ၼၼ်ႉ မူဝ်ယွၼ်းသူးယူႇတႃႇသေႇယဝ်ႉ ၸၢမ်သႅင်းလူး ဢမ်ႇၵူဝ်ႁႃႉ”
“ဢမ်ႇၵူဝ်ၵူၺ်း”
“ႁဵတ်းသင် သမ်ႉဢမ်ႇၵူဝ်လႃႇ”
“မူဝ် ... ဝူၼ်ႉတူၺ်းလေႃႇ ၶုၼ်သၢမ်လေႃးလႄႈၼၢင်းဢူးပဵမ်ႇၼၼ်ႉ ပေႃးဝႃႈ သၢမ်လေႃး ထွမ်ႇၵႂၢမ်းမႄႈၶဝ်သေ ဢဝ်ၼၢင်း ဢူပႅမ်းၼႆ ၸွင်ႇသၢမ်လေႃး တေၺႃးဢူးပဵမ်ႇႁိုဝ်”
“ဢမ်ႇၺႃးၼႃး”
“ပေႃးဢမ်ႇၺႃးၵၼ်ၼႆ ၸွင်ႇတေလႆႈၽၢတ်ႇၵၼ်ႁိုဝ်လႃႇ”
“ဢမ်ႇၽၢတ်ႇၼႃး”
“ၸွင်ႇဢူးပဵမ်ႇ တေလႆႈတုၵ်ႉၶ ၶၢၼ်ၸႂ်ႁိုဝ်”
“ဢမ်ႇတုၵ်ႉၶၼႃး”
“ၵွပ်ႈၼႆ ၸၢမ်သႅင်းတႄႉ ဢမ်ႇႁႃတၢင်းၺႃးၵၼ်လႄႈ လွင်ႈတၢင်းၽၢတ်ႇၵၼ်ၼၼ်ႉၵေႃႈ ဢမ်ႇၵူဝ်ၼႆယဝ်ႉ”
“ၶိၵ်း ... ၶိၵ်း ... ၸၢမ်သႅင်းတေဢၢၼ်းပဵၼ်သၢဝ်လူင် တေႃႇၸူဝ်ႈႁႃႉ”
ၼၢင်းၸၢမ်သႅင်း ယုမ်ႉငွၵ်းႁူဝ်သေ
“ဢိူဝ်ႈ”
ၸၢႆးမွၼ်းၶိူဝ်းၵေႃႈ ၸင်ႇယုမ်ႉၶူဝ်သေ လၢတ်ႈဝႃႈ
“ၸၢမ်သႅင်း ... ယူဝ်ပိူၼ်ႈၵမ်းၵမ်း မႃးႁွင်ႉမေႃၵႂၢမ်းၽၢႆႇၼႃႈႁိူၼ်း ၸၢမ်သႅင်းၶဝ် တိၵ်းတိၵ်း ႁေယဝ်ႉဢိူဝ်ႈ”
“ၵႂၢမ်းသင်”
“ၵႂၢမ်းဢၼ်ဝႃႈ ပီႈၼၢင်း ပီႈၼၢင်းသၢဝ်လူင်ဢိူၺ် ၼႆ ၼၼ်ႉဢိူဝ်ႈ”
“ႁိုဝ်ႉ! ... ပေႃးမႃးႁွင်ႉတႄႉ ၸၢမ်သႅင်းတေဢဝ်ၵၢင်ႇၵႂႃႉ ပိုတ်းပၼ်ၶဝ်ႁေယဝ်ႉဢိူဝ်ႈ ... ပေႃးႁတ်းမႃးႁွင်ႉၵေႃႈ မႃးႁွင်ႉ တူၺ်းလႄႈ”
“တႄႉႁႃႉ ... ၸၢမ်သႅင်း”
“တႄႉဢိူဝ်ႈ”
“ၸွင်ႇၸၢမ်သႅင်း မေႃပိုတ်းၵၢင်ႇႁိုဝ်”
“မေႃၼႅၼ်ႇယဝ်ႉ”
“ပေႃးၼႆ ၶမ်ႈၸူင်ႈပီႈၸၢႆးၶိူဝ်း တေၸူဝ်းၸၢႆးၶမ်းသေ မႃးႁွင်ႉၵႂၢမ်း ပီႈၼၢင်းသၢဝ်လူင် ၽၢႆႇၼႃႈႁိူၼ်းၸၢမ်သႅင်းၶဝ်ၼႃႈ”
“ပေႃးႁတ်းၵေႃႈ မႃးႁွင်ႉတူၺ်းလႄႈ”
“ၸၢမ်သႅင်း တေႁတ်းပိုတ်းယူႇႁႃႉ”
“ႁတ်းၼႅၼ်ႇယဝ်ႉ”
“ပေႃး ၸၢမ်သႅင်းပိုတ်းၼႆ တေဢမ်ႇၸပ်းပီႈၸၢႆးၶိူဝ်း လႆႈၵူၺ်း”
“ၸပ်းၼႅၼ်ႇယဝ်ႉ”
“ဢမ်ႇၸပ်းသႄႈ ပီႈၸၢႆးၶိူဝ်းမေႃဝႄႈယူႇလူး”
“တေႁဵတ်းႁိုဝ်ဝႄႈ”
“လွမ်လွမ်ၵႂႃႇပႅပ်ႉမႅပ်း ၽၢႆႇလင်ၸၢႆးၶမ်းသေ ဢဝ်ၸၢႆးၶမ်း ယူႇၽၢႆႇၼႃႈဝႆႉႁေႉယဝ်ႉဢိူဝ်ႈ ... ၵွပ်ႈၼႆ ပေႃးၸၢမ်သႅင်းပိုတ်းမႃးၼႆ လူဝ်ႇၸပ်းသႂ်ႇၸၢႆးၶမ်းၵူၺ်းဢိူဝ်ႈ”
ၼၢင်းမူဝ်ၶၢဝ် ၸင်ႇလိၵ်းတႃတေႃႇၸၢႆးၶိူဝ်း ၶွၼ်ၼိုင်ႈသေ ထၢမ်ဝႃႈ
“ၸပ်းတီႈလႂ် ၸၢႆးၶမ်းလႃႇ ပီႈၸၢႆးၶိူဝ်း”
“ၸပ်းသႂ်ႇႁူဝ်ၸႂ်မၼ်းသေ ၶမ်ဝႆႉၵိုမ်းၵိုမ်း ဢမ်ႇၸၢင်ႈလိုမ်း လႆႈၼႆဢိူဝ်ႈ ႁႃး ႁႃး ”
ၼၢင်းၸၢမ်သႅင်း လီဢၢႆၵႂႃႇသေ ဢဝ်သၢႆထူင်မၼ်းၽတ်ႉ ပၼ်ၸၢႆးၶိူဝ်းယူႇ။
“ဢိုဝ်ႉႁိုဝ် ပီႈၸၢႆးၶိူဝ်းၼႆႉ ဝႃႈထႅင်ႈလႄႈ ဢိုဝ်ႉႁိုဝ် ဝႃႈထႅင်ႈလႄႈ”
ၼၢင်းမူဝ်ၶၢဝ် ၸင်ႇၶိုၼ်းထၢမ်ထႅင်ႈ
“ပီႈၸၢႆးၶိူဝ်း ... မၢၵ်ႇၵၢင်ႇ ဢၼ်ၸၢမ်သႅင်း ပိုတ်းၼၼ်ႉလူး ပဵၼ်မၢၵ်ႇၵၢင်ႇ မဵဝ်းႁိုဝ်လႃႇ”
“ပဵၼ်မၢၵ်ႈၵၢင်ႇ မၢၵ်ႇႁူဝ်ၸႂ် ဢၼ်ဢဝ်တၢင်းႁၵ်ႉသေ ႁဵတ်းဝႆႉၼၼ်ႉဢိူဝ်ႈ ႁႄး ႁႄး”
ၼၢင်းၸၢမ်သႅင်း ၶိုၼ်းလီဢၢႆသေ ဢဝ်တႃမိုဝ်းမၼ်း ထုပ်ႉပၼ်ၸၢႆးမွၼ်းၶိူဝ်းလႄႈ ၼၢင်းမူဝ်ၶၢဝ်ၶႃသွင်ၵေႃႉ ၵေႃႉၶွၼ်ၶွၼ်ယဝ်ႉ”
“ဢိုဝ်ႉႁိုဝ် ... ဢိုဝ်ႉႁိုဝ်... လၢတ်ႈတိၵ်းတိၵ်းလႄႈ လၢတ်ႈ တိၵ်းတိၵ်းလႄႈ”
“ႁႃး ...ႁႃး ... ႁႅမ်ပိူၼ်ႈသေ သမ်ႉၸႂ်ႉပိူၼ်ႈလၢတ်ႈတိၵ်းတိၵ်းလႄႈၼႆဝႃႇ ပေႃးၼႆ လၢတ်ႈထႅင်ႈလႄႈမူဝ်ၶၢဝ်”
“ၶိၵ်း ၶိၵ်း ... မၢၵ်ႇၵၢင်ႇဢၼ်ပိုတ်းၼၼ်ႉ ပိုတ်းလၢႆလုၵ်ႈလႃႇ ပီႈၸၢႆးၶိူဝ်း”
“ႁဵင်ႁႃႈပၢၵ်ႇလုၵ်ႈဝႃႈ”
“တီႈၸပ်းၼၼ်ႉတႄႉ သမ်ႉၸပ်းႁူဝ်ၸႂ်ၸၢႆးၶမ်းၼႆႉႁႃႉ ပီႈၸၢႆးၶိူဝ်း”
“ၸႂ်ႈဢိူဝ်ႈ”
“ပီႈၸၢႆးၶိူဝ်းလႄႈ မူဝ်ၼႆႉ ယွၵ်ႇပိူၼ်ႈတိၵ်းတိၵ်းဝႃႇ ၸၢမ်သႅင်း တေၸႂ်လမ်ယူႇၼႃႈ”
“ပေႃးၸၢမ်သႅင်းၸႂ်လမ်ၼႆ မူဝ်တေၸႂ်ႉ ပီႈၸၢႆးၶမ်း ၶျေႃးပၼ်လႆ”
“ဢူဝ် ... ဢမ်ႇလူဝ်ႇ”
ၽွင်းၼၼ်ႉ ၸၢႆးၶမ်းၵေႃႈ ဢွၵ်ႇႁွင်ႈႁဵၼ်းသေ မႃးၸူးၶဝ်ယူႇ ၸၢႆးၶိူဝ်းၸင်ႇဝႃႈ
“ၼႄႈ ... ၸၢႆးၶမ်း တေမႃးၶျေႃးၵူၼ်းၸႂ်လမ်ယဝ်ႉ”
“ၸႂ်ႈတႄႉဢိူဝ်ႈၼေႃ ႁႃးလူဝ်ႇလႆႈပၢႆႈပၼ်ၶႃယူဝ်ႉ ပီႈၸၢႆးၶိူဝ်း”
ၸၢႆးၶမ်းၽႅဝ်မႃးတီႈၶဝ် ၸိူဝ်းၼၼ်ႉသေ
“သူသၢမ်ၵေႃႉ ၶႃႉၸိုဝ်ႈၵဝ်ယူဝ်ႉၼႆႉ ၸွင်ႇၸႂ်ႈႁိုဝ် ႁူၵဝ် လိူတ်ႇဝႃႈလိူတ်ႇယဝ်ႉၼႆႉ”
ၼၢင်းမူဝ်ၶၢဝ်ၸင်ႇဝႃႈ
“ပီႈၸၢႆးၶမ်း ပိူၼ်ႈဝႃႈ‘ႁူလိူတ်ႇပိူၼ်ႈၶႃႉၸူမ်း ႁူၶူမ်းပိူၼ်ႈၶႃႉၸႃႉ’ၼႆၼႃႇ မူဝ်ၶဝ် လၢတ်ႈၶိူဝ်းပီႈၸၢႆးၶမ်းၼႆၵေႃႈ လၢတ်ႈလွင်ႈလီဢိူဝ်ႈ ပေႃးဢမ်ႇယုမ်ႇၼႆ ထၢမ်တူၺ်းၸၢမ်သႅင်းလႄႈ”
ၸၢႆးၶမ်းၵေႃႈ ၸင်ႇထၢမ်တႄႉယဝ်ႉ
“ၸၢမ်သႅင်း ၶဝ်ဝႃႈႁိုဝ်ဝႃႈ”
ၼၢင်းၸၢမ်သႅင်းၵေႃႈ ပေႃးတေလၢတ်ႈသိုဝ်ႈသိုဝ်ႈ ၸိူင်ႉၼင်ႇ ၶဝ်လၢတ်ႈၼင်ႇၼႆ မၼ်းၼၢင်းဢမ်ႇႁတ်းလၢတ်ႈလႄႈ မၼ်းၼၢင်း ၸင်ႇဝႃႈ
“ဢေႃ ... ႁဝ်းဝႃႈ ပီႈၸၢႆးၶမ်း ၶတ်းၸႂ်လိၵ်ႈၵျႃႉၼႆယဝ်ႉ”
လႆႈငိၼ်းၼၢင်းၸၢမ်သႅင်းလၢတ်ႈၼင်ႇၼႆ ၼၢင်းမူဝ်ၶၢဝ် လႄႈ ၸၢႆးမွၼ်းၶိူဝ်းလွမ်လွမ် ယုမ်ႉၶူဝ်တေႃႇၵၼ်ယူႇ၊ ၼၢင်းၸၢမ်သႅင်း တႄႉ လၵ်ႉလွမ်လပ်းတႃ ၵၢပ်ႈသီႇသူပ်းတေႃႇၶႃသွင်ၵေႃႉယူႇ ၸၢႆးၶမ်း ၸင်ႇဝႃႈ
“သူသၢမ်ၵေႃႉလူး ဢမ်ႇၶတ်းၸႂ်လိၵ်ႈႁႃႉ”
ၼၢင်းမူဝ်ၶၢဝ် ၸင်ႇဝႃႈ
“ၶၢဝ်းယၢမ်းၼႆႉ ပဵၼ်ၶၢဝ်းယၢမ်းၶတ်းၸႂ်လိၵ်ႈယဝ်ႉ ပွႆးထၢမ်လိၵ်ႈၵေႃႈ ၸမ်မႃးယဝ်ႉဢမ်ႇၸႂ်ႈႁႃႉ ... ၵွပ်ႈၼႆ မူဝ်ၵေႃႈၶတ်း ၸႂ်ယူႇ”
ၼၢင်းၸၢမ်သႅင်းၵေႃႈဝႃႈ
“ၸၢမ်သႅင်းၵေႃႈ ၼင်ႇႁိုဝ်တေပူၼ်ႉၼၼ်ႉ ၶတ်းၸႂ်ယူႇ ၼင်ႇၵဝ်ႇယဝ်ႉ”
ၸၢႆးမွၼ်းၶိူဝ်းတႄႉ မၼ်းၸၢႆးပႆႇတွပ်ႇလၢတ်ႈသင်လႄႈ ၸၢႆးၶိူဝ်း ၸင်ႇထၢမ်
“ၸၢႆးၶိူဝ်း ... မႂ်းလႃႇဢမ်ႇၶတ်းၸႂ်ႁႃႉ ... ၵဝ်ႁၼ်မႂ်း မိူဝ်ႈလႂ်ၵေႃႈ ၵုမ်ႇတႅမ်ႈဝွၵ်းတႅမ်ႈၸိူင်းယူႇၵူၺ်းယဝ်ႉ”
“ၸၢႆးၶမ်း ... ဝႃႇသၼႃႇ(ၸႂ်သူင်) ဢၼ်ဝႃႈၼၼ်ႉ ဢမ်ႇမီး ဢၼ်ႁေႉဢၼ်တပ်ႉမၼ်းဝႃႇ လွင်ႈတႅမ်ႈလိၵ်ႈၼႆႉတႄႉ ပဵၼ်ဝႃႇသၼႃႇၵဝ်ယဝ်ႉ ၵွပ်ႈၼႆ ဢၼ်တႅမ်ႈၵေႃႈတႅမ်ႈ ဢၼ်ၶတ်းၸႂ်ၵေႃႈ ၶတ်းၸႂ်ယူႇၵႂႃႈ”
ၼၢင်းမူဝ်ၶၢဝ်ၵေႃႈ ၸင်ႇၶိုၼ်းဝႃႈ
“ဢၼ်ပီႈၸၢႆးၶမ်းဝႃႈၼၼ်ႉ ၸႂ်ႈတႄႉဢိူဝ်ႈ မူဝ်ၵေႃႈၵႆႉၵႆႉ လႆႈႁၼ် ပီႈၸၢႆးၶိူဝ်း ၵုမ်ႇတႅမ်ႈဝွၵ်းတႃႇသေႇယဝ်ႉ တူၺ်းလေႃႇ ၼႂ်းပပ်ႉမၼ်းဢၼ်လႂ်ၵေႃႈ လႆႈႁၼ်မီးဝွၵ်းၵူႈပပ်ႉယဝ်ႉ မိူဝ်ႈၼႆႉၵေႃႈ မႃးတႅမ်ႈယူႇ တီႈၼႆႈထႅင်ႈယဝ်ႉ”
“ၸၢႆးၶိူဝ်း ပၼ်ၵဝ်ယွၼ်းတူၺ်းၽွင်ႈလူး ဢၼ်မႂ်းတႅမ်ႈၼၼ်ႉ” ၸၢႆးၶမ်းၵေႃႈ မႃးဢဝ်လူတူၺ်းယဝ်ႉ ဝၢႆးသေမၼ်းလူတူၺ်းၵႂႃႇယဝ်ႉ မၼ်းၸင်ႇဝႃႈ
“ႁႃႉ ... ဝွၵ်းပိုၼ်းတၢင်းႁၵ်ႉတႆးၼႆႉ ၶႅမ်ႉဢိူဝ်ႈၼႆႉ ၵဝ်ယွင်ႈယေႃးပၢႆၵမ်မႂ်းတႄႉတႄႉယဝ်ႉ ၸၢႆးၶိူဝ်း သိုပ်ႇၶတ်းၸႂ်လႄႈ”
“ၶမ်ႈၼႆႉတႄႉ ပႆႇၸၢင်ႈၶတ်းၸႂ်ၵွၼ်ႇ”
“ၵွပ်ႈသင်လႃႇ”
“ၵဝ်တေၸူဝ်းမႂ်း ၵႂႃႇႁွင်ႉၵႂၢမ်းတီႈၼိုင်ႈဢိူဝ်ႈ”
“တေၵႂႃႇႁွင်ႉၵႂၢမ်းသင် တေႁွင်ႉတီႈလႂ် ၵဝ်ၵူဝ်ပိူၼ်ႈဢဝ် ၵၢင်ႇပိုတ်းပၼ်ႁႃးၵူၺ်းဢိူဝ်ႈမႂ်း”
ၸၢႆးမွၼ်းၶိူဝ်း ၶိုၼ်းထၢမ်ဝႃႈ
“ၵႂၢမ်းဢၼ်ဝႃႈ ပီႈၼၢင်းသၢဝ်လူင်ၼၼ်ႉ မႂ်းလႆႈယူႇႁႃႉ”
“လႆႈဢိူဝ်ႈ”
“ပေႃးလႆႈၼႆ ၶမ်ႈၸူင်ႈ ႁႃးၵႂႃႇႁွင်ႉတီႈၼႃႈႁိူၼ်းဢၼ်တေပဵၼ် ပီႈၼၢင်းသၢဝ်လူင်ၵေႃႉၼိုင်ႈ ၼၼ်ႉၼေႃႈ”
ၼၢင်းၸၢမ်သႅင်း လၵ်ႉလွမ်လိူၵ်ႇတႃၸင်းတေႃႇ ၸၢႆးမွၼ်းၶိူဝ်းယဝ်ႉ ၸၢႆးၶမ်းၸင်ႇဝႃႈ
“ၸၢႆးၶိူဝ်း ယူဝ်ပီႈၼၢင်းသၢဝ်လူင်ၼၼ်ႉ ဢဝ်ၵၢင်ႇပိုတ်း ႁႃးယူဝ်ႉဢၢႆႈ”
“မႂ်းၵူဝ်ၺႃးႁူဝ်မႂ်းႁႃႉ”
“ၵဝ်ၵူဝ်ၺႃး ႁူဝ်ၸႂ်ၵဝ်ဢိူဝ်ႈ”
“ႁႃး ႁႃး ယႃႇပေၵူဝ် တီႈဢၼ်ႁႃးတေၵႂႃႇၼႆႉတႄႉ မၼ်းတေဢဝ်မၢၵ်ႇႁူဝ်ၸႂ် ႁဵင်ႁႃႈပၢၵ်ႇသေ ပိုတ်းဝႃႇ”
“တႄႉႁႃႉ ... ပေႃးၼႆတႄႉ ၵႂႃႇၵႂႃႈ ပဵၼ်တီႈလႂ်ဝႃႈ”
“ၵဝ်တေမႃးႁွင်ႉမႂ်းၵႂႃႈ ၵႂၢမ်းပီႈၼၢင်းသၢဝ်လူင်ၼၼ်ႉ မႂ်းတူၺ်းသေၽိုၵ်းႁွင်ႉဝႆႉၶႅမ်ႉၶႅမ်ႉလႃႈ”
“ၵဝ်လႆႈဝႆႉမူတ်းယဝ်ႉ”
“ႁွင်ႉတူၺ်းလူး”
ၸၢႆးၶမ်းၵေႃႈ ႁွင်ႉမေႃၵႂၢမ်း ပီႈၼၢင်းသၢဝ်လူင်ၼၼ်ႉ ၼႄၶဝ်ယူႇ
✽ ၼွင်ႉယိင်းၶဝ် ၼွင်ႉၸၢႆးၶဝ် ပိူၼ်ႈမီးၸူႉ ၵူႈၵေႃႉၵူႈၵေႃႉ ၵိုတ်းပီႈၼၢင်းသၢဝ်လူင်ၶဝ်ၵူၺ်းဢိူဝ်ႈ ... သၢဝ်လူင်ဢိူၺ် ... ဢိူၺ် သၢဝ်လူင်ဢိူၺ် ... ဢိူၺ်းသၢဝ်လူင်ဢိူၺ် ၵႂႃႇၵၢတ်ႇၵေႃႈ ၼိုင်ႈၵေႃႉ ၼိုင်ႈၵေႃႉ ... မိူဝ်းႁိူၼ်းၵေႃႈၼိုင်ႈၵေႃႉ ၼိုင်ႈၵေႃႉ ✽
ၸၢႆးမွၼ်းၶိူဝ်းလႄႈ ၼၢင်းမူဝ်ၶၢဝ် ယုမ်ႉၶူဝ်သေတူပ်းမိုဝ်း ၶဝ်ႈသဵင်ၸွမ်းၸၢႆးၶမ်းယူႇ၊ ၼၢင်းၸၢမ်သႅင်း ၼႃႈမႆႈလီဢၢႆလႄႈ မၼ်းၼၢင်းၸင်ႇဝႃႈ
“ဢူဝ် ... သူၸိူဝ်းၼႆႉ ပေႃးလႃႈပေႃးလႃႈ ပိူၼ်ႈဢွၼ်ၵၼ် လွမ်တူၺ်း သူယူႇယဝ်ႉၼႄႈ ဢမ်ႇလီဢၢႆပိူၼ်ႈႁႃႉ ၸၢမ်သႅင်းတႄႉ လီဢၢႆပိူၼ်ႈ တၢင်သူသၢမ်ၵေႃႉၼႃႇယဝ်ႉ”
ၼၢင်းၸၢမ်သႅင်း ဝႃႈၼင်ႇၼႆသေ ပၢႆႈၽၢတ်ႇၶဝ်ၵႂႃႇလႄႈ ၶဝ်ဢွၼ်ၵၼ် ၸူမ်းၶူဝ်မၼ်းယူႇ။
ႁႃး ... ႁႃး ... ႁႃး ... ၶိၵ်း ... ၶိၵ်း ... ႁီး ... ႁီး”