မွၵ်ႇလူင်ႇလဵဝ်/တွၼ်ႈသိပ်း
ထႅင်ႈဝၼ်းၼိုင်ႈ
ၼၢင်းမူဝ်ၶၢဝ် လႄႈ ၼၢင်းၸၢမ်သႅင်းၵေႃႈ ဢဝ်ငိုၼ်းသေ ၵႂႃႇႁႃသိုဝ်ႉၾိမ်းယဝ်ႉ ဝၢႆးသေသိုဝ်ႉလႆႈယဝ်ႉ ၶႃသွင်ၵေႃႉပူၼ်ႉမႃး တီႈတႃႈၵႃးလွႆလႅမ်သေ လႆႈမႃးႁၼ် ၸၢႆႈၼႃထိုဝ်လႄႈ ၼၢင်းၸၢမ် သႅင်းၸင်ႇဝႃႈ
“မူဝ် ... ၼၼ်ႉပဵၼ်ၵႃး ၸၢႆးၼႃထိုဝ် ဢမ်ႇၸႂ်ႈႁႃႉ”
“ၸႂ်ႈဢိူဝ်ႈ”
ၸၢႆးၼႃထိုဝ်ၵေႃႈ တိုၵ်ႉတူၺ်းလိၵ်ႈၽိုၼ်ၶၢဝ်ႇယူႇ တီႈၼႂ်းၵႃးၼၼ်ႉယဝ်ႉ မၼ်းတိုၵ်ႉၶဝ်ႈၸႂ်သေ လူတူၺ်းလိၵ်ႈၽိုၼ်ၶၢဝ်ႇယူႇ
“ၶၢဝ်ႇငၢဝ်းၼွၵ်ႈမိူင်း မိူင်းဢၽရိၵပွတ်းၸၢၼ်းၾႃႉလႅင်ႈ မူဝ်းၶွင်ႇ ၽူၼ်ဢမ်ႇမႃးလႄႈ ၵၢၼ်ၽုၵ်ႇသွမ်ႈလူႉလႅဝ်ဝႃႇ ဢလူဝ်ႉ တုၵ်ႉၶႃႉ... တုၵ်ႉၶႃႉ”
ၼၢင်းမူဝ်ၶၢဝ်လႄႈ ၼၢင်းၸၢမ်သႅင်း ၽႅဝ်မႃးႁိမ်းမၼ်းသေတႃႉ မၼ်းပႆႇႁူႉ မၼ်းတိုၵ်ႉသိုပ်ႇလူထႅင်ႈယူႇ
“ဢိူဝ်ႈ ... ၶၢဝ်ႇငၢဝ်းၼွၵ်ႈမိူင်းၼႆႉ သုၵ်ႉသၵ်ႉၼႃႇ ၵဝ်တေ တူၺ်းၶၢဝ်ႇငၢဝ်း ဢၼ်ပိူၼ်ႈ ပိုၼ်ၶၢဝ်ႇၼၼ်ႉၵွၼ်ႇ ႁႃႉ ငဝ်းလၢႆးၶႄႇ ၵုၼ်ႇၽူးဝႃႇ ဢၢပ်ႈတေလီတူၺ်းယူႇၼႆႉ ပေႃးၽႅဝ်မႃးတူၼ်ႈတီးတႄႉ ၵဝ်တေမႃးတူၺ်းၵမ်းလဵဝ်ယဝ်ႉ ဢမ်ႇပၼ်လွတ်ႈသႄႈ”
မၼ်းသိုပ်ႇတူၺ်းမႃးၽႅဝ် ၶၢဝ်ႇငၢဝ်းၵူပ်ႉၵူႈပဵၼ်ႁိူၼ်းၵၼ်ၼၼ်ႉသေ
“ႁႃႉ ... လုၵ်ႈယိင်းလုၵ်ႈၸၢႆးပိူၼ်ႈၼႆႉ ၵူႉသူဝ်ႇၵၢမ်ႇလီၵျႃႉ တူၺ်းလူး ၵိုတ်းဢၢႆႈႁႃးၵူၺ်းယဝ်ႉ ပႆႇၺႃးၸိူင်ႉပိူၼ်ႈ”
ၼၢင်းမူဝ်ၶၢဝ်လႄႈၼၢင်းၸၢမ်သႅင်း လွမ်ၶႂ်ႈၶူဝ်တႄႉတႄႉ ႁဵတ်းၼၼ်သေ ၸၢႆးၼႃထိုဝ် တၼ်းတူၺ်းႁၼ်ၼႂ်းမၢၼ်ႇၵႃးသေ မၼ်းလွမ်ႁူႉလွင်ႈဝႃႈ ၼၢင်းမူဝ်ၶၢဝ်ၶႃ မႃးလၵ်ႉလွမ်ထွမ်ႇမၼ်းၼႆ လႄႈ မၼ်းႁဵတ်းၵဵင်ႈဢမ်ႇႁူႉသေ သိုပ်ႇတူၺ်းလႃႈလီလူလူင်ၵႂႃႇယဝ်ႉ
“ႁႃး ... တီႈၼႆႈတႄႉ ပဵၼ်ၸိုဝ်ႈတႆးတင်းသွင်ၵေႃႉဢိူဝ်ႈၼႆႉ သွင်ၵေႃႉလႆႈၸႂ်ၵၼ်သေ ၵူပ်ႉၵူႈဝႃႇ ၸၢႆးမွၼ်းၶိူဝ်း လႄႈ ၼၢင်းမူဝ်ၶၢဝ်ဝႃႇ”
ၸၢႆးၼႃထိုဝ် တင်ႈၸႂ်ဝႃႈ ႁႂ်ႈမၼ်းငိၼ်းလႄႈ ၼၢင်းမူဝ်ၶၢဝ် ပဵၼ်ဢၼ်ယူႇယၢပ်ႇၵႂႃႇသေ မၼ်းၼၢင်းၸင်ႇဝႃႈ
“ပီႈၸၢႆးၼႃထိုဝ်”
ၸၢႆးၼႃထိုဝ်ၵေႃႈ ႁဵတ်းၵဵင်းတူၵ်းၸႂ်ဝၢႆႇတူၺ်းယဝ်ႉ
“ဢေႃႈ ... ၼၢင်းမူဝ်ၶၢဝ်လႄႈ ၼၢင်းၸၢမ်သႅင်းႁႃႉၼႆႉ”
“ၸႂ်ႈဢေႃႈ ... ပီႈၸၢႆးၼႃထိုဝ် တူၺ်းလိၵ်ႈၶၢဝ်ႇငၢဝ်းသင် ဝႃႈၼၼ်ႉ”
“လိၵ်ႈၶၢဝ်ႇ မိူဝ်ႈၼႆႉၼၼ်ႉဢိူဝ်ႈ”
“ပႃးၶၢဝ်ႇငၢဝ်းၸိူင်ႉႁိုဝ် ဢၼ်လၢၵ်ႇလၢႆးမၼ်း”
“ဢမ်ႇပႃးၸိူင်ႉႁိုဝ်ၼင်ႇၵဝ်ႇ”
“မိူဝ်ႈၵႆႈ ပီႈၸၢႆးၼႃထိုဝ် လူၵႂႃႇဝႃႈႁိုဝ်ၵေႃ ၶိုၼ်းမႄးလူ တူၺ်းလူး”
“ဢမ်ႇဝႃႈႁိုဝ်လူင် ... ၵူၺ်းလူဝႃႈၶၢဝ်ႇလၢႆးၵုၼ်ႇၽူးၶႄႇ ဢၢပ်ႈတေလီတူၺ်းယူႇၼႆၵူၺ်း”
“ထၢင်ႇဝႃႈ မူဝ်ၶၢဝ်ဢမ်ႇငိၼ်းၼႆႁႃႉ ႁိုဝ်ႉ!”
“ဢေႃႈ ... ယႃႇၽိတ်းၸႂ်ၼႃႈ ၼၢင်းမူဝ်ၶၢဝ်မီးလွင်ႈတၢင်း ၸိူင်ႉႁိုဝ် တေၵႂႃႇလွႆလႅမ်ႁႃႉ”
“ဢမ်ႇၸႂ်ႈ ဢၢင်ႈမႃးပိုင်ႈဢိင် ပီႈၸၢႆးၼႃထိုဝ် ႁႂ်ႈဢဝ်ၶူဝ်းၼႆႉ သူင်ႇပၼ်လွႆလႅမ် ၽွင်ႈၼႆဢေႃႈ”
“သူင်ႇပၼ်ၽႂ်”
“သူင်ႇပၼ် ပီႈၸၢႆးၶိူဝ်း”
“လႆႈယူႇ ပဵၼ်ဢီႈသင်”
“ပဵၼ်ၽလိမ်ႇ(ၾိမ်း)ဢေႃႈ ၼႆႉၵေႃႈဢဝ်ပၼ်ပီႈၸၢႆးၶိူဝ်း ၼင်ႇၵဝ်ႇၼႃႈ”
“လိၵ်ႈဢၼ် ဢၼ်လိူင်လႄႈ ဢၼ်သွမ်ႇလေႃးၵၼ် ၼၼ်ႉႁႃႉ”
သီၼမ်ႉယႃႈၼႆႉ ပေႃးဢဝ်သီလိူင်လႄႈ ဢၼ်သွမ်ႇလေႃးၵၼ်ၼႆ ပဵၼ်သီၶဵဝ်ၵႂႃႇယဝ်ႉ ... ၵွပ်ႈၼႆ ၸၢႆးၼႃထိုဝ်ၶႂ်ႈဝႃႈ“လိၵ်ႈၶဵဝ်ႁႃႉ” ၼႆၼၼ်ႉယဝ်ႉ၊ ၼၢင်းမူဝ်ၶၢဝ်ၵေႃႈ ႁူႉပွင်ႇၵႂႃႇလႄႈ မၼ်း ၼၢင်းၸင်ႇၶိုၼ်းဝႃႈ
“ဢမ်ႇၸႂ်ႈၵူၺ်း ပီႈၸၢႆးၼႃထိုဝ် ဢဝ်သူင်ႇပၼ်တႄႉတႄႉၼႃႈ”
“တမ်းၸႂ်လႃႈ”
“ၶွပ်ႈၸႂ်ယဝ်ႉ ပီႈၸၢႆးၼႃထိုဝ် မူဝ်ၶဝ်တေၵႂႃႇၵွၼ်ႇၼႃႈ”
“ဢိူဝ်ႈ ... ဢိူဝ်ႈ ... လွႆးလွႆး”
ၶႃသွင်ၵေႃႉၵေႃႈ ပႆၽၢတ်ႇၸၢႆးၼႃထိုဝ်မႃးသေ ၽွင်းမိူဝ်ႈၶႃ ၽႅဝ်မႃးတီႈ သဵၼ်ႈတၢင်းၵႃးၼၼ်ႉ ၵႃးသလုၼ်းလမ်းၼိုင်ႈ ၼဵၵ်းႁွၼ်းမၼ်း“တိတ်းတိတ်း”ၼႆ ၵိုတ်းၽၢႆႇၼႃႈၶႃသွင်ၵေႃႉသေ ၵေႃႉ ဢၼ်ႁေႃႈၵႃးမႃးၼၼ်ႉ ပဵၼ်ၸၢႆးသႅင်မိူင်းယဝ်ႉ ၸၢႆးသႅင်မိူင်းၸင်ႇဝႃႈ
“ႁေႉ ... မူဝ် ... ၶိူဝ်သွင်ၵေႃႉ တေၵႂႃႇလႂ်ၼႆႉ တေမိူဝ်းႁႃ”
ယွၼ်ႉပိူဝ်ႈၸၢႆးသႅင်မိူင်း ႁွင်ႉၼၢင်းမူဝ်ၶၢဝ်ဝႃႈ “မူဝ်”ၼႆ လႄႈ ၼၢင်းမူဝ်ၶၢဝ် ဢမ်ႇလႆႈၸႂ်သေဢိတ်း ၵူၺ်းၵႃႈ ၶဝ်ပဵၼ်တႆးၵေႃႉၵၼ် ၸဵမ်လဵၵ်ႉလႄႈ မၼ်းၼၢင်းၵေႃႈ ၸင်ႇၶိုၼ်းတွပ်ႇဝႃႈ
“ၸႂ်ႈဢိူဝ်ႈ ... ၸၢႆးသႅင်မိူင်း”
“ပေႃးၼႆၵေႃႈ သင်ႇထုၵ်ႇယဝ်ႉ ... ၶိုၼ်ႈၶီႇၵႃးလႄႈ ၵဝ်တေမိူဝ်းသူင်ႇပၼ်လႆ”
“လႆႈယဝ်ႉ ... ၸၢႆးသႅင်မိူင်း ... ႁႃးတေၶီႇလူတ်ႉသၢႆမိူဝ်း ဢဝ်လႆ”
“ၵဝ်တႃႉ မီးၸေႇတၼႃႇသေ ႁွင်ႉဢိူဝ်ႈၼႆႉ မႃးၶီႇလႄႈ”
ၼၢင်းမူဝ်ၶၢဝ် လွမ်ဝၢႆႇတူၺ်းၼၢင်းၸၢမ်သႅင်း ၵႅပ်ႉၼိုင်ႈသေ ၼၢင်းၸၢမ်သႅင်းၵေႃႈ ဢမ်ႇၶႂ်ႈၶီႇ ၵူၺ်းၵႃႈ ပေႃးဢမ်ႇၶီႇၵေႃႈ ဢႃးၼႃႇၵေႃႉဢၼ်ႁွင်ႉၼၼ်ႉလႄႈ ၶႃသွင်ၵေႃႉၵေႃႈ ၶိုၼ်ႈၶီႇၵႃး တင်းသွင်ၵေႃႉယဝ်ႉ၊ ၸၢႆးၼႃထိုဝ်တႄႉ လွမ်တူၺ်းၶဝ် တေႃႇပေႃးပူၼ်ႉၵႂႃႇယူႇ ၼိူဝ်ၵႃးၼၼ်ႉ ၸၢႆးသႅင်မိူင်း ၸင်ႇဝႃႈ
“မူဝ် ... ၶိူဝ်သွင်ၵေႃႉတႄႉ တေလႆႈၶိုၼ်ႈၸၼ်ႉၸွမ်ယဝ်ႉၼေႃႈ”
“ၸႂ်ႈဢိူဝ်ႈ ... ပီၵၢႆ သင်မႂ်းၶတ်းၸႂ်လိၵ်ႈၵေႃႈ မႂ်းတေႃႈ တေလႆႈၶိုၼ်ႈယူႇ မႂ်းဢမ်ႇၶတ်းၸႂ်လိၵ်ႈလႄႈ ၸင်ႇတူၵ်းသုမ်းယဝ်ႉ ဢမ်ႇၸႂ်ႈႁႃႉ”
“မူဝ် ... မႂ်းတၢင်ႇတၢင်းၽိတ်းၼႆၵေႃႈ ၵဝ်တေႃႈလႆႈၵူမ်ႈႁူဝ်ၶၢမ်ႇၵူၺ်းယဝ်ႉ ယွၼ်ႉပိူဝ်ႈ ၵဝ်တူၵ်းသုမ်းလႄႈ မႂ်းလွမ်ၸူမ်းဝႆႉၼႃ”
“ၸၢႆးသႅင်မိူင်း ၵၢင်ၸႂ်ႁဝ်းတႄႉ ၶႂ်ႈႁႂ်ႈပူၼ်ႉၵူႈၵေႃႉယဝ်ႉ ၵူၺ်းၵႃႈ တႃႇတေပူၼ်ႉ ပေႃးဢမ်ႇၶတ်းၸႂ် သမ်ႉဢမ်ႇပူၼ်ႉလႆႈ ဢမ်ႇၸႂ်ႈႁႃႉ”
ပေႃးလၢတ်ႈလွင်ႈၶတ်းၸႂ်လိၵ်ႈၼႆ ပဵၼ်ၶေႃႈၵႂၢမ်း ဢၼ်သၢၼ်ၶတ်းႁူ ၸၢႆးသႅင်မိူင်းၶေႃႈၼိုင်ႈယဝ်ႉ ၵၢင်ၸႂ်မၼ်းတႄႉ ၶႂ်ႈၵျေႃႇမူၼ်ႈ ၶႂ်ႈဢႅဝ်ႇလႄႇ ၶႂ်ႈမူတ်းၶၢဝ်းယၢမ်းၸွမ်းလူၺ်ႈတႆးၵေႃႉ၊ ၶႂ်ႈလဵတ်းတိင်ႇ မေႃၵႂၢမ်းၸိူဝ်းၼႆႉ တိုၼ်းပဵၼ်ဝႃႇသၼႃႇမၼ်းယဝ်ႉ။
ယွၼ်ႉပိူဝ်ႈမၼ်းၸၢႆးငိုၼ်းၼမ်လႄႈ မၢင်ပွၵ်ႈမင်လႂ်ၵေႃႈ တင်းတႆးၵေႃႉမၼ်းသေ မေႃႁႃၵိၼ်လဝ်ႈယဝ်ႈ။
မၼ်းႁေႃႈၵႃးၽႅဝ်မႃးၼႂ်းဝၢင်းႁိူၼ်း ၼၢင်းမူဝ်ၶၢဝ်ၶဝ်သေ မႃးၵိုတ်းၵႃး တီႈၼႃႈႁိူၼ်းၼၢင်းမူဝ်ၶၢဝ်ဝႆႉယဝ်ႉ ၶႃသွင်ၵေႃႉလူင်းၵႃးမႃးသေ ၼၢင်းမူဝ်ၶၢဝ်ၸင်ႇဝႃႈ
“ၸူမ်းယဝ်ႉ ... ၸၢႆးသႅင်မိူင်း ၶွပ်ႈၸႂ်ယဝ်ႉ”
ၽွင်းၼၼ် မႄႈၼၢင်းမူဝ်ၶၢဝ်ၶဝ် ၽႅဝ်မႃးသေ ၸင်ႇမႃးဝႃႈ
“ဢေႃႈ ... ယူဝ်ဝႃႈပဵၼ်ၽႂ်ၼႆၼႃး ... ၸၢႆးသႅင်မိူင်း လုၵ်ႉတီႈလႂ်မႃးၼႆႉ”
“ၶႃႈမႃးႁၼ်ၼၢင်းမူဝ်ၶၢဝ်ၶဝ် ၸွမ်းတၢင်းသေ မႃးသူင်ႇ ၶႃသွင်ၵေႃႉဢေႃႈ”
“ဢေႃႈ မႃးသူင်ႇလုၵ်ႈယိင်းႁႃႉ လီဢိူဝ်ႈ လီဢိူဝ်ႈ ၸၢႆးသႅင်မိူင်း ဢမ်ႇမႃးၼင်ႈၼႂ်းႁိူၼ်းၵွၼ်ႇလႃႇ”
“လႆႈၶႃႈယဝ်ႉ ပႃႈ ၶႃႈတေပူၼ်ႉမိူဝ်းၵမ်းလဵဝ်ယဝ်ႉ”
“တေမိူဝ်းၵမ်းလဵဝ်ႁႃႉ ... ပႄႉၼႅတ်ႈလႃႇ”
“ဢေႃႈ”
“ဢိူဝ်ႈ ဢိူဝ်ႈ ပေႃးတၼ်းၼႆ ၵႆႉမႃးဢႅဝ်ႇႁိူၼ်းပႃႈၶဝ်ၽွင်ႈလႄႈၼႃႈ”
“ဢေႃႈ ... ဢေႃႈ ... တေမႃးယူႇၶႃႈ”
ၸၢႆးသႅင်မိူင်း ၸင်ႇဝၢႆႇတူၺ်း ၼႃႈၼၢင်းမူဝ်ၶၢဝ်သေ တၵ်ႉဝႃႈ
“တေမိူဝ်းၵွၼ်ႇၼႃႈ”
ၼၢင်းမူဝ်ၶၢဝ်ၵေႃႈ ႁဵတ်းၵဵင်ႈယုမ်ႉသေ ငွၵ်းႁူဝ်ၼႄၵမ်း ၼိုင်ႈယဝ်ႉ ပႃႈယွတ်ႈတႄႉ ယုမ်ႉတေႃႇၸၢႆးသႅင်မိူင်းၼႆ ၵႅမ်ႈမၼ်း ပေႃးတၢၼ်ႇတေတႅၵ်ႇယဝ်ႉ၊ ဝၢႆးသေ ၵႃးၸၢႆးသႅင်မိူင်း ဢွၵ်ႇဝၢင်း ႁိူၼ်းၵွႃႇ ပႃႈယွတ်ႈၸင်ႇထၢမ်
“လုၵ်ႈယိင်း ၵႂႃႇၵၢတ်ႇမႃးႁႃႉၼႆႉ”
“ဢေႃႈ”
“ၵႂႃႇႁႃသိုဝ်ႉသင်လုၵ်ႈယိင်း”
ပေႃးမၼ်းၼၢင်းဝႃႈ ၵႂႃႇႁႃသိုဝ်ႉၽလိၼ်ႇ(ၾိမ်း)သေ သူင်ႇပၼ်ၸၢႆးၶိူဝ်းၼႆ မႄႈၶဝ်တေဢမ်ႇလႆႈၸႂ်လႄႈ မၼ်းၼၢင်း ၸင်ႇလႅၼ်လၢတ်ႈ
“ဢေႃႈ ... ၸၢမ်သႅင်း ၶႂ်ႈၵႂႃႇႁႃတူၺ်းၽႅၼ်ႇသိူဝ်ႈလႄႈ လုၵ်ႈယိင်းၵႂႃႇၸွမ်းသူင်ႇမၼ်းဢေႃႈ”
“မီးလႂ်လႃႇ ၽႅၼ်ႇသိူဝ်ႈဢၼ်ၶိူဝ်သိုဝ်ႉမႃး”
ၼၢင်းမူဝ်ၶၢဝ် တေလၢတ်ႈထႅင်ႈၸိူင်ႉႁိုဝ်ၵေႃႈ မၼ်းၼၢင်း ပႆႇဝူၼ်ႉလႆႈ ၼၢင်းၸၢမ်သႅင်း ၸင်ႇၵႂင်သေလၢတ်ႈဝႃႈ
“ဢေႃႈ ... ၸၢမ်သႅင်းၶဝ် ဢမ်ႇသိုဝ်ႉၶႃႈ ဢေႃႈ ဢၢင်ႈသိုဝ်ႉၼႆ ၵႃႈမၼ်းပိူၼ်ႈႁႅင်ႉယွၼ်း ၵႃႈယႂ်ႇၼႃႇၽႅဝ်လႄႈ ၸၢမ်သႅင်း ဢမ်ႇပဵၼ်သိုဝ်ႉမႃးၶႃႈပႃႈ”
“ၸႂ်ႈဢိူဝ်ႈ ... ပေႃးႁႅင်ႉၵႃႈယႂ်ႇၼႃႇၼႆ သဵင်ႈငိုၼ်းၼမ် လၢႆလၢႆၵူၺ်းယဝ်ႉ၊ သိုဝ်ႉၼုင်ႈဢၼ် ၵႃႈမၼ်းဢမ်ႇပေႃးယႂ်ႇၼၼ်ႉၼႆ ၶႅၼ်းဢိတ်းၼိုင်ႈဢိူဝ်ႈ”
ပႃႈယွတ်ႈလၢတ်ႈၼင်ႇၼႆသေ ၶဝ်ႈမိူဝ်းၼႂ်းႁိူၼ်းယဝ်ႉ၊ ၼၢင်းမူဝ်ၶၢဝ်လႄႈ ၼၢင်းၸၢမ်သႅင်းတႄႉ လိၵ်းတႃတေႃႇၵၼ်သေ လၵ်ႉလွမ်ယုမ်ႉတေႃႇၵၼ်ဝႆႉယူႇ။