ပပ်ႉၵႅမ်မိုဝ်းယေႃးၵီႇ/ပၢၵ်ႈၼႄလွင်ႈၵျၢင်ႉထမ်း
ယေႃးၵီတင်းၼမ်၊ လဝ်ႇပႅင်းၵမ်၊ ၵႂၢမ်းယမ်သြႃႇပၢၵ်ႈ။
ၼႂ်းတူဝ်ၼႆႉၸိုင်၊ တူင်ႉတွတ်ႇၼိုင်၊ ၺၢၼ်ႇထိုင်တၵ်းတူၵ်းသၢၵ်ႈ။
ယၵ်ႉယူႇႁိုင်ႁိုင်၊ ယႃႇပေၼိုင်၊ ၸဵဝ်းထိုင်တီႈၽူဝ်ႇမၢၵ်ႈ။
ၵုမ်ႇၽိုၼ်ႉၵုမ်ႇၼိုင်၊ ပေႃးၼႆၸိုင်၊ ၶမ်ႁိုင်ၼႂ်းတုၵ်ႉယၢၵ်ႈ။
ၸဵပ်းမႃးၵႃႈႁိုဝ်၊ ယိူၼ်ႉၸႂ်ထိုဝ်၊ ၼႃထိုဝ်ၶၼ်ႇထီႇၽၢၵ်ႈ။
ပေႃးႁဵတ်းပွင်ပႅင်၊ လႆႈၶိုၼ်းၼႅင်၊ ထမ်းသႅင်ဢမ်ႇမႃးသၢၵ်ႈ။
ဝေႇတၼႃႇၽုတ်းပၼ်၊ ၺၢၼ်ႇထူပ်းႁၼ်၊ ဝႆးၶၼ်ပဵၼ်လူႉငၢၵ်ႈ။
ယေႃးၵီႇမေႃမႄ၊ ထၵ်းၽုတ်းၼႄ၊ ၵူဝ်ႁႄသွတ်ႉသႅတ်ႉထၢၵ်ႈ။
ၶတ်းၸႂ်ယၵ်ႉၼူၵ်ႇ၊ သတိတူၵ်ႇ၊ ၼႂ်းမူၵ်ႇတူဝ်တုၵ်ႉယၢၵ်ႈ။
ပဵၼ်လူႉပိင်းတူဝ်၊ ၺၢၼ်ႇဢွၼ်ႁူဝ်၊ ငိၼ်းၵူဝ်ၽူဝ်ႇမၢၵ်ႈ။
ပေႃးပဵၼ်လူႉသုတ်း၊ မၢၵ်ႈၺၢၼ်ႇၽုတ်း၊ တႅပ်းပုတ်းၵိလေႇႁၢၵ်ႈ။
တုၵ်ႉယၢၵ်ႈၽေးၶဵၼ်၊ ထၢတ်ႇယူတ်းယဵၼ်၊ ၵမ်းပဵၼ်ၸႂ်ၽူဝ်ႇမၢၵ်ႈ။
ၵတ်းယဵၼ်ငၢၼ်းငၢၼ်း၊ ၸႂ်သိူဝ်းလၢၼ်း၊ ထိုင်ၶၢၼ်းၺၢၼ်ႇႁွတ်ႈၽၢၵ်ႈ။
ပူင်တူဝ်ပူင်ၸႂ်၊ ၵျႃႉၸိုၼ်ႈသႂ်၊ ႁႂ်ၽႂ်ၶႂ်ႈဢုပ်ႇသၢၵ်ႈ။
ၸူမ်းလူင်ၸူမ်းလၢင်၊ ဢုပ်ႇပၢင်ပၢင်၊ တိုၼ်းၸၢင်လၢးၵဝ်ထၢၵ်ႈယဝ်ႉၼေႃး။