မွၵ်ႇလူင်ႇလဵဝ်/တွၼ်ႈပႅတ်ႇ
ၸၢႆးမွၼ်းၶိူဝ်း ၽႅဝ်မႃးလွႆလႅမ် လႆႈသၢမ်ဝၼ်းသေတႃႉ ၼႂ်းၸႂ်မၼ်းတႄႉ ၵုမ်ႇဝူၼ်ႉၶွပ်ႈ ၼၢင်းမူဝ်ၶၢဝ် ၼႂ်းတႃမၼ်းၵေႃႈ ၵုမ်ႇႁၼ်ၼႃႈၼၢင်းမူဝ်ၶၢဝ် ... ၼႂ်းႁူမၼ်းၵေႃႈ ၵုမ်ႇငိၼ်းသဵင်လၢတ်ႈ ၼၢင်းမူဝ်ၶၢဝ်ယူႇ ၵူႈဝၼ်းယဝ်ႉ၊ ဝၼ်းမိူဝ်ႈၼႆႉ မၼ်းတိုၵ်ႉၼင်ႈၼႂ်းႁိူၼ်းၶဝ်သေ တိုၵ်ႉတႅမ်ႈလိၵ်ႈလဵၼ်ႈယူႇ
ၵလိင်း ... ၵလိင်း ... ၵလိင်း
လႆႈငိၼ်းသဵင်ၶဝ်ႇႁိင်ႇလႅင်လႄႈ မၼ်းၸၢႆး ဝၢႆႇတူၺ်းမႃး တီႈၼွၵ်ႈ ႁိမ်းၽၵ်းတူဝၢင်းႁိူၼ်းၶဝ်ၼၼ်ႉ လႆႈႁၼ်ၵူၼ်းသူင်ႇလိၵ်ႈ ဢဝ်လိၵ်ႈၽိုၼ်ၼိုင်ႈယုၵ်ႉၼႄသေဝႃႈ
“ၸၢႆးမွၼ်းၶိူဝ်း ... ၸၢႆးမွၼ်းၶိူဝ်း လိၵ်ႈ လိၵ်ႈ”
ၸၢႆးမွၼ်းၶိူဝ်းၵေႃႈ ၼႅတ်ႈဢႅၼ်ႇဢွၵ်ႇမႃးသေ မႃးႁပ်ႉဢဝ်လိၵ်ႈယဝ်ႉ
“ၸူမ်းၶွပ်ႈၸႂ်ၶႃႈယဝ်ႉ”
ဝၢႆးသေ ၵူၼ်းသူင်ႇလိၵ်ႈ ၶီႇလႅင်ပူၼ်ႉၵႂႃႇ ၸၢႆႈမွၼ်းၶိူဝ်းၵေႃႈ ၶဝ်ႈမႃးၼႂ်းႁိူၼ်းသေ မႃးၽုၺ်ႇတူၺ်း လိၵ်ႈမၼ်းယဝ်ႉ၊ လႆႈႁၼ်တူဝ်လိၵ်ႈမူၼ်းမူၼ်း ႁၢင်ႈလီလီဢွၼ်ႇ ပဵၼ်တူဝ်လိၵ်ႈ ၼၢင်းမူဝ်ၶၢဝ် တႅမ်ႈမႃးၸူးမၼ်းၼၼ်ႉယဝ်ႉ။
✽ ပၼ်ထိုင် ✽
ပီႈၸၢႆးၶိူဝ်း လွႆလႅမ်
မူဝ်မီးလိၵ်ႈ ၶုၵ်းၸႂ်လႆႈ ၶႆႈၸႂ်ထိုင်သေ ပွင်ၶိုင်တႅမ်ႈလိၵ်ႈ မႃးတီႈပီႈၸၢႆးၶိူဝ်းယဝ်ႉ။
ၽွင်းယၢမ်းႁပ်ႉႁၼ်လိၵ်ႈမူဝ်ၼႆႉ ႁႂ်ႈလႆႈပဵၼ်ၽွင်းယၢမ်း သိူဝ်းၼူဝ်သေၵမ်းၼႆ ယူႇတီႈယၢၼ်ၵႆသေ မူဝ်ယွၼ်းသူးပၼ်ယူႇ ပီႈၸၢႆးၶိူဝ်း၊
ဝၼ်းဢၼ်ပီႈၸၢႆးၶိူဝ်းမိူဝ်းၵႂႃႇလွႆလႅမ်ၼၼ်ႉၼႆ ၼႂ်ၼၼ်ႉ ပီႈၸၢႆးၶိူဝ်း ၵႂႃႇၵိၼ်ၶဝ်ႈသွႆး တီႈပႃႈတုမ်ႉငိုၼ်းၽိတ်းၼၼ်ႉယူႇဢမ်ႇၸႂ်ႈႁႃႉ ၼႂ်ၼၼ်ႉ မူဝ်လႄႈ ၸၢမ်သႅင်းၵေႃႈ ၵႂႃႇၵိၼ်ၼင်ႇၵဝ်ႇယဝ်ႉ သင်ၸိူဝ်ႉဝႃႈ မူဝ်ၶဝ်တၼ်းၽႅဝ်ၸဝ်ႉဢိတ်းၼိုင်ႈၼႆ ထၢင်ႇတႄႉ တေထူပ်းၺႃး ပီႈၸၢႆးၶိူဝ်းယူႇဢမ်ႇႁၢင်ႉယဝ်ႉ... ၵူၺ်းၵႃႈ မူဝ်ၶဝ် တူၵ်းလိုၼ်းၵႂႃႇဢိတ်းၼိုင်ႈလႄႈ ၸင်ႇဢမ်ႇထူပ်းၺႃး ပီႈၸၢႆးၶိူဝ်းယဝ်ႉ၊ ယွၼ်ႉပိူဝ်ႈသင်လႄႈ မူဝ်ၶဝ်သမ်ႉႁူႉဝႃႈ ပီႈၸၢႆးၶိူဝ်းမႃးၵိၼ် ၶဝ်ႈသွႆးၼႆတႄႉ ၽွင်းမိူဝ်ႈ မူဝ်ၶဝ်ပၼ်ၵႃႈၶဝ်ႈသွႆးၼၼ်ႉ မူဝ်ဝႃႈတီႈပႃႈၶၢႆၶဝ်ႈသွႆး“ယႃႇပေတုမ်ႉငိုၼ်းၽိတ်းၼႃႈ”ၼႆလႄႈ ပႃႈၶဝ်ႈသွႆးၼၼ်ႉ ၸင်ႇလၢတ်ႈၼႄ လွင်ႈဢၼ်ပီႈၸၢႆးၶိူဝ်းမႃးၵိၼ်ယဝ်ႉသေ လုၵ်ႉၵႂႃႇၵူၺ်းၼႆလႄႈ မူဝ်လႄႈၸၢမ်သႅင်းယင်းၶိုၼ်းပူၼ်ႉတူၺ်း တီႈတႃႈၵႃးလွႆလႅမ်ၵွၼ်ႇယဝ်ႉ၊ ၵူၺ်းၵႃႈ ဢမ်ႇတၼ်းၶိုတ်း ပီႈၸၢႆးၶိူဝ်းၶဝ်လႄႈ မူဝ်ၶဝ် လႆႈႁိူဝ်ႉၵႂႃႇတႄႉတႄႉပီႈၸၢႆးၶိူဝ်း။
ထႅင်ႈလွင်ႈၼိုင်ႈ ... ပေႃးဝႃႈၶႅပ်းႁၢင်ႈ ဢၼ်မူဝ်ၶဝ်ထႆႇဝႆႉၼၼ်ႉ ပေႃးလႆႈၼႆ ၶႅၼ်းတေႃႈ သူင်ႇပၼ်မႃးၽႂ်းၽႂ်းလႄႈၼႃႈ မူဝ်ၶဝ် မွင်းပႂ်ႉၶႂ်ႈႁၼ်ၼႅၼ်ႇယဝ်ႉလႄႈ မၢင်ပွၵ်ႈယင်းၼွၼ်းၾၼ်ႁၼ် ၼႂ်းၾၼ်ၵွၼ်ႇယဝ်ႉ။
ႁႂ်ႈၵတ်းယဵၼ်ၸႂ် မိူၼ်ၼမ်ႉတိုင်းသႂ်သေၵမ်း
မူဝ် (တူၼ်ႈတီး)
ၸၢႆးမွၼ်းၶိူဝ်း လူတူၺ်းလိၵ်ႈၼၼ်ႉယဝ်ႉသေ မၼ်းပဵၼ်ဢၼ်သိူဝ်းၸႂ်ၵႂႃႇတႄႉတႄႉ... ပီႈၼၢင်းမၼ်း ၼၢင်းသႅင်လၢဝ် ၸင်ႇႁၼ်မၼ်းသေ ၸင်ႇမႃးထၢမ်ဝႃႈ
“ၼွင်ႉၸၢႆးႁဵတ်းသင် ပႄႉယုမ်ႉပေႃးပဵၼ်တၢၼ်ႇၼႆႉလႃႇ မီးလွင်ႈတုမ်ႉၸႂ်သင် ပဵၼ်လိၵ်ႈၽႂ်ပၼ်မႃးၼၼ်ႉ လိၵ်ႈၶဵဝ်ၼွင်ႉ ၸၢႆးႁႃႉ”
“ဢမ်ႇၸႂ်ႈၵူၺ်း ... ပီႈသႅင်လၢဝ် ... လိၵ်ႈတႆးၵေႃႉတူၼ်ႈတီး ပၼ်မႃးဢိူဝ်ႈ ပေႃးဢမ်ႇယုမ်ႇၵေႃႈ တူၺ်းလႄႈ”
“ႁိူဝ်ႇ ... သမ်ႉပဵၼ်တႆးၵေႃႉၼၢင်းယိင်းဢဝ်လႃႇ”
“ဢႃ ... ပီႈသႅင်လၢဝ်ၼႆႉ ၼွင်ႉၸၢႆးၶဝ်တိုၵ်ႉႁႃမိုတ်ႈၵူၺ်း ဢိူဝ်ႈ”
“ၸင်ႇႁႃမိုတ်ႈၵၼ်ၵူၺ်းၼႆႁႃႉ ... ၼႂ်းလိၵ်ႈၼႆႉတႅမ်ႈဝႆႉ တႄႉ ဢၢပ်ႈမိုတ်ႈၵၼ်ႁႅင်းတႄႉတႄႉယဝ်ႉ၊ တူၺ်းလေႃႇ မၼ်းတႅမ်ႈမႃးၵေႃႈ သမ်ႉဝႃႈ“မူဝ်”ၼႆဝႃႇ သမ်ႉႁွင်ႉၼွင်ႉၸၢႆးဝႃႈ “ပီႈၸၢႆးၶိူဝ်း” ၼႆတႄႉ မိူဝ်းၼႃႈမႃးတႄႉ တေၸၢင်ႈၶိူဝ်းယူႇယူဝ်ႉ ၼွင်ႉၸၢႆး”
“ဢူဝ် ... ပီႈသႅင်လၢဝ် လႃႈလီဝႃႈ”
ၸၢႆးမွၼ်းၶိူဝ်းၶဝ် မီးပီႈၼွင်ႉသၢမ်ၵေႃႉသေ မၼ်းပဵၼ် ၵေႃႉလဵၵ်ႉသေပိူၼ်ႈယဝ်ႉ။ ၽၢႆႇၼိူဝ်မၼ်းၼႆႉ မီးပီႈၼၢင်းၶဝ် ၼၢင်း သႅင်လၢဝ်သေ ပီႈဢၢႆႈလူင်ၶဝ်တႄႉ ပဵၼ်ၸၢႆးမွၼ်းၶမ်းယဝ်ႉ၊ ပီႈဢၢႆႈ ပီႈၼၢင်းမၼ်းတႄႉ တႄႇၼႃႈႁိူၼ်းမီးဝႆႉ လုၵ်ႈၸၢႆးဢွၼ်ႇၵေႃႉၼိုင်ႈယဝ်ႉ၊ ၽွင်းၶႃသွင်ၵေႃႉပီႈၼွင်ႉ တိုၵ်ႉလၢတ်ႈတေႃႇၵၼ်ယူႇၼၼ်ႉ ပီႈဢၢႆႈလူင်ၶဝ် ၸၢႆးမွၼ်းၶမ်း ၽႅဝ်မႃးသေ ၸင်ႇမႃးဝႃႈ
“ၶိူဝ်သွင်ၵေႃႉ ပီႈၼွင်ႉဝႃႈသင်တီႈၵၼ်ၼႆႉ”
“ဢေႃႈ ... ၼွင်ႉပႂ်ႉႁဝ်းတီႈတူၼ်ႈတီး သႂ်ႇလိၵ်ႈမႃးတီႈ ၼွင်ႉၸၢႆးႁဝ်းဝႃႇ ပီႈၸၢႆးမွၼ်းၶမ်း”
“တႄႉႁႃႉ ... ၸွင်ႇႁၢင်ႈလီ ... ဢၢႆႈၼွင်ႉ”
“ဢႃ ... ပီႈဢၢႆလူင်ၼႆႉၵေႃႈ ပီႈသႅင်လၢဝ်လႃႈလီဝႃႈဢိူဝ်ႈ ဢမ်ႇၸႂ်ႈသင်”
ၽွင်းၼၼ် ၵူၼ်းမႃးသူင်ႇၶႅပ်းႁၢင်ႈ ဢဝ်ၶႅပ်းႁၢင်ႈ ဢၼ်ၸၢႆးမွၼ်းၶိူဝ်းၸႂ်ႉသုၵ်ႈၼၼ်ႉ မႃးသူင်ႇပၼ်ယဝ်ႉ မၼ်းၸင်ႇဝႃႈ
“ၸၢႆးမွၼ်းၶိူဝ်း ... ၵဝ်မႃးသူင်ႇၶႅပ်းႁၢင်ႈမႂ်းဢိူဝ်ႈ ဢႃႉ... ဢၼ်မႂ်းထႆႇပၼ်ၼႆႉ ၶႅမ်ႉၵူႈဢၼ်ယဝ်ႉ၊ ဢေႃႈ ဢၼ်မႂ်းထႆႇပၼ်ၼၼ်ႉ ပဵၼ်ၵူၼ်းတီႈလႂ်ဢေႉ ... ပဵၼ်သၢဝ်မႂ်းႁႃႉ”
“ဢႃ ... မႃးဝႃႈထႅင်ႈၵေႃႉၼိုင်ႈယဝ်ႉ”
ပီႈဢၢႆႈပီႈၼၢင်းမၼ်း ဢွၼ်ၵၼ်ၸူမ်းၶူဝ်ယူႇ ၸၢႆးမွၼ်းၶမ်း ၸင်ႇဝႃႈ
“ပၼ်ႁဝ်း ယွၼ်းတူၺ်းၽွင်ႈလူး ဢၢႆႈၼွင်ႉ”
ဝၢႆးသေၵူၼ်းသူင်ႇၶႅပ်းႁၢင်ႈမိူဝ်းၵႂႃႇ ၶဝ်ၵေႃႈ ဢွၼ်ၵၼ်မႃး ၼင်ႈၼႂ်းႁွင်ႈၶႅၵ်ႇသေ မႃးလွမ်တူၺ်းၶႅပ်းႁၢင်ႈၸိူဝ်းၼၼ်ႉယူႇ ၼၢင်းသႅင်လၢဝ် လႆႈႁၼ် ၶႅပ်းႁၢင်ႈၼၢင်းမူဝ်ၶၢဝ် ပဵၼ်ဢၼ်ႁၢင်ႈလီတႄႉ တႄႉလႄႈ မၼ်းၸင်ႇယိပ်းၶႅပ်းႁၢင်ႈသေထၢမ်ဝႃႈ
“ၼွင်ႉၸၢႆး ... မူဝ် ဢၼ်ဝႃႈၼၼ်ႉ ပဵၼ်ၵေႃႉၼႆႉႁႃႉ”
“ၸႂ်ႈဢိူဝ်ႈ ပီႈသႅင်လၢဝ်”
“ဢႃႉ ... လႅတ်းၵျႃႉၼႆႉ ၼွင်ႉၸၢႆးတေႃႈ ၶိုင်လီလီလႃႈ ပီႈတႄႉၽွမ်ႉၵမ်းလဵဝ်ယဝ်ႉ”
ၸၢႆးမွၼ်းၶမ်းၸင်ႇယွၼ်းတူၺ်း
“မီးလႂ် ပၼ်ပီႈၸၢႆးတူၺ်းၽွင်ႈလူး ႁႄး ႁႄး ႁၢင်ႈလီတႄႉ ဢိူဝ်ႈၼႆႉ ၼွင်ႉၸၢႆးၶႂ်ႈမေႃႁႃဝႆႉၼင်ႇၵဝ်ႇၼႆႉ ၵႂႃႇႁဵတ်းႁိုဝ်ၺႃးၵၼ် တီႈလႂ်ၼႆ ၶႆႈၼႄပီႈၸၢႆးၶဝ်ငိူၼ်ႈမၼ်းလူး”
“ဢူဝ် ... ပီႈဢၢႆႈပီႈၼၢင်းၶဝ်ၼႆႉ တူၺ်းၶႅပ်းႁၢင်ႈၼႆၵေႃႈ တူၺ်းလီလီၵေႃႈဢမ်ႇၸႂ်ႈ ... ၵုမ်ႇမေႃးယူႇဝႃႇ”
ၼၢင်းသႅင်လၢဝ် ၸင်ႇၶိုၼ်းထၢမ်
“ၵေႃႉၼႆႉလူး ပဵၼ်ၽႂ်ၼႆႉ”
“ပဵၼ်တႆးၵေႃႉၼၢင်းမူဝ်ဢိူဝ်ႈ ၼၢင်းၸၢမ်သႅင်းၼႆဝႃႈ”
“ၵေႃႉၼႆႉၵေႃႈႁၢင်ႈလီၼင်ႇၵဝ်ႇယဝ်ႉ ပေႃးဢဝ်ပီႈၼၢင်း ဝႃႈတႄႉ ၼၢင်းမူဝ်ၼႆႉ လီႁၵ်ႉသေပိူၼ်ႈယဝ်ႉ ဢမ်ႇၸႂ်ႈႁႃႉၼွင်ႉ ၸၢႆး”
ၸၢႆးမွၼ်းၶိူဝ်းၵေႃႈ ၵႂင်ၵႂႃႇသေ တွပ်ႇဝႃႈ
“ၸႂ်ႈဢိူဝ်ႈ ... ဢႃ ... ၽႂ်တေႁူႉ”
“ၶိၵ်း ၶိၵ်း ၼွင်ႉၸၢႆးႁူႉယူႇသေ ႁဵတ်းၵဵင်ႈဢမ်ႇႁူႉယူဝ်ႉ”
ၸၢႆးမွၼ်းၶမ်း ၸင်ႇဢဝ်ၶႅပ်းႁၢင်ႈဢၼ်ၶဝ်ထႆႇ တီႈၼမ်ႉဢုၼ်ႇၼၼ်ႉသေ ထၢမ်
“ၼႆႉပဵၼ်တီႈလႂ်ၼႆႉ ဢၢႆႈၼွင်ႉ”
“ဢေႃႈ ... ပဵၼ်တီႈၼမ်ႉဢုၼ်ႇဢိူဝ်ႈ ပီႈဢၢႆႈ”
“ၶႅမ်ႉဝႆႉၼင်ႇၵဝ်ႇၼေႃ ... ဢိူဝ်ႈ ... ဢၼ်ဢၢႆႈၼွင်ႉထႆႇ ပၼ်ၼႆႉ ၶႅမ်ႉၵူႈၶႅပ်းယဝ်ႉၼႆႉ၊ ပေႃးပဵၼ်ၼႆတႄႉ တေမီးတၢင်းၶိုၼ်ႈယႂ်ႇၼမ်တႄႉတႄႉယူႇ ... ၶတ်းၸႂ်လႄႈၼႃႈ ဝၢႆးၼႆႉယူဝ်ၶႄးတေပူၼ်ႉ ပီႈၸၢႆးၵႂႃႇၵွၼ်ႇၵႂႃႈ”
“ဢမ်ႇပူၼ်ႉလႆႈသႄႈ ... လွင်ႈထႆႇႁၢင်ႈၼႆႉတႄႉ သုမ်းပီႈ ဢၢႆႈမူတ်းယဝ်ႉ”
ၸၢႆးမွၼ်းၶမ်းၼႆႉ မၼ်းပဵၼ်ၵူၼ်းမေႃထႆႇႁၢင်ႈ ၸိုဝ်ႈသဵင်လိုဝ်း ၸိုဝ်ႈသဵင်ယႂ်ႇၵေႃႉၼိုင်ႈသေ မၼ်းၽုၺ်ႇသႅင်ႇထႆႇႁၢင်ႈဝႆႉယဝ်ႉ။ ဝၢႆးသေ ၶဝ်တူၺ်းၶႅပ်းႁၢင်ႈၸိူဝ်းၼၼ်ႉယဝ်ႉမူတ်း ၸၢႆးမွၼ်းၶိူဝ်း ဢဝ်မႃးၼႂ်းလုၵ်းၶၢၼ်းၼွၼ်းမၼ်းသေ မႃးတူၺ်းလီလီငၢမ်းငၢမ်း မၼ်းၶိုၼ်းသိုပ်ႇၶိုင် တႃႇတေသူင်ႇပၼ် ၼၢင်းမူဝ်ၶၢဝ်ၶဝ် ၵမ်းလဵဝ်ယူႇယဝ်ႉ။