ပပ်ႉႁဵၼ်း ၾိင်ႈပိူင်ပၢၼ်မႂ်ႇ ပုၼ်ႈတႃႇၵူၼ်းမိူင်းတႆး/လွင်ႈၵႂႃႇပႆ

ၶေႃႈပွၼ်ႈၸႂ်

ၵူၼ်းႁဝ်းတေတိတ်းတေႃႇၵပ်းသိုပ်ႇၵၼ်လႄႈသင် ႁဵတ်းသၢင်ႈၵၢၼ်ငၢၼ်းလႄႈသင်၊ ယူႇတီႈလဵဝ်ဢမ်ႇလႆႈ၊ လူဝ်ႇလႆႈၵႂႃႇလႆႈပႆ။ ၵႂႃႇပႆဢၼ်ဝႃႈၼႆႉ ဢမ်ႇၸႂ်ႈလိူင်ႈလဵၵ်ႉ။ “ၵိၼ်ဢမ်ႇထုၵ်ႇၼိုင်ႈၵမ်း ၵႂႃႇဢမ်ႇထုၵ်ႇၼိုင်ႈယၢင်ႈ” ၼႆၼၼ်ႉလႄႈ လွင်ႈၵႂႃႇပႆၼႆႉၵူၼ်းႁဝ်းဢမ်ႇလီဝႆႉမဝ်မၢင်။

လၢႆးႁဵတ်းလၢႆးသၢင်ႈ

ၶိူင်ႈဢၼ်ၵူၼ်းႁဝ်းၸႂ်ႉတိုဝ်း တႃႇၵႂႃႇတႃႈပႆတၢင်းၼၼ်ႉ မီးလေႃႉ၊ ႁိူဝ်းမိၼ်၊ သတ်းၶီႇ၊ သတ်းတၢင်ႇ ၸိူဝ်းၼႆႉယဝ်ႉ။ တီႈတေၸႂ်ႉမဵဝ်းလႂ်ၵေႃႈ လူဝ်ႇၾၢင်ႉသတိ တႃႇလွတ်ႈၽေးဢွၼ်တၢင်း။ ၵွပ်ႈၼႆ ၵႂႃႇတႃႈပႆတၢင်းၼႆႉ ဢမ်ႇဝႃႈပႆလိၼ်ၶီႇၵႃး လူဝ်ႇႁူႉပၵ်းပိူင်သဵၼ်ႈတႃႈသၢႆတၢင်း၊ တွၼ်ႈလႂ်တႃႇပႆလိၼ် တွၼ်ႈလႂ်တႃႇၸႂ်ႉၶိူင်ႈလူတ်ႉ။ တီႈလႂ်လူဝ်ႇႁေႃႈထိူင်း ၶူဝ်တင်းၼႃႈၶၢမ်ႇၼမ်ႉၼၵ်းလႆႈၵႃႈႁိုဝ်?။ တင်ႈဢဝ်ၸဵမ်ၸိူဝ်းၼႆႉၵႂႃႇ။
ပေႃးပႆတၢင်း တေလႆႈပႆယဵၼ်ႇငႄႈလီငၢမ်း၊ ၼၢင်းယိင်းပေႃးတေၵဵပ်းၶူဝ်းၶွင် ဢၼ်တူၵ်းၼိူဝ်ပိုၼ်ႉလိၼ်ၼၼ်ႉ ဢမ်လီၸုၵ်းသေၵဵပ်း၊ ႁႂ်ႈၼင်ႈလူင်းသေၵဵပ်း။

ပႆၸွမ်းတၢင်းလႄႈ ၵႄႈၵူၼ်းၼမ် ဢမ်ႇလီလုတ်ႇလႅၼ်းယႃႈ၊ ၸၢင်ႈႁဵတ်းႁႂ်ႈပိူၼ်ႈမဵၼ်လႄႈ ဢၢႆၵႂၢၼ်းလႅၼ်းယႃႈ ၸပ်းပိူၼ်ႈလႆႈတၢင်းပဵၼ်၊ ၸၢင်ႈပဵၼ်ၽေးတေႃႇပိူၼ်ႈၵူၼ်းႁိမ်းႁွမ်း။

သင်ဝႃႈႁဝ်းလႆႈၼင်ႈၵႂႃႇၼိူဝ်လူတ်ႉသေ မီးၼၢင်းယိင်းလုၵ်ႈဢွၼ်ႇၵူၼ်းထဝ်ႈၶဝ် လႆႈၸုၵ်းယူႇၸိုင် ႁဝ်းထုၵ်ႇလီလႆႈလုၵ်ႉပၼ် ႁႂ်ႈပိူၼ်ႈလႆႈၼင်ႈ။
ၼင်ႇႁိုဝ်ပေႃးတေႁူႉၶိူင်ႈမၢႆ သဵၼ်ႈတႃႈသၢႆတၢင်းသေ ႁဵတ်းၸွမ်းလႆႈၽဵၼ်ႈၽဵၼ်ႈၼၼ်ႉ တေလႆႈ သွၼ်တီႈႁူင်ႈႁဵၼ်းၵူၺ်းဢမ်ႇၵႃး လီပိုတ်ႇပၢင်သွၼ်ပၼ်တႃႇၼႂ်းပွၵ်ႉၼႂ်းဝၢၼ်ႈ။
သဵၼ်ႈတႃႈသၢႆတၢင်းၵူၼ်းၵႂႃႇပႆၼၼ်ႉ ၵူၼ်းၵူႈၵေႃႉမီးပုၼ်ႈၽွၼ်း တႃႇတေႁဵတ်းႁႂ်ႈမၼ်းပဵၼ် သဵၼ်ႈတၢင်းလီလွတ်ႈၽေး။ ပေႃးမီးတေႃ လူဝ်ႇၶုတ်းပႅတ်ႈ။ မီးလုၵ်းလူဝ်ႇထူမ်ပႅတ်ႈ။ ၵူႈၵေႃႉလီ ဢွၼ်ၵၼ်ၸွႆႈလုမ်းလႃးလႄႈ ၶႂၢၵ်ႈယႂ်ႇႁႂ်ႈတၢင်းလီသေၵဝ်ႇ။ ပေႃးမီးႁွင်ႈၼမ်ႉၼမ်ႉႁိမ်းတၢင်းၵေႃႈ လူဝ်ႇမေႃလုမ်းလႃး ႁႂ်ႈၼမ်ႇၸၢင်ႈလႆၵႂႃႇလႆႈလီလီ၊ ယႃႇႁႂ်ႈ ထူမ်ႈတၢင်းယႃႉတၢင်း။ ပေႃးၼမ်ႉၶၢမ်ႈတၢင်းၵေႃႈ လူဝ်ႇၸွႆႈၵၼ်ႁဵတ်းၶူဝ်ပၼ်။ ပဵၼ်ၵၢၼ်ၵူၼ်း တင်းၼမ်လူဝ်ႇလႆႈၽွမ်ႉၵၼ်ၼႄၼမ်ႉၸႂ်ယဝ်ႉ။

ၶေႃႈထၢမ်

ၵဵဝ်ႇလူၺ်ႈ လွင်ႈၵႂႃႇပႆၼႆႉ မီးလၢႆးၵႂႃႇပႆၸိူင်ႉႁိူဝ်လွၼ်ႉလွၼ်ႉ? (ပႆတၢင်းၶီႇလေႃႉၸဵမ်ၸိူဝ်းၼႆႉၵႂႃႇ)
ၼႂ်းၵႃႈလၢႆးၵႂႃႇပႆၸိူဝ်းၼၼ်ႉ ၸဝ်ႈၵဝ်ႇမေႃဝႆႉဢၼ်လႂ်?၊ ဢၼ်မေႃထႅင်ႈမဵဝ်းလႂ်လၢႆလၢႆ?
ပႅၵ်ႉသမ်ႉဝႃႈတမ်းဝႆႉပၵ်းပိူင်ၵေႃႈ လွင်ႈၵႃးလူတ်ႉၽႃႇၵူၼ်းတၢႆ ၼႂ်းၶူးယႂ်ႇဝဵင်းလူင်ၶဝ်ၼႆႉမီးယူႇ ၵူႈမိုဝ်ႉၵူႈဝၼ်း၊ လွင်ႈၼႆႉပဵၼ်ယွၼ်ႉသင်?။ လွင်ႈၼႆႉ တေၸၢင်ႈၵႅတ်ႇၶႄႁႄႉၵင်ႈလႆႈၸိူင်ႉႁိုဝ်? တွပ်ႇၵႄႈတူၺ်းတႃႉ။